Tshilumbu tshidi pankatshi pa Yehowa ne matunga
“Diyoyo nedifike bushuwa too ne ku tshitupa tshia kulekule tshia buloba, bualu Yehowa udi mu tshilumbu ne matunga.”—YELEMIYA 25:31.
1, 2. (a) Ntshinyi tshiakenzeka mu ditunga dia Yuda kunyima kua lufu lua mukalenge Joziase? (b) Mukalenge wa ndekelu wa ditunga dia Yuda uvua nganyi, ne mmunyi muakakengaye bu muvuaye mubule lulamatu?
DITUNGA dia Yuda divua mu tshikondo tshibi tshitambe ne tshia malu makole. Mu bidimu bikese patupu bia kukokesha kuende, mukalenge muimpe Joziase uvua muanji kukandisha tshiji tshikole tshia Yehowa. Kadi, ntshinyi tshiakenzeka kunyima, pakashipabo Joziase mu 629 K.B.B.? Bakalenge [buonso] bakakokesha kunyima kuende kabakanemeka Nzambi to.
2 Anu bu mudi 2 Bakalenge 24:19 umanyisha malu adi atangila mukalenge wa ndekelu wa Yuda, Sedekiase, muana wa balume muinayi wa Joziase, ne: kakalekela ‘kuenza malu avua mabi ku mêsu kua Yehowa, bilondeshile bionso bivua [tutuende muan’a bute] Jehoyakime muenze.’ Mbipeta kayi biakamueneka? Nebukadnezare wakabunda Yeruzaleme, kukuata Sedekiase, kukosa bana bende ba balume muminu yeye mutangile, pashishe kumushipa mêsu ne kuya nende ku Babilone. Kabidi, bena Babilone bakapawula mpanza ne malongo bivuabo batumika nabi bua ntendelelu wa Yehowa, bakuosha ntempelo ne tshimenga. Aba bakashala ne muoyo bakaya nabo mu bupika ku Babilone.
3. Ntshikondo kayi tshiakatuadija pakabutudibua Yeruzaleme mu 607 K.B.B., ne ntshinyi tshivua ne bua kuenzeka ku ndekelu kua tshine tshikondo atshi?
3 Tshidimu atshi, mu 607 K.B.B., ke tshiakabutudibua Yeruzaleme ne ke tshiakatuadija “bikondo bijadika bia matunga” bidibo batele mu Luka 21:24. Tshikondo etshi tshia bidimu 2 520 tshiakajika mu siekele wetu eu, mu tshidimu tshia 1914. Tshidimu atshi, dîba diakakumbana bua Yehowa kumanyisha ne kukumbaja dilumbuluisha diende pa bulongolodi ebu bunyanguke ku butuangaji bua Muanende mubanjija, Yezu Kristo, udi munene kutamba Nebukadnezare. Dilumbuluisha edi diakatuadija ne etshi tshidi tshiakanangane ne Yuda lelu’eu, bulongolodi kampanda budi budibala mudibo buleji-mpala bua Nzambi ne Kristo pa buloba.
4. Mu diumvuangana ne mulayi wa Yelemiya, nnkonko kayi idi mua kujudibua mpindieu?
4 Katuenaku tumona difuanangana, ku lumue luseke, pankatshi pa munyukunyuku uvua mukuate bukalenge bua Yuda mu bidimu bia ndekelu bia kukokesha kua bakalenge bende—ne ku lukuabu luseke, munyukunyuku udi unyukula bukua-buena-nkristo mu matuku etu aa—ne malu makole adi akuata kabidi matunga adi mabunyungulule anyi? Kabiyi mpata! Apu, mulayi wa Yelemiya udi umvuija tshinyi pa bidi bitangila mushindu wakumbaja Nzambi malu lelu’eu? Tuanjibi kumona.
