Tuambuluishayi bantu bua basemene pabuipi ne Yehowa

‘Bua muntu kufikaye kudi Tatu, anu yeye mupitshile kundi.’​—YONE 14:6, Muanda Mulenga Lelu.

1. Ndîyi kayi divua Yezu mubisha ku bafue mutumine bayidi bende, ne ntshinyi tshidi tshimueneke bua mudi Bantemu ba Yehowa batumikile dîyi edi?

YEZU KRISTO wakatumina balondi bende dîyi bua ‘bavuije ba bisamba bionso bayidi, bababatize mu dîna dia Tatu ne mu dia muana ne mu dia [spiritu munsantu, NW].’ (Matayo 28:19) Mu bidimu dikumi bidi bipite ebi, Bantemu ba Yehowa mbambuluishe bantu bapite pa miliyo isatu bua kulua kudi Nzambi, pashishe mbabatambuishe bua kuleja mudibu badilambule kudiye bua kuenza disua diende. Tudi ne disanka dia kubambuluisha bua basemene pabuipi ne Nzambi.​—Yakobo 4:8.

2. Nansha mudi bapiabapia ba bungi bikale batambula, ntshinyi tshidi tshienzeka?

² Kadi mu amue matunga, bungi bua bamanyishi ba Bukalenge kabuena buvula bilondeshile bua bayidi bavule bapiabapia badibu batambuishemu to. Bushuwa, katuena ne bua kupua muoyo aba badi bafua, ku tshidimu tshionso muntu 1 pa 100. Kadi mu bidimu bikese bishale ebi, bantu ba bungi mbalekele ditabuja bua kabingila kampanda. Bua tshinyi? Tshiena-bualu etshi ne tshikuabu tshidi tshilonda nebileje mushindu udi bantu basemena pabuipi ne Yehowa ne tubingila tudi tufikishe bamue ku dilekela ditabuja.

Tshipatshila tshia mudimu wetu wa buambi

3. (a) Mmunyi mudi mudimu udibu bapeshe bayidi ba Yezu ufuanangana ne wa muanjelu muleja mu Buakabuluibua 14:6? (b) Mmushindu kayi muimpe wa kukoka ntema ya bantu ku mukenji wa Bukalenge, kadi ndutatu kayi ludiku?

³ Mu “tshikondo [etshi] tshia ku nshikidilu,” bayidi ba Yezu badi ne mudimu wa kumuangalaja “dimanya dilelela” didi ditangila ‘lumu luimpe elu lua bukalenge.’ (Danyele 12:4, NW; Matayo 24:14) Mudimu wabu mmufuanangane ne wa muanjelu ‘uvua ne lumu luimpe lua tshiendelele lua kuambilaye badi bikala pa buloba, ne kudi ditunga dionso ne tshisamba tshionso ne muaku wonso ne bantu bonso.’ (Buakabuluibua 14:6) Mu bukua-bantu budi budifile bikole mu malu a panu, mushindu mutambe buimpe wa kukoka bantu ku Bukalenge bua Nzambi ne kubambuluisha bua basemene pabuipi ne Yehowa ng’wa kubamanyisha bua ditekemena dia muoyo wa kashidi mu mparadizu wa pa buloba. Nansha mudibi biumvuike, aba badi badisangisha ne bantu ba Nzambi anu bua kumona mua kubuela mu Mparadizu kabena ne makasa mashindame mu njila mubumbakane udi ufikisha ku muoyo nansha.​—Matayo 7:13, 14.

4. Bilondeshile Yezu ne muanjelu udi ubuka munkatshi mua diulu, mudimu wetu wa buambi udi ne tshipatshila kayi?

⁴ Yezu wakamba ne: “Etshi tshidi tshiumvuija muoyo wa kashidi, dipeta diabu dia dimanya diebe wewe, Nzambi umuepele mulelela, ne dia eu uwakatuma, Yezu Kristo.” (Yone 17:3, NW) Muanjelu udi ubuka munkatshi mua diulu udi umanyisha “lumu luimpe lua tshiendelele” ne udi wambila bantu badi pa buloba ne: ‘Nutshine Nzambi, numutumbishe, bualu bua dîba dia dilumbuluisha diende diakulua; nukukuile yeye wakafuka diulu ne buloba ne mâyi manene ne mishimi ya mâyi.’ (Buakabuluibua 14:7) Nenku, tshipatshila tshinene tshitudi tumanyishila lumu luimpe ntshia kuambuluisha bantu bua basemene pabuipi ne Yehowa ku butuangaji bua Yezu Kristo.

