Nzambi udi witaba bantu ba bisamba bionso

PAKAYA John bua musangu wa kumpala mu ditunga dia Mali, biakamulenga bikole ku muoyo pakamonaye mushindu wakamuakidilabu ne musangelu kudi Mamadou ne dîku diende. Pakasomba John panshi ne pavuaye udia ubianya biakudia bivuabu badila bonso mu dilongo dimue ne bena mu dîku edi, wakadiebeja mushindu mulenga uvuaye mua kumanyisha muena kumbelu lumu luimpe lua Bukalenge bua Nzambi ludi mu Bible Dîyi diende, luvua luikale dipa dia mushinga wa bungi menemene. Nansha muvuaye mumanye Mfualansa, muakulu utubu bakula kabidi mu Mali, John uvua udiebeja mushindu uvuaye mua kuyukila ne bena mu dîku edi bavua ne ntendelelu ne ngelelu wa meji bishilangane bikole ne biende yeye.

Mpindieu, John kuvulukaye bualu budibu balonde mu Bible bua tshimenga tshia Babela. Mu tshimenga atshi Nzambi wakakondakaja muakulu wa bantu bavua bamutombokele. (Genese 11:1-9) Nunku, bantu ne bantu bavua ne wabu muakulu, wabu ntendelelu ne wabu ngelelu wa meji bakaya mu bitupa bishilangane bia buloba. Lelu, bu mudi ngendu ne bimuangi bienzeka miaba yonso, bantu ba bungi badi bapeta lutatu lua buena luakapeta John, pamu’apa nansha muaba udibu basombele: Mmushindu kayi wa kumanyisha bantu ba muaba mukuabu ditekemena dia mu Bible?

Tshilejilu tshia kale

Kumpala Yona uvua ne mudimu wa kumanyisha bena Isalele malu a kudi Yehowa anu bu muvua baprofete bakuabu ba mu Isalele benza. Uvua muprofete mu tshikondo tshivua bisa dikumi bia Isalele bidifile mu dienza bilele bivua bipendesha Nzambi. (2 Bakelenge 14:23-25) Elabi meji tshiakumvua Yona pakamupeshabu mudimu wa pa buawu wa kumbuka mu ditunga dimulela bua kuya mu Ashû kuyisha bantu ba mu tshimenga tshia Ninewe, bantu bavua ne ntendelelu ne bibidilu bishilangane ne biende. Pamu’apa Yona kavua nansha mua kuikala wakula muakulu wa bena Ninewe, anyi pamu’apa uvua uwakula anu bisebusebu. Nansha biobi bivua mushindu kayi, bidi bimueneka se: Yona wakamona mudimu au mumupite bukole, ke yeye kunyema.​—Yona 1:1-3.

Bushuwa, Yona uvua ne bua kumanya ne: Yehowa Nzambi katu utangila amu mpala, kadi udi ukonkonona mutshima. (1 Samuele 16:7) Kunyima kua Yehowa mumane kupandisha Yona mu tshishima mu mâyi, wakamutuma kabidi bua kuyaye kuyisha bena mu Ninewe. Yona wakatumikila dîyi adi, ne pakabayishaye, bena Ninewe badilengeja bonso mu tshibungi. Kadi nansha nanku, Yona kavua ne meji mimpe nansha. Ku diambuluisha dia ka-mutshi kavuaye mutolueshe, Yehowa wakamulongesha ne: uvua ne bua kushintulula mushindu wende wa dimona malu. Yehowa wakakonka Yona ne: ‘Meme tshiakadi ne bua kunyingalala bua Ninewe, musoko au munene, mudi bantu binunu lukama ne makumi abidi badi kabayi mua kujingulula tshianza ne ntshia balume ne ntshia bakaji anyi?’ (Yona 4:5-11) Netuambe tshinyi buetu tuetu lelu? Mmunyi mutudi mua kuambuluisha bantu ba miaba mikuabu?

Ditaba bena Samalea ne bantu bavua kabayi bena Yuda

Mu bidimu lukama bia kumpala, Yezu wakambila balongi bende bua kuvuija bantu ba bisamba bionso bayidi. (Matayo 28:19) Kuenza mudimu eu kakuvua kupepele to. Bayidi ba Yezu bavua bena Yuda, ne anu bu Yona, bavua ne tshibidilu tshia kuakula anu ne bantu ba mu ditunga diabu. Bua kuamba bulelela, bavua anu mua kudimona benzejibue bua kulonda lungenyi lua disungulujangana luvuaku mu tshikondo atshi. Kadi Yehowa wakenza bua se: basadidi bende bajingulule tshivuaye musue bua bualu buabu.