5, 6. (a) Biangatshile mu 1914, mmunyi mudi nsombelu wa bukua-buena-nkristo mufuanangane ne eu uvua nende Yuda kumpala kua kabutu kende? (b) Mmukenji kayi udi kasumbu ka Yelemiya ka matuku aa katuadile bukua-buena-nkristo?
5 Mumanyi mupiluke wa makumi ne filozofi muena Grande-Bretagne, Bertrand Russell, wakamba kukadi bidimu 40 ne: “Katshia ku tshidimu tshia 1914, aba buonso badi bajingulula nshidimukilu wa bukua-bantu badi bapampakana bikole bua tshidi tshimueneka bu dilonda njila dikena kuepuka ne dimana kujadika diambedi diatufikisha ku kabutu kapite bunene.” Ku luende luseke, muena mbulamatadi wa ku ditunga dia Allemagne, Konrad Adenauer, wakamba ne: “Dikubibua ne bupole biakajimina mu nsombelu wa bantu katshia ku tshidimu tshia 1914.”
6 Lelu’eu, anu bu mu tshikondo tshia Yelemiya, kusemena kua nshikidilu wa bulongolodi ebu bua malu kudi kumuenekela ku malu mabi, bu mudi kuela panshi kukuate buôwa kua mashi a badi kabayi ne tshilumbu, amu bu muakenzekabi nangananga mu mvita yonso ibidi ya buloba bujima mu siekele eu [wa 20]. Mvita eyi ivua yenzeka nangananga pankatshi pa matunga adi bukua-buena-nkristo bujame, adi adiamba mudiwo atendelela Nzambi wa mu Bible. Mbuena-mpala ibidi bua mushindu kayipu! Kabiena bikemesha padi Yehowa mutume Bantemu bende bua kubamanyisha mukenji eu udi mu Yelemiya 25:4-6: “Alukilayi, bu nuenu mua kusua, muntu yonso alekele njila wende mubi ne bikadilu bibi bia bienzedi biende, . . . Ne kanulondi nzambi mikuabu bua kuyisadila ne kuyinamina, bua kanumfikishi munda ku mudimu wa bianza bienu ne meme tshivu kunukebela tshipupu.”
7. Ntshinyi tshidi tshijadika se: bukua-buena-nkristo budi bulengulula madimuija a Yehowa?
7 Kadi, matunga a bukua-buena-nkristo ki mmalukile pa kulekela bienzedi biawu bibi nansha. Ebi mbilejibue patoke ku dilambula nzambi wa mvita milambo ku Corée ne ku Vietnam. Ne atshidi matungunuke ne kuwuja mfranga mu bibombi bia bapanyishi ba lufu, benji ba bingoma. Matunga a bukua-buena-nkristo mmatule lupetu lutua ku miliyare tshinunu ya dolare bua kulubuluja midimu ya dienza bingoma mu bidimu bia 80. Mu tshidimu tshia 1951 too ne tshia 1991, mfranga mitula bua kukumbaja bipatshila bia biluilu ku ditunga dia Etats-Unis ivua mipite ne kule makasa mapeta kudi biapu bionso bia mu ditunga edi. Bushuwa, katshia mvita ya mu mifintshifintshi yajika, kujika kuvuabo bela tubobo tuvule, bungi bua bingoma bia nikleere bia kale mbukepele, kadi nkushale bikuabu bia bukole bubutudi bungi kabuyi kubala, ne bitshidi bitungunuka ne kuvudijibua mene. Dimue dituku, bushuwa nebikale mua kutumika nabi.
