Bansonga bàdì bavuluka Mufuki wabu

“Nunku, uvuluke Mufuki webe Munene mu matuku a bunsongalume buebe.”​—MUAMBI 12:1, NW.

1. Mbiambilu kayi bia muana wa mvula 11 bìdì bisokolola ne: Mufuki wetu mmuntu mulelela kudiye?

MMUNYIPU mudibi bilenga padi bansonga bakula ne benza malu mu mushindu udi uleja ne: badi bamona Yehowa Nzambi bu muntu mulelela udibu banyisha ne basua kusankisha! Muana wa balume wa mvula 11 wakamba ne: “Pandi nkayanyi ne ntangidila pa dididishi, ndi mmona mudi bifukibua bia Yehowa bikale bia dikema. Pashishe ndi ntuadija kuela meji bua mushindu wikala Mparadizu mulengele mu matuku atshilualua ne mushindu ungikala ne bua kulenga nyama tshikondo atshi.” (Yeshaya 11:6-9) Wakasakidila ne: “Pandi nkayanyi, ndi nsambila Yehowa. Ndi mumanye ne: kakumfiikila munda bua diakula nende dîba dionso. Ndi mumanye ne: udi misangu yonso untangila.” Mufuki wetu mmulelela kuudi bu mudiye bua muana wa balume eu anyi?

Mmunyi mudi Nzambi muikale mulelela kuudi?

2. (a) Mmunyi mudi Mufuki webe mua kulua mulelela kuudi? (b) Mmuaba kayi udi baledi mua kuikala nawu mu diambuluisha bana babu bua kuanyisha ne: Nzambi mmuntu mulelela?

² Bua Yehowa kuikalaye muntu mulelela kuudi, pamue ne malaya ende, udi ne bua kulonga bangabanga malu àdì amutangila ne matuku atshilualua a dikema adiye ukupesha mu bulongolodi bupiabupia bua buakane budi Bible umvuija. (Buakabuluibua 21:3, 4) Pikala baledi bebe bakulongeshe malu aa, udi ne kabingila ka kuleja dianyisha bualu ebi bidi bikuambuluisha bua kulonda dîyi-dituma edi dienzeja ku spiritu: “Nunku, uvuluke Mufuki webe Munene.” (Muambi 12:1, NW) Nsongakaji kampanda wakamba pa bidi bitangila dishidimunyibua diende dia kumpala dia kudi baledi ne: “Tshintu tshionso mu nsombelu tshivua misangu yonso tshilua panyima pa Yehowa. Eu uvua nsapi wa divuluka dianyi dia Mufuki wanyi.” Nsongakaji mukuabu wakamba ne: “Nengikale tshiendelele ne dianyisha kudi baledi banyi bua mudibu bandongeshe ne: Yehowa mmuntu mulelela. Bakandeja mushindu wa kumunanga ne bakangambila pa bidi bitangila disanka dia kumusadila ku dîba ne ku dîba.”

3, 4. Ntshinyi tshidi mua kukuambuluisha bua kuela meji pa bidi bitangila Yehowa bu muntu mulelela?

³ Pabi, bavule badi ne lutatu lua kuangata Nzambi bu muntu mulelela udi ubatabalela. Bidi nanku buebe anyi? Nsongalume kampanda wakambuluishibua bua kuela meji pa bidi bitangila Nzambi mu mushindu wa pa nkayende kudi tshiambilu etshi tshia mu Tshibumba tshia Nsentedi: “Mushindu udi Yehowa Nzambi muikale munene pa bidi bitangila mubidi wende, katuena bamanye.” Bushuwa, bunême bua Nzambi kabuena busuikakaja ku bunene buende anyi ku tshimuenekelu tshiende, anu bu muakamba tshiambilu tshidi tshilonda tshia mu Tshibumba tshia Nsentedi atshi: “Bunene buende menemene budi mu dikala Nzambi wa mushindu udiye,” eyowa, Nzambi wa lulamatu, wa luse, wa dinanga, ne mufuidianganyi wa luse.a (Ekesode 34:6; Dutelonome 32:4; Musambu wa 86:5; Yakobo 5:11) Udiku mufike ku dimona Yehowa bu muntu wa nunku, mulunda wa kueyemena uudi mua kuikala nende ne malanda a mushinga mukole anyi?​—Yeshaya 41:8; Yakobo 2:23.

