Dituku dia Yehowa didi pabuipi
‘Umvuayi dîyi edi, nuenu bantu bakulumpe; telejayi matshu enu, nuenu badi bashikame mu buloba ebu!’—YOELE 1:2.
1, 2. Mbua nsombelu kayi uvuaku mu Yuda buvua Yehowa muenzejile Yoele ku spiritu bua kumanyisha mulayi wende wa bukole?
‘AKA! bua dituku adi! Bua dituku dia Yehowa didi pabuipi, ne didi dilua bu kubutuka kufume kudi Nzambi Wa-Bukole-Buonso.’ Ndimanyisha kayipu dia bukole! Uvua mukenji wa Nzambi mumanyisha bantu bende ku diambuluisha dia muprofete wende Yoele.
2 Mêyi au a mu Yoele 1:15 avua mafundila mu Yuda, pamu’apa bu mu tshidimu tshia 820 K.B.B. Tshikondo atshi tukunakuna tua bisonsa bibishi tuvua tulengeje buloba abu. Bimuma ne ntete bivua bivule. Mpata ivua mialabale ne ivua ne bisonsa bibishi. Nansha nanku, kuvua bualu bubi butambe. Ntendelelu wa Baala uvua mutangalake mu Yeruzaleme ne mu buloba bua Yuda. Bantu bavua badifile mu dikuatshika dia maluvu kumpala kua nzambi eu wa dishima. (Fuanyikija ne 2 Kulondolola 21:4-6, 11.) Yehowa uvua mua kulekela bionso ebi bitungunuka anyi?
3. Yehowa wakadimuija bua bualu kayi, ne nku tshinyi kudi bisamba ne bua kudilongolola?
3 Mukanda wa mu Bible wa Yoele kawena ushiya mpata bua diandamuna. Yehowa Nzambi uvua ne bua kubingisha bumfumu bukulu buende ne kusantuisha dîna diende dinsantu. Dituku dinene dia Yehowa divua pabuipi. Tshikondo atshi Nzambi uvua ne bua kukumbaja dilumbuluisha pa bisamba bionso mu “tshibanda tshia Yehoshafata.” (Yoele 3:12) Bisamba bidilongolole bua kuluangana mvita ne Wa-Bukole-Buonso, Yehowa. Tuetu petu tudi pabuipi ne dituku dinene dia Yehowa. Nenku tukonkononayi mêyi a mulayi wa Yoele bua matuku etu aa ne bua akadi mapite.
Ditangalaka dia bîshi
4. Muanda uvua Yoele mudimuije bualu buawu uvua ne bua kuikala wa bunene kayi?
4 Ku butuangaji bua muprofete wende, Yehowa udi wamba ne: ‘Umvuayi dîyi edi, nuenu bantu bakulumpe; telejayi matshu enu, nuenu badi bashikame mu buloba ebu! Muanda bu nunku wakamueneka mu matuku enu anyi? Wakamueneka mu matuku a batatu benu anyi? Ambilayi bana benu muanda eu, bana benu bambile bana babu kabidi, babu bana bambile bena mulongo mukuabu udi ulonda wabu mulongo.’ (Yoele 1:2, 3) Bakulumpe ne bantu bonso bavua mua kuindila tshintu kampanda tshivua katshiyi tshianji kuenzeka mu matuku abu a muoyo anyi mu matuku a bankambua babu. Tshivua ne bua kuikala tshintu tshia pa buatshi bualu bavua ne bua kutshilondela bena mu tshipungu tshisatu! Muanda eu wa dikema uvua muanda kayi? Bua kumanya, tufuanyikija ne: tudi bapingane mu matuku a Yoele.
5, 6. (a) Umvuija tshipupu tshidi Yoele umanyisha. (b) Nnganyi uvua Mpokolo wa tshipupu atshi?
5 Teleja! Yoele udi umvua mukungulu ufumina kule. Muulu mudi mufiika fitutuu, ne tshiona atshi tshidi tshikuatshisha buôwa tshidi tshidiunda padi mîdima itangalaka muulu. Pashishe divuba dienze bu muîshi didi dipueka. Ntshiluilu tshia miliyo mivule ya bîshi. Ne ndibutuka kayipu didibi bikebesha! Mpindieu tangila Yoele 1:4. Bîshi ebi bitangalaki ki mbishikile anu pa mikumbi ya masala mimuangadi. O, tòo! Kudi kulua kabidi bisumbu bia mikumbi kayiyi masala mikale ne nzala, yenda ilamba panshi. Miambula kudi lupepele, mikumbi eyi idi ifika mu mupodi wa dîsu, ne tshiona tshiayi ntshifuane tshia makalu a mvita. (Yoele 2:5) Bua nzala mikole idiyi nayi, miliyo mivule ya kudiyi idi mua kuandamuna ne lukasa luonso muaba udi bu mparadizu ulua tshipela.
6 Mu luendu elu mudi kabidi mêshi—bana ba bibeyibeyi bia butuku ne bia mu munya. Bisumbu bivule bia mêshi mikale ne nzala bidi mua kudia mabeji a mitshi tshitupa ku tshitupa, dibeji ku dibeji, too ne padi mitshi ishala kayiyi mabeji. Ne bivule bia ku bidiwu ashiya, mikumbi idi ibidia. Ne bidi mikumbi ishiya, mpenzu ya lubilu lukole idi ne bua kubijikija bionso nkong. Kadi tangila bualu ebu: Mu Yoele nshapita 2, mvese wa 11, Nzambi udi umvuija tshisumbu etshi tshia mikumbi bu ‘masalayi ende.’ Eyowa, Nzambi uvua Mpokolo wa tshipupu tshia mikumbi ivua ne bua kubutula buloba ne kukebesha nzala mikole. Ndîba kayi? Anu kumpala kua “dituku dia Yehowa.”
‘Tabalayi, nuenu bakuatshiki ba maluvu’!
7. (a) Bamfumu ba bitendelelu bena Yuda bavua ne nsombelu kayi? (b) Mmunyi mudi bamfumu ba Bukua-buena-nkristo lelu’eu bikale mu nsombelu wa muomumue ne wa bamfumu ba bitendelelu bena Yuda?
7 Bamfumu ba bitendelelu ba mu Yuda, musumba mupange kanemu, mbasunguluja patoke padibu batuma dîyi edi ne: ‘Tabalayi, nuenu bakuatshiki ba maluvu, dilayi bienu; asