Bena disanka ku bonso badi pa buloba
1 “Disanka didi kudi bantu badi ne Yehowa, Nzambi wabo!” (Mus. 144:15) Mêyi aa adi umvuija ne: Bantemu ba Yehowa mbantu bena disanka dia bungi ku bantu bonso badi pa buloba. Kakuena disanka dikuabu dinene kupita edi didi difumina ku disadila Yehowa, Nzambi umuepele mulelela udi ne muoyo. Bu mudiye ‘Nzambi wa disanka,’ bantu badi bamutendelela badi pabu baleja disanka. (1 Tim. 1:11, NW) Mbimue bitupa kayi bia ntendelelu wetu bidi bienza bua tuetu kuikala ne disanka dia bungi nunku?
2 Tshitudi bikadile bena disanka: Yezu wakatujadikila se: muntu udi upeta disanka padiye ‘mumanye bupele buende bua mu nyuma.’ (Mat. 5:3, NW) Kuikala ne tshibidilu tshia kulonga Mukanda wa Nzambi ne kubuela mu bisangilu bietu bionso bia bena Kristo kudi kutukumbajila majinga aa. Dilonga bulelela bua mu Dîyi dia Nzambi nditupikule ku mashimi a bitendelelu ne ntupakanyi yabi. (Yone 8:32) Mukanda wa Nzambi mmutulongeshe kabidi njila mutambe buimpe utudi ne bua kulonda mu nsombelu. (Yesh. 48:17) Bua malu aa, malanda etu ne bena Kristo netu mmashême ne kabidi disanka didi munkatshi muetu ne bana betu batudi badisangisha nabu.—1 Tes. 2:19, 20; 1 Pet. 2:17.
3 Tudi tupeta disanka dia bungi patudi tutumikila mêyi a Nzambi adi ne mushinga wa bungi adi atuleja mua kuikala ne nsombelu mulenga, bualu tudi bamanye ne: bidi bitukuba ne kabidi bisankisha Yehowa. (Nsu. 27:11) Kamona-kamba mukuabu wakamba ne: “Nansha mudibu ne mikenji mishile, Bantemu ba Yehowa kabatu bamueneka babungame to. Batu bamueneka ne disanka. Bakulumpe ne bana (ba munkatshi muabu) badi ne mmuenekelu wa bantu bena disanka didi dikemesha ne malu adibu benza badi baenza ne nkatshinkatshi.” Mmunyi mutudi mua kuambuluisha bakuabu bua kuikalabu pabu ne nsombelu wa disanka bu utudi nende eu?
4 Tuambuluishayi bakuabu bua bikale ne disanka: Buloba mbuwule tente ne malu adi abungamijangana, ne pa tshibidilu bantu badi bamona anu mîdima bua matuku alua kumpala eku. Kadi tuetu tudi tumona bitoke, bamanye se: dimue dituku, kakuakuikala muntu nansha umue wikala kabidi mu dibungama to. (Buak. 21:3, 4) Nenku, tudi tudifila ne tshisumi tshionso mu buambi, tuenda tukeba bantu ba muoyo muimpe batudi mua kumanyisha ditekemena dietu ne malu adi atangila Yehowa atudi tuitabuja.—Yeh. 9:4.
5 Muanetu wa bakaji mukuabu udi mpanda-njila wakamba ne: “Kakuena bualu bukuabu budi butamba kusankisha kupita kuambuluisha bantu netu bua bamanye Yehowa ne bulelela buende.” Tuenzayi tshionso tshitudi mua kuenza bua kukankamija bantu ba bungi bua bitabe bua kulonga Bible. Kusadila Yehowa ne kudifila mu mudimu wa diambuluisha bakuabu bua bamusadile pabu kudi kupetesha muntu disanka dia bungi menemene.—Bien. 20:35.