Tshitudi tuenza mu mudimu wa Yehowa

5. Mmêyi kayi avua Paulo ne Yezu bambe adi aleja ne: mudimu utudi tuenza ng’wa Yehowa, ki ng’wetu nansha?

⁵ Mu difundila bena Kristo nende bela manyi, mupostolo Paulo udi wakula bua ‘mudimu wa kufikisha bakuabo ku dilengejangana’ ne wamba ne: Nzambi udi ulengejangana ne bantu ku diambuluisha dia mulambu wa tshia-bupikudi. Paulo udi wamba ne: bidi bu ‘[Nzambi] unubela mukana muetu’ ne se: ‘Mu dîna dia Kristo tudi tunulomba ne: anyishayi bua kulengejangana ne [Nzambi].’ Bualu ebu budi busankisha bikole. Nansha tuetu bikale “bena mpala [bela manyi] ba Kristo” anyi batumibue badi ne ditekemena dia muoyo pa buloba, katuena ne bua kupua muoyo se: mudimu eu ng’wa Yehowa, ki ng’wetu to. (2 Kolinto 5:18-20, MMM) Nzambi ke udi ukoka bantu ne ulongesha aba badi balua kudi Kristo. Yezu wakamba ne: ‘Kakuena muntu udi mumanye mua kudivuila kundi, bikala Tatu wakuntuma kayi mumukoke; ne meme nemmubishe dituku dia ku nshikidilu. Baprofete bakafunda ne, Nzambi neabayishe bonso. Muntu yonso wakumvua mêyi a Tatu, wakuayila, ulualua kundi.’​—Yone 6:44, 45.

6. Mmunyi mudi Yehowa unyukula matunga bua musangu wa kumpala, ne mbanganyi badi bapeta bukubi mu “nzubu” wende wa ntendelelu?

⁶ Mu matuku aa a ku nshikidilu, mmunyi mudi Yehowa ukoka bantu ne ubunzuluila “tshiibi tshia ditabuja”? (Note kuinshi bua Bienzedi 14:27, NW; 2 Timote 3:1) Mushindu munene ng’wa kutuma Bantemu bende bua bamanyishe mukenji wende wa lupandu ne wa kabutu ka ndongoluelu eu wa malu mubi. (Yeshaya 43:12; 61:1, 2) Dimanyisha edi didi dienzeka pa buloba bujima didi dinyukula matunga​—tshimanyinu tshia kabutu kakadi pa kuenzeka. Anu mu tshine tshikondo etshi, bantu ba “mushinga mukole” ku mêsu kua Nzambi badi benda babapatula mu ndongoluelu eu ne badi bapeta bukubi mu “nzubu” wende wa ntendelelu mulelela. Nenku Yehowa udi ukumbaja mêyi ende a mulayi uvua Hagai mufunde: “Nenyukule matunga onso, ne bintu bilengele bia matunga onso bidi ne bua kubuelamu; ne nenguuje nzubu eu tente ne butumbi.”​—Note kuinshi bua Hagai 2:6, 7, NW; Buakabuluibua 7:9, 15.

7. Mmunyi mudi Yehowa unzulula mitshima ya bantu ne ubakoka kudiye ne kudi Muanende?

⁷ Yehowa udi unzulula mitshima ya bantu aba badi batshina Nzambi, “bintu bitambe buimpe bisungula mu matunga onso”​—bua bamone mua ‘kuteya ntema ku malu adibu bamba’ kudi Bantemu bende. (Hagai 2:7, Jewish Publication Society; Bienzedi 16:14, NW) Anu bu muvuabi mu siekele wa kumpala, imue misangu Yehowa utu ukuata mudimu ne banjelu bua kutangija Bantemu bende kudi bantu ba muoyo mulenga badi bamulomba diambuluisha. (Bienzedi 8:26-31) Padi bantu bumvua bua malu malenga adi Nzambi mubenzele ku butuangaji bua Muanende Yezu Kristo, dinanga dia Yehowa didi dibakoka kudiye. (1 Yone 4:9, 10) Bushuwa, Nzambi udi ukoka bantu kudiye ne kudi Muanende ku diambuluisha dia “bulenga-bunangi” Buende anyi “dinanga dia lulamatu.”​—Note kuinshi bua Yelemiya 31:3, NW.

