Imbilayi Yehowa misambu ya dimusamuna
“Lekela ngimbile Yehowa, bualu mmutambe kutumbishibua.”—EKESODE 15:1.
1. Mbikadilu ne ngikadilu kayi bia Yehowa bidi bitupetesha kabingila kempe ka kumusamuna?
MISANGU dikumi ne isatu mijima, Musambu wa 150 udi utuma dîyi bua kusamuna Yehowa anyi Yah. Mvese wa ndekelu udi wamba ne: “Tshintu tshionso tshidi tshieyela—tshisamuna Yah. Samunayi Yah, nuenu bantu!” Bu mutudi Bantemu ba Yehowa, tudi bamanye se: Yehowa muakanyine dimusamuna dietu. Udi Mfumu Munene udi ku mutu kua bionso, Mukalenge wa kashidi, Mutufuki wetu, Mutuenzedi wetu wa bilenga. Udi wa pa buende, ukena kufuanyikija mu nsombelu mivule. Udi muena dimanya ne bukole bikena ndekelu, mupuangane mu buakane ne udi tshimuenekelu mene tshia dinanga. Udi ku mutu kua bintu bionso bidi bimpe; mmulamatshi wa ku mikenji. (Luka 18:19; Buakabuluibua 15:3, 4) Yeye muakanyine dimusamuna dietu anyi? Bushuwa, udi menemene mudiakanyine!
2. Ntubingila kayi tutudi natu tudi tutusaka ku dileja dianyisha kudi Yehowa?
2 Katuen’anu mua kusamuna ne kutendelela Yehowa patupu, kadi kabidi, tudi ne bua kumuleja dianyisha dietu ne kumuela tuasakidila bua bionso bidiye mutuenzele. Udi Mufidi wa “dipa dionso dimpe ne tshintu tshionso tshipuangane.” (Yakobo 1:17) Udi Mushimi, Mpokolo wa muoyo wonso. (Musambu wa 36:9) Bintu bionso bidi bantu basanka nabi mbifumine kudiye, bualu yeye udi Mutufuki wetu Munene. (Yeshayi 42:5) Udi kabidi Mufidi wa mabenesha wonso a mu nyuma atudi tupeta ku diambuluisha dia spiritu wende, bulongolodi buende ne Dîyi diende. Mpekatu yetu mmilekedibue ku mulambu wa Muanende wakafilaye bu tshia-bupikudi tshietu. (Yone 3:16) Tudi ne ditekemena dia Bukalenge bua ‘mawulu mapiamapia ne buloba bupiabupia muikala buakane ne bua kuikala.’ (2 Petelo 3:13) Tudi bashemeje bulunda ne bena nkristo netu. (Lomo 1:11, 12) Tudi ne butumbi ne mabenesha bu mutudi Bantemu bende. (Yeshayi 43:10-12) Ne tudi ne disanka dia mpatshi dia kumusambila. (Matayi 6:9-13) Bushuwa, tudi ne tubingila tuvule bua kuela Yehowa tuasakidila!
Mishindu itudi mua kusamuna Yehowa
3. Mmu mishindu kayi kabukabu mutudi mua kusamuna Yehowa ne kumuleja dianyisha dietu?
3 Bu mutudi basadidi ba Yehowa baditshipe, mmunyi mutudi mua kumusamuna ne kumuleja dianyisha? Tudi mua kuenza nunku pa kudifila mu mudimu wa bena nkristo—kufila bumanyishi bua ku nzubu ne ku nzubu, kuenza makumbula mapiamapia, kulombola malonga a Bible, ne kufila bumanyishi bua mu misesu. Tudi kabidi mua kumusamuna pa kubabidila bikondo bionso bua kufila bumanyishi bua mu mpukapuka. Pashishe, tudi kabidi mua kusamuna Yehowa ku bibidilu bietu bia tshitembu, nansha kabidi ku mvuadilu wetu mupepele udi kayi mufuatuluke ne ku nkoselu wetu wa nsuki. Bantemu ba Yehowa badi misangu mivule batumbishibua bualu badi bafila tshilejilu tshimpe mu mianda eyi. Kabidi, tudi mua kusamuna Yehowa ne kumuela tuasakidila mu masambila.—Tangila 1 Kulondolola 29:10-13.