Dilumbuluisha bukua-buena-nkristo bulenguludi bua bubi
8. Mmunyi muakakumbanyina bukua-buena-nkristo mêyi adi mu Yelemiya 25:8, 9?
8 Lelu, mêyi aa a Yehowa mafunda mu Yelemiya 25:8, 9 mmakumbanyine menemene bukua-buena-nkristo, budi kabuyi butumikile mikenji ya buakane ya bena nkristo: “Ke bua tshinyi monayi tshidi Yehowa wa biluilu muambe: ‘Bu munudi kanuyi batumikile mêyi anyi, ndi ntuma ne nengangate mêku wonso a ku nord,’ aa mmêyi a Yehowa, ‘eyowa, nengatume kudi Nebukadnezare, mukalenge wa Babilone, musadidi wanyi, ne nendue nabo bua kuluisha ditunga edi ne buonso badi basemu, ne matunga aa wonso adi ku mpenge kuadi; ne nengafile ku kabutu, nengavuije tshintu tshidi tshikemesha bantu ne tshintu tshidibo belela mionzo, ne miaba miatula bua bikondo kabiyi bijadika.’” Nunku, dikenga dinene nedianji kudituta pa bukua-buena-nkristo, budi budibala mudibo tshisamba tshia Nzambi, ne pashishe neditante pa buloba bujima, dikuate ‘matunga wonso adi ku mpenge.’
9. Mmu ngumvuilu kayi muavu nsombelu wa mu nyuma wa bukua-buena-nkristo mubi mutambe mu tshikondo tshietu etshi?
9 Tshikondo kampanda mu bukua-buena-nkristo, bavua banemeka Bible, dibaka ne nsombelu wa dîku bivua biangatshibua bu mpokolo wa disanka mu miaba pabuipi ne yonso pa buloba bujima, bantu bavua bajuuka ne dinda ne benza midimu yabu ya ku dituku ne ku dituku. Bavule bavua biikisha bua kupetulula makanda pa kubala ne kulonga Dîyi dia Nzambi dilolo, ku bukenke bua muinda. Kadi, lelu’eu, nsombelu wa bantu bungi kabuyi kubala mmunyanguke ne tshiendenda tshia masandi, dishipa dia mabaka, kunua kua bintu bia lulèngù ne maluvu makole, buenzavi bua bansonga, lukuka, bukata ne lulengu bua kuenza mudimu, bupika bua televizion, ne malu makuabu mabi. Nsombelu eu ntshimanyinu tshidi tshimanyisha kabutu kakadi Yehowa Nzambi pa kutumina bakokeshi ba bukua-buena-nkristo balenguludi ba malu mabi.
10. Umvuija muikala nsombelu wa bukua-buena-nkristo kunyima kua dikumbana dia malumbuluisha a Yehowa.
10 Yehowa udi umanyisha anu bu mutudi tubibala mu Yelemiya nshapita wa 25, mvese wa 10 ne wa 11 ne: “Nengumbushe munkatshi muabu mutoyi wa ditshionkomoka ne mutoyi wa disanka diabo, dîyi dia musedi ne dîyi dia musedibue, mutoyi wa tshiamu tshia mpelu tshidibo bendesha ne diboko ne butoke bua muinda. Ne ditunga edi dijima didi ne bua kulua muaba muatula, tshintu tshidi tshikemesha.” Nebikale kukema kua mushindu kayipu pabutudibua miaba minene ya ntendelelu ne nzubu milengele ya bukua-buena-nkristo! Kabutu aka nekikale ne bualabale kayi? Mu tshikondo tshia Yelemiya, Yuda ne matunga mena mutumba akashala kaayi masa kudi bantu munkatshi mua bidimu 70, lupolo lua dîba luleja mu Musambu wa 90:10, bu matuku wonso masanga adi muoyo wa muntu unenga. Lelu’eu, dikumbajibua dia dilumbuluisha dia Yehowa nedikuate buloba bujima ne bipeta biadi nebishale kashidi.