Bualu bua kumpala buvua bua kutshimuna disungulujangana divua pankatshi pa bena Yuda ne bena Samalea. Bena Yuda kabavua bumvuangana ne bena Samalea to. Nansha nanku, misangu ya bungi Yezu wakalongoluela bena Samalea njila bua kuitababu lumu luimpe mu matuku avua alua kumpala. Wakaleja muvuaye kayi ne kansungasunga pakakulaye ne mukaji muena Samalea. (Yone 4:7-26) Musangu mukuabu, pakelaye lusumuinu lua muena Samalea wa luse, wakaleja mutendeledi muena Yuda ne: bantu bavua kabayi bena Yuda bavua mua kunanga muntu nabu. (Luka 10:25-37) Pakakumbana tshikondo bua Yehowa kubuejaye bena Samalea mu tshisumbu tshia bena Kristo, Filipo, Petelo ne Yone, bonso bena Yuda, bakayisha bena mu Samalea. Mukenji uvuabu bayisha wakapesha bena mu tshimenga etshi disanka dia bungi menemene.​—Bienzedi 8:4-8, 14-17.

Bikalabi bivua bikole bua bena Kristo bena Yuda kunangabu bena Samalea bavua bikale balela babu ba pale, bivua ne bua kuikala bibakolele menemene bua kunanga bantu bavua kabayi bena Yuda anyi bantu ba bisamba bia bende bavua bena Yuda bapetula ne bakine. Nansha nanku, kunyima kua lufu lua Yezu, bakumbusha mikalu ivua pankatshi pa bena Kristo bena Yuda ne bantu ba bisamba bia bende. (Efeso 2:13, 14) Bua kuambuluisha Petelo bua itabe ndongoluelu mupiamupia eu, Yehowa wakamuambila mu tshikena-kumona bua ‘kabikidi tshiakulengejabu kudi Nzambi ne: [ntshibipe].’ Pashishe nyuma wa Yehowa wakamulombola kudi muntu wa bisamba bia bende diende Kônelio. Pakajingulula Petelo mushindu uvua Nzambi umona malu, bua se: kavua ne bua kuamba muntu eu wa bisamba bia bende ne: mmubipe bualu Nzambi ukavua mumukezule, ke Petelo kuambaye ku bukole bua nyuma muimpe ne: ‘Bulelela, ndi njingulula ne: Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’ (Bienzedi 10:9-35) Petelo wakakema bikole pakamuleja Nzambi ne: uvua muitabe Kônelio ne dîku diende pa kubitshikijila nyuma muimpe!

Paulo: tshivuadi tshisungula bua bisamba bia bende

Mudimu wa Paulo wa diyisha udi tshilejilu tshilenga tshia mushindu udi Yehowa ulongolola basadidi bende ku kakese ku kakese bua kunangabu ne kuambuluisha bantu ba mishindu yonso. Mu tshikondo tshiakakudimuna Paulo mutshima, Yezu wakamba ne: Paulo uvua mua kuenza mudimu bu tshivuadi tshisungula bua kufikisha dîna diende kudi bantu ba bisamba bikuabu. (Bienzedi 9:15) Pashishe Paulo wakaya ku Alaba, pamu’apa bua kuelangana meji bua disua dia Nzambi dia se: amuenzele mudimu wa kumanyisha bisamba bia bende lumu luimpe.​—Galatia 1:15-17.

Mu luendu luende lua kumpala lua bu-misionere, Paulo wakaleja lukunukunu pavuaye uyisha bantu bavua kabayi bena Yuda. (Bienzedi 13:46-48) Yehowa wakabenesha mudimu wa Paulo, kulejabi ne: mupostolo eu uvua wenza mudimu uvua mu diumvuangana ne disua dia Yehowa. Paulo wakaleja ne: uvua mumvue bimpe menemene mushindu uvua Yehowa umona malu pakabelaye Petelo ne dikima dionsopakalejaye kansungasunga mu dibenga kusomba ne bana babu bena Kristo bavua kabayi bena Yuda.​—Galatia 2:11-14.

Tudi tupeta tshijadiki tshikuabu tshidi tshileja ne: Nzambi uvua ulombolola mudimu wa Paulo mu luendu luende luibidi lua bu-misionere pakamukanda nyuma muimpe bua kuyisha mu provense wa bena Lomo wa Bitunia. (Bienzedi 16:7) Bidi bimueneka ne: tshikondo katshivua tshianji kukumbana bua kuyishamu to. Kadi panyima, bamue bantu ba mu Bitunia bakalua bena Kristo. (1 Petelo 1:1) Mu tshikena-kumona kampanda, muena Makedonia mukuabu wakasengelela Paulo ne: “Lua biebe mu Makedonia, utukuatshishe.” Ke Paulo kujingulula ne: uvua ne bua kushintulula luendu bua kumona mua kuya kayisha lumu luimpe mu provense wa bena Lomo au.​—Bienzedi 16:9, 10.

Dimanya kuibidilangana ne nsombelu mipiamipia dia Paulo diakedibua mu diteta pavuaye uyisha bena mu Atena. Mikenji ya bena Gelika ne ya bena Lomo ivua ikandika bua kubueja nzambi mienyi ne bilele bipiabipia bia ntendelelu mu matunga abu. Dinanga divua nadi Paulo bua bantu aba diakamusaka bua kuelangana meji bikole bua bilele bivuabu nabi mu ntendelelu yabu. Pavuaye mu Atena wakamona tshioshelu tshikuabu bafundapu ne: ‘Kudi Nzambi udi kayi Mumanyibue.’ Wakakula bua bualu ebu mu mudimu wende wa diyisha. (Bienzedi 17:22, 23) Mmushindu kayipu mulenga wa kutuadija dimanyisha mukenji bimpe ne kanemu!

