Keba tumama tudi mu teritware wenu ne ntema
1 Yehowa udi wamba ne: ‘Lua. Udi musue, angate mâyi a muoyo tshianana.’ (Buak. 22:17) Ku bantu badi bitaba dîyi edi, kudi kabidi ba bungi badi tumama. Ke bua tshinyi mu bidimu 13 bishale ebi ku filiale wa mu ditunga dia États-Unis, bakenza bisumbu 27 bia muakulu wa tumama ne tusumbu tukuabu tukese 43.
2 Nansha mudi bisumbu bionso bia muakulu eu ne tukuabu tukese biditua mu dikeba bantu badi tumama ne bena mapapa badi mu teritware yabu padibu mu mudimu wabu wa diyisha, kutshidi bantu ba nunku ba bungi batudi ne bua kukeba mu ditunga edi bua kubayisha.
3 Mmunyi muudi mua kubambuluisha? Paudi muaba wa bantu ba bungi, ukadiku mutentekele ne mumone bantu bayikila mu muakulu wa tumama anyi? Udiku mumanye muntu kampanda nansha ku mudimu anyi mu tulasa, udi ne muanabu kamama anyi? Ikala ne ntema bua kukeba bantu ba mushindu’eu paudi wenza malu ebe makuabu dituku dionso. Kadi mmunyi muudi mua kujadika ne: nebateleje mukenji wa Bukalenge?
4 Amba lumu luimpe: Ambila tshisumbu tshia muakulu wa tumama anyi kasumbu kakese kadi pabuipi ne muaba udi bantu aba basombela. Ba bungi batu bakola lukasa mu dilonga dia bulelela padibu badisangisha ne Bantemu badi tumama mu bisangilu bia tshisumbu bidibu benza mu muakulu wa tumama. Nunku, pikalaku tshisumbu tshia muakulu eu anyi kasumbu kakese muaba uudi, sekretere wa tshisumbu tshienu neatshifundile malu onso adi atangila tumama tudi mu teritware wenu.
5 Kadi ntshinyi tshiudi mua kuenza bikalaku kakuyi muntu pabuipi apu udi mua kuambuluisha tumama tudi muaba unudi bua kukolatu mu nyuma? Mmunyi muudi mua kutuambuluisha? Pingana kumbelu aku ne akula ne muntu umue wa mu dîku amu udi umvua. Udi mua kumulomba bua kuleja bande wa video wa muakulu wa tumama bua kukoka ntema ya muena mu dîku amu udi kamama. Bamue bamanyishi mbalonge muakulu wa tumama wa bena Amerike bua kumona mua kuyukila ne tumuma bilenga. (Bien. 16:9, 10) Broshire wa Utulomba ne mukanda wa Dimanya bidiku mu muakulu wa tumama wa bena Amerike mu bande ya video. Kulombola malonga a Bible ne biamu bia mudimu ebi kukadi kupatula bipeta bia bungi bimpe.
6 Pa kuikala ne ntema mu dikeba tumama tudi muaba unudi, nudi mua kupesha bantu ba nunku mushindu wa kuangata mâyi a muoyo tshianana.—Mat. 10:11.