Dilumbuluisha Babilone Munene
11. Nnganyi wambuluisha bu tshiamu tshia mudimu bua kubutula bukua-buena-nkristo? Mbua tshinyi?
11 Anu bu mudi mukanda wa Buakabuluibua 17:12-17 ubimanyisha, dîba nedilue diatuadija Yehowa kukumbaja mudimu wende mukuate buôwa pa kuteka lungenyi mu mutshima wa “nsengu dikumi”—makole a biluilu adi madisange bua kuenza Bulongolodi bua Matunga Masanga—“bua kukumbajayi lungenyi luende,” elu lua kubutula nsangilu wa pa buloba bujima wa bitendelelu bia dishima. Kadi, mmunyi muenzekabi? Nekuikale mishindu kabukabu yasaka ‘nsengu dikumi’ mitela mu Buakabuluibua nshapita wa 17 ku ‘dikina mukaji wa ndumba ne . . . kumuosha ne kapia, kumushidisha,’ bilondeshile mêyi mamba mu mvese wa 16. Bushuwa, bingoma bia nikleere mbisalale ne bitshidi bitungunuke ne kusalala mu miaba kabukabu idi ndululu pa buloba. Kadi, tudi ne bua kuindila bua kumona muateka Yehowa lungenyi luende mu mitshima ya bamfumu bena tshididi bua kukumbajabo didisombuela diende.
12. (a) Ntshinyi tshiakenzekela Babilone kunyima kua yeye mumane kubutula Yeruzaleme? (b) Ntshinyi tshienzekela matunga kunyima kua kabutu ka bukua-buena-nkristo?
12 Ku kale, kuakafika tshikondo tshivua Babilone ne bua kupeta pende dinyoka dia tshiji tshikole tshia Yehowa. Nunku, biangatshile ku Yelemiya nshapita wa 25, mvese wa 12, mulayi udi uleja malu mushindu mukuabu, pa kupingana tshia nyima. Mpindieu, Nebukadnezare ne Babilone kabatshiena batumika bu Mukumbaji wa dilumbuluisha dia Yehowa nansha, kadi mbatekibue mu mulongo umue ne matunga a pa buloba bujima. Nsombelu eu mmufuanangane ne udiku mu tshikondo tshietu etshi. “Nsengu dikumi” ya mu Buakabuluibua nshapita wa 17 neyibutule bitendelelu bia dishima, kadi yoyi payi neyibutudibue pashishe pamue ne “bakalenge [bakuabu] ba pa buloba,” anu bu mudi Buakabuluibua nshapita wa 19 ubileja. Mu Yelemiya 25:13, 14, mbakulemu bua dilumbuluishibua dia Babilone ne dia “matunga wonso” avua mamuenesha tshisamba tshia Yehowa kasuba. Yehowa wakatumika ne Nebukadnezare bu muena mudimu mukumbaji wa dilumbuluisha bua kunyoka Yuda. Kadi, mukalenge eu wa Babilone pamue ne aba bakakokesha kunyima kuende, bakabandisha makaya ne lutambishi kumpala kua Yehowa yeye muine, tshilejilu pa kutumika bibi ne mpanza ya mu ntempelo wende. (Danyele 5:22, 23) Ku lukuabu luseke, pakabutulabo Yeruzaleme kudi bena Babilone, matunga mena mutumba ne Yuda—Moabe, Amona, Tyr, Edome ne makuabu—akasanka ne kuseka tshisamba tshia Nzambi. Mine aa akapeta pawu difutu divua diaakanyine dia kudi Yehowa.
Dilumbuluisha “matunga wonso”
13. “Lupanza elu lua mvinyo wa tshiji tshikole” ludi lumvuija tshinyi, ne mbualu kayi buenzekela aba banua lupanza elu?
13 Ke bua tshinyi, Yelemiya nshapita wa 25, mvese wa 15 ne wa 16, udi wamba ne: “Monayi tshidi Yehowa, Nzambi wa Izalele, mungambile: ‘Angata lupanza elu lua mvinyo wa tshiji ku tshianza tshianyi, ne udi ne bua kulunuisha matunga wonso andi nkutuma bua kuya kudiwu. Ne adi ne bua kulunua, ne kuenda atetuka, ne kuenza bu bantu bapie dipala, bua muele undi ntuma munkatshi muawu.’” Bua tshinyi mbakule bua ‘lupanza lua mvinyo wa tshiji tshikole tshia Yehowa’? Mu Matayi 26:39, 42 ne mu Yone 18:11, Yezu mmuakule bua “lupanza” ludi tshimfuanyi tshia disua dia Nzambi kudiye. Bia muomumue, lupanza ludi luleja disua dia Nzambi bua matunga, disua dia kuanuisha didisombuela diende. Yelemiya nshapita wa 25:17-26 udi utela matunga avua bu tshilejilu tshia matunga a mu tshikondo tshietu etshi.