Paulo uvua ne bua kuikala umvua disanka dia bungi pavuaye wela meji bua bipeta bia mudimu wende wa dikala mupostolo wa bisamba bia bende! Wakambuluisha bua kuasa bisumbu bivua ne bena Kristo bungi tshianana bavua kabayi bena Yuda ba mu Kolinto, mu Filipoi, mu Tesalonike ne mu bimenga bia mu Galatia. Wakambuluisha balume ne bakaji ba ditabuja bu mudi Damali, Dionusio, Sêgio Paulo ne Tito. Ndisanka kayipu dia kumona bantu bavua kabayi bamanye ni n’Yehowa ni m’Bible bitaba bulelela bua bena Kristo? Bua bidi bitangila mudimu wakenzaye bua kuambuluisha bantu bavua kabayi bena Yuda bua kumanya bulelela, Paulo wakamba ne: ‘Nunku mu bualu ebu ndi ntshinta bua kuamba lumu luimpe ku nseke kudi dîna dia Kristo kadiyi dianji kutedibua, mbu muakafundabu ne: Nebamone kudi [bavua kabayi banji kumvua] lumu luende lulua kudibu, ne badi kabayi banji kumvua nebajingulule.’ (Lomo 15:20, 21) Tudiku petu mua kuambila bantu badi kabayi bena kuetu lumu luimpe anyi?

Tuambuluishayi bantu bonso ba pa buloba

Solomo wakalomba Yehowa bua bantu bavua kabayi bena Isalele bavua mua kulua kutendelela mu ntempelo wa mu Yelushalema. Wakalomba ne: ‘Umumvuile mu diulu kuudi ushikama, wenzele muntu wa bende malu onso adiye ukulomba; bua bantu bonso ba pa buloba bamanye dîna diebe.’ (1 Bakelenge 8:41-43) Lelu bamanyishi ba Bukalenge binunu ne binunu ba mu matunga a bungi badi pabu ne meji a mushindu’eu. Badi bapeta bantu badi bu bena Ninewe bavua kabayi ‘mua kujingulula tshianza ne ntshia balume ne ntshia bakaji.’ Kabidi bamanyishi ba Bukalenge badi ne dijinga dikole dia kukumbaja milayi idi yakula bua disangisha dia batendeledi balelela mu matunga a bungi.​—Yeshaya 2:2, 3; Malaki 4:1-3.

Amu mudi bantu ba mu Bukua-buena-Kristo bitabe mukenji wa ditekemena udi mu Bible, bantu ba mu ntendelelu mikuabu badi bawitaba pabu. Mmunyi mudi muanda eu ukutangila wewe nsungasunga? Dikonkonona nkayebe bimpebimpe. Biwamona ne: lungenyi lua disungulujangana nduele miji bikole munda muebe, ulumbushe pa kukeba bua kuikala ne dinanga.a Kubengi bantu badi Nzambi witaba.​—Yone 3:16.

Dianjila kulongolola lungenyi luebe kumpala kua kuyukila ne muntu wa muaba mukuabu. Keba bua kumanya malongesha a ntendelelu wabu, majinga abu, ne ngelelu wabu wa meji; pashishe ukebe bualu bunudi mua kupetelanganapu. Uleje bakuabu buimpe ne luse. Epuka dielangana mpata, kuikadi muena malu makole, kadi ukankamijangana. (Luka 9:52-56) Wewe muenze malu aa, neusankishe Yehowa “udi musue bantu bonso basungidibue, bafike ku dimanya dia malu malelela.”​—1 Timote 2:4.

Tudi ne disanka dia bungi bua mutudi ne bantu ba miaba ne bibidilu kabukabu. (Yeshaya 56:6, 7) Kabienaku bitusankisha bikole lelu patudi katuyi anu tumvua mêna bu mudi Mariya, Jean, Étienne ne Thomas munkatshi muetu, kadi bikale ne makuabu mêna bu mudi: Mamadou, Jegan, Reza ne Chan anyi? Bulelela, ‘mbatunzuluile tshiibi tshinene tshia kuenza mudimu mukole’. (1 Kolinto 16:9) Nunku dîba dionso didi mushindu umueneka, tudienzejayi bua kuambulula lubila ludi Yehowa Nzambi udi kayi ne kansungasunga wela bua kubikila bantu ba bisamba bionso!

[Mêyi adi kuinshi]

[Bimfuanyi mu dibeji 23]

Paulo wakambila bantu ba miaba yonso lumu luimpe mu dibidilangana ne nsombelu ya bantu ne bantu

. . . mu Atena

. . . mu Filipoi

. . . mu luendu