“Mudimu wenu mukole kawena patupu”
1 Lungenyi elu ludi lutukankamija bushuwa! Mudimu webe mukole uudi wenzela Yehowa ki ng’wa patupu to. (1 Kol. 15:58, NW) Kadi anjibi kuela meji mushindu utu bantu badishipa ne midimu mikole munkatshi mua mêba a bungi anu bua kulengeja nsombelu wabu peshi kuvudija mpetu! Badi mua kulonga tulasa tua bungi munkatshi mua bidimu bivule anyi kuenza mudimu bu bapika bua kupeta bintu bivulavula. Pabi, bua “bikondo bidi malu abatulukila,” kabakufika nansha ku dipeta bintu bivuabu bipatshila, peshi bidi mua kubenzeja bua kuitaba anu ku tshimfula muoyo bintu bikese menemene bidi bimueneka. Mudimu mukole wonso udibu benza udi ulua wa tshianana, bienza anu bu muntu ‘wipata lupepele.’ (Muam. 1:14; 9:11) Mbimpe menemene mutudi ne bivule bia kuenza mu mudimu umuepele udi kauyi wa patupu, udi ne difutu dimpe ditambe.
2 Mudimu udi ne mushinga menemene: Kuyisha lumu luimpe lua Bukalenge bua Nzambi mmudimu wa mushinga mukole menemene pa buloba apa. Mmudimu utudi ne bua kuenza nansha bantu bateleja anyi kabayi bateleja. Mbimpe tuetu kufika petu ku diamba anu bu Paulo ne: “Ndi mbingishibua ku mashi a bantu bonso. Tshiakatshina bua kunuambila malu onso adi Nzambi musue.”—Bien. 20:26, 27.
3 Tutu tumvua disanka dia dikema padi bantu bateleja ne banyisha mukenji wa Bukalenge! Tshilejilu, nsongakaji kampanda wakafuisha mamuende mukuabu. Nanku wakashala udikonka bua kumanya kuvua mamuende mukuabu eu muye: mmu diulu anyi peshi mmu inferno? Wakatela dîna dia Yehowa pavuaye usambila Nzambi bua kumulomba diambuluisha, anu bu muvuabu bamulongeshe kudi muanabu wa bakaji. Pashishe wakabanga kulonga Bible ne kubuela mu bisangilu bia bena Kristo. Wakatuadija kumona malu munga mushindu ne kukosaye makasa kudi ba-bandi bavuaye mudie nabu bulunda. Nsongakaji eu wakalekela dinua dia makanya ne diamba, kufikayi too ne ku dilekela buivi. Udi wamba ne: “Dinanga Yehowa ke diakandekesha nsombelu mubi wa mushindu’eu. Bua luse luvule lutuye nalu, anu Yehowa ke uvua mua kumpesha ditekemena dia muoyo wa kashidi.” Katshitu ujimija kabidi dîba diende bua kuipatshila malu a tshianana nansha.
4 Nansha padi bantu babenga mua kuteleja, tshidiku udi anu ukumbaja mudimu udi ne mushinga. Mu mitu muabu mbamanye ne: Bantemu ba Yehowa bavua balue kubatangila. Kuenza nunku kudi kujadika muudi ne muoyo-mutoke, lulamatu, kabidi ne dinanga. Mpindieu udi wela meji ne: mudimu webe mukole uudi wenzela Mukalenge ng’wa patupu anyi? Tòo!