Mbanganyi badi Yehowa ukoka?

8. Mbantu ba mushindu kayi badi Yehowa ukoka?

⁸ Yehowa udi ukoka kudiye ne kudi Muanende bantu badi bamukeba. (Bienzedi 17:27) Munkatshi mua bantu aba mudi “badi batua mikemu ne badila bua malu mabi onso adi bantu benza” mu Bukua-buena-Kristo, ne kabidi pa buloba bujima. (Yehezekele 9:4, MMM) ‘Mbamanye bupele buabu bua mu nyuma.’ (Matayo 5:3, NW) Bushuwa, bantu aba “mbena bupuekele [“badipuekeshi” bilondeshile note wa kuinshi] ba pa buloba,” bikala mua kusombela kashidi mu mparadizu wa pa buloba.​—Sefanya 2:3, NW.

9. Mmunyi mudi Yehowa mua kumona bikala bantu “badiakaje bimpe bua muoyo wa kashidi,” ne mmunyi mudiye ukoka bantu aba?

⁹ Yehowa udi mua kumanya malu adi mu mutshima wa muntu. Mukalenge Davidi wakambila muanende Solomo ne: ‘Yehowa udi ukebakeba mitshima ya bantu bonso; udi ujingulula meji onso adibu bela munda muabu. Biwamukeba, neumupete.’ (1 Kulondolola 28:9) Bilondeshile mutshima ne lungenyi anyi kudi muntu munemenene, Yehowa udi mua kumona bikalaye mua kuanyisha malu adiye mulongolole bua dibuikidila dia mpekatu ne ditekemena dia muoyo wa kashidi mu ndongoluelu mupiamupia ne muakane wa Nzambi. (2 Petelo 3:13) Ku diambuluisha dia Dîyi diende, diyisha ne dilongesha kudi Bantemu bende, Yehowa udi ukoka kudiye ne kudi Muanende ‘bonso badi badiakaje bimpe bua muoyo wa kashidi,’ ne bantu aba badi ‘balua bena kuitabuja.’​—Bienzedi 13:48, NW.

10. Ntshinyi tshidi tshileja ne: Yehowa katu udianjila kufunda bamue bantu bakokaye ne bakuabu babengaye kukoka?

¹⁰ Yehowa utuku udianjila kufunda bamue bantu bakokaye ne bakuabu babengaye kukoka anyi? Nansha kakese! Nzambi udi ukoka bantu bilondeshile majinga abu. Udi unemeka budisunguidi buabu. Yehowa mmuteke kumpala kua bantu ba pa buloba lelu disungula dia muomumue ne divuaye muteke kumpala kua bena Isalele kukadi bidimu bipite pa 3 000, pakamba Mose ne: ‘Ngakuteka muoyo ne malu mimpe, ne lufu ne malu mabi kumpala kuenu lelu. Ndi mbikila diulu ne buloba bu bamonyi ba bualu ebu ne: ngakuteka muoyo ne lufu, ne disanka ne mulawu kumpala kuenu lelu: nunku nudisunguile muoyo, ne nuikale ne muoyo nuenu ne bana benu; bua kunanga Yehowa, Nzambi wenu, ne bua kutumikila dîyi diende, ne bua kumulamata; bualu bua yeye udi muoyo wenu ne muvudiji wa matuku enu.’​—Dutelonome 30:15-20.

11. Mmunyi muvua bena Isalele ne bua kusungula muoyo?

¹¹ Mona se: bena Isalele bavua ne bua kusungula muoyo pa ‘kunanga Yehowa, kutumikila dîyi diende ne kumulamata.’ Pakambabu mêyi aa, bena Isalele kabavua banji kuangata Buloba Bulaya nansha. Bavua batudile mu Mpata ya Moaba, badilongolola bua kusabuka musulu wa Yadene ne kubuela mu Kanâna. Nansha muvuabi kabiyi bibi bua buobu kutuma meji ku buloba “buimpe ne bunene” buvua “ne mabele ne buitshi bia bungi” buvuabu ne bua kupeta mu katupa kîpi, dikumbana dia malu aa avuabu batekemene divua disuikila ku dinanga diabu bua Yehowa, diteleja dia dîyi diende ne dimulamata diabu. (Ekesode 3:8) Mose wakatokesha bualu ebu pakambaye ne: ‘[“Nuenu bateleje,” NW] mukenji ungakunuelela lelu bua kunanga Yehowa, Nzambi wenu, ne bua kuenda mu njila yende ne bua kutumikila mikenji yende ne mêyi ende ne mikandu yende: nunku nenuikale ne muoyo, nenukumbane ba bungi, ne Yehowa, Nzambi wenu, neanuvudijile disanka mu buloba bunuyaya kupiana.’​—Disendemija miaku ndietu; Dutelonome 30:16.

