Udiku mua kualabaja mmuenenu webe wa malu anyi?

TSHIKUMINA tshikole tshiakenzeka mu Tshimenga tshia Kobe, ku Ouest kua ditunga dia Japon, ne bena budisuile bakalua pa lukasa bua kuambuluisha bantu. Kadi, muntu kampanda wa ku Biro bia malu a Bukole bua Mubidi bia mu tshimenga atshi uvua mubenge bua kupesha baminganga bavua balue kuambuluisha manga a kuondapa nawu avuabu balombe. Muntu au, uvua muikale kabidi direktere wa lupitadi lunene lua mu tshimenga atshi, uvua musue bua bantu bavua bapete njiwu baye mu mpitadi ya mu Kobe pamutu pa baminganga kubatuabu nshingi ne kubelabu mâyi bipite bungi mu miaba ivuabu bafidila diambuluisha edi. Kunyima wakitaba bua kupesha baminganga aba manga avuabu balombe, kadi miaba yonso bakajana mmuenenu wa malu mumakane ne mubule luse uvua nende muntu eu kumpala.

Pamu’apa muntu kampanda udi ne bukokeshi ukadi mukuenzele malu makole a muomumue. Imue misangu bikadi bikufikile bua kuikala nawu. Dialabaja mmuenenu webe wa malu didiku mua kukuambuluisha anyi?

Keba mua kumanya nseke yonso ya bualu

Pa tshibidilu bantu batu bakonkonona anu luseke lumue lua bualu anyi babutangila mu luidi kampanda. Mu dienza nenku badi bakepesha ngumvuilu wabu ne dijingulula diabu dia malu. Misangu mivule bitu bifumina ku malu bu mudi: tulasa tudi muntu mulonge, malu akadiye mumone ne nsombelu uvuaye nende. Muntu udi mua kuangata mapangadika a meji padiye udienzeja bua kupeta ngumvuilu mujima wa bualu. Tshilejilu, biwikala usambulukila pa mansanga a njila kuikala mashinyi ne bantu ba bungi, muaba udi kauyi midilu itu imanyika mashinyi mu njila, bidi mua kuikala bia meji bua wewe kutangila anu kumpala anyi? Nansha kakese! Bia muomumue, kualabaja ngelelu webe wa meji bua kumanya nseke yonso ya bualu kudi mua kuikala ne diambuluisha dia bungi bua kuangata mapangadika ne kuenza malu mu mushindu muimpe. Kudi mene mua kupandishangana.

Tuetu bonso tudi mua kudilongolola mu muanda eu. Nenku udiebeje ne: ‘Mmu malu kayi mundi mua kupeta dikuatshisha bu meme mua kualabaja ngelelu wanyi wa meji?’

Mushindu uutu umona bakuabu

Ntshinyi tshiutu umona pautu utangila bakuabu? Utu ne tshilele tshia kukonkonona malu adibu bamba anyi benza bu adi mimpe peshi mabi, bienze bu se: kakuena mmuenenu mukuabu wa nkatshinkatshi anyi? Utu wangata mêyi a muntu yonso mukuabu anu bu kalumbandi anyi tshipendu? Tshidi muntu mukuabu wamba tshitu anu tshilelela menemene anyi tshia dishima kuudi? Kuikala ne mmuenenu au wa malu kudi bu mukuatshi wa foto udi ulengulula mekala kabukabu adi amueneka muaba kampanda mu muvu wa otone (automne), bienze bu se: kutu anu bimfuanyi bia dikala difiike ne ditoke. Peshi utu ne meji a kushindamena pa bilema bidi nabi muntu, bifuanangane bikole ne muena luendu udi ulekela butshiafu bukese bushiya kudi mupitshi wa njila kampanda wa bulekelavi bumupangisha bua kutangila bintu anyi mêtu kansanga malenga?​—Tangila Muambi 7:16.

Tudi mua kulongela malu a bungi ku mushindu udi Yehowa umona bilema bia bantu. Nansha mudiye mumanye mateketa ne mapanga a bungi a bantu, katu ualondesha nansha. Mufundi wa misambu muena dianyisha wakamba ne: ‘Yehowa, bu wewe ubala dipambuka dia bantu, muntu kayi wakadi mua kuimana?’ (Musambu 130:3) Yehowa mmusue kusemeja kule bilema bia bena mpekatu badi banyingalala, ubikupula ne kalolo bua kabikadi dikeji mu malanda etu nende nansha. (Musambu 51:1; 103:12) Yehowa wakamba bua Mukalenge Davidi wakenza mpekatu minene musangu kampanda ne Beta-sheba ne: uvua muntu uvua “undonda ne muoyo wende mujima, wenza bivua bindengelela.” (1 Bakelenge 14:8, Mukanda wa Mvidi Mukulu) Bua tshinyi Nzambi wakamba mêyi aa bua Davidi? Bualu uvua mutambe kutangila ngikadilu milenga ya Davidi. Wakakonkonona malu onso avua ne mushinga ne kusungulaye bua kutungunuka ne kuleja musadidi wende luse.