14. Mu diumvuangana ne mulayi wa Yelemiya, nnganyi wanua lupanza lua mvinyo wa tshiji tshia Yehowa, ne ebi bidi tshimfuanyi tshia tshinyi bua matuku etu aa?
14 Pikala bukua-buena-nkristo, anu bu Yuda, bumane kulua “muaba muatula, tshintu tshidi tshikemesha, tshintu tshidibo belela mionzo, ne tshintu tshiela mulawu,” kabutu nekindile nsangilu wa pa buloba bujima wa bitendelelu bia dishima. Pashishe, nekakuate bulongolodi ebu bujima, buleja mu tshimfuanyi kudi Ejipitu, ne nebunue pabu lupanza lua minyo wa tshiji tshia Yehowa! Eyowa, “bakalenge buonso ba ku nord, badi pabuipi ne badi kule, umue kunyima kua mukuabu, pamue ne makalenge makuabu wonso a pa buloba” nebikale ne bua kunua. Ndekelu wa bionso, “mukalenge wa Schéschac yeye muine neanue kunyima kuabu.” “Mukalenge eu wa Schéschac” nnganyi? Schéschac ndîna dia mu tshimfuanyi, mfundilu musokoka, wa dibubika bualu, didi difunkuna Babilone. Anu bu muvua Satana mukalenge wa Babilone ukêna-umueneka, ke mudiye “mfumu wa bulongolodi ebu” kabidi lelu’eu, anu bu mudi Yezu ubileja. (Yone 14:30) Nunku, Yelemiya 25:17-26 mushindu umue ne Buakabuluibua nshapita wa 18 too ne wa 20, udi ufila butoke pa dilondangana dia mianda yenzeka pendeshibua lupanza lua tshiji tshia Yehowa. Diambedi, nsangilu wa pa buloba bujima wa bitendelelu bia dishima ke wabutudibua, pashishe, makokeshi a malu a tshididi, ku ndekelu, Satana yeye muine neakupibue mu dijimba.—Buakabuluibua 18:2; 19:19-21; 20:1-3.
15. Ntshinyi tshienzeka pumvuika lubila lua “ditalala ne dikubibua”?
15 Bantu badi bakula bia bungi bua ditalala ne dikubibua katshia bela kabobo ka mudi mvita ya mu mifintshifintshi mijike, ne nkushale mpindieu anu bukokeshi bua bukole bupitshidile bumuepele. Anu bu mudi Buakabuluibua 17:10 ubileja, buine bukokeshi bua bukole bupitshidile ebu, mutu wa muanda-mutekete wa nyama wa luonji, budi ne bua “kushala lupolo luîpi lua dîba.” Kadi, “lupolo luîpi lua dîba” elu lukadi lutua ku tshibungubungu. Mu tshitupa tshîpi emu, mbila yonso ya “ditalala ne dikubibua” ya bena malu a tshididi neyishikile ne “kabutu ka tshimpitshimpi kadituta diakamue padibo.” Ke tshidi mupostolo Paulo wamba.—1 Tesalonike 5:2, 3.
16, 17. (a) Pikala muntu kampanda uteta kuepuka dilumbuluisha dia Yehowa, ntshinyi tshiapatuka bu tshipeta? (b) Disua dia Yehowa dia kubutula nedikumbane mushindu kayi pa buloba mu tshitupa tshîpi emu?
