Bansonga: Ibidijayi biumvuilu bienu!

“Biakudia bikole bidi bua bantu bapie, buobu badi bikale ne biumvuilu biabu bibidija ku dienza nabi mudimu, bua kusunguluja tshidi tshimpe ne tshidi tshibi.”​—EBELU 5:14, NW.

1, 2. (a) Mmunyi mudi nsombelu wetu lelu mufuanangane ne wa bena Kristo ba kale ba mu Efeso? (b) Nngikadilu kayi idi mua kukukuba ku njiwu, ne mmunyi muudi mua kuyikolesha?

‘NUDIMUKE bienu bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo patshiditshiku tshia kuenzamu malu mimpe, bualu bua matuku adi mabi.’ (Efeso 5:15, 16) Katshia mupostolo Paulo wafunda mêyi aa kukadi bidimu binunu bibidi, ‘bantu babi ne badingi ba bakuabu mbatungunuke mu dienza dia malu mabi.’ Tudi mu ‘matuku a ku nshikidilu a malu makole,’ anyi bu mudi nkudimuinu mukuabu wandamuna, bikondo bidi “biûle ne njiwu.”​—2 Timote 3:1-5, 13; MML.

² Kadi udi mua kuepuka njiwu idi mua kuikala mikualamine mu njila pa kukolesha ‘budimu, [dimanya, NW] ne bukole bua kupangadija malu makane.’ (Nsumuinu 1:4) Nsumuinu 2:10-12 (MMM) udi wamba ne: ‘Padi meji abuela munda muebe, ne padi dimanya dikusankisha mu muoyo webe, [busunguluji, NW] nebukukube, lungenyi nelukulame, nelukuepule mu njila mubi, ne ku bantu badi bakula miaku mibi.’ Kadi mmunyi muudi mua kukolesha ngikadilu eyi? Ebelu 5:14 (NW) udi wamba ne: “Biakudia bikole bidi bua bantu bapie, buobu badi bikale ne biumvuilu biabu bibidija ku dienza nabi mudimu, bua kusunguluja tshidi tshimpe ne tshidi tshibi.” Anu bu mutubi bua dimanya kayi dionso, bua kumanya mua kuenza mudimu bimpe ne biumvuilu, bidi bikengela kubibidija. Muaku wa mu tshiena-Greke udi Paulo mutele udi umvuija: ‘kuikala muibidija bu muena manaya a dibidija mubidi.’ Mmunyi muudi utuadija dibidija edi?

Ibidija biumvuilu biebe

3. Mmunyi muudi mua kuenza mudimu ne biumvuilu biebe paudi kumpala kua dipangadika kampanda?

³ Tangila ne: udi wibidija biumvuilu biebe​—anyi bukole buudi nabu bua kusunguluja tshidi tshimpe ne tshidi tshibi—​“ku dienza nabi mudimu.” Paudi ne bua kuangata dipangadika, kufuikakaja anyi kuenza malu mu tshiputuku peshi kulonda patupu bakuabu kakuena mua kukufikisha ku disungula bualu bua meji nansha. Bua kuangata mapangadika a meji, udi ne bua kuenza mudimu ne biumvuilu biebe. Mushindu kayi? Tshia kumpala, udi ne bua kukonkonona nsombelu bimpebimpe ne kumvua malu onso. Udi mua kudiela nkonko padibi bikengedibua. Wikale mujadike malu audi musue kuenza. Nsumuinu 13:16 udi wamba ne: ‘Muntu mudimuke yonso udi wenza malu ende ne lungenyi.’ Pashishe, keba bua kujadika mikenji anyi mêyi-maludiki a mu Bible adi akula bua tshilumbu etshi. (Nsumuinu 3:5) Bua kuenza bionso ebi, udi ne bua kuikala ne dimanya dia mu Bible. Ke bua tshinyi Paulo udi utukankamija bua kudia “biakudia bikole”​—kulonga ‘butshiame ne bule ne butumbuke ne buondoke’ bua bulelela.​—Efeso 3:18, MMM.