⁴ Yezu wakambuluisha balondi bende ba kumpala bua kupeta malanda a muntu pa nkayende ne Nzambi. Nunku, pakafunda mupostolo Yone pa dibiishibua diende ditekemena bua kuikala ne muoyo mu diulu, Yone wakamba ne: “Netuikale bafuanangane [ne Nzambi]; bualu bua netumumone bu mudiye.” (1 Yone 3:2; 1 Kolinto 15:44) Lelu’eu bansonga badi pabu mua kuambuluishibua bua kumona Nzambi bu muntu mulelela, muntu udibu mua kumanya bimpe nansha mudibu kabayi mua kumumona yeye muine nkayende. Nsongalume kampanda wakabambisha ne: “Baledi banyi bavua bangambuluisha bua kuvuluka Yehowa pa kungela nkonko mivule, bu mudi eyi: ‘Yehowa neambe tshinyi? Mmunyi muudi mua kubiumvuija mu mêyi ebe nkayebe? Abi bidi biumvuija tshinyi?’” Nkonko ya mushindu’eu kayenaku ituelesha meji pa malanda etu nkayetu ne Nzambi anyi?

Tshidi kuvuluka kumvuija

5. Mbilejilu kayi bia mu Bible bidi bileja ne: kuvuluka muntu kudi kumvuija bivule kupita ditutshila dîna diende muoyo?

⁵ Ditumikila dîyi-dituma edi ne: “Nunku, uvuluke Mufuki webe Munene,” didi diumvuija bivule kupita diela meji patupu pa bidi bitangila Yehowa. Didi dilomba dienza bualu, dienza tshidi tshimusankisha. Pavua muena tshibawu musengelele Yezu ne: ‘Pawabuela mu bukalenge buebe, umvuluke,” uvua ujinga bua Yezu kuenzaye bivule kupita ditutshila amu dîna diende muoyo. Uvua musue bua Yezu enze bualu kampanda, bua amubiishe. (Luka 23:42) Bia muomumue, muena buloko Yozefe uvua mutekemene tshienzedi kampanda buende yeye pakalombaye mutuadi wa dikopo wa Faraone bua kuvulukaye bua bualu buende kudi Faraone. Ne pakalomba Yobo Nzambi ne: ‘Umvuluke,’ Yobo uvua ulomba ne: mu tshikondo kampanda tshivua kumpala, Nzambi enze bua kumubiisha ku bafue.​—Yobo 14:13; Genese 40:14, 23.

6. Mmunyi mudi muaku wa tshiena-Ebelu bua “kuvuluka” umvuija kujinga tshintu anyi muntu udibu bavuluke?

⁶ Mukanda kampanda udi wamba ne: muaku wa tshiena-Ebelu mukudimuna ne: “kuvuluka” utu misangu mivule umvuija “kujinga kua mu tshieledi tshia lungenyi ne tshienzedi tshidi tshiya pamue ne bukokeshi bua ditutshila muoyo.” Diumvuangana pankatshi pa “kujinga” ne muaku “kuvuluka” didi mua kumueneka mu tshikemu etshi tshia “musumba mutompakaja”, NW) mu tshipela ne: “Tutshidi amu tuvuluka mishipa ituvua tudia mu Ejipitu!” Anu bu muakasengelela Yobo bua Nzambi kumuvulukaye ne dianyisha, nunku Hezikiya, Nehemiya, Davidi, ne mufundi mukuabu wa misambu ukena mumanyike dîna bakalomba pabu bua Yehowa abavuluke ne kujinga bu dianyisha dia lulamatu luabu.​—Dibadika 11:4, 5, MMM; 2 Bakelenge 20:3; Nehemiya 5:19; 13:31; Misambu 25:7; 106:4.

7. Bituavuluka Nzambi ne kujinga, mmunyi muikalabi ne buenzeji mu bikadilu bietu?

⁷ Nunku tudi mua kudiebeja ne: ‘Tudiku tuvuluka Mufuki wetu ne kujinga, ne tuepuka dienza bualu kayi buonso budi mua kumukebela diumvua bibi peshi kumunyingalaja anyi?’ Nsongakaji kampanda wakamba ne: “Mamu wakangambuluisha bua kujingulula se: Yehowa udi ne nyanji (sentiments), ne pantshivua ne bidimu bikese, ngakamanya ne: bienzedi bianyi bivua ne buenzeji kudiye.” (Musambu wa 78:40-42) Mukuabu wakumvuija ne: “Mvua mumanye ne: bienzedi bianyi bivua mua kuambuluisha anyi kupangisha bua kuandamuna ku mufuno wa Satana kudi Yehowa. Mvua musue bua kusankisha mutshima wa Yehowa, nunku abi biakangambuluisha ne mbitungunuke ne kungambuluisha lelu’eu.”​—Nsumuinu 27:11.