4. Ng’umue mushindu kayi wa ku mishindu mitambe bulenga itudi mua kusamuna Tatuetu munanga wa mu diulu?
4 Kupita apu, umue wa ku mishindu mitambe bulenga itudi mua kusamuna Tatuetu munanga wa mu diulu mpa kumutumbisha ne kusamuna ngikadilu yende ne misambu ya Mélodies du Royaume. Benji ne bimbi ba misambu bavule badi bapunga ku dîyi se: tshiombelu tshitambe bionso n’dîyi dia muntu. Bamanyi bapiluke ba mijiki klasike, badi bipatshila kufunda manaya mimba anu kudi biombelu, bualu kuteleja mudi dîyi dia muntu dijikuka mu musambu kudi kusankisha bikole.
5. Mbua tubingila kayi butudi ne bua kuangata misambu yetu ya Bukalenge ne mushinga muvule?
5 Mmushindu kayipu udi Yehowa usanka pa kuteleja misambu idi bantu bimba, nangananga padibu bimba misambu ya dimusamuna ne dimuleja dianyisha! Nenku, tudi ne bua kuangata ne mushinga munene ngimbilu wetu wa misambu yetu ya Bukalenge mu bisangilu bietu kabukabu—bisangilu bia mu tshisumbu, mpuilu ya tshijengu, mpuilu wa pa buende wa matuku bungi kampanda, mpuilu ya distrike, ne mpuilu ya bukua-matunga. Mukanda wetu wa misambu muwule tente ne misambu ya mfuekenke mimba ne biombelu, bulengele buayi badi misangu mivule babutumbisha kudi bantu ba pambelu. Patudi tudiina mu dimba misambu ya Bukalenge, tudi tusankisha bakuabo bantu ne tuyibabidila tuetu bine.
Dimba misambu ya disamuna Yehowa mu tshikondo tshitshivua Bible ufundibua
6. Mmunyi muakenza bena Izalele bua kuleja dianyisha bua dipikudibua diabu mu Mbuu Mukunze?
6 Dîyi dia Nzambi didi dituambila ne: Mozese ne bena Izalele bakimba misambu bua kusekelela ditshimuna bu muvuabu bapikudibue ku tshiluilu tshia Faraone mu Mbuu Mukunze. Musambu wabu wakatuadija ne mêyi aa: “Lekela ngimbile Yehowa, bualu mmutambe kutumbishibua. Tubalu ne batubandi mbabinyishe mu mbuu. Makanda ne bukole bianyi n’Yah, bualu udi usadila bu dipandishibua dianyi. Yeye eu ng’udi Nzambi wanyi, ne nemutumbishe.” (Ekesode 15:1, 2) Tudi mua kufuanyikija musangelu ne disanka bivua nabi bena Izalele pavuabo bimba ne mêyi aa kunyima kua dipikudibua diabu mu tshishima!
7. Mbimue bilejilu kayi bidi mu Mifundu ya tshiena-Ebelu bia disamuna Yehowa kudi bena Izalele pa kumuimbila misambu?
7 Mu 1 Kulondolola 16:1, 4-36, tudi tubala se: Yehowa uvua usamunyibua ku dimuimbila misambu ne mêyi ne biombelu pakalua Davidi ne Arke umbukila ku Yeruzaleme. Tshikondo atshi tshivua tshia disanka divule. Kuvua kabidi dimbila Yehowa misambu ya dimusamuna pamue ne biombelu, mu tshikondo tshiakabanjija Mukalenge Solomo ntempelu ku Yeruzaleme. Tudi tubala mu 2 Kulondolola 5:13, 14 mu Mukanda wa Nzambi ne: “Hakelabo mpungi kudi bena mpungi ne bimbi ba misambu diatshimue bua kutumbishabo ne bua kusadilabo Yehowa, ne hakimbabo ne mpungi ne biamu ne biombelu bia kutumbishabo n’abi Yehowa, bamba ne: Yeye udi muimpe, bualu bua luse luandi ludi lujalame tshiendelele, nsubu wakûla tente ne ditutu, nsubu wa Yehowa mene. Nunku bakuidi kabakamanya mua kuimana bua kuenzabo mudimu wabo bualu bua ditutu; bualu bua butumbi bua Yehowa buakûsha nsubu wa Nzambi tente.” Ntshinyi tshidibi bileja? Bidi bileja se: Yehowa uvua uteleja mêyi a biombelu a dimusamuna ne uvua kabidi ubisankidila, anu bu mudibi bilejibue ku ditutu dia mu tshishima. Ku shòò, bakayimba kudi bisumbu bibidi bia tu-ngimba tua mêyi matue mu tshikondo tshiakabanjijabu ngumbu ya Yeruzaleme mu matuku a Nehemiya.—Nehemiya 12:27-42.
