Dibenesha dia Yehowa didi dituvuija babanji
1 Batu batamba kutua muntu mushinga anu pa kumona bungi bua makuta adiye nawu. Ke bua tshinyi bantu ba bungi batu bangata bena mfranga bu bantu ba diakalenga dipite dia bakuabu ne badi ne bionso. Kadi bantu badi bela meji ne: makuta adi mua kusumba disanka badi badishima. (Muam. 5:12) Bantu badi ‘basue kuikala babanji’ ne bintu bia bungi kabatu bapeta disanka dia mutantshi mule to. (1 Tim. 6:9) Kadi basadidi ba Yehowa badi ne disanka dia bushuwa, ne kabidi mbabanji kupita bakuabu bonso. (Nsu. 10:22; Buak. 2:9) Bua tshinyi tudi tuamba nanku?
2 Tshijadiki tshia bubanji butudi nabu: Tudi ne bujinguludi bua bungi bua malu a mu nyuma, ne kabidi tudi ne lungenyi lua malu a mu Mukanda wa Nzambi. Ku diambuluisha dia bulongolodi buende bua pa buloba, Yehowa utu utulongesha malu adi amutangila yeye ne Muanende, bua tuetu kupeta disanka dia kashidi. Lungenyi lujalame ludi lutupesha mushindu wa kusemena pabuipi ne Yehowa ne kudia nende malanda mashême. (Yak. 4:8) Kusunguluja tshidi tshimpe ne tshidi tshibi ne kulonda mikenji ya Nzambi kudi kutukuba ku amue masama ne ku njiwu. Tudi tueyemena Yehowa bamanye se: neatupeshe bitudi nabi dijinga, neatuambuluishe bua kusanka ne bitudi nabi ne bua kupeta ditalala dia mu mutshima.—Mat. 6:33.
3 Tudi ne ditalala ne tudi mu buobumue ne bana betu ba mu nyuma bualu tudi tudienzeja bua kumuenesha mamuma a nyuma wa Nzambi. Bu mudi dinanga dikole ditusuike pamue, katuena ne bua kudiumvua bu bantu badibu bapue muoyo kudi Nzambi anyi kudi bana betu padi dikenga ditukuata to.—Gal. 6:10.
4 Nsombelu wetu udi ne mushinga mulelela ne tudi bamanye bua tshinyi tudi ne muoyo. Buetu tuetu, kudifila mu mudimu wa diyisha lumu luimpe pa buloba bujima ndiakalengele dia dikema. Bidi bifila disanka didi dishala mutantshi mule bualu tudi tuambuluisha bakuetu bua kuikalabu pabu mu malanda mimpe ne Nzambi ne kukuatabu mudimu pamue netu mu buobumue mu ntendelelu mulelela. Mudimu wetu eu udi tshiûma tshia mushinga mukole; mmudimu udi upa Yehowa lumu ne utusankisha bua mutudi petu tuenza bua kutumbisha dîna diende. Tudi tulama lungenyi luimpe, bamanye se: ditekemena ditudi nadi bua matuku atshilualua nedikumbane mu katupa kîpi emu.
5 Tulejayi dianyisha: Tuikalayi tuanyisha anu kuanyisha mabenesha a Yehowa adi atuvuija bushuwa bantu babanji bapite bakuabu bonso panu pa buloba. (Nsu. 22:4) Patudi tudilamina dîba dituku dionso bua kuelangana meji bua bitudi nabi, nebitusake bua kuela Yehowa tuasakidila bua kalolo ne dinanga bidiye nabi ne kabidi nebituambuluishe bua kushala bamulamate amu yeye.