12. Ntshinyi tshidi tshilejilu tshia bena Isalele ne bua kutulongesha bua mudimu wetu wa kuyisha ne kulongesha?

¹² Malu adi kuulu eku kaenaku atulongesha bualu kampanda bua mudimu wetu wa kuyisha ne kulongesha mu tshikondo etshi tshia ku nshikidilu anyi? Tudi tuela meji ne tuakula mu mudimu wetu bua buloba bukadi pa kuandamuka Mparadizu. Kadi tuetu, ne bantu batudi bavuije bayidi netumone muakumbana dilaya edi bituikala anyi bikalabu basadila Nzambi kabiyi bua tubingila tua budisui to. Anu bu bena Isalele, tuetu ne bantu batudi tulongesha, tudi ne bua kulonga mua ‘kunanga Yehowa, kuteleja dîyi diende ne kumulamata.’ Tuetu bavuluke malu aa patudi mu buambi, bushuwa netuenze mudimu pamue ne Nzambi mu disemeja bantu pabuipi nende.

Benzejanganyi ba mudimu ne Nzambi

13, 14. (a) Bilondeshile 1 Kolinto 3:5-9, mmunyi mutudi tulua benzejanganyi ba mudimu ne Nzambi? (b) Nnganyi utudi ne bua kutumbisha bua divula dionso didi dimueneka, ne bua tshinyi?

¹³ Paulo wakatokesha bimpe dienzejangana mudimu ne Nzambi pa kuakula bua mudimu wa budimi. Wakafunda ne: ‘Nunku Apolo udi bu tshinyi? Paulo udi bu tshinyi? Badi bakuatshi ba mudimu ne nuenu nuakitabuja bua bualu buabu, bu muakabapa Mukalenge bukole muntu ne muntu. Meme ngakakuna bintu, Apolo wakabimiamina mâyi, kadi Nzambi wakabidiundisha. Udi ukuna ne udi umiamina mâyi badi umue, kadi muntu ne muntu neangate difutu bu mudi mudimu wende. Bualu tudi benzejanganyi ba mudimu ne Nzambi. Nuenu nudi budimi bua Nzambi.’​—1 Kolinto 3:5-9.

¹⁴ Bu mutudi benzejanganyi ba mudimu ne Nzambi, tudi ne bua kukuna ne lulamatu ‘dîyi dia bukalenge’ mu mitshima ya bantu, pashishe kumiamina dijinga dionso dia kumanya bivule mâyi, ku diambuluisha dia makumbula malongolola bimpe ne malonga a Bible. Bikala buloba, mmumue ne: mutshima, buikale buimpe, Yehowa neenze wende mudimu pa kukolesha ntete ya bulelela bua mu Bible bua ilue mutshi udi ukuama mamuma. (Matayo 13:19, 23) Neakoke bantu kudiye ne kudi Muanende. Nenku, bungi bua bamanyishi ba Bukalenge mbuvule bua mudimu udi Yehowa wenza mu mitshima ya bantu, ukolesha ntete ya bulelela ne ukoka bantu aba kudiye ne kudi Muanende.