4. Bua tshinyi dimanya dia mêyi-maludiki a Nzambi didi ne mushinga wa bungi?

⁴ Kuenza malu aa kudi ne mushinga wa bungi bualu tudi bapange bupuangane ne bikale ne meji matangija anu ku mpekatu. (Genese 8:21; Lomo 5:12) Yelemiya 17:9 udi wamba ne: ‘Mutshima udi upita bintu bionso kudinga muntu, ne udi utamba kunyanguka.’ Kuoku kakuyi mêyi a Nzambi bua kutuludika, tudi mua kudidinga pa kuela meji ne: tshintu kampanda ntshimpe patshi tshikale tshibi​—anu bualu mubidi wetu udi utshikeba ne muoyo mujima. (Tangila Yeshaya 5:20.) Mufundi wa misambu wakamba ne: ‘Nsongalume nealengeje bienzedi biende munyi? Adimuke biende bu mudi dîyi diebe diamba. Ndi mpeta lungenyi ku mêyi audi ungambila, nunku ndi nkina njila yonso ya mashimi.’​—Musambu 119:9, 104.

5. (a) Bua tshinyi bamue bansonga badi balonda njila ya mashimi? (b) Mmunyi muvua nsongakaji kampanda mufike ku dinanga bulelela?

⁵ Bua tshinyi bamue bansonga badi bakolele mu mêku a bena Kristo mbalonde njila ya mashimi? Kabienaku mua kuikala se: kabatu banji ‘kudijinguluila [tshidi] disua dia Nzambi didi dimpe, didi dimusankisha, ne didi diakane tshishiki’ anyi? (Lomo 12:2) Bamue badi mua kuikala babuela mu bisangilu pamue ne baledi babu ne bamanye mua kuambulula ku muoyo amue malongesha a ntaku a mu Bible. Kadi bidi bibungamija pa kumona mudi dimanya diabu dikese padibu babalomba bua kufila bijadiki bia malu adibu bitabuja anyi bua kumvuija amue malu muondoke a mu Dîyi dia Nzambi. Mbipepele bua kushima bansonga ba mushindu’eu. (Efeso 4:14) Biwikala mu nsombelu eu, bua tshinyi kubenga kuangata dipangadika dia kuenza mashintuluka? Muanetu wa bakaji kampanda mutshikale nsonga udi wamba ne: “Ngakenza makebulula. Ngakadiebeja ne: ‘Mmunyi mundi mujadike ne: etshi ke tshitendelelu tshilelela? Mmunyi mundi mumanye ne: kudi Nzambi diende Yehowa?’”a Kukonkonona mifundu ne lubatshi kuakamutuisha ne: malu avua baledi bende bamulongeshe avua malelela menemene!​—Tangila Bienzedi 17:11.

6. Mmunyi muudi mua ‘kusunguluja tshidi tshilengelela Mfumu’ Yehowa?

⁶ Wewe mumanye mêyi-maludiki a Yehowa, ‘neusunguluje tshidi tshilengelela Mfumu’ kakuyi lutatu. (Efeso 5:10, MMM) Kadi ntshinyi tshiudi mua kuenza paudi kuyi mujadike njila wa meji uudi ne bua kulonda mu nsombelu kampanda? Lomba lungenyi kudi Yehowa mu disambila. (Musambu 119:144) Uyukile ne baledi bebe anyi muena Kristo kampanda mupie pa malu au. (Nsumuinu 15:22; 27:17) Udi kabidi mua kupeta mibelu mimpe pa kuenza makebulula mu Bible ne mu mikanda ya Société Watch Tower. (Nsumuinu 2:3-5) Biumvuilu biebe nebitambe kutua paudi utamba kuenza nabi mudimu.

Leja busunguluji paudi ujikija lutetuku

7, 8. (a) Mmunyi muudi mua kuenza mudimu ne biumvuilu biebe bua kujadika bikalabi bikengela kubuela anyi kubenga kubuela mu difesto kampanda? (b) Ntshinyi tshidi Bible wamba bua dijikija lutetuku?

