Mioyo ya bantu idi mu njiwu!

¹ Bible udi umvuija bimpe menemene se: Yehowa mmusue bua ‘bantu ba mishindu yonso basungidibue.’ Kadi, bidi kabidi bilelela se: tshidi mua kuenza bua bantu miliyare ne miliyare badi pa buloba kushala ne muoyo, mmushindu udibu bamona Yehowa Nzambi ne Bukalenge buende bulombola kudi Yezu Kristo. Mmuenenu muakanyine ng’eu udi muashila anu pa “dimanya dijalame dia bulelela.” (1 Tim. 2:3, 4, NW) Patudi eku tuenda tumanyisha bantu ne: mu katupa kîpi emu nebumbushe bubi buonso pa buloba bua kushila bukua-panu bupiabupia bua Nzambi bua buakane muaba, tudi kabidi ne mudimu wa mushinga mukole wa kupandisha mioyo ya bantu.​—Mat. 24:14; 28:19, 20; Lomo 10:13-15.

² Bua tshinyi tudi ne bua kuwenza lukasa? Yezu wakadimuija bantu bua bualu bua “dikenga dinene didi kadiyi dianji kufika katshia ku ntuadijilu wa buloba.” (Mat. 24:21, MMM) Dikenga adi neditue ku nkomenu wadi ku Armagedone. (Buak. 16:16) Mu bantu ba bungi badi mua kubutuka bikalabu babenge mua kulonda lumu luimpe mudi balela betu badi kabayi bena kuitabuja, bena mutumba, bena mudimu netu, balongi netu ne bamanyangana nabu. Kadi butudi nabu mbua kupetangana ne “bantu ba mishindu yonso” bua kuidikija Nzambi wakananga bantu bonso pa buloba e kufilaye Muanende, Yezu Kristo, bua kupikula bonso. (Yone 3:16) Tudi ne bua kudienzeja ne lukunukunu luonso bua kubikila bantu bonso bua banyemene ku muaba wa bukubi wa Nzambi. Patudi tuenza mudimu wa buambi ne muoyo mujima, tudi mua kuepuka dipia tshibawu tshia mashi.​—Yeh. 33:1-7; 1 Kol. 9:16.

³ Ntshipatshila kayi tshitudi natshi? Dîyi dia Nzambi didi dishindika mushinga wa mudimu wa buambi. Anu bu muakamba mupostolo Paulo, ‘dinanga dia Kristo didi dituenzeja’ bua kuikala ne nsombelu udi umvuangana ne njila ya Nzambi. (2 Kol. 5:14) Tshibumba tshia Nsentedi tshitu kabidi tshituleja misangu mivule ne: tudi ne bua kuyisha. Mudimu wetu wa Bukalenge utu utulombola misangu yonso pa mushindu wa kuenza mudimu wa buambi. Bakulu batu balongolola mudimu eu ne batukankamija bua tuetu kuwenza. Bamanyishi netu batu batubikila bua kupatuka nabu mu buambi. Tutu tuteleja mibelu ya bungi pa mushindu wa kulongolola malu atuayisha bantu, kufila bibejibeji ne mikanda mikuabu, kupinganyina bantu, kulonga ne bantu Bible ne kukeba mushindu wonso udi umueneka bua kuyisha. Bionso ebi bidi bituambuluisha bua kufika ku tshipatshila tshitudi natshi tshia kusungila mioyo ya bantu.​—1 Kol. 9:22, 23; Ef. 1:13.