Mushindu muakanyine wa kufila mikanda yetu

¹ Kukadi kupite ngondo ndambu katshia tuashintulula mushindu wa kufila mikanda yetu mu buambi: katuyi tulomba bantu bua kufutabu makuta. Ngenzelu eu udi wenda bimpe anyi? Luapolo yetu ya buambi idi ileja ne: tudi tuabanya mpindieu mikanda ya bungi, mikese ne minene. Nanku bantu ba bungi badi bapeta mushindu wa ‘kulua’ ne ‘kuangata mâyi a muoyo tshianana.’​—Buak. 22:17.

² Kadi nansha nanku, kabiena biumvuija ne: tudi ne bua kuikala tufila mikanda yetu tshifilafila kudi muntu kayi yonso kakuyi disungulula to, ne dijinga dietu mene kadiena nanku to. Anu mutu muntu yonso kayi ujinga bua kunyanga biende bintu bidiye nabi, bia muomumue mumanyishi yonso udi ne bujitu bua kuenza mudimu ne meji ne mikanda idi Société umupesha kayi umulomba dikuta, mikanda ituye upetela mu tshisumbu tshidiye. Ki mbua ne: bu mudi Société utuma mikanda bua bamanyishi bonso kayi utekemena bua bafute makuta, nanku katu utula dikuta nansha dimue bua diyipatula ne diyabanya to. Tuetu bonso tudi ne bua kumanya se: mikanda yetu idi ne mushinga wa bungi bua kuambuluisha bantu badi bakeba ne muoyo mujima bua kupeta dimanya dijalame dia Yehowa Nzambi ne Muanende, Yezu Kristo.​—Yone 17:3.

³ Kadi mmunyi mudi Société mua kufila mikanda kudi bantu bonso kayi uyilombela makuta? Nku diambuluisha dia mapa adi bantu bafila adi apingaja makuta atu anu atuka bua kuyipatula ne kuyabanya. Nangananga basadidi badilambule ba Yehowa ke badi bakuatshisha mudimu eu. Bantemu ba Yehowa kabena batekemena dikuatshisha dia kudi bantu bakuabu bua mudimu eu udi ubalomba bua kumanyisha Bukalenge ne mitalu nansha. Katshia katutu banji kuditua mu dilomba bantu makuta to, ne nansha mpindieu katuakuenza nanku to. Kadi, tudi tuanyisha mapa makese a bantu batudi tupetangana nabu mu buambi badi banange bulelela ne muoyo umue ne badi bikale bena dianyisha.

⁴ Mapa atudi tufila adi ambuluisha ku tshinyi? Tudi ne bua kuikala badiakaje bua kumvuija bimpe mu tshikoso ne: mapa adi bantu bafila ku budisuile ke adi akuatshisha mudimu wetu wa dilongesha Bible udi wenzeka pa buloba bujima. Makuta onso atudi tupeta, badi benza nawu mudimu bua kukumbaja mfranga ya bungi idi ituka bua kuenza mudimu wa buambi lelu’eu. Pa kumbusha dipatula mikanda anyi bintu bikuabu bia diabanya pa buloba bujima, Société utu utuula makuta bua kutangila malu a filiale, nzubu ya Betele, bua Tulasa tua Dilongesha Mudimu ne tua ba-misionere, bua kukuatshisha ba-misionere, batangidi bena-ngendu, depo ya mikanda, ne mikuabu midimu ya bungi idi yambuluisha bua kumona mua kuenza mudimu wonso udi Yezu muomekele bayidi bende.​—Mat. 24:14; 28:19, 20.