8. Ntshinyi tshidi tshileja se: kuimba misambu kuvua kuangatshibua ne mushinga muvule kudi bena Izalele?
8 Bushuwa, kuimba kua mushindu’eu kuvua ne muaba munene mu ntendelelu uvua wenzekela mu ntempelu muvua bena Lewi 4 000 balamibue ku luseke bua mudimu wa mijiki. (1 Kulondolola 23:4, 5) Buobo aba, bavua bimba biombelu tshiapamue ne bimbi ba misambu. Mijiki, nangananga bimbi ba misambu, bavua ne muaba munene mu ntendelelu, ki ng’anu bua kulongesha malu manene a mu Mikenji, kadi bua kufila mmuenenu muakane bua ntendelelu. Yakambuluisha bena Izalele bua kutendelela Yehowa ne musangelu. Mona mushindu uvuabo badilongolola ne ntema ivuabo bateya ku muanda eu: “Bungi buabo busangisha ne bana babo bakadi bayishibue bua kuimbilabo Yehowa misambu, buonso bakadi ne tshimbidi tshiakane, bakadi nkama ibidi ne makumi muanda mukulu ne muanda mukulu.” (1 Kulondolola 25:7, Mukanda wa Nzambi) Mona muvuabo bangata misambu ya disamuna Yehowa ne mushinga. Bavua bibidijibue mu dimba misambu ne bavua bapiluke!
9. Mmushindu kayi udibu bazangika kuimba misambu mu Mifundu ya tshiena-Greke?
9 Tuyayi mpindieu mu siekele wa kumpala wa tshikondo tshietu etshi, ntshinyi tshitudi tusanganamu? Yezu, butuku bua dimupangila diende, ne mianda mivule mimunemene mu tshieledi tshiende tshia lungenyi, wakumvua dikengedibua dia kuela tshisala ku difesto diende dia Pasaka ne kubanjija Tshivulukilu tshia lufu luende pa kuimba misambu ya disamuna Yehowa. (Matayi 26:30) Kabidi, tudi tubala ne: “pabuipi ne munda-nkulu mua butuku,” Paulo ne Silase, kunyima kua bamane kututshibua ne kuedibua mu buloko, “bakasambila ne kusamuna Nzambi ne misambu; eyowa, bena buloko bakabumvua.”—Bienzedi 16:25.
Kuimba misambu ya disamuna—Muanda munene mu ntendelelu wetu
10. Mmêyi-matuma kayi adi Dîyi dia Nzambi ditupetesha bua kumusamuna pa kumuimbila misambu?
10 Udiku umona pamu’apa se: kuimba misambu ya Bukalenge kakuena ne mushinga muvule bua wewe kuteyaku ntema yebe mijima anyi? Bikalabi nanku, kuenaku ne bua kutangila tshiakabidi muanda eu, mu mushindu udi Yehowa ne Yezu Kristo bangata misambu ya disamuna ne mushinga anyi? Ke bualu kayi, Dîyi dia Nzambi ndiwule tente ne mêyi-matuma adi atulomba bua kusamuna Yehowa ne kumuimbila misambu ya dimusamuna! Tshilejilu, mu Yeshaya 42:10, tudi tubala mu Mukanda wa Nzambi ne: “Imbilai Yehowa musambu muhiamuhia, numutumbishe tô ne kunfudilu kua buloba! Nuenu badi benda pa mai manene, ne bintu bionso bidimu, maloba a ku muelelu wa mai manene ne bantu bonso badimu bimutumbishe.”—Tangila kabidi Musambu wa 96:1; 98:1.
11. Mmubelu kayi uvua mupostolo Paulo mufile pa bidi bitangila kuimba kua misambu?
11 Mupostolo Paulo uvua mumanye se: kuimba misambu kudi mua kusanguluja mmuenenu yetu, nenku, wakatudimuija misangu ibidi mijima pa muanda eu. Tudi tubala mu Efeso 5:18, 19 ne: “Nuwujibue ne spiritu, nuakuishangana ne misambu ya disamuna Nzambi ne misambu ya mu nyuma, nuimbile Yehowa misambu ne biombelu mu mitshima yenu.” Mu Kolosai 3:16, tudi tubala ne: “Dîyi dia Kristo dishale munda muenu ne bubanji, mu meji wonso! Tungunukayi ne kulongeshangana ne kudimuijangana bamue ne bakuabo ne misambu, disamuna Nzambi, ne misambu ya mu nyuma mimba ne bulenga buonso, nuimbile Yehowa misambu mu mitshima yenu.”
