Tuikalayi ne budipuekeshi mu mvuadilu ne mu ndengejilu wa mubidi ne nsuki
1 Kamona-kamba kampanda wakamba ne: “Bantu balume bonso, too ne bansongalume, mbavuale tulavuanda. Bamamu bonso ne bansongakaji, nansha batshidi bana batekete, bonso mbavuale nkanzu anyi jipa. Kakuena muntu udi ne mupanu wa jeans (Lois) anyi udi muvuale kapila (triko) tshianana to. Muntu yonso udi umueneka ne disanka.” Ntshisumbu kayi tshivuabu bamba etshi? Tshia bena malu a tshididi anyi? Tshia bena manaya anyi? Tshia bimbi ne baji ba maja anyi? Kabiena nanku nansha! Bavua bakula bua tshisumbu tshia balume ne bakaji bavua badisangishe bua mpungilu wa distrike munene mu tshikondo tshia mushipu tshidimu tshishale.
2 Muaba mukuabu uvua mpungilu wa nunku muenzekele, mufundi wa mu tshikandakanda kampanda wakamba bua tshisumbu tshia Bantemu ne: “Bantu balume bonso bavua ne mankenda ne bavuale nkotshi ne tulavuanda. Bantu bakaji bavua bavuale ne budipuekeshi kadi bikale bilengele kumona.” Muntu mukuabu udi yeye muena mudimu wa dilama bantu udi wamba ne: “Nudi bantu ba bikadilu bilenga, ba kanemu, ba mankenda ne bulongame. Malu andi mumone adi ansamina muoyo. Mu buloba ebu budi bunyanguke ne budi bukoya buambule mbuaya, nudi nuenza muenu muonso bua kumbusha bukoya!” Mmêyi kayipu bulenga mamba bua bualu buetu! Katuenaku ne dianyisha bua mudibu bakula bilenga bua buana buetu bua buloba bujima anyi? Bushuwa, Bantemu bonso mu tshibungi mbafikishe bantu ku diamba mêyi aa bua mmuenekelu wabu mulenga.
3 Tukadi bamanyike pa buloba bujima bua mmuenekelu wetu musunguluke eu. (Mal. 3:18) Bua tshinyi? Bualu tudi tutumikila dîyi dia mu Mukanda wa Nzambi didi ditubela bua ‘kudilengeja ne bilulu bidi bituakanyina; bikale ne kalolo ne bupuekele; badilengeje ne bienzedi bimpe bu bantu badi bamba ne: tudi tutshina Nzambi.’—1 Tim. 2:9, 10.
4 Ntshinyi tshidi mvuadilu ne ndengejilu wetu bileja? Bilamba bitudi tuvuala ne mushindu utudi tubivuala bidi bileja tshitudi: bileja malu atudi tuitaba, lungenyi lutudi nalu ne meji etu. Mvuadilu utudi tusungula udi uleja tshitudi ne uleja muntu utudi tuidikija. Kulonda ngelelu wa meji mubi ne bikadilu bibi bidi bena panu batangalaja nkubi. Tshitudi tukeba ki ntshia kuepuka miodele mipiamipia ya bilamba ya buena-lelu to, kadi tshitudi tuipatshila nkukeba bua kujingulula bikala bilamba bitudi tuvuala biakanyine muntu udi wamba mudiye musadidi wa Nzambi. (Lomo 12:2) Pamutu pa kuikala ne mvuadilu udi uleja lungenyi lua bantu badi bakeba kuikala badikadile anyi udi utuma lungenyi lua bantu ku mvuadilu wa bandumba, tuetu tudi basue kuleja mutudi bushuwa ‘tutumbisha Nzambi.’—1 Pet. 2:12.
5 Misangu mikuabu, muntu mupiamupia, udi kayi ne dimanya dia bungi anyi muntu mutekete mu nyuma udi mua kuitaba tshionso tshidi bena panu banyisha mu malu a mvuadilu ne dilengeja dia mubidi kayi wanji kutangila kumpala meji adibu mua kuelela Yehowa ne bulongolodi buende bua tshidiye musungule etshi. Muntu yonso wa kutudi udi ne bua kudikonkonona munda munda bua kumona ni udi ne ngenyi ya bena panu. Tudi mua kuebeja muanetu wa balume anyi wa bakaji wa kunemekibua, ukadi mushindame mu nyuma bua atuambila mudiye umona mvuadilu wetu ne ndengejilu wetu wa mubidi ne pashishe kutumikila mibelu ikalaye mua kutupesha ayi.
6 Bamue batu pabuipi bua kutangila bimpe mvuadilu wabu padibu baya mu mpungilu. Kadi bamulengulula panyima pa mpungilu. Tulamayi mêyi a mushinga adi ne diambuluisha dia bungi kudi bena mudimu bena Kristo. (2 Kol. 6:3, 4) Muaba kayi wonso udi bantu, kamanyinu ka mpungilu katuikala bavuale kusakidila ne mvuadilu wetu muakanyine ne ndengejilu wetu wa mubidi bidi bitusunguluja, bileja ne: tudi Bantemu ba Yehowa. Nunku, bilamba bietu tudi ne bua kubilongolola bimpe mu mushindu udi uleja budipuekeshi, bua kulejabi ne: ‘katuena ba pa buloba’ to.—Yone 15:19.
7 Nunku tuenzayi muetu muonso bua Mpungilu wa Distrike wa “Bamanyishi ba Bukalenge ba tshisumi” wa tshidimu etshi bua tuleje ne: tudi “bantu ba tshijila kudi Yehowa, Nzambi [wetu].” Lumu luimpe lutuashiya neluikale mua kusakidila ‘butumbi ne bunême’ ku dîna dia Yehowa.—Dut. 26:19.
[Kazubu mu dibeji 6]
Mutudi mua kutumbisha Yehowa:
▪ Kuvuala bilamba bidi bikumbanyine basadidi ba Nzambi.
▪ Kuepuka mvuadilu udi ulonda lungenyi lua bena panu.
▪ Kuleja budipuekeshi budi buleja meji mimpe.