Bisangilu bidi biambuluisha bansonga

¹ Mushikankunde kampanda wakamba ne: “Imue misangu ntu ngela meji ne: bansonga ke badi ne ntatu mipite bukole. Tudi munkatshi mua bantu badi benda bundumba, banua diamba ne bakuatshika maluvu.” Ke muutu pebe wela meji anyi? Bikalabi nanku, udi wela meji ne: ntshinyi tshiudi natshi dijinga bua wewe kuluisha malu mabi aa? Udi dijinga ne ditabuja, ditabuja dikole bua kutuishibua ne: njila ya Yehowa mmilenga, bualu diodi kadiyiku, “muntu kena mua kumusankisha.” (Eb. 11:6) Kubuela mu bisangilu bia tshisumbu nekukuambuluishe bua malu a Buena-Kristo kukutuilawu ne kabidi nekukoleshe dipangadika diudi muangate bua kuepuka malu adi mabi.

² Bisangilu nebikuambuluishe bikole: Ntshinyi tshitu tshienza bua tuikale ne disanka patudi tudia biakudia bishême ne balunda betu ba pa muoyo? Ki mbiakudia bimpe ebi kusangisha ne balunda ba disanka batudi nabu dîba edi ditudi tujikija lutetuku anyi? Eyowa, bisangilu bietu bitu bitupesha pabi disanka dia muomumue, kadi adi disanka diodi didi dia mu nyuma.

³ Malu adi atangila ntatu ya matuku onso ne makuabu adi atangila milayi ya dikema ya mu Bible adibu batulongesha mu bisangilu adi atukolesha mu nyuma. Badi batupesha mibelu mimpe idi itulongesha mua kuikala ne nsombelu mulenga ne kabidi ituleja mua kupita ne ntatu itudi tupeta. Balunda batudi tupeta mu bisangilu ke buobu menemene; ne disomba nabu didi ditusankisha ne ditukuba mu nyuma. (Mus. 133:1) Kabiena bikemesha bua muvua nsongakaji mukuabu muambe ne: “Dituku dijima dintu mu kalasa didi dinzengeja bikole. Kadi bisangilu bitu biobi anu bu muaba wa tshitalela mu tshipela, muaba undi mpetela bukole bua kumona mua kupitshisha bimpe dituku didi dilonda mu kalasa.” Mukuabu nsongakaji yeye wakamba ne: “Ndi mulue kumona se: kushemeja bulunda ne bantu badi banange Yehowa kudi kungambuluisha bua kushala mumulamate.”

⁴ Paudi udifundisha mu Kalasa ka Mudimu wa Teokrasi, udi ulonga mua kukebulula malu a mu Bible, kualongolola alue muyuki ne pashishe kuwenza kumpala kua bateleji mu Nzubu wa Bukalenge bienze bu udi uyikila ne muntu. Elabi meji ku tshiudi upeta padibu bakuleja mushindu wa kulongesha bimpe bulelela budi bupandisha bantu budi mu Dîyi dia Nzambi! Nkuepi kukuabu kudibu mua kulongesha bansonga bimpe mushindu’eu?

⁵ Mushindu udi bisangilu mua kutamba kutukuatshisha: Bua bisangilu kutambabi kutuambuluisha, kudi malu manene asatu atudi ne bua kulonda: Didilongolola, difila mandamuna ne ditumikila malu malonga.

⁶ Dilongolola bua bisangilu: Ikala pa tshibidilu ne dîba dia kuikala udilongolola bua bisangilu. Kulekedi midimu ya mu kalasa, tudimudimu tukese peshi amue malu autu wenza bua kujikija mukodi akudia dîba dionso diudi nadi dijinga bua kudianjila kudibadila malu alongeshabu mu tshisangilu tshionso. Mbimpe kutungunuka ne tshibidilu tshimpe etshi. Bualu bua kumpala ne bua mushinga wa bungi menemene, nkuikala ne tshibidilu tshia kulonda ndongamu wa dibala dia Bible dia ku lumingu luonso bua Kalasa ka Mudimu wa Teokrasi. Bidi bilomba anu minite mikese ku dituku bua kubala ne kuelangana meji bua nshapita mifila. Mbimpe kuikala ne dîba diudi mulongolole bua kulongolola Dilonga dia Mukanda dia Tshisumbu ne Dilonga dia Tshibumba tshia Nsentedi. Bamue batu badilongolola bua bisangilu ebi dituku dimue anyi abidi kumpala kua kuenzekabi. Padiku mushindu, enza bia muomumue ne dianjila kulongolola malu anuikala ne bua kulonga mu Tshisangilu tshia Mudimu tshia lumingu luonso.

⁷ Ikala ufila mandamuna mu bisangilu: Bible udi wamba ne: pavuaYezu ne bidimu 12, bakamusangana mu ntempelo, uteleja, wela nkonko ne ufila mandamuna. (Luka 2:46, 47) Mmuomumue ne: uvuamu ne lungenyi luende luonso. Bisangilu nebikukuatshishe bikole biwadienzeja bua kuikala kufilamu mandamuna.​—Nsu. 15:23.

⁸ Udi ne bua kushindamija lungenyi luebe pa malu adibu balongesha mu bisangilu. Imue misangu bitu bikole bua kuteleja muyuki kadi bikale bipepele bua kuwenza. Bua tshinyi? Bualu lungenyi luetu ludi mua kuikala lutua eku lutua eku padi muntu mukuabu wakula. Mmunyi muudi mua kuteka lungenyi luebe kaba kamue? Ikala ufunda tumue tualu. Funda malu manene adi mua kulua kukuambuluisha pashishe. Difunda malu manene aa nedikuambuluishe bua kushindamija lungenyi luebe pa malu adibu balongesha. Ikala kabidi ukeba mvese mu Bible webe ne ulonda ngamba-malu padiye wenda ubala mvese eyi.

⁹ Udifundile kabidi tshipatshila tshia kuikala kuandamuna mu bitupa bionso bia bisangilu mutubu bela bateleji nkonko. Nebikuambuluishe bikole biwikalaku wanji kuela meji bimpe bua tshiudi usua kuamba. Nsumuinu 15:28 udi wamba ne: “Mutshima wa muntu muakane udi welangana meji a bualu budiye mua kukudimuna.”

¹⁰ Tumikila malu audi ulonga: Bualu bua ndekelu nkujadika ne: malu audi ulonga ‘adi akuata mudimu munda muebe.’ (1 Tes. 2:13, MMM) Paudi utumikila malu malenga audi ulonga mu tshisangilu tshionso, neudiumvue pabuipi menemene ne Yehowa Nzambi. Neikale muntu mulelela ku mêsu kuebe, ne neupete disanka dia bungi bualu ‘udi wenda mu bulelela,’ ubumuenesha mu nsombelu webe.​—3 Yone 4, MMM.

¹¹ Bana betu batshidi bansonga, nuenu bikale ne tshibidilu tshia kudilongolola bua bisangilu, nufilamu mandamuna ne nutumikila malu anudi nulongamu, bisangilu nebinusankishe bikole. Kabidi nebinukuatshishe bikole mu nyuma. Nebikoleshe ditabuja dienu, bualu nenupangadije bua kushala balamate Yehowa, Tatu wenu wa mu diulu.​—Mus. 145:18.