Kumbaja majinga ebe a mu nyuma
1 Mpungilu wetu wa Distrike wa “Bamanyishi ba Bukalenge ba tshisumi” utudi bindile ntshikondo tshiatupesha mushindu mulenga wa kukumbaja majinga etu a mu nyuma. Anu mutu tshiakudia tshilenga ne mushinga mu mubidi wa muntu, programe utudi bindile eu neatudishe mu nyuma ne ‘mêyi a ditabuja.’ (1 Tim. 4:6) Neatuambuluishe bua kusemena pabuipi ne Yehowa. Kabidi tudi mua kutekemena bua kupeta mibelu ne ditukankamija biatuambuluisha bua kutantamena ntatu. Yehowa udi utujadikila ne: ‘Nenkuyishe lungenyi, nenkuleje njila uudi ne bua kuendela, nenkupe meji patshidi dîsu dianyi kuudi.’ (Mus. 32:8) Ndibenesha bushuwa bua mudiye utulombola ne dinanga mu nsombelu wetu. Tangila amue malu atudi mua kuenza bua mpungilu eu atuambuluishe bikole.
2 Tudi ne bua kulongolola mutshima wetu: Tuetu bonso tudi ne bujitu bua kukuba mutshima wetu wa mu tshimfuanyi. (Nsu. 4:23) Bidi bitulomba didikanda ne kuikala bamanye bimpe tshidi meji etu. Mpungilu ntshikondo tshia kuela meji pa malanda etu ne Yehowa, tshikondo tshia ‘kutangilatangila mikenji miakane tshishiki ya budishikaminyi.’ Bua kulongolola mutshima wetu bua ‘kuitabuja dîyi didi dikunyibua munda muetu,’ tudi ne bua kulomba Yehowa atukenkete, atusokoluele ‘malu mabi’ adi mua kuikala munda muetu adi akengela kuakaja ne atulombole mu ‘njila wa tshiendelele.’—Yak. 1:21, 25; Mus. 139:23, 24.
3 Teleja ne elangana meji: Yezu wakela Mariya kalumbadi bua ntema ivuaye nayi ku mêyi ende, wamba ne: “Malia wakusungula luseke ludi luimpe, kabena bamanye mua kumunyengalu.” (Luka 10:39, 42) Tuetu bikale ne lungenyi lua mushindu umue umue elu, katuakuanyisha bua malu adi kaayi ne mushinga atubueje mu ditanaja nansha. Netuenze muetu muonso bua kusomba ne kuikala ne ntema munkatshi mua programe yonso mujima. Netuepuke mayuki ne kuendakana tshianana tshianana, kabidi nebikengele tuetu kuikala ne budimu bua telefone yetu ya ku bianza, biamu bia foto anyi bia kamera kabibueji bakuabu mu ditanaja.
4 Patudi tuteleja miyuki, mbimpe kufunda tu-note tukese tuatuambuluisha bua kumvua mushindu udiwu. Tudi ne bua kukeba dimvuangana pankatshi pa bitudi tuteleja ne bitukadi bamanye. Kuenza nunku nekutuambuluishe bua kumvua muyuki bimpe ne kukuata malu adibu balongeshamu. Patuabalulula malu etu atuvua bafunde au, meji etu ikale a kutumikila bitudi balonge. Yonso wa kutudi udi mua kudikonka ne: ‘Mmunyi mudi malu aa angambuluisha mu malanda anyi ne Yehowa? Mmalu kayi andi ne bua kushintulula mu nsombelu wanyi? Mmunyi mundi mua kutumikila malu aa mu nsombelu wanyi ne bakuabu? Mmunyi mundi mua kuenza nawu mudimu mu buambi?’ Uyukile ne bakuabu malu audi mumone makusankishe bikole. Kuenza nunku nekutuambuluishe bua kulama mêyi a Yehowa ‘munda mua mitshima yetu.’—Nsu. 4:20, 21.
5 Tutumikilayi bitudi tulonga: Kunyima kua dibuela mu mpungilu wa distrike, muntu mukuabu wakamba ne: “Programe uvua ne malu avua atangila muntu ne muntu, usaka muntu yonso bua kukonkonona nsombelu wende ne wa bena mu dîku diende ne kubambuluisha ne mibelu ya mu Bible idi ikengedibua. Uvua mutambe kuntabeja bua kumanya bujitu bundi nabu ne kumona mua kuambuluisha tshisumbu bikole.” Pamu’apa ba bungi ba kutudi bakadiku bumvue pabu nanku. Kadi ki nkujike anu patudi tumuka ku mpungilu tudiumvua bakankamija ne bakolesha ku muoyo to. Yezu wakamba ne: ‘Binuamanya malu aa, nenuikale ne disanka binuaenza.’ (Yone 13:17) Tudi ne bua kutumikila malu onso adi atutangila tuetu. (Filip. 4:9) Ebu ke bualu bunene buatufikisha ku dikumbaja menemene majinga etu a mu nyuma.
[Kazubu mu dibeji 5]
Elangana meji bua malu audi uteleja:
▪ Mmunyi mudi malu andi nteleja angambuluisha mu malanda anyi ne Yehowa?
▪ Mmunyi mudiwu angambuluisha mu malanda anyi ne bakuabu?
▪ Mmunyi mundi mua kuatumikila mu nsombelu wanyi ne kuenza nawu mudimu mu buambi?