Dikoleshangana ku muoyo dia pa buadi
1 Kakuena dituku dipita didi bantu ba Yehowa kabayi bapeta mateta bua ditabuja diabu. Bu mudi Diabolo mumanye ne: nkumushadile matuku makese, udi utuluisha mvita ya ndekelu bua kutupangisha bua kuikala ne muoyo mutoke kudi Yehowa. (Buak. 12:12) Bidi bia mushinga bua tuetu ‘kudikolesha mu Mukalenge ne mu bukole buende bunene’ bua tuamona mua ‘kudimanyika bimpe palua dituku dibi, ne patuajikija kuenza malu onso, tudi mua kuimana.’—Ef. 6:10, 13.
2 Kudisangisha ne bana betu mbualu budi Yehowa mulongolole bua kutuambuluisha bua tuetu kupeta bukole. Mupostolo Paulo wakamona mushinga wa kudisangisha aku. Wakajinga bikole bua kuikala pamue ne bena Kristo nende bua buobu kumona mua ‘kukoleshangana ku muoyo’ ne ‘kukankamana.’ (Lomo 1:11, 12, Mukanda wa Mvidi Mukulu [Katolike, MMM]) Bua kutukolesha bua kuenza disua dia Nzambi, Kasumbu Kaludiki nkalongolole ne dinanga dionso bua kutupetesha mushindu wa tuetu kukoleshangana ku muoyo ne bakuetu mu Mpungilu wa Distrike wa “Bamanyishi ba Bukalenge ba tshisumi” utudi bindile kumpala eku.
3 Wikalamu bua akuambuluishe: Difundila tshipatshila tshia kuikala mu mpungilu awu matuku onso asatu. Nebituambuluishe bikole tuetu tufika kumpala kua musambu wa ntuadijilu ne tushala too ne patuamba “Amen” ku disambila dia ndekelu. (Yesh. 48:17, 18) Nenku bidi bikengela bua ba bungi ba kutudi kulongololabu programe wa bidibu benza bua kumona mua kuikala mu mpungilu au matuku onso asatu. Bushuwa, kabiena anu mua kuikala bipepele bua mfumuebe wa mudimu kukupeshaye dikisha bua kupumbisha ku mudimu matuku asatu aa majima to, kadi Yehowa udi utujadikila se: neatuambuluishe bua kuenza disua diende. (1 Yone 5:4, 15) Biwikala kuyi muanji kutuadija kudilongolola, ke tshikondo tshia kutuadija etshi bua kubumba makuta a njila ne kumanya muaba uwaya kutudila; udilongolole bimpe ne kuenji malu ku mpukapuka to. Tudi mua kutekemena ne dishindika dionso ne: Yehowa neabeneshe bionso bituenza bua kubuela mu mpungilu matuku onso asatu aa.—Nsu. 10:22.
4 Dianjila kutekemena ne: nebakukankamije: Kutuku muanji kuamba dikuabu mu difuma ku mpungilu ne: “Eu ke mpungilu menemene!” Bua tshinyi uvua mua kuikala mumvue mushindu au? Bualu bu mutudi bantu bapange bupuangane, tudi mua kuya kuenda kuteketa mu nyuma ku kakese ku kakese, tumona bikengela bua batukolesheku mu nyuma. (Yesh. 40:30) Muanetu wa bakaji mukuabu wakamba ne: “Malu a panu adi antshiokesha bikole, mpungilu yoyi idi ingambuluisha bua kutuishila kabidi mêsu anyi pa malu a mu nyuma, impesha bukole bua mu nyuma bundi nabu dijinga. Bidi bimueneka bu se: dinkolesha ku muoyo edi didi dilua anu pandi nadi dijinga menemene.” Misangu mikuabu ke muukadi pebe mumvue.
5 Miyuki ne nkonko idibu bela banga bana betu pamue ne bitupa bikuabu bimpe bia mpunglu bidi bitukolesha ku muoyo. Muanetu wa balume mukuabu wakamba ne: “Mushindu udibu bumvuija ne baleja mua kutumikila mêyi a mu Bible ke udi utamba kunsankisha menemene. Bushuwa, drama idi yambuluisha bikole ne ituleja mushindu udi bilejilu bia bantu ba kale, bimpe ne bibi, mua kutuambuluisha. Mikanda mipiamipia mbintu bintu ntamba kutekemena bikole ne ntu ne disanka dia kuyibala matuku a bungi adi alonda pandi mpingana kumbelu.”
6 Mpungilu yetu ndilongolola dia Yehowa ditudi tukengela mu ‘matuku aa makole a ku nshikidilu.’ (2 Tim. 3:1) Idi ituambuluisha bua kulonda mubelu eu mufundisha ku nyuma wa Nzambi wa ne: ‘Nutabale, nutantamane mu ditabuja, nuikale balume mene, nukuatshibue bikole.’ (1 Kol. 16:13) Nunku, tupangadijayi ne muoyo umue bua kuikala mu tshitupa tshionso ne kupeta masanka mavule adi akoleshangana ku muoyo mu Mpungilu wa Distrike wa “Bamanyishi ba Bukalenge ba tshisumi”!
[Kazubu mu dibeji 3]
Udilongolole bua kuikalamu matuku onso asatu
▪ Lomba dikisha ku mudimu.
▪ Lamisha kua wewe kuya kutudila muaba wenzekela mpungilu.
▪ Longolola makuta a njila.