Kristo Yezu wakaleja mmuenenu eu mualabale bua bilema bia bakuabu. (Yone 5:19) Pavua bapostolo bende benza bilema, Yezu uvua ne luse ne uditeka pa muaba wabu. Wakamba bua dipanga bupuangane dia bantu ne: nansha padi ‘muoyo musue kuenza, mubidi tshiawu mbutekete.’ (Matayo 26:41, MMM) Muikale ne bualu ebu mu lungenyi, Yezu uvua mumanye mua kupita ne mateketa ne bilema bia bayidi bende mu lutulu ne uditeka pa muaba wabu. Kavua utamba kutangila mapanga abu to, kadi uvua utangila ngikadilu yabu mimpe.

Umue musangu yeye mumane kubela bapostolo bualu bavua belangana mpata bua kumanya uvua umueneka mutambe bakuabu, Yezu wakasakidila ne: ‘‘Kadi, nuenu nudi bantu bakandamata mu makenga anyi; ne ndi ngenza nenu tshipungidi, anu bu mudi Tatu wanyi muenze nanyi tshipungidi, bua bukalenge, bua numone mua kudia ne kunua ku mesa anyi mu bukalenge buanyi, ne nusombe pa nkuasa ya butumbi bua kulumbuluisha bisa dikumi ne bibidi bia Isalele.” (Luka 22:24-30, NW) Bushuwa, nansha muvua bapostolo bikale ne mapanga a bungi, Yezu uvua muvuluke lulamatu luabu ne dinanga divuabu nadi buende yeye. (Nsumuinu 17:17) Yezu uvua ne dishindika bua malu avuabu mua kuenza ne enzabu, nenku wakapunga nabu tshipungidi bua Bukalenge. Eyowa, ‘Yezu wakananga bayidi bende too ne ku nshikidilu.’​—Yone 13:1.

Nenku, bikala ngikadilu ne bilema bia muntu bikufiikisha munda, ikala bu Yehowa ne Yezu. Alabaja ngelelu webe wa meji, ne keba bua kukonkonona malu onso. Pa kuangata malu ne mmuenenu muakanyine, neumone bipepele bua kunanga ne kuanyisha bana benu.

Mu difila bintu bia ku mubidi

Kupa ndimue dia ku masanka mapesha bena Kristo. Kadi kupa kuetu kudi ne bua kuimanyina anu pa mudimu umuepele, tshilejilu, bu mudi kuenza mudimu wa buambi anyi? (Matayo 24:14; 28:19, 20) Peshi udi mua kualabaja ngelelu webe wa meji bua kutangila kabidi majinga a ku mubidi ne diakalenga dia bakuabu? Bushuwa, bena Kristo bonso badi bitaba ne: kufila bintu bia mu nyuma kudi ne mushinga mutambe bunene. (Yone 6:26, 27; Bienzedi 1:8) Kadi, anu bu mudi kufila bintu bia mu nyuma kuikale ne mushinga, ke mutudi kabidi katuyi ne bua kulengulula kufila bintu bia ku mubidi.​—Yakobo 2:15, 16.

Patudi tuelangana meji bua majinga a lukasalukasa a bana betu ba mu nyuma batudi nabu mu tshisumbu tshietu ne ba pa buloba bujima, tudi mua kumona bimpe menemene tshitudi mua kuenza bua kubambuluisha. Padi aba badi ne mushindu babanyina bakuabu bintu ne kalolo, kudi kumueneka nkatshinkatshi. Eu ke mushindu udi majinga a bana betu bonso akumbana. Mukulu kampanda muena Kristo wakumvuija bualu ebu mushindu’eu: “Padi dijinga dimueneka mu tshitupa kampanda tshia buloba, bana betu ba mu tshitupa tshikuabu nebafile diambuluisha diabu. Pikalabu kabayi ne mushindu, bana betu ba munga muaba nebambuluishe. Nenku majinga a bana betu pa buloba bujima adi akumbana. Bushuwa, buena-muntu bua buloba bujima mbulenga.”​—2 Kolinto 8:13-15; 1 Petelo 2:17.