16 Bulongolodi buonso bua pa buloba bujima bua Satana, kutuadija ne bukua-buena-nkristo, budi ne bua kunua lupanza lua didisombuela dia Yehowa. Ke tshidi tshimueneka pa kuangata dilondangana dia mianda didiye uleja Yelemiya pashishe, mu nshapita wa 25, mvese wa 27 too ne wa 29: “Udi ne bua kubambila ne: ‘Monayi tshidi Yehowa wa biluilu, Nzambi wa Izalele muambe: “Nuayi, nukuatshike, nuluke ne nudishinde kanuyi mua kuimana kuulu, bua muele undi ntuma munkatshi muenu.”’ Ne bidi ne bua kuenzeka nunku biabengabo kuangata lupanza ku tshianza tshiebe bua kunua, apo, wewe neubambile ne: ‘Monayi tshidi Yehowa wa biluilu muambe: “Nenunue bushuwa. Bualu, monayi! pa tshimenga mene padibo babila dîna dianyi ke pandi ntuadija kuvuija tshipupu, ne nuenu, nenushale kanuyi nupeta dinyoka anyi?”’ ‘Kanuakushala kanuyi nupeta dinyoka, bualu ndi mbikila muele pa bantu buonso badi bâse pa buloba,’ aa mmêyi a Yehowa wa biluilu.”
17 Aa mmêyi makole—adi akuatshisha buôwa bushuwa, bualu mmamba kudi Mfumu Munene udi ku mutu kua bionso biakafukibua, Yehowa Nzambi. Munkatshi mua bidimu binunu ne binunu, mmulengulule ne lutulu luonso mêyi a diupula lumu, bipendu ne lukinu bivua bantu buomekela dîna diende dinsantu. Kadi, ndekelu wa bionso, dîba diakumbanyi bua yeye kuandamuna ku disambila divua Muanende musuibue, Yezu Kristo, mulongeshe balongi bende patshivuaye pa buloba: “Nudi ne bua kusambila nunku: ‘Tatu wetu udi mu diulu, dîna diebe ditumbe! Bukalenge buebe bulue! Disua diebe dienzeke pa buloba bu mudidi dienzeka mu diulu!’” (Matayi 6:9, 10) Disua dia Yehowa didi se: Yezu atumike bu muele Wende pa kukumbaja didisombuela diende.
18, 19. (a) Nnganyi udi uya lubilu pa kabalu katoke bua kutshimuna mu dîna dia Yehowa, ne ntshinyi tshidiye windila kumpala kua kujikija ditshimuna diende? (b) Mmalu kayi makuate buôwa enzeka palekela banjelu mpepele mikebeshi ya mvunde ya tshiji tshia Yehowa?
18 Mu Buakabuluibua nshapita 6, tudi tubala diambedi ne: Yezu udi uya lubilu pa kabalu katoke bua ‘kutshimuna ne kujikija ditshimuna diende.’ (mvese 2) Lubilu elu pa kabalu luakatuadija pakamubanjijabo bu Mukalenge wa mu diulu mu 1914. Tubalu tukuabu ne batubandi badi bamulonda mu nyima, bidi tshimfuanyi tshia mvita mijima, tshiyole tshia nzala ne tshipupu tshia masama, bidi bikengesha bukua-bantu katshia ku tshidimu atshi. Kadi, makenga aa wonso neajike dîba kayi? Buakabuluibua nshapita wa 7 udi utumanyisha ne: banjelu banayi mbakuate bikole “mpepele inayi ya buloba” too ne pasangishibua Izalele wa mu nyuma, kabidi ne musumba munene udi ufuma mu matunga wonso bua kupeta lupandu. (mvese wa 1) Ntshinyi tshienzeka pashishe?