⁵ Didiunda dia katshia ne katshia didi dimueneka munkatshi mua bantu ba Yehowa didi disaka bena Kristo ba bungi ku didiebeja tshidibu pabu mua kuenza bua kuambuluisha. Bonso kabena amu ne mushindu wa kuambuluisha mu midimu ya diibaka dia nzubu ya filiale ne Nzubu ya Bukalenge anyi wa kuya mu matunga a kule kule bua kuditua mu mudimu wa dimanyisha lumu luimpe. Kadi bua kumonabu pabu mua kuambuluisha mu malu aa adi asankisha bilondeshile kabu kadibu naku, bamanyishi ba bungi pamue ne bena mu mêku abu batu ne tshibidilu tshia kuteka kantu ku luseke katubu bafila bua kukuatshisha mudimu wa pa buloba bujima. (Tangila 1 Kolinto 16:1, 2.) Kuenza nunku kudi kukuatshisha midimu yonso ya Société, kusangishamu ne ya diabanya dia mikanda. Muntu nansha umue kêna ne bua kuela meji ne: mapa a ku budisuile atudi tufila bua mudimu wa pa buloba bujima adi anu bua mfranga itu ituka bua mikanda to.

⁶ Tudi ne bua kudianjila kulongolola tshiena-bualu kampanda tshia mu Bible bua kuyikila ne bantu batudi tupeta mu mudimu wa ku nzubu ne ku nzubu anyi miaba mikuabu. Mukanda wa Comment raisonner à partir des Écritures (anyi kakanda ka Mua kutuadija ne kutungunuka ne mayuki pa Bible) udi ne ngenyi ya bungi mimpe ya kutuadija nayi mayuki kabidi ne biena-bualu bia mu Bible biakanyine. Peshi tudi mua kulonda ngenyi itubu bafila mu Mudimu wetu wa Bukalenge. Bilondeshile meji adi muntu uleja bua mukenji wa Bukalenge, mumanyishi ke udi ne bua kupangadija bua kufila anyi kubenga kufila mukanda. Padi muntu umueneka kayi mutambe kunanga bulelela ne kabiyi biakanyine kumupesha mukanda anyi tshintu tshikuabu, pamu’apa mbimpe ukoseshe diyuki ne bukalanga ne uye kudi munga muntu. Bumue, udi mua kumushila nansha trakte, pikalaye muitabe bua kumubala. Kupu muoyo bua kufunda dîna dia muntu yonso udi umueneka ujinga kumanya bulelela bua wamona mua kumupinganyina. Ke tshitudi mua kuenza kabidi patudi katuyi ne dîba dia bungi dia tuetu kuyikila mu bitulu ne muntu, imue misangu bualu tudi bamusangane ne midimu mikuabu ya bungi, anyi bualu tshikondo atshi ki ntshimpe buende yeye.

⁷ Ngenzelu muakanyine eu wa mushindu wa kuabanya mikanda udi wambuluisha muntu yonso bua kumona ne: mudimu wetu wa dilongesha Bible ki ng’wa bungenda nansha. Udi utuambuluisha kabidi bua kuikala kuteka pa muaba wa kumpala tshipatshila tshietu tshia kuyisha lumu luimpe lua Bukalenge ne kuvuija bantu bayidi ba Yezu Kristo. Bantemu ba Yehowa mbashilangane menemene ne bimue bitendelelu bitu bilomba “ka pa luse,” bualu badi basanka bua mudibu mua kufila mikanda yabu kudi bantu bonso kabayi batekemena dikuta kudibu. Katutu tuenda tusengelela bantu badi kabayi banyisha bushuwa mukenji utudi tuenda nawu bua batupeshe mapa bua mudimu eu muenza pa buloba bujima nansha. (Tangila Tshibumba tshia Nsentedi tshia dia 1 Tshisua-munene 1990, dibeji 22-23 [Mfual.].) Mapa onso nkong katuyi tumbusha dikuta nansha dimue, tudi tuangata bua kukuatshisha mudimu muenza pa buloba bujima wa dilongesha Bible, bualu bamanyishi bonso mbadisuile ne muntu nansha umue mu bulongolodi buetu kêna upeta difutu anyi makasa bua mudimu wende to.

⁸ Bilondeshile mutuasuminyina bua kualabaja mudimu wetu, mu dienza mudimu bimpe ne mikanda milenga ya Société eyi, Yehowa neatungunuke ne kutuyisha kumpala. Nansha tuetu muaba kayi, bantu badi muoyo usaka bua kumanya bulelela badi banyisha bikole patudi tubumvuija bimpe tshitudi tuenzela mudimu wetu eu ne basanka bua kufila pabu mapa a ku budisuile bua kuukuatshisha.