12. Mbilejilu kayi bitudi nabi pa bidi bitangila misambu yetu bidi bituambuluisha bua kulongesha ne kupeshangana mibelu umue kudi mukuabo?
12 Udi umona se: mu tshilejilu tshionso, Paulo udi wakula misangu mivule bua kuimba, padiye utela ‘misambu, disamuna Nzambi, misambu ya mu nyuma, kuimba ne biombelu mu mitshima yenu.’ Kabidi, udi utuadija mibelu yende kudi bena Kolosai pa kuamba ne: ku diambuluisha diayi tudi mua “kulongeshangana ne kudimuijangana umue ne mukuabo.” Ne ki mututu bushuwa tuenza, anu bu mudibi mua kumueneka mu biena-bualu bia misambu yetu—“Que toute la création loue Jéhovah!” (nimero 5), “Soyons fermes, inébranlables!” (nimero wa 10), “Réjouissez-vous dans l’espérance du Royaume!” (nimero wa 16), “Ne le crains pas!” (nimero wa 27), “Louons Jéhovah, notre Dieu!” (nimero wa 100), ebi bidi amu bilejilu bikese.
13. Mmunyi mudi “mupika wa lulamatu ne wa budimu” muleje mushinga wa kuimba misambu bu tshitupa tshinene mu ntendelelu wetu?
13 Mu diumvuangana ne mêyi-matuma aa, “mupika wa lulamatu ne wa budimu” mmulongolole bua se: mu bisangilu bietu—bisangilu bia mu tshisumbu, mpuilu ya tshijengu, mpuilu ya pa buayi ya matuku bungi kampanda, mpuilu ya distrike, ne mpuilu ya bukua-matunga—kuikalabi bituadija ne bijika ne misambu ya Bukalenge. (Matayi 24:45) Kupita apu, kudi misambu milongolola bua kuimba mu bikondo bikuabu mu bisangilu ebi. Bu mudi bisangilu bietu bituadija pa tshibidilu ne misambu ya Bukalenge, katuenaku ne bua kuenza muetu muonso bua kufika pa dîba, ku ntuadijilu menemene bua kubabidila tshitupa etshi tshia ntendelelu wetu anyi? Kabidi, bu mutu bisangilu bijika ne dimba musambu, katuenaku ne bua kushala muaba awu too ne pimbibua musambu wa nkomenu ne disambila didi diwulonda diakamue munyima anyi?
14. Mbilejilu kayi bitudi nabi bia misambu miakanyine idi isungudibua bua programme yetu?
14 Misambu mu bisangilu bietu mmisungula biakane mu diumvuangana ne programme. Tshilejilu, mu Mpuilu wa Distrike wa “Dilongesha dia Nzambi” wakenzeka mu 1993, musambu nimero wa 191 wa “Manifestons la vérité,” udi ukankamija bena nkristo bua kuluangana ne Satana, bulongolodi ebu, ne mubidi udi munyanguke, uvua ulonda diakamue miyuki isatu ivua yakula bua baluishi aba basatu ki wakasungudibua. Mushindu wa muomumue, musambu nimero wa 164 wa “Les enfants sont de précieux dons de Dieu,” musambu udi udimuija baledi, uvua ulonda diakamue muyuki uvua uzangika midimu idi baledi ne bua kukumbuja bua kulongesha babu bana. Musambu nimero wa 70, “Soyons comme Jérémie,” wakalondibua munyima kudi mulongolongo wa miyuki mishindamena pa milayi ya Yelemiya. Ne kunyima kua muyuki mukosolola bilondeshile bitupa kabukabu bia mudimu wetu wa Bukalenge, kuakalonda musambu nimero wa 156, “Je le veux,” musambu udi usaka menemene ku disadila. Ditabalela dia muomumue didi dienjibua mu disungula misambu bua dilonga dia Tshibumba tshia Nsentedi, Tshisangilu tshia mudimu, ne Kalasa ka Mudimu wa Teokrasi. Bidi bikengela kutabalela bua se: padi bakulu benza miyuki ya patoke ne baleja misambu ya kutumika nayi bua kunzulula programme, badi ne bua kusungula musambu udi muakanangane ne tshiena-bualu tshia muyuki wabu.
