“Tungunuka ne kuipatshila tshidi tshimpe”
1 Nsombelu wa muena Kristo udi umvuija ‘kuipatshila mua kuenzelangana bimpe dîba dionso kudi bantu bonso.’ (1 Tes. 5:15, MMM) Patudi tubuela mu mpungilu yetu ya distrike tudi tupeta mishindu ya bungi ya kuenzela bakuabu bualu kampanda buimpe. Mu bikondo bia mushindu au, bantu ba bungi mbatutangile ne muntu yonso udi ulua kutudi udi ushala ne lungenyi kampanda lua mushindu utudi bilondeshile mutuikala mua kumuenzela malu. Bua kulama lumu luimpe ludi nalu Bantemu ba Yehowa, tudi ne bua kuleja ku bienzedi bietu mutudi ‘tunemeka bantu bonso.’ (1 Pet. 2:17) Bidi biumvuija kabidi ne: ‘muntu ne muntu katangidi malu ende nkayau, kadi muntu ne muntu atangile kabidi malu a bakuabo.’ (Filip. 2:4) Tangila mushindu udi muanda eu utangila miaba ya kutudila mu mpungilu.
2 Patutu tubuela mu mpuilu bitu tshibidilu bua bantu ba bungi balongolole miaba idi bana betu bakuabu mua kutudila. Kadi banga badi mua kusungula bua kuya kusombela kua balela babu ne tshipatshila tshia kubayisha lumu luimpe anyi kubabikila bua kuluabu mu mpungilu. Bua bualu ebu tudi ne bua kubela kalumbandi. (1) Mu mishindu yonso, katuena basue kunemeshila bawetu bujitu nansha. Kumpala kua tuetu kuenza luendu bua kuya ku mpungilu, tudianjilayi kudilongolola bua kukumbaja bituikala nabi dijinga, bu mudi a biakudia ne makuta a njila pikalabi bikengedibua. (2) Katuakushala matuku a bungi patupu kua bawetu aba matuku a mpungilu mamane kujika anu bualu mbatuakidile bilenga nansha. Kuenza nanku nekuleje mutudi tuanyisha muoyo wabu muimpe. (3) Tuvuluke ne: tudi benyi, ne kabidi tudi ne bua kunemeka bintu bia bende ne katuena ne bua kudidinga kudiangatshila tshintu buobu kabayi batuanyishile nansha. Patudi kua bende, mukenji udi mu Matayo 7:12 ke utudi ne bua kulonda.
3 Tulongeshe bana mushindu wa kusomba bimpe: Imue misangu, bana batubu balekelela kakuyi muntu mukulumpe mu mpungilu kabatu bashiya tshilejilu tshilenga to. (Nsu. 29:15) Mu bimue bikondo, baledi batu balekela bana babu badienzela malu kabayi babatangila. Nunku bamue bana batu benda batambakana tshianana tshianana, kabayi ne ntema ku bidibu balongesha ne bateka disalu. Kababalekedi batua musesu patupu ku nkumba padi mpungilu mu dienzeka nansha. Bana badi ne bua kusomba pamue ne baledi babu, badi ne bua kuikala ne yabu Bible kabidi ne kaye ka kuangatshila tu-note, nunku nebibambuluishe bua kushala ne ntema ne nebalonge mua kutshina Yehowa. (Dut. 31:12) Nansha dîku diodi dikala disombele kua muanetu kampanda mu tshikondo tshia mpungilu, baledi badi ne bua kutangila bana, ne bana pabu mbimpe bikale ne bikadilu bia bana bena Kristo, nunku dîna dia Yehowa neditumbishibue.
4 Baledi, kumpala kua mpungilu, vuluijayi bana benu bikadilu bia bena Kristo bidibu ne bua kuikala nabi dîba dionso ne miaba yonso. (Ef. 6:4) Tshilejilu, nubaleje ne: dinanga dilelela dia bena Kristo ‘kadiena dienza malu a dikamakama, kadiena didikebela bintu, kadiena dikuata tshiji lubilu.’ (1 Kol. 13:5) Bua biobi kuikalabi ne mushinga, bantu bakole badi ne bua kuikala tshilejilu tshimpe kudi bonso. Bana, nenutungunuke ne kuipatshila tshidi tshimpe panuatumikila baledi benu, nunemeka bintu bia bende bia bena nzubu badi banuakidile ne kubidi nunemeka bakuabu banudi nabu. (Kolos. 3:20) Patudi tudienzeja bonso pamue bua kuenzela bantu bonso malu mimpe, tudi ‘tutumbisha diyisha dia Nzambi, Musungidi wetu mu malu onso.’—Tito 2:10.
5 Tshikadilu tshietu tshimpe tshidi tshikudimuna lungenyi lua bantu badi batutangila, kabidi ne lua aba batu batuamba mêyi mabi bua bualu kampanda peshi kansanga. Mu bualu buonso butuenza mu mpungilu ne muaba kayi wonso mu musoko wenzekelaye; nansha mu njila, tudia ne balunda, tuikisha mu nzubu mudibu batuakidile anyi patudi tuyisha mu mpukapuka mu bikondo bitudi tupeta dîba; ngakuilu wetu ne bienzedi bietu bia bena Kristo bidi ne bua kuleja ne: tudi basue bua kuipatshila tshidi tshimpe.
[Kazubu mu dibeji 4]
Tshia kuvuluka:
▪ Wikale ne lutulu ne kanemu kudi bana benu ne kudi muntu udi mukuakidile ku nzubu kuende.
▪ Londa bidi bana betu badibu bomekela bujitu bua diakidilangana bua disanka dia bonso badi balue bua mpungilu.
▪ Kunyangi malu bua muoyo wa kalolo ne dikuakidila dilenga didi bena ku nzubu bakuleja nansha.
▪ Tangila bimpe bionso bidi bana bebe benza.