Ndongamu mupiamupia wa mpuilu wa pa buende wa dituku dimue

“Ikalayi bantu bakole ku ngelelu wenu wa meji.” Ke tshiena-bualu tshia mpuilu wa pa buende wa dituku dimue watuadija kubangila mu ngondo wa tshitema wa tshidimu etshi. (1 Kol. 14:20, Muanda Mulenga Lelu) Bua tshinyi tudi ne bua kubuelamu? Bualu buloba mbuwule tente ne malu mabi. Bua kubenga kupona mu malu aa, tudi ne bua kukolesha ngelelu wetu wa meji wa mu nyuma bua tuamona mua kuenza malu mimpe adi mua kutshimuna malu mabi. Ke tshiatuambuluisha mpuilu wa pa buende wa dituku dimue eu.

Mu tshitupa tshia kumpala, mutangidi wa tshijengu neenze muyuki eu: “Bintu bidi bituambuluisha bua kulua bantu bakole mu ngumvuilu wa Bible.” Neatuleje mushindu utudi mua kushindama mu ditabuja. Ngamba-malu walua kutuendela buenyi yeye nealeje mushindu udi ditumikila dia mêyi a mu Bible dikale ne mushinga mukole ne mudidi mua kulengeja ngumvuilu wetu, dîba dienzaye muyuki udi ne tshiena-bualu etshi ne: “Longeshayi biumvuilu bienu bua kulama makanda enu a mu nyuma.”

Bansonga pabu badi ne bua kukolesha ngelelu wabu wa meji. Nebumvuije muanda eu mu miyuki eyi: “Bua tshinyi tudi ne bua kuikala bu bana batekete bua bidi bitangila bubi” ne “Bansonga badi bapeta lungenyi mpindieu.” Telejayi bansonga balonda mushindu utubu benza bua kudikolesha mu nyuma bua kabafiki ku didibueja mu malu mabi a panu ne kuepuka bimvundu.

Ntshinyi tshitudi ne bua kuenza bua kupeta disanka dia bungi menemene mu nsombelu wetu? Ngamba-malu walua kutuendela buenyi neumvuije muanda eu mu muyuki wa ndekelu eu ne: “Ditumikila mêyi a mu Bible ne lungenyi dinupeteshe disanka.” Neafile bilejilu bua kumvuija ne: ditumikila Dîyi dia Nzambi didi dituambuluisha bua kumanya tshia kuenza patudi mu ntatu, dituambuluisha bua kuangata mapangadika ne tshitudi ne bua kuenza bua malu adi Yehowa utulongesha kutukuatshishawu.

Bana betu badi bajinga kuleja ne: mbadilambule kudi Nzambi ne mbasue kutambula mu mpuilu eu bua kuleja patoke bualu ebu badi ne bua kumanyisha mutangidi-muludiki pa lukasa. Diakamue padibu bamanyisha dituku dienzeka mpuilu wa pa buende wa dituku dimue eu, tudi tunulomba bua kuenza kamanyinu pa kalandriye kenu ne kudilongolola bua kanupangidi malu malenga adi mu ndongamu eu. Nubuelayi mu mpuilu wa pa buende wa dituku dimue eu yonso! Neanukoleshe bua kutantamena malu mabi adi mu buloba emu ne neanuambuluishe bua kushala balamate Yehowa.