8. (a) Ntshipatshila kayi tshialeja ne: tudi tuvuluka Yehowa ne kujinga? (b) Nnkonko kayi idi bansonga ne bua kukonkonona ne meji?

⁸ Tudi mua kuitaba se: mu bulongolodi ebu bubi, ki mbipepele pa tshibidilu bua kuvuluka Yehowa pa kudifila tshishiki mu mudimu ùdì umusankisha. Kadi mmunyipu muikalabi bilenga biwidikija nsongalume Timote wa mu siekele wa kumpala​—kabiyi kupua muoyo binunu bia bansonga batshinyi ba Nzambi lelu’eu—​pa kuipatshila mudimu wa Buena-nkristo wa ku dîba ne ku dîba bu ministre mpanda-njila! (Bienzedi 16:1-3; 1 Tesalonike 3:2) Nansha nanku, tudi mua kukonka ne: Neukokeshe mua kudiambuluisha wewe nkayebe mu mudimu wa bumpanda-njila anyi? Ne biwasela, newikale ne makokeshi bua kutabalela bena mu dîku diebe anyi? (1 Timote 5:8) Eyi nnkonko minene, ne mbia mushinga mukole bua wewe kuelanganapu meji biakane.

Malonga àdì ne tshipatshila

9. Ndipangadika kayi didi kumpala kua bansonga didi ditangila malonga a mu bulongolodi ebu?

⁹ Bu mudi nsangilu wa bantu utamba kulua nkongo ne nsanzu, dilonga dia tulasa tua bungi didi mua kukengedibua bua kupeta mudimu mukumbanyine bua kudiambuluisha wewe nkayebe mu mudimu wa bumpanda-njila. Udi mua kuikala mumone se: nansha bamue bàvuà balonge mu université bavua ne bua kubalongesha tshiakabidi bua buobu kupeta nzanzu mipiamipia idi bamfumu ba midimu batua mushinga lelu’eu. Nunku ndilonga dia tulasa bungi kayi dinuipatshile nuenu bansonga bàdì basue kusankisha Nzambi? Dipangadika didi ne bua kuangatshibua biakane pa kuikala ne dîyi-dituma edi mu lungenyi: “Nunku, uvuluke Mufuki webe Munene.”

10. Mmalongesha kayi matambe buimpe atudi mua kupeta?

¹⁰ Bushuwa, neusue kulonda tshidi nansha mene bakokeshi bavule ba mu bulongolodi ebu bamona bu malongesha matambe buimpe ku onso​—aa adi mapetela ku dilonga dia Dîyi dia Nzambi ne ntema. Mufundi wa mikanda wa bena Allemagne Johann Wolfgang von Goethe wakafunda ne: “Padi dilubuluka mu meji dia [tshisamba kampanda] dikale dia bungi, bidi mua kulua kuenzeka bikole menemene bua kutumikatshi ne Bible bu tshishimikidi ne bu tshiamu tshia mudimu bua malongesha.” Eyowa, dilonga dia Bible nedikuakaje bimpe mu nsombelu kupita malonga makuabu kayi onso!​—Nsumuinu 2:6-17; 2 Timote 3:14-17.

11. (a) Mmudimu kayi mutambe mushinga ku yonso utudi mua kuenza? (b) Bua tshinyi nsonga mukuabu wakasungula bua kupeta ndambu wa malonga?

¹¹ Bu mudi dimanya dia Nzambi dikale dipeteshi dia muoyo, mudimu ùdì ne mushinga ku yonso uudi mua kuenza lelu’eu ng’wa kuabanyangana dimanya edi ne bakuabu. (Nsumuinu 3:13-18; Yone 4:34; 17:3) Kadi, bua kuenza nunku ne kupatula bipeta, bidi bikengela wikale mulonge mu mishindu ya nshindamenu. Udi ukengela bua kuela meji mu mushindu mutokesha, kuakula malu alonda lungenyi, ne kubala ne kufunda bimpe​—makokeshi adi mafila mu tulasa. Nunku angata malonga ebe a mu tulasa ne muoyo umue, bu muakenza Tracy, nsongakaji kampanda wa mu Florida, mu États-Unis, wakapeta dipolome mu tshilongelu tshibandile pa kupeta lumu mu tshilongelu etshi. Wakumvuija ditekemena diende ne: “Ntu misangu yonso ne tshipatshila tshia kulua musadidi wa ku dîba ne ku dîba wa Nzambi wanyi Yehowa, ne ndi mutekemene se: malonga anyi neangambuluishe bua kukumbaja tshipatshila etshi.”