19 Yelemiya nshapita wa 25, mvese wa 30 ne wa 31, udi utungunuka ne: “‘Yehowa yeye nkayende neakungule biangatshile muulu, ne biangatshile ku tshisombedi tshiende tshinsantu neatayishe dîyi diende. Bushuwa, neakungule pa muaba wende wa tshisombedi. Neele lubila lufuane lua badiatakaji ba tshikaminu tshia mvinyo, bua kubunda nalu bantu buonso badi bâse pa buloba. Diyoyo nedifike bushuwa too ne ku tshitupa tshia kulekule tshia buloba, bualu kudi tshilumbu pankatshi pa Yehowa ne matunga. Yeye nkayende neadilumbuluishile muntu yonso. Bua bantu babi, neabafile ku muele,’ aa mmêyi a Yehowa.” Nenku, ditunga nansha dimue kadiakudiepula ku dinua lupanza lua tshiji tshikole tshia Yehowa to. Pa nanku, bu mutshidiku dîba, mbimpe bua muntu yonso wa mutshima mululame adilamune ku bubi bua matunga kumpala padi banjelu banayi kabayi banji kulekela mpepele mikebeshi ya mvunde ya tshiji tshikole tshia Yehowa. Mikebeshi ya mvunde, miaku ki mmiangata mu mushindu munekesha to, bualu mulayi wa Yelemiya udi utungunuka nunku mu mvese wa 32 ne wa 33:
20. Ku ndekelu wa bionso, ntshienzedi kayi tshialeja bualu bunene bua dilumbuluisha dia Yehowa, kadi bua tshinyi tshienzedi etshi tshidi tshikengedibua?
20 “Yehowa wa biluilu udi wamba nunku: ‘Monayi! Tshipupu tshidi tshipatuka ku ditunga ne ku ditunga, ne mvunde mukole neajuke biangatshile ku bitupa bia kulekule bia buloba. Ne bushuwa, aba bashipabo kudi Yehowa mu dituku adi nebikale ku mfudilu too ne ku mfudilu mukuabu kua buloba. Kabakubadila, kabakubangula ne kabakujiikibua. Nebalue bu bufuke pa tshipapu tshia buloba.’” Monayi bushuwa muanda wa dibungama wa bitalu bungi kabuyi kubala, kadi mbimpe wenzeke, bua buloba bukezudibue ku bubi buonso kumpala kua Mparadizu mulaya kudi Nzambi kuashibua.
Balami nebele mikunda ne mbila
21, 22. (a) Mu Yelemiya 25:34-36, mbanganyi bavua “balami” ba Izalele, ne mbua tshinyi mbasakibue ku diela mikunda ne mbila? (b) Mbalami kayi ba matuku aa badi bakumbanyine menemene tshiji tshia Yehowa, bua tshinyi bidi ne bua kuikala nanku?
21 Mvese wa 34 too ne wa 36 idi isakidila pa bidi bitangila dilumbuluisha dia Yehowa ne: “Elayi mikunda, nuenu balami, ne elayi mbila! Bungulukayi mu buloba, nuenu banene ba tshisumbu tshia mikoko, bualu matuku enu akumbanyi bua kukoshibua mitu ne bua kutangadika kuenu, nenupone bu tshivuadi tshilengele! Ne muaba wa kunyemena wanyanguki popamue ne balami ba mikoko, ne mushindu wa kudiopoka wanyanguki pawu ne banene ba tshisumbu tshia mikoko. Telejayi! Kudila kua balami ne kukungula kua banene ba tshisumbu tshia mikoko, bualu Yehowa udi ubutula bidi mu mpata yabu ya tshidiilu.”
22 Balami aba mbanganyi? Apa, ki mbafunkuna ba-ntunga-mulongo ba bitendelelu, bikala bamane kunua tshiji tshia Yehowa. Mbalami ba basalayi, badibo batele kabidi mu Yelemiya 6:3, badi basangisha biluilu biabu bu bisumbu bia mikoko bua kuyobola Yehowa. Mbamfumu bena malu a tshididi, badi banemena pa makaya a badibo bakokesha. Bavule ba kudibo mba-tuntuntu tua bintu ku mapangu, bapiluke mu dikosa mishiku. Mbena lujoko bua kujikija biyole bia nzala bidi bibutula bantu bavule mu matunga mudi biakudia bikepela. Badi banemesha “banene ba tshisumbu tshia mikoko,” bu mudi banene bena mu biapu bia bingoma, babutudi ne banyangi bena lukuka ba metu, bisuku, mâyi ne kapepa, eku babenga kufila diambuluisha bua luondapu ne biakudia bidi bilomba amu kutula mfranga mikese, kadi idi ipandisha bana miliyo makumi mavule bakadi mikolo ku tshina.