Mudimu wa luibaku ludi kaluyi lubutuka

15. Mmufuanu kayi uvua Paulo mufile bua kuleja mutudi mua kuambuluisha bakuabu bua kukolesha ditabuja?

¹⁵ Nansha mutudi tusanka bua divula edi, tudi tujinga ne muoyo mujima bua bantu aba batungunuke ne kunanga Yehowa, kuteleja dîyi diende ne kushala bamulamate. Bidi bitubungamija patudi tumona bamue bakuatshika mashika ne balekela ditabuja. Tudiku mua kuenza tshintu kampanda bua kuepula malu aa anyi? Mu mufuanu mukuabu, Paulo udi uleja mushindu utudi mua kuambuluisha bakuabu bua kukolesha ditabuja. Udi ufunda ne: ‘Kakuena muntu udi mua kujadika tshishimikidi tshikuabu, anu tshiotshi tshiakamana kujadikibua, tshidi Yezu Kristo mene. Bamue nebase pa tshishimikidi etshi ne biamu bia or anyi bia argent, anyi mabue a mushinga mukole; bakuabu nebase ne mitshi, anyi bisosa anyi nsona. Kadi mushindu wa mudimu wa muntu ne muntu neumueneke. Dituku nediwusokolole. Bualu bua, kapia ka dituku adi nekamueneshe mudi mudimu wa muntu ne muntu ne nekawutete bua kuleja mushinga wawu.’​—1 Kolinto 3:11-13, MML.

16. (a) Mmunyi mudi mifuanu ibidi ya Paulo mikale ne bipatshila bishilangane? (b) Mmunyi mudi mudimu wetu wa luibaku mua kunyanguka ne kauyi mua kukandamena kapia?

¹⁶ Mu mufuanu wa Paulo wa budimi, dikola ndisuikila ku dikuna ne meji onso, dimiamina mâyi pa tshibidilu ne dibenesha dia Nzambi. Mufuanu mukuabu wa mupostolo udi uleja bujitu budi nabu musadidi muena Kristo bua tshidi mudimu wende wa diibaka ulua. Mmuibakile pa tshishimikidi tshia bushuwa ne bintu bia mushinga anyi? Paulo udi ubela ne: ‘Kadi muntu ne muntu adimuke bu mudiye wasapu.’ (1 Kolinto 3:10) Tuetu bamane kujula dijinga dia kumanya bia bungi dia muntu pa kumuambila bua ditekemena dia muoyo wa kashidi mu Mparadizu, tutuku tuimanyikila dilongesha dietu anu pa malu manene a dimanya dia mu Mifundu ne pashishe tuela kashonyi pa malu adi muntu ne bua kuenza bua kupeta muoyo wa tshiendelele anyi? Dilongesha dietu dijima didiku dishindamene anu pa kuamba ne: ‘Wewe musue kuikala ne muoyo wa kashidi mu Mparadizu, udi ne bua kulonga, kubuela mu bisangilu ne kuyisha’ anyi? Bikalabi nanku, katuena tuibaka ditabuja dia muntu au pa tshishimikidi tshikole nansha, ne bitudi tuibaka kabiakukandamena kapia ka mateta anyi kushala mutantshi mule to. Kukeba bua kusemeja bantu pabuipi ne Yehowa anu ku diambuluisha dia ditekemena dia kuikala ne muoyo mu Mparadizu dishintakaja ne bidimu bikese bia mudimu muenzela Nzambi kudi bu kuibaka ne ‘mitshi, bisosa ne nsona.’

Tuibakayi dinanga bua Nzambi ne Kristo

17, 18. (a) Ntshinyi tshidi tshikengedibua bua ditabuja dia muntu kushaladi mutantshi mule? (b) Mmunyi mutudi mua kuambuluisha muntu bua Kristo kuikalaye mu mutshima wende?

¹⁷ Bua ditabuja kushaladi mutantshi mule, didi ne bua kuikala diashila pa malanda adi muntu nkayende nawu ne Yehowa ku butuangaji bua Yezu Kristo. Bu mutudi bantu bapange bupuangane, tudi mua kudia malanda aa a ditalala ne Nzambi anu ku butuangaji bua Muanende. (Lomo 5:10) Tuvulukayi tshivua Yezu muambe ne: ‘Bua muntu kufikaye kudi Tatu, anu yeye mupitshile kundi.’ Bua kuambuluisha bakuabu bua kuibakabu ditabuja, ‘kakuena muntu udi mua kujadika tshishimikidi tshikuabu, anu tshiotshi tshiakamana kujadikibua, tshidi Kristo mene.’ Bidi biumvuija tshinyi?​—Yone 14:6, MML; 1 Kolinto 3:11.