⁷ Tutangile mpindieu mushindu uudi mua kuenza mudimu ne biumvuilu biebe mu imue nsombelu misunguluke. Tshilejilu, fuanyikija ne: mbakubikile mu difesto kampanda. Pamu’apa mbakutumine mene mukanda ukumanyisha bua difesto adi. Badi bakuambila ne: Bantemu ba bungi bansonga nebikalemu. Kadi nebalombe makuta bua kupingaja pa adibu batule bua kusumba bintu. Neuyemu anyi?

⁸ Enza mudimu ne biumvuilu biebe. Tshia kumpala, manya mudibu balongolole malu. Mbantu bungi munyi bikala mu difesto adi? Mbanganyi bikalemu? Nedituadije dîba kayi? Nedijike dîba kayi? Mmalu kayi adibu balongolole? Mmunyi mualudikabu difesto adi? Pashishe, enza amue makebulula, udi mua kutangila biena-bualu bia: “Réunions récréatives,” ne “Divertissement” mu mukanda wa Index.b Ntshinyi tshialeja makebulula ebe? Tshia kumpala, nealeje ne: Yehowa ki mmukandike disangila pamue bua kusanka nansha. Bushuwa, Muambi 8:15 udi wamba ne: padiye wenza mudimu mukole, ‘muntu kêna ne bualu buimpe bukuabu muinshi mua dîba budi butamba kudia, kunua ne kusanka.’ Nansha Yezu Kristo muine wakaya mu didia dia pa buadi ne wakabuela mu difesto dimue dia dibaka. (Luka 5:27-29; Yone 2:1-10) Bantu badi mua kupeta diambuluisha dia bungi mu disomba pamue dia mushindu’eu bikalamu nkatshinkatshi.

9, 10. (a) Nnjiwu kayi idi mua kuikala mu amue mafesto? (b) Nnkonko kayi iudi ne bua kudiela kumpala kua kupangadija bua kubuela anyi kubenga kubuela mu difesto kampanda?

⁹ Kadi, mafesto adi kaayi malongolola bimpe adi mua kufikisha ku ndululu. Mu 1 Kolinto 10:8 (MML), tudi tubala muvua dibenga kuleja meji mu mafesto difikishe ku masandi ne ku dishipesha bena Isalele bapange lulamatu “binunu makumi abidi ne bisatu . . . dituku dimue.” Didimuija dikuabu dia mushinga didi mu Lomo 13:13 (MMM) ndia se: “Bu mutudi mu munya, tuende mu buakane; tulekele budiavi ne bunuavi, tshiendenda ne malu a bundu, matandu ne lubabu.” (Tangila 1 Petelo 4:3.) Bushuwa, katuena mua kujadika bungi busunguluke bua bantu badi mua kubuela mu difesto kampanda nansha. Kadi malu mamona adi aleja ne: padi difesto dikale ne bantu ba bungi mbikole bua kudiludika bimpe. Mafesto a bantu bakese ne malongolola bimpe kaatu alua “mafesto mabi” to.​—Galatia 5:21, Byington.

¹⁰ Kakuyi mpata, makebulula ebe neajule nkonko mikuabu bu mudi eyi: Bamue bena Kristo bapie mu nyuma nebikalemu anyi? Nnganyi menemene udi muambule bujitu bua difesto adi? Tshipatshila tshia difesto edi ntshia kukankamija disomba dilenga anyi ntshia kukumbaja dijinga dia muntu kampanda? Kudiku mikalu bua bantu badi ne bua kubuelamu anyi? Bikala difesto dienzeka ku ndekelu kua lumingu, nedijike dîba dimpe bua bantu badimu kumonabu mua kuenza mudimu wa bena Kristo dituku didi dilonda anyi? Bikalabu balongolole mijiki ne maja, nebipetangane ne mêyi-makulu a bena Kristo anyi? (2 Kolinto 6:3) Kudiela nkonko eyi kakuena mua kuikala kutekete nansha. Kadi Nsumuinu 22:3 udi udimuija ne: ‘Muntu mudimuke udi utangila dikenga diamba kumukuata, udi usokoma; kadi batshimbakanyi badi bapitaku, badi bakengeshibua.’ Bushuwa, udi mua kuepuka nsombelu ya njiwu pa kuenza mudimu ne biumvuilu biebe.

