Bampanda-njila badi bambuluisha bakuabu
1 Yezu wakamba ne: ‘Bulelela, bintu bia kunowa bidi bia bungi, kadi bena mudimu badi banya-banya. Nunku nulombe mukalenge wa bintu bia kunowa, atume bena mudimu mu kunowa kuende.’ Bu muvua banowi ba mu siekele wa kumpala bikale bakese ne bikale ne teritware munene wa kuenzelamu mudimu, Yezu uvua mua kuikala mubalombole bua kufika ne lumu luimpe kudi bantu ba bungi menemene mu dibatuma ku umue ku umue. Kadi ‘wakabatuma kumpala kuende ku babidi ku babidi.’ (Luka 10:1, 2) Bua tshinyi babidi ku babidi?
2 Bayidi aba bavua bapiabapia ne kabayi ne dimonamona malu to. Pa kuenza mudimu pamue bavua mua kulongela kudi bakuabu ne kukankamijangana. Bu muakamba Solomo, ‘bantu babidi badi bapita umue.’ (Muam. 4:9, 10) Nansha kunyima kua dimuangalaka dia spiritu munsantu mu Pentekoste wa mu 33 B.B., Paulo, Bânaba, ne bakuabu bakafila bena kuitabuja nabu mu mudimu. (Bien. 15:35) Ndisanka kayipu divua ne bua kuikala dia bamue bua kuikala bashidimuna kudi bantu bakumbane ba nunku!
3 Ndongamu muimpe wa dishidimuna: Anu bu tshisumbu tshifuanangane natshi tshia mu siekele wa kumpala, tshisumbu tshia bena nkristo tshia lelu mbulongolodi budi buyisha. Tshidi kabidi tshitushidimuja. Ku muntu ku muntu, dijinga dietu dia mu mutshima didi ne bua kuikala dia kumanyisha lumu luimpe mu mushindu wa dipatula bipeta. Dikuatshisha didiku bua bamanyishi bavule kuenza mudimu udi upatula bipeta bimpe.
4 Mu Kalasa ka Mudimu wa Bukalenge kavuaku matuku adi mashale aa, Société uvua mumanyishe ndongamu bua bampanda-njila kuambuluishabu bakuabu mu mudimu wa budimi. Kudiku dijinga pa bualu ebu anyi? Eyowa, didiku. Bamanyishi bapite pa muliyo mujima mbatambule mu bidimu bisatu bidi bishale ebi, ne bavule ba kudibu badi bakengela dibashidimuna bua kuluabu bapiluke mu mudimu wa diyisha. Nnganyi udibu mua kutumika nende bua kukumbaja dijinga edi?
5 Bampanda-njila badi mua kuambuluisha. Bulongolodi bua Yehowa budi bubapesha mibelu mivule ne bubashidimuja. Mu Kalasa ka Mudimu wa Bumpanda-njila kenza mu mbingu ibidi, bampanda-njila batu bapeta dishidimuna dikumbanangane ne bidibu bakengela. Batu kabidi bapeta dikuatshisha mu bisangilu biabu ne mutangidi wa tshijengu ne wa distrike, kabidi ne mibelu ya bakulu. Nansha mudi bampanda-njila kabayi bonso bamonemone malu bu Paulo ne Bânaba, mbapete dishidimuna dia mushinga, didibu ne disanka dia kuabanyina bakuabu.
6 Nnganyi wapetelaku masanka? Ndongamu eu mmuenzela anu bamanyishi bapiabapia peshi batshidi batambuilaku anyi? Nansha kakese! Kudi bansonga ne bakulumpe bakuabu badi balonge bulelela kukadi bidimu bivule kadi bikala mua kuanyisha diambuluisha mu bitupa bikuabu bia mudimu. Bamue badi benza mudimu mulenga mu difila mikanda kadi bikale ne lutatu bua kuenza makumbulula anyi kutuadija malonga a Bible. Bakuabu badi mua kutuadija malonga a Bible kakuyi lutatu kadi balue kumona se: balongi babu kabena baya kumpala. Ntshinyi tshidi tshibapangisha mua kuya kumpala? Badi mua kulomba bampanda-njila bamonemone malu bua kufila diambuluisha mu nsombelu eyi. Bamue bampanda-njila batu bapatula bipeta bimpe mu dikolesha dijinga dia kumanya bivule, dituadija malonga a Bible, ne dilombola balongi bapiabapia ku bulongolodi. Dimonamona malu diabu nediambuluishe mu ndongamu mupiamupia eu.
7 Udiku mumone se: ndongamu webe kêna ukupetesha mushindu wa kuikala mu bisangilu bia mudimu wa budimi bidi bienzeka pa tshibidilu mu tshisumbu mushindu uudi muanyishe anyi? Mpanda-njila umue udi mua kuanyisha bua kuenza nebe mudimu mu bikondo bidi bamanyishi bakuabu kabayiku.
8 Bidi bikengela dikuatshishangana dimpe: Misangu ibidi ku tshidimu, bakulu nebenze malongolola bua bamanyishi badi bajinga kupeta diambuluisha bua kuikalabu mu ndongamu wa Bampanda-njila badi bambuluisha bakuabu. Biwanyisha kupeta diambuluisha edi, udisuike ne mumanyishi mpanda-njila udibu basungule bua kukuambuluisha, longolola ndongamu muakanyine bua mudimu, ne umulamate. Unemeke dîba dinudi bumvuangane misangu yonso. Panudi nuenza mudimu pamue, utangile mishindu ya dimanyisha lumu luimpe idi ipatula bipeta. Konkonona bua tshinyi imue mbuelelu idi ipatula bipeta bimpe. Wangate ne mushinga ngenyi idi mpanda-njila mua kukupesha bua kulengeja mbuelelu webe. Paudi ukuata mudimu ne malu audi mulonge, dilubuluka diebe mu mudimu nedimueneke, kuudi wewe ne kudi bakuabu. (Tangila 1 Timote 4:15.) Nuenze mudimu pamue misangu mivule menemene padiku mushindu, mu bitupa bionso bia mudimu, bu mudi buambi bua mu mpukapuka kadi kushindamena pa tshitupa tshia pa buatshi tshiudi ukengela diambuluisha.
9 Mutangidi wa mudimu udi ne ntema ku didiunda diwenza. Ku musangu ne ku mukuabu, neayukile ne mulombodi wa Dilonga dia Mukanda dia Tshisumbu bua kumona mushindu uudi upetela masanka ku ndongamu eu. Bia muomumue, mutangidi wa tshijengu neakuambuluishe pakumbulaye tshisumbu.
10 Yehowa mmusue bua bantu bende bikale bashidimuna ne ‘balongolola tshishiki bua midimu yonso mimpe.’ (2 Tim. 3:17) Wangata ndongoluelu wa Bampanda-njila badi bambuluisha bakuabu bu dilongolola dilenga bua kuambuluisha aba badi bajinga kuakaja makokeshi abu a kuyisha dîyi. Biwikala ne diakalenga dia kuikala mu ndongoluelu eu, wenzemu mudimu ne dianyisha ne budipuekeshi, ne disanka.