¹⁸ Kuibakila pa Kristo bu tshishimikidi kudi kumvuija kulongesha bua mulongi wa Bible ikale ne dinanga dikole bua Yezu ku diambuluisha dia dimanya dia tshishiki dia mudimu Wende bu Mupikudi, Mfumu wa tshisumbu, Muakuidi Munene wa dinanga ne Mukalenge udi ukokesha. (Danyele 7:13, 14; Matayo 20:28; Kolosai 1:18-20; Ebelu 4:14-16) Bidi biumvuija kutamba kumona Yezu bu muntu mulelela, muenze anu bu udi mu mitshima yabu. Masambila atudi tubenzela adi ne bua kuikala bu dilomba dia Paulo bua bena Kristo ba mu Efeso. Wakafunda ne: ‘Ndi ntua binu panshi kumpala kua Tatu, bua yeye anupe bua Kristo ikale mu mitshima yenu bua ditabuja; bua muanda eu, ne nuenu nuela miji ne [“nushindama pa tshishimikidi,” NW].’​—Efeso 3:14-17.

19. Ntshinyi tshidi ne bua kuikala tshipeta tshia diibaka dinanga bua Kristo mu mitshima ya batudi tulongesha Bible, kadi mmalu kayi atudi ne bua kulongesha?

¹⁹ Bituibaka bua dinanga dia Kristo kukoladi mu mitshima ya bantu batudi tulongesha, nebibafikishe ku dikolesha dinanga bua Yehowa Nzambi. Dinanga ne luse lua Yezu bidi bileja bimpe menemene ngikadilu ya Yehowa. (Matayo 11:28-30; Mâko 6:30-34; Yone 15:13, 14; Kolosai 1:15; Ebelu 1:3) Nenku bantu buobu bafike ku dimanya ne ku dinanga Yezu, nebamanye ne nebanange kabidi Yehowa.a (1 Yone 4:14, 16, 19) Tudi ne bua kulongesha balongi ba Bible ne: Yehowa ke uvua mpokolo wa bionso bidi Yezu muenzele bukua-bantu ne se: tudi ne bua kumuela tuasakidila, kumutumbisha ne kumutendelela bu ‘Nzambi [wa] lupandu luetu.’​—Musambu 68:19, 20; Yeshaya 12:2-5; Yone 3:16; 5:19.

20. (a) Mmunyi mutudi mua kuambuluisha bantu bua basemene pabuipi ne Nzambi ne Muanende? (b) Ntshinyi tshituakonkonona mu tshiena-bualu tshidi tshilonda?

²⁰ Bu mutudi benzejanganyi ba mudimu ne Nzambi, tuambuluishayi bantu bua basemene pabuipi nende ne pabuipi ne Muanende, tubambuluishe bua kukoleshabu dinanga ne ditabuja mu mitshima yabu. Nenku nebamone Yehowa bu muntu mulelela. (Yone 7:28) Ku butuangaji bua Kristo, nebafike ku didia malanda a nsungasunga ne Nzambi, ne nebamunange ne nebamulamate. Kabakudikosela tshikondo tshia kuenzela Nzambi mudimu ne dinanga nansha. Badi ne dishindika dikole dia se: malaya malenga a Yehowa neakumbane mu tshikondo tshidiye mujadike. (Muadi 3:24-26; Ebelu 11:6) Kadi nansha patudi tuambuluisha bakuabu bua kukolesha ditabuja, ditekemena ne dinanga, tudi ne bua kukolesha ditabuja dietu tuetu bine bua dikale bu mazuwa makole adi mua kukandamena mpepele mikole. Netukonkonone bualu ebu mu tshiena-bualu tshidi tshilonda.

[Mêyi adi kuinshi]

Diambulula

◻ Mmunyi mututu tukoka ntema ya bantu ku mukenji wa Bukalenge, kadi nnjiwu kayi idiku?

◻ Mbantu ba mushindu kayi batu Yehowa ukoka kudiye ne kudi Muanende?

◻ Ntshinyi tshivua tshilombibue bua bena Isalele kubuelabu mu Buloba Bulaya, ne ntshinyi tshitudi tulongelaku?

◻ Mmudimu kayi utudi nawu mu diambuluisha bantu bua kusemena pabuipi ne Yehowa ne Muanende?

[Tshimfuanyi mu dibeji 10]

Nansha mutudi tuleja bantu ditekemena dia muoyo wa kashidi mu Mparadizu, tshipatshila tshietu tshinene ntshia kubasemeja pabuipi ne Yehowa

[Bimfuanyi mu dibeji 13]

Makumbula etu adi mua kupatula bipeta bimpe bituadilongolola bilenga