Leja busunguluji paudi upangadija bua kulonga tulasa

11. Mmunyi mudi bansonga mua kuenza mudimu ne biumvuilu biabu mu dilongolola malu abu a matuku atshilualua?

¹¹ Bible udi wamba ne: mbimpe kudianjila kulongolola malu bua matuku atshilualua. (Nsumuinu 21:5) Wewe ne baledi bebe nukadiku bakule bua malu awenza mu matuku ebe atshilualua anyi? Pamu’apa udi mulongolole bua kuenza mudimu wa ku dîba ne ku dîba bu mpanda-njila. Bushuwa, kakuena mudimu mukuabu mulenga udi mua kufila disanka dia bungi bu eu nansha. Wewe muikale ne bibidilu bimpe bia didilongela ne mukoleshe mamanya ebe a mudimu wa buambi, nanku udi muikale udilongolola bua mudimu eu udi usankisha. Ukadiku muele meji bua mushindu uwikala mua kudiambuluisha mu mudimu eu anyi? Pikalabi se: mu matuku atshilualua udi upangadija bua kulela, newikale ne mushindu wa kuambula bujitu abu bupiabupia anyi? Kuangata mapangadika makanyine ne malelela bua malu a mushindu’eu kudi kulomba bua kuenza mudimu ne biumvuilu biebe.

12. (a) Mmalu kayi adi amue mêku mapangadije bua kuenza pa kumona mudi nsombelu ya malu a bubanji yenda ishintuluka? (b) Kutungunuka ne tulasa kudiku menemene kubengangana ne tshipatshila tshia kuikala mpanda-njila anyi? Umvuija.

¹² Mu amue matunga kutshidi mushindu wa kulongela mudimu wa bianza pambelu. Kudi bansonga badi balonga mua kusumbisha bintu bidi bena mu dîku bapana anyi badi balongela bungenda kudi balunda babu bakadi bantu bakulumpe badi mu mudimu eu. Bakuabu batu balonga tulasa tuikala mua kubambuluisha pashishe bua kupeta mushindu wa kudia ne kuvuala. Muaba udiku kakuyi mushindu wa kulonga malu aa, kunyima kua bamane kuelangana meji bimpe, baledi badi mua kulongolola bua bana babu kutungunukabu ne tulasa pakadibu bajikija tulasa tua bikadilu. Kudianjila kulongolola malu mushindu’eu bua kumona mua kuambula majitu a ku buntu bukulumpe ne nangananga bua kumona mua kuenza mudimu wa bumpanda-njila munkatshi mua tshikondo tshile kakuena kubengangana ne diteka Bukalenge bua Nzambi pa muaba wa kumpala nansha. (Matayo 6:33) Kutungunuka ne tulasa kakuena kupangisha bua kuenza bumpanda-njila to. Tshilejilu, nsongakaji kampanda Ntemu uvua musue kuenza bumpanda-njila munkatshi mua matuku a bungi. Yeye mumane kujikija tulasa tua bikadilu, baledi bende​—bikale pabu bampanda-njila ba pa tshibidilu—​bakalongolola bua yeye kutungunuka ne tulasa. Uvua wenza bumpanda-njila eku muikale ulonga, ne mpindieu udi ne mushindu wa kudiambuluisha eku utungunuka ne mudimu wa bumpanda-njila.