15. Mmunyi mudi muludiki wa tshisangilu mua kuvudija dianyisha bua musambu wimbibua?
15 Mu dimanyisha musambu wa kuimba, muludiki wa muyuki udi mua kuvudija dianyisha bua musambu pa kufila tshiena-bualu tshiawu. Katuena tuimba nimero to, apo, biena-bualu biangatshila mu Mifundu. Kabidi bidi mua kuambuluisha tshisumbu bua kutamba kuanyisha musambu pikalabu bamanyishe mvese udi mufunda muînshi mua tshiena-bualu. Pashishe, mamanyisha makese adi ne bua kufidibua pa bualu ebu, bu mudi edi dia ne: musambu eu udi ne bua kuimbibua ne musangelu, ne disanka anyi dishindika dionso, bilondeshile mushindu udi ngimbilu wa musambu.
Leja dianyisha bua buimpe bua Yehowa pa kuimba misambu
16. Mmunyi mutudi mua kudibueja mu mmuenenu wa misambu yetu?
16 Bu mudi mêyi a tusala a misambu yetu ya Bukalenge mikale ne diumvuija dinene, tudi ne bua kuatabalela patudi tuimba misambu. Tudi basue kudibueja mu mmuenenu udi mu musambu wonso. Imue bu eyi idi yakula bua dinanga, dimuma dia nyuma idi ilenga ku mutshima. (Galatia 5:22) Misambu eyi tudi ne bua kuyimba ne ngonji yonso ne musangelu. Mikuabo nya disanka divule, ne tudi ne bua kuteta bua kuyimba ne disanka dionso. Mikuabo nya tshikuma ne itutshisha musesu, ya mushindu’eu idi ne bua kuimbibua ne musangelu ne dishindika dikole. Mu Kalasa ketu ka Mudimu wa Teokrasi, mbatubele bua kuleja disanka ne musangelu patudi tuenza miyuki yetu. Kuleja disanka ne musangelu patudi tuimba misambu yetu kudi ne mushinga muvule mutambe.
17. (a) Ndidiwula kayi diakadiwulabu bena Izalele babule lulamatu ditudi katuyi basue bua dituenzekela pa bidi bitangila ngimbilu wetu wa misambu? (b) Mbipeta kayi biapatuka patudi tuangata ne mushinga mibelu idi mu misambu yetu?
17 Bituikala tuimba misambu yetu ya Bukalenge, eku ngenyi yetu mituma ku malu makuabo, katuakumona mua kuleja dianyisha bua diumvuija didi mu mêyi a musambu to, tudiele lukonko elu lua se: katuen’anu bu bamue bena Izalele babule lulamatu bakadiwulabu, bualu pavuabo basamuna Nzambi ne mishiku yabu, mitshima yabo ivua kule nende anyi? (Matayi 15:8) Tudiku basue kudiwudibua mushindu’eu bua ngimbilu wetu wa misambu ya Bukalenge anyi? Pa kuleja dianyisha patudi tuimba misambu yetu ya Bukalenge, tudi tujula majinga ki ng’anu kutudi nkayetu, apo kabidi kudi aba badi basombe ku luseke luetu mu Nzubu wa Bukalenge, kusangisha ne basonga pabo. Eyowa, biangata eu yonso udi wimba misambu mu Nzubu yetu ya Bukalenge mibelu idi mu misambu ne mushinga, ebi nebikale dikankamija dinene bua kuikala ne mitalu mu mudimu wa buambi ne kuepuka mateyi a bienzedi bibi.
18. Mbuenzeji kayi buvua nabu misambu yetu ya Bukalenge kudi mukaji kampanda?
18 Misangu ne misangu, misambu yetu ya Bukalenge itu itamba kukemesha bantu ba pambelu. Tshikondo kampanda, bakapatula mu Tshibumba tshia Nsentedi tshiena-bualu etshi: “Dimba [dietu] edi didi padi mua kuambuluisha bua kufikisha bantu ku dipeta dimanya pa bidi bitangila Yehowa Nzambi diakalejibua ku bualu kampanda buakamona mukaji kansanga, wakatambushibua mu mpuilu wa “Ditshimuna dia Nzambi” wakenzeka mu 1973 mu tshipalu tshia Yankee Stadium, mu tshimenga tshia New York. Wakadiyila bua musangu wa kumpala ku Nzubu wa Bukalenge wa muaba uvuaye musombele, ne kushalamu too ne pajikile bisangilu bionso bibidi. Pavua bena mu tshisumbu bimba . . . ‘Fixons nos regards sur le prix!,’ mêyi ne mushindu uvuabo bimba biakamukemesha bikole bitambe, e kudiambila ne: ebi bivu’amu muvuaye musue. Kunyima, wakasemena kudi Bantemu ne kubalomba dilonga dia Bible, ne [mukaji eu] wakalubuluka biakane too ne muvuidileye muena nkristo mufidi wa bumanyishi wa Yehowa.”
