Tudiku bamanye mushinga udi nawu mankenda anyi?

¹ Dinanga ditudi banange Nzambi wa Tshijila utudi tutendelela didi ne bua kutusaka ku ditabalela makenda a mubidi wetu, nkoseshilu wa nsuki ne mvuadilu wetu. Mukanda wa Mudimu wetu udi wamba nunku mu dibeji dia 130-131: “Bua bumanyishi butudi tufila patoke, tudi bamanyibue kudi bena mutumba betu. Kadi bumanyishi ebu nebuikale kabidi butambe buimpe bu tuetu mua kutabalela bua nzubu wetu kuikalaye ne mankenda ne bulongame munda ne panyima. . . . Balume ne batatu ba dîku badi ne bua kutabalela nangananga bua nzubu yabu ne mbanza kuikalayi ne mankenda, ne bulongame bua kufila kabidi bumanyishi buimpe. Bamfumu ba mêku mbamanye ne: badi ne bua kuenza nanku bikalabu basue kudileja mudibu baludiki ba nzubu yabu biakane, kabiyi bitangila anu dilombola dia nzubu bimpe mu nyuma. (1 Tim. 3:4, 12) Bakaji kabidi badi ne bukenji bua kutabalela pa malu aa, nangananga pa bidi bitangila munda mua nzubu. (Tito 2:4, 5) Bana bakolesha bimpe nebenze muabu muonso mua kuenza bua kuikalabu ne mankenda ne kulama bibambalu biabu ne mankenda ne bulongame. . . .

² “Nkoseshilu wetu wa nsuki ne mvuadilu wetu bidi ne bua kuikala kabidi bilondeshile mikenji ya Nzambi. Katuena mua kumonangana ne muntu kampanda munene patudi bikale ne mvuadilu mubi to. Katuenaku mua kutamba kuditatshisha bua mvuadilu wetu nangananga patudi tuenzela Yehowa mudimu, patudi tudileja bu basadidi bende mu mudimu wa buambi nansha ku tshiakuidi anyi? Nkoseshilu wetu wa nsuki ne mvuadilu wetu bidi mua kufikisha bantu ku dianyisha nansha ku dibenga tshitendelelu tshilelela tshia Yehowa. Katuena mua kuikala ne mvuadilu wa tshilenduishi nansha mvuadilu wa dipanga kanemu to. (Mika 6:8; 1 Kol. 10:31-33; 1 Tim. 2:9, 10) Patudi tuenza mudimu wa buambi nansha patudi tuya mu bisangilu bietu bia tshisumbu, bia tshijengu nansha mu mpungilu, tudi ne bua kuvuluka tshidi Mukanda wa Nzambi wamba pa bidi bitangila mankenda a mubidi ne mvuadilu wa tshitembu, bua tuetu kutumbisha Yehowa.

³ “Bidi bia muomumue kabidi patudi tuya ku Betele. . . . Kupu muoyo ne: Betele mmuomumue ne: “Nzubu wa Nzambi.” Ke bualu kayi tudi ne bua kukosesha nsuki yetu bimpe, kuikala ne mvuadilu ne ngikadilu bia muomumue ne patutu tuya mu bisangilu bietu mu Nzubu wa Bukalenge.”