13. Mmunyi mudi mêku ne bua kubala mushinga wa ditungunuka ne malonga?

¹³ Bua tshilumbu tshia kutungunuka ne tulasa, dîku dionso didi ne bukenji ne bujitu bua kudiangatshila dipangadika. Buobu basungule bimpe tulasa atu, tudi mua kuambuluisha bikole. Nansha nanku tulasa etu tudi mua kuikala kabidi buteyi. Ntshipatshila kayi tshiudi natshi biwikala wela meji bua kutungunuka ne tulasa? Ntshia kudilongolola bua kuambula majitu a ku buntu bukulumpe mu mushindu muakanyine anyi? Peshi udi “udikebela malu manene”? (Yelemiya 45:5; 2 Tesalonike 3:10; 1 Timote 5:8; 6:9) Netuambe tshinyi bua kumbuka kumbelu bua kuya kutungunuka ne malonga kua bende, pamu’apa kuya kusombela mu kampise anyi mu enterna? Bualu abu nebuikale bua meji patudi tutangila didimuija dia Paulo dia se: “malunda mabi adi anyanga malu makane a bantu” anyi? (1 Kolinto 15:33; 2 Timote 2:22) Vuluka kabidi ne: ‘matuku adi mashale mmakese.’ (1 Kolinto 7:29, MML) Mmatuku bungi kayi awenza bua kulonga tulasa etu? Tulasa etu netudie tshitupa tshinene tshia bidimu biebe bia bunsonga anyi? Bikalabi ne: eyowa, mmunyi muwatumikila dikankamija didi Bible ufila dia ‘kuvuluka Mufuki webe mu matuku a bunsongalume buebe’? (Muambi 12:1) Kabidi, tulasa tuine etu netukupeshe mushindu wa kukumbaja malu a mushinga a bena Kristo bu mudi kubuela mu bisangilu, kuenza buambi ne kudilongela anyi? (Matayo 24:14; Ebelu 10:24, 25) Biumvuilu biebe biobi bitue, kuakupanga kuikala ne bipatshila bia mu nyuma pawikala wewe ne baledi bebe nulongolola malu bua matuku ebe atshilualua.

Ditantshilangana dia kanemu

14. (a) Mmêyi kayi adi ne bua kuludika bantu badi babangilangane padibu balejangana dinanga? (b) Mmunyi mudi bamue babangilangana baleje meji makese mu tshilumbu etshi?

¹⁴ Muanda mukuabu udi ulomba bua wikale ne biumvuilu nditantshilangana. Ki mbibi bua kuleja dinanga kudi muntu uudi mutekele muoyo. Kakuyi mpata, babangilangana bakadilama bimpe badibu batele mu Musambu wa Solomo bakenzelangana amue malu a dinanga kumpala kua kuselanganabu. (Musambu wa Solomo 1:2; 2:6; 8:5) Lelu’eu, bamue bantu badi batantshilangana badi mua kuela meji bia muomumue ne: kukuatangana ku tshianza, kutuangana mishiku ne kupukilangana ki mbibi to, nangananga pakadi dibaka pabuipi. Kadi vuluka ne: ‘Udi weyemena mutshima wende udi mupote.’ (Nsumuinu 28:26) Bia dibungama, babangilangana ba bungi bakapanga meji pa kuditeka mu nsombelu ivua ibela mu diteta. Dilejangana diabu dia dinanga diakalua dikole kakuyi mushindu wa kudikanda; kuenzabu malu avua kaayi makane ne kufikabu too ne ku dienda masandi.

15, 16. Mmapangadika kayi a meji adi babangilangana ne bua kuangata bua kuikala bajadike ne: ditantshilangana diabu nedikale dia kanemu?

¹⁵ Biwikala ne mubangila webe, leja meji pa kuepuka dikala nende nkayebe mu nsombelu idi kayiyi miakanyine. Nenku bidi mua kuikala bitambe buimpe bua kusombeshangana muaba udi banga bantu anyi kusombela miaba ya patoke. Bamue babangilangana batu balongolole bua kuikala ne muntu udi muikale ubafila dîba dionso. Kabidi, tangila tshidi Hoshea 4:11 wamba: ‘Maluvu ne mvinyo mipiamipia bidi biumusha meji a mu mutshima.’ Maluvu adi mua kunyanga lungenyi ne kufikisha babangilangana ku dienza bualu buikala mua kubanyingalaja kunyima.

¹⁶ Nsumuinu 13:10 udi wamba ne: ‘Kudisua kudi kupatula anu matandu, kadi badi [bebejangana, NW] lungenyi badi ne meji.’ Bushuwa, ‘nuebejangane lungenyi’ ne nuakule bua ngikadilu unudi ne bua kuikala nende. Nuele mikalu bua mushindu unudi ne bua kulejangana dinanga ne muntu yonso anemeke kuondo ka muoyo ka mukuabu ne bidiye umvua. (1 Kolinto 13:5; 1 Tesalonike 4:3-7; 1 Petelo 3:16) Kuyukila malu aa manene kudi mua kuikala kukole ku ntuadijilu, kadi kudi mua kupangisha bilumbu binene bua kumuenekabi kunyima.