23. Umvuija mushindu wikala nsombelu mu miaba ya Satana kunyima kua bienzedi bia Yehowa bia dibutula.
23 Kabiena bikemesha padi nshapita wa 25 wa Yelemiya ujika ne mvese wa 37 ne wa 38, pa kuamba bua bantu aba badi bakeba ditalala ne buiminyi anu bua diakalenga diabo nkayabu ne: “Miaba ya ditalala ya kusombela yakulua miaba mipuwe talalaa bua tshiji tshikole tshia Yehowa. Wakumbuka mu tshipuka mutuye musombele amu bu muana wa nyama wa ntambue, bualu ditunga diabu ndilue muaba wa lunsuya, bua muele udi ukengesha ne bua tshiji tshiende tshikole.” Ndunsuya kayipu, bushuwa! Kadi, tshiji tshikole tshia Yehowa netshikumbajibue ku diambuluisha dia “muele wende wa mvita,” wa Eu udi ubikidibua mu Buakabuluibua 19:15, 16 ne: “Mukalenge wa bakalenge ne Mfumu wa bamfumu” udi ulombola matunga ne dikombo dia tshiamu. Ne ntshinyi tshienzeka pashishe?
24. Kabutu ka bitendelelu bia dishima ne bishadile bia ku bulongolodi bua Satana nekatuadile bukua-bantu bakane mabenesha kayi?
24 Ukadiku mumone mutu tshipepele tshikole tshituta, [tshiupula mitshi ne tshitula misaka ya nzubu] anyi? Bitu pamu’apa bikuatshisha buôwa bukole. Kadi padibu butshia mu dinda, nansha muwasangana bukoya miaba yonso, kapepa nekikale kempe katambe ne ku matshi nekuikale kupole, abi nebikusake bua kuela Yehowa tuasakidila bua dituku dipiadipia dilenga ditambe. Bia muomumue, palekela kututa tshipepele tshia dikenga dinene, newikale mua kutangila buloba ne kuela nzambi tuasakidila bu muudi mushale ne muoyo ne mudiakaje bua kuditua pebe mu mudimu mufundila bantu kudi Yehowa: kusukula buloba bua kubuvuija mparadizu mulengele. Yehowa neikale mujikije tshilumbu tshivua pankatshi pende ne matunga mushindu wa dikema, pa kutumbisha dîna diende ne pa kukomba buloba bua disua diende dienjibuepu mu Bukokeshi bua bidimu tshinunu bua Bukalenge bua Masiya. Bukalenge ebu bulueku mu katupa kîpi emu!
Diambulula dia tshikoso 5-24 bia tshiena-bualu etshi
◻ Mbuena-mpala ibidi kayi bua bukua-buena-nkristo bualumbuluishibua mu tshitupa tshîpi emu?
◻ Mmuenenu mualabale kayi wa dilumbuluisha udi usanganyibua mu Yelemiya 25:12-38?
◻ Ndupanza kayi lua didisombuela luendeshibua mu matunga wonso?
◻ Balami bela mikunda ne mbila mbanganyi, ne mbua tshinyi badi bapampakana?
[Tshimfuanyi mu dibeji 18]
Yehowa mmumane kusungula tshiamu tshia mudimu tshia kubutula natshi bukua-buena-nkristo
[Tshimfuanyi mu dibeji 23]
Kunyima kua mpepele mikebeshi ya mvunde ya dikenga dinene, buloba bukezula nebuikaleku