12. Bikala malonga a pa mutu a mu bulongolodi ebu masungudibue, adi mua kuambuluisha bua kukumbaja tshipatshila kayi?

¹² Ukadiku muele meji bua tshiudi uyila mu kalasa anyi? Bidi bangabanga bua kudiakaja wewe muine bua kulua ministre mukumbane wa Yehowa anyi? Pikalabi nanku, neusue kukonkonona ne muoyo umue mushindu udi malonga ebe akumbaja bimpe tshipatshila etshi. Kunyima kua mumane kuyukidilangana ne baledi bebe, dipangadika didi mua kuangatshibua se: utungunuke ne dilonga tulasa tubandile kupita pa bidi mikenji ya ditunga ilomba. Malonga a pa mutu a nunku adi mua kukukuatshisha bua kupeta mudimu wa ku mubidi bua wewe kudiambuluisha ne kabidi kukushiila dîba ne makanda bua kudifila tshishiki mu mudimu wa Bukalenge.​—Matayo 6:33.

13. Mmunyi mudi bena nkristo babidi bena Russie bakatungunuka ne malonga a pa mutu baleje tshipatshila tshiabu mu nsombelu?

¹³ Bamue bàdì batungunuka ne malonga a pa mutu mbadifile mu mudimu wa ku dîba ne ku dîba nansha patshidibu balonda malonga au. Tangila Nadia ne Marina, mishikankunde ibidi ya ku Moscou, mu Russie. Bonso babidi bakatambula mu Tshisanga 1994 ne bakatuadija kusadila bu ba-ministre bampanda-njila bambuluishi. Katupa kîpi kunyima bakapeta mapolome mu tshilongelu tshibandile ne bakalonda programe wa bidimu bibidi mu malu a bungenda. Mu Lumungulu 1995 bakatuadija mudimu wa bumpanda-njila bua pa tshibidilu, kadi bakalama muayene mubandile mu tulasa tuabu tua malu a bungenda. Kabidi, bavua balombola bubidi buabu, muayene wa malonga a Bible 14 ku lumingu eku batshikale baya mu kalasa. Bana ba bakaji aba mbatekemene se: malonga abu mu malu a bungenda neabambuluishe bua kupeta mudimu muakane, bua buobu kumona mua kudiambuluisha nkayabu mu mudimu wa ku dîba ne ku dîba.

14. Kabiyi kutangila mushiki wa malonga a mu bulongolodi ebu atudi tusungula, ntshintu kayi tshikala tshia mushinga mukole mu nsombelu yetu?

¹⁴ Biwatungunuka ne malonga kupita àdì mikenji ya ditunga ilomba, konkonona ne meji kabingila kebe kaudi wenzela nunku. Mbua kudipetela lumu ne mabanji a ku mubidi anyi? (Yelemiya 45:5; 1 Timote 6:17) Peshi tshipatshila tshiebe ntshia kutumika ne malonga a pa mutu aa bua kudifila tshishiki mu mudimu wa Yehowa? Lydia, nsongakaji kampanda wakasungula bua kutungunuka ne malonga a pa mutu, wakumvuija mmuenenu mulenga pa malu a mu nyuma, pa kuamba ne: “Bakuabu badi batungunuka ne malonga mabandile ne balekela dinanga dinekesha dia bintu ditshiamakana mu njila wabu, ne mbapue Nzambi muoyo. Buanyi meme, malanda anyi ne Nzambi ke tshintu tshitambe mushinga ku bionso kundi.” Mmuenenu kayipu muakanyine ka-lumbandi buetu bonso!