Bayisha ‘ku buana too ne mpindieu’

17. Mmunyi muvua Davidi muvuije Yehowa ‘tshieyemenu tshiende kubangila ku buana,’ ne ndilongesha kayi didi bansonga mua kupeta lelu mu muanda eu?

¹⁷ Nebikengele kuikala ne budimu misangu yonso bua kuepuka mateyi a Satana​—ne pamu’apa kuikala ne dikima dikole. Ku misangu udi mua kudimona kuyi umvuangana, ki ng’anu ne balunda bebe, kadi ne bantu bonso. Davidi mufundi wa misambu wakasambila ne: ‘Wewe, Mukalenge Yehowa, udi ditekemena dianyi; udi tshieyemenu tshianyi ku buana buanyi too ne katataka. Nzambi, wewe wakunyisha ku buana buanyi too ne mpindieu; too ne mpindieu ntshidi ngambila bantu bua bienzedi biebe bia kukema.’ (Musambu 71:5, 17)c Davidi mmumanyike bua dikima divuaye nadi. Kadi ndîba kayi divuaye mudipete? Wakadipeta patshivuaye nsonga! Nansha kumpala kua kuluanganaye mvita ne Goleyata itudi bamanye bimpe, Davidi ukavua muleje dikima dia pa buadi pakashipaye ntambue ne nkashama bua kukuba mikoko ya tatuende. (1 Samuele 17:34-37) Nansha nanku, Davidi wakapesha Yehowa lumu bua dikima dionso divuaye muleje, umubikila ne: ‘tshieyemenu tshianyi ku buana buanyi too ne katataka.’ Davidi wakapeta dikima dia kutantamena mateta onso akamufikila bualu uvua mueyemene Yehowa. Wewe pebe neumone se: wewe mueyemene Yehowa, neakupeshe dikima ne bukole bua ‘kutshimuna bukua-panu.’​—1 Yone 5:4, Mukenji Mulenga.

18. Mmubelu kayi udibu bapeshe bansonga badi batshina Nzambi lelu’eu?

¹⁸ Bansonga binunu bivule bu wewe mbangate dipangadika dia dikima ne badi mpindieu basadila bu bamanyishi ba lumu luimpe batambule. Tudi tusakidila Nzambi bua ditabuja ne dikima dinudi nadi nuenu bansonga! Nuikale anu bapangadije bua kuepuka malu mabole a bukua-panu. (2 Petelo 1:4) Nutungunuke ne kuenza mudimu ne biumvuilu bienu bilongesha kudi Bible. Dienza nenku nedinukube ku dikenga mpindieu ne nedinupeteshishe lupandu ku ndekelu. Bushuwa, anu bu mualeja tshiena-bualu tshietu tshia ndekelu, nenutute diakalengele mu nsombelu wenu.

[Mêyi adi kuinshi]

Nkonko bua kuambulula

◻ Mmunyi mudi nsonga wibidija biumvuilu biende?

◻ Mmunyi mudi nsonga mua kuenza mudimu ne biumvuilu biende bua dibuela mu mafesto a bena Kristo?

◻ Mmalu kayi adi muntu ne bua kukonkonona padiye wangata mapangadika bua tulasa tuende?

◻ Mmunyi mudi bantu badi babangilangane mua kuepuka buteyi bua dienda masandi?

[Tshimfuanyi mu dibeji 15]

Dilonga mua kuenza makebulula nedikuambuluishe bua kuibidija biumvuilu biebe

[Tshimfuanyi mu dibeji 16]

Padi mafesto mikale ne bantu bakese, mbipepele bua kualudika bimpe ne kaena mua kulua mangumba a bantu kabayi kukanda

[Tshimfuanyi mu dibeji 16]

Baledi badi ne bua kuambuluisha bana padibu bangata mapangadika adi atangila tulasa tuabu

[Tshimfuanyi mu dibeji 17]

Disomba ne mubangila webe muaba udi banga bantu nedikukube