‘Mmunyi mumvuabu?’
1 Yezu wakamba ne dishindika dionso ne: “Nebambile bisamba bionso lumu luimpe diambedi.” (Mâko 13:10) Nansha mutudi tuenza mudimu wetu ne tshisumi tshionso, kutshidi anu bantu miliyo nkama ne nkama batudi katuyi banji kuyisha mpala ne mpala to. Imue mbulamatadi mmikandike mudimu wetu. Matunga a bungi adi ne bantu badi benda bavula ne lukasa lua dikema. Nunku, ‘mmunyi mumvuabu?’—Lomo 10:14.
2 Eyemena Yehowa: Tuvulukayi ne: Yehowa mmumanye tshidi mutshima wa muntu ne muntu yonso. Nansha muntu muikale ne nsombelu wa mushindu kayi, yeye muikale ukeba ne muoyo mujima bulelela budi butangila Nzambi, kamana kamana neabupete.—1 Kul. 28:9.
3 Bivua bitonda Abalahama bikole bua buenzavi buvua nabu bantu ba mu Sodoma ne Amola. Kadi Nzambi wakamujadikila ne: Sodoma kavua ne bua kubutudibua bu buobu mua kusanganamu bantu bakane dikumi patupu. (Gen. 18:20, 23, 25, 32) Yehowa katuku muanji kushipa bantu babi pamue ne bantu bakane to, anu muakamuenekabi mu mushindu wakapandishaye Lota ne bana bende ba bakaji.—2 Pet. 2:6-9.
4 Dimue edi Eliya wakela meji ne: uvua amu nkayende uvua usadila Nzambi mulelela. Kadi, Yehowa wakamushindikila ne: kavua nkayende nansha, wakamuambila kabidi se: mudimu uvuaye mutuadije uvua ne bua kuenzeka too ne ku ndekelu. (1 Bak. 19:14-18) Tudi mua kuamba tshinyi bua mu matuku etu aa?
5 Ikala ne bivule bia kuenza mu mudimu wa Nzambi: Tshidibi katuena bamanye bu bikala mudimu wa diyisha eu ne bua kuenzeka too ne penyi. Mudimu eu ng’wa Yehowa ne yeye mmuteke banjelo bende bua kuutangila. (Buak. 14:6, 7) Anu yeye ke udi ne bua kujadika too ne mu bualabale kayi muikala mudimu wa diyisha eu ne bua kuenzeka mu bantu ba bisamba bionso. Yehowa yeye musue, udi mua kuenza bua bamanyishe mukenji wa Bukalenge mu mishindu itudi katuyi belele meji bua bantu ba bungi ‘bumvue dîyi dia lumu luimpe, ne bitabuje.’ (Bienzedi 15:7) Bidi Yehowa wenza nebileje menemene tshidiye, yeye bu Nzambi wa dinanga, wa meji ne buakane.
6 Ndiakalenga dietu dia kuenza mudimu biumvuangane ne disua dia Yehowa, nanku tuenzayi muetu muonso bua muntu yonso umvue lumu luimpe.—1 Kol. 9:16.