19. Ndikankamija kayi dia ndekelu didi difidibua bua kuimba misambu yetu ya Bukalenge ne mutshima wetu wonso?
19 Mu bisangilu bietu bivule, pa kubifuanyikija, kudi anu bikondo bikese bidi bateleji bababidila bua kuleja mudibu badiumvua ne mudibu baleja dianyisha. Kadi, tuetu buonso tudi mua kuleja mutudi tudiumvua pa bidi bitangila buimpe bua Yehowa pa kudisanga ne muoyo umue mu dimba misambu ya Bukalenge. Ku luseke lukuabo, patudi tusangila pamue, katutuku ne mmuenenu mimpe anyi? Nenku, tudi ne bua kudiumvua anu bu badi bimba misambu! (Yakobo 5:13) Bushuwa, mu mushindu utudi tuleja dianyisha bua buimpe bua Yehowa ne bulenga buende bukena butuakanyine, netumuimbile misambu ya dimusamuna ne anyima wetu mujima.
Newandamune munyi?
◻ Ntubingila kayi tubidi tua nshindamenu tudi tutusaka bua kusamuna Yehowa?
◻ Mmu mishindu kayi kabukabu mutudi mua kusamuna Yehowa?
◻ Tela umue wa ku mishindu mitambe bulenga ya kusamuna Yehowa.
◻ Mbilejilu kayi bia mu Mifundu bitudi nabi pa bidi bitangila disamuna Yehowa pa kumuimbila misambu?
◻ Mmunyi mutudi mua kuenza bua kuleja dianyisha bua misambu yetu ya Bukalenge?
[Kazubu mu dibeji 11]
Ulonge misambu eyi!
Bidi bimueneka patoke se: bamue badi ne lutatu lukese mu dilonga imue misambu. Kadi, tudi ne bua kuamba se: bena dîku dia Betele wa ku Brooklyn, anu bu mudibi kabidi bua bamue bena mu bisumbu bia ku New York, kabena ne lutatu bua kuimba musambu kayi wonso wa ku misambu eyi. Pamu’apa, kuenza madikolela bua kulonga eyi ivua imueneka bu mikole, ke tshidi mua kuikala mu malu wonso, muanda udi ukengedibua. Diakamue, padibu bibidilangana ne misambu ya mushindu’eu, bena mu tshisumbu batu pa tshibidilu bayanyisha kupita eyi ivua mipepele bua kulonga.
[Kazubu mu dibeji 12]
Imbayi misambu ya Bukalenge panudi nudisangisha mu bibilu
Misambu yetu ya Bukalenge kayena ikengela kuyimba anu mu Nzubu wa Bukalenge nkayamu nansha. Paulo ne Silase bakimba misambu bua kusamuna Yehowa pavuabo mu buloko. (Bienzedi 16:25) Ne mulongi Yakobo udi wamba ne: “Muntu kayi yonso udi ne mmuenenu muimpe? Imbe misambu ya kusamuna Nzambi.” (Yakobo 5:13, note udi kuinshi kua dibeji) Mu bibilu bia bantu, muntu kayi yonso udi ne mmuenenu muimpe. Nenku, bua tshinyi kubenga kuimbaku misambu ya Bukalenge? Bia nunku, bidi mua kuikala bia disanka padi kuimba kua misambu kuenzeka pamue ne biombelu bu mudi piano ne gitare. Pikalabi kabiyi nanku, kudi tusete tua misambu yetu ya Bukalenge mimba ne piano; mêku mavule a Bantemu adi ne album ya tusete etu. Katuena anu tuambuluisha bua kuimba misambu bilenga, kadi, tudi kabidi tuimpe bua kuimba misambu idibu batumika nayi padi amue manaya enzeka.
[Tshimfuanyi mu mabeji 8, 9]
Kunyima kua dipikudibua diabu mu Mbuu Mukunze, bena Izalele bakaleja disanka diabu pa kuimba misambu
[Tshimfuanyi mu dibeji 10]
Misambu mimba ne disanka ntshimue tshia ku bitupa bia ntendelelu wa bena nkristo lelu’eu