Muanetu wa bakaji kampanda muena Kristo uvua ne dijinga dia kubuela mu umue wa ku mpungilu ya bukua-matunga ku Mputu wa ku Est kavua ne mushindu wa kuenza luendu to. Kadi wakumvua ne: bana betu ba kuinaku bavua ne dijinga dikole dia kupeta Bible, nenku wakafila dipa bua Bible eyi ku butuangaji bua muanetu mukuabu wakenza luendu bua kubuelamu. Nunku wakapeta disanka dia kupa ne dia kuabanyangana ne bena Kristo nende ba mu ditunga dia ku ba bende.​—Bienzedi 20:35.

Pamu’apa pa kualabaja ngelelu webe wa meji udi mua kufila dipa dinene menemene bua mudimu wa dilongesha bantu Bible pa buloba bujima udi wenda anu uvula, udisankisha ne usankisha kabidi bakuabu.​—Dutelonome 15:7; Nsumuinu 11:24; Filipoi 4:14-19.

Patudi tufila mibelu

Padibu batubikila bua kubela anyi kululamija muntu, ngelelu wa meji wa lubatshi ne wa nkatshinkatshi neafikishe bana betu ba mu nyuma ku ditunemeka ne netufile dikuatshisha dia bushuwa. Bitu bipepele menemene bua kushindamena pa malu makese ne kufila nkomenu wa lukasalukasa munemenene luseke lumue. Ebi bidi bileja ne: tudi basue anu mmuenenu wetu, bu bamfumu ba bitendelelu ba mu tshikondo tshia Yezu, bavua basue kuambika bakuabu majitu a mikandu yabu kayiyi ndekelu. (Matayo 23:2-4) Ku lukuabu luseke, bituepuka dinekesha ne bituafila mibelu milenga mishindamene bikole pa mêyi-maludiki a mu Mifundu, pa kuleja ngelelu wa meji muakane, wa nkatshinkatshi ne wa luse udi nende Yehowa, nebitambe kupepela bua bakuabu kuitababu ne kutumikilabu ngenyi yetu.

Kukadi bidimu ndambu, bana betu ba balume bansonga ba mu bisumbu bivule bakadisangisha bua kunaya. Bu bisongakaja, lungenyi lua ditembangana luakamueneka munkatshi muabu, kubafikishabi ku diambangana mêyi makole adi atapa ku muoyo. Mmunyi muvua bakulu ba muaba au bajikije tshilumbu etshi? Bikale bamanye dijinga ditu nadi bansonga bua kudiolola, kabakabakandika bua kunaya pamue nansha. (Efeso 5:17; 1 Timote 4:8) Pamutu pa nanku, bakafila mibelu ne dîsu dikole, kadi mikale ya meji bua kubaleja kuvua lungenyi lua ditembangana mua kubafikisha. Bakafila kabidi mibelu idi yambuluisha, bu mudi kuikala ne bantu bakulumpe dîba didibu banaya. Bansonga aba bakanyisha meji ne nkatshinkatshi bivua mu mibelu eyi ne bakayitumikila. Kabidi, kanemu ne dinanga divuabu nadi bua bakulu biakavula.

Dienzeja bua kuikala ne mmuenenu wa malu mualabale

Nansha muudi kuyi mua kuikala mumanye ne: udi ne meji mabi bua bamue bantu anyi mu amue malu, nebikulombe anu bua kudienzeja ne tshisumi bua kualabaja ngelelu webe wa meji. Paudi ulonga Dîyi dia Nzambi, elanganapu meji bua kumvua ne kujingulula ngelelu wa meji wa Yehowa. (Musambu 139:17) Keba bua kumvua tshidibu bambidile mêyi adi mu Bible ne mêyi-maludiki adimu, ne dienzeja bua kukonkonona malu mudi Yehowa wenza. Dienza nenku nedikale mu diumvuangana ne disambila dia Davidi dia se: ‘Yehowa, ummanyishe bienzedi biebe! Unyishe njila yebe. Undombole mu bulelela buebe, unyishe.’​—Musambu 25:4, 5.

Wewe muikale ne mmuenenu wa malu mualabale, neubeneshibue. Dibenesha dimue didi difumina ku dikala ne mmuenenu wa malu mualabale nedikale lumu luwapeta bu muntu wa nkatshinkatshi ne udi uditeka pa muaba wa bakuabu. Neumone mua kuenza malu mu mushindu udi uleja meji ne diditeka pa muaba wa bakuabu paudi wambuluishangana mu nsombelu mishilashilangane. Bualu ebu nebufikishe ku buobumue ne diumvuangana bimpe dia bena Kristo.

[Bimfuanyi mu dibeji 12]

Kupa kua kalolo kudi kuambuluisha bakuabu, kusankisha mufidi, ne Tatu wetu wa mu diulu