Bala pamue ne bana bebe

Bilondeshile tshikandakanda tshia Veja tshia mu ditunga dia Brésil, bana ba babadi ba dilambu batu pamu’apa batamba kunanga mikanda kupita bana badibu kabayi baleje tshilejilu etshi tshia dibala ku mabu. Martha Hoppe, mumanyi mupiluke wa malu a dikola dia bana, udi wamba ne: “Kubala mikanda pamue kudi kukolesha malanda pankatshi pa baledi ne bana, ne kudi kuambuluisha muana bua kumanya bimpe malu adi mu mikanda.”

Kubadila bana bebe mikanda ne dîyi dikole kudi kabidi kukupesha mpunga wa kuandamuna nkonko. Udi mua kuakula bua bimfuanyi bionso bidi biumvuija malu adibu bafunde. Hoppe udi uleja ne: “Padi muana utamba kumvua malu adi mu mikanda, udi utamba kusakibua bua kuyikeba dîba didiye musue kumanya bia bungi.”

Baledi ba bungi ba munkatshi mua Bantemu ba Yehowa batu babala ne bana babu. Badi mua kubala mikanda bu mudi: Miyuki ya mu Mukanda wa Nzambi, Telejayi Mulongeshi munene ne Muntu mutambe bunene wa katshia ne katshia.a Mikanda bu eyi kayena patupu yambuluisha bana bua kuluabu babadi balenga, kadi bua kukolesha kabidi dijinga diabu dia kumanya bivule mu mukanda wa kumpala utu bantu batamba kusumba pa buloba bujima: Bible Munsantu. Ke bua tshinyi, biwikala muledi, fila tshilejilu kudi bana bebe pa kuikala mubadi wa dipoko wa Dîyi dia Nzambi. (Yoshua 1:7, 8) Ne mu mishindu yonso, ulongolole dîba dia kuikala ubabadila!

[Mêyi adi kuinshi]