15. Mmishindu kayi mishilashilangane ya malonga ivua munkatshi mua bena nkristo ba mu siekele wa kumpala?

¹⁵ Bia mushinga, kuvua mishindu mishilashilangane ya malongesha munkatshi mua bena nkristo ba mu siekele wa kumpala. Tshilejilu, bapostolo Petelo ne Yone bakangatshibua bu bavua ‘kabayi bamanye mikanda ne bantu ba patupu’ bualu kabavua balongeshibue mu bilongelu bia ba-Rabbi. (Bienzedi 4:13) Mupostolo Paulo, ku luseke lukuabu, wakapeta tshidi tshifuanangane lelu ne malonga a mu université. Pabi, Paulo kakatumika ne malonga au bua kukoka ntema kudiye yeye muine; kadi, avua diakalenga pakayishaye bantu ba mianzu mishilangane mu nsombelu. (Bienzedi 22:3; 1 Kolinto 9:19-23; Filipoi 1:7) Bia muomumue, Manaene, “wakalonga pamue ne Herode mfumu wa distrike,” uvua munkatshi mua aba bàvuà ku mutu mu tshisumbu tshia ku Antiokia.​—Bienzedi 13:1, NW.

Bua tshinyi kutumika ne mfranga yebe ne meji?

16. (a) Bua tshinyi bidi mua kutamba kukola bua kuvuluka Mufuki wetu bituikala ne mabanza? (b) Mmunyi mudi umue wa ku mifuanu ya Yezu usokolola mushinga wa kuela meji kumpala kua kutula mfranga?

¹⁶ Biwapangila kutumika ne mfranga yebe ne meji, bidi mua kukukolela bua kuvuluka Mufuki webe pa kuenza tshidi tshimusankisha. Bualu biwabuela mabanza, tudi mua kuamba ne: udi ne mfumu mukuabu. Bible udi umvuija ne: ‘Musombi wa bintu udi mupika wa mumusombeshi.’ (Nsumuinu 22:7) Umue wa ku mifuanu ya Yezu udi wela kashonyi pa mushinga wa kuela meji kumpala kua kutula mfranga. “Nnganyi wa kunudi,” ke muakamba Yezu, “biasuaye kuibaka tshibumba, kêna wanji kusomba bua kupima mushinga, ne kumona bikalaye ne bia kutshijikija nabi? Tshianana, neikale mua kuasa bishimikidi biatshi, kadi kumona kayi mukokeshe mua kutshijikija, ne babandidi bonso nebatuadije kumuela nsenda.”​—Luka 14:28, 29, NW.

17. Bua tshinyi misangu mivule mbikole bua kukontolola ntudilu wetu wa mfranga?

¹⁷ Pa nanku, neutete ne meji bua kulonda dîyi-diludiki dia mu Mifundu dia ‘kubenga kuikala ne muntu dinga dibanza anu dia kunangangana.’ (Lomo 13:8) Kadi ebi mbikole bua kuenza, nangananga patudi tuakamangana misangu yonso ne dimueneka dia bintu bipiabipia bìdì basuishi bamba muudi bushuwa ubikengela. Muledi kampanda, udi mutete mua kuambuluisha bana bende bua kuikalabu ne busunguluji, wakamba ne: “Tudi bapitshishe tshikondo tshile mu diyukidilangana pa tshidi dikengela ne pa tshidi dijinga.” Mu tshi-bungi, bilongelu mbipange kulongesha malu bu nunku, bipetesha amu dimanya dikese pa mushindu wa kutumika ne mfranga mu mushindu wa meji. “Tudi tupeta mapolome mu bilongelu bibandile batambe kumanya tshipapu tshia nseke isatu, ibidi ya bule bumue, kupita mushindu wa kulama mfranga,” ke muakamba muena mudimu wa malu a nsangilu wa bantu. Nunku, ntshinyi tshidi mua kukuambuluisha bua kutula mfranga ne meji?

18. Ntshinyi tshidi nsapi wa ditumika ne mfranga ne meji, ne mbua tshinyi?

¹⁸ Ditumikila dilomba edi: “Nunku, uvuluke Mufuki webe Munene,” didi nsapi wa ditumika ne meji ne mpetu yebe. Bidi nunku bualu paudi utumikila dîyi-dituma edi, bualu buebe bua kumpala mbua kusankisha Yehowa, ne kujinga kuebe buende yeye kudi ne buenzeji pa mushindu uudi utula mfranga yebe. Pa nanku, newenze madikolela bua kubenga kulekela majinga ebe nkayebe atshiamakana mu dipesha Nzambi bulamate bua anyima mujima. (Matayo 16:24-26) Newenze madikolela bua kulama dîsu diebe “dipepele,” mbuena kuamba ne: ditangija mu butoke buonso ku Bukalenge bua Nzambi ne ku dienza dia disua diende. (Matayo 6:22-24, NW) Nunku neufike ku dimona mubelu wa kudi Nzambi wa ‘kutumbisha Yehowa ne biuma biebe’ bu muabi wa disanka.​—Nsumuinu 3:9.

Bansonga bakanyine didikija

19. Mmunyi muvua bansonga mu bikondo bishale bavuluke Mufuki wabu?

¹⁹ Diakalenga, bansonga bavule, ba kale ne ba lelu, mbavuluke Mufuki wabu. Samuele mutekete wakashala mushindame mu mudimu wa mu tabernakle nansha muvuaku buenzeji bua buendenda bua aba bavuaye utumika nabu pamue. (1 Samuele 2:12-26) Mukaji mutetshianganyi mulobeshi, muena kua Potifare, wakapangila bua kusesuisha nsonga Yozefe bua kuenda masandi. (Genese 39:1-12) Nansha ‘mutshivuaye anu muana,’ Yelemiya wakayisha ne dikima dionso kumpala kua buluishi bukole. (Yelemiya 1:6-8) Muana mukaji mukese muena Izalele wakaludika kakuyi ditshina mfumu wa bukole wa tshiluilu tshia bena Syrie bua kukeba diambuluisha mu Izalele, muaba uvuaye mua kulongela pa bidi bitangila Yehowa. (2 Bakelenge 5:1-4) Nsonga Danyele pamue ne banyanende bakalama ditabuja diabu pakabatetabu mu mikenji ya Nzambi pa malu a biakudia. Ne bansonga Shadalaka, Meshaka, ne Abedenego bakasungula bua kuedibua mu tshikutu tshia kapia pamutu pa kunyanga bulamatshi buabu kudi Nzambi pa kutendelela tshimfuanyi.​—Danyele 1:8, 17; 3:16-18; Ekesode 20:5.

20. Mmunyi mudi bansonga bavule bavuluke Mufuki wabu lelu’eu?

²⁰ Lelu’eu bansonga bapite pa 2 000 ba bidimu kutuadijila ku 19 too ne ku 25 badi batumika ku tshilombuelu tshia buloba bujima tshia Bantemu ba Yehowa ku New York, mu États-Unis. Badi amu tshitupa tshikese tshia makumi a binunu bia bansonga pa buloba bujima bàdì bavuluka Mufuki wabu. Bu Yozefe wa kale, mbabenge bua kunyanga bupeluke buabu mu malu a tshitembu. Bavule mbatumikile Nzambi pamutu pa bantu padibu benzejibua ku bukole bua kusungula udibu ne bua kusadila. (Bienzedi 5:29) Mu 1946 mu Pologne, nsongakaji wa bidimu 15 Henryka Zur wakanyawudibua pakabengaye bua kuenza tshienzedi kampanda tshia ditendelela mpingu. “Ela meji muonso muudi musue,” ke muakamuambila umue wa ku bamukengeshi, “enza anu tshimanyinu tshia nkuruse tshia bena Katolike.” Bu muakabengaye, bakamukokela mu diitu ne kumuasa tshingoma, ditekemena diende dia muoyo wa tshiendelele dishale amu pa diodio!b

21. Ndibikila kayi didi dia meji bua kuitaba, ne ntshipeta kayi tshikalaku?

²¹ Mmunyipu mudi mutshima wa Yehowa usangala bua bansonga bàdì bamuvuluke munkatshi mua siekele mivule! Newandamune ku dibikila diende dia ne: “Nunku, uvuluke Mufuki webe Munene” anyi? Bushuwa mmuakanyine dimuvuluka diebe! Ku dituku dionso ela meji pa bionso bidiye mukuenzele ne biakuenzelaye kabidi, ne itaba dibikila edi: “Muan’anyi, wikale ne meji, usankishe mutshima wanyi, bua mmanye mua [“kuandamuna,” NW] kudi muntu udi umpenda.”​—Nsumuinu 27:11.

[Mêyi adi kuinshi]

Udi muvuluke anyi?

◻ Mmunyi mudi bansonga mua kuambuluishibua bua kumona Nzambi bu muntu mulelela?

◻ Kuvuluka Mufuki webe kudi kumvuija tshinyi?

◻ Malonga etu adi ne bua kuikala ne tshipatshila kayi?

◻ Bua tshinyi mbia mushinga mukole bua kutumika ne mfranga yetu ne meji?

◻ Mbansonga kayi badi bakanyine didikija diebe?

[Tshimfuanyi mu dibeji 17]

Ukadiku muele meji bua tshiudi uyila mu kalasa anyi?

[Tshimfuanyi mu dibeji 18]

Udi ulonga mua kutumika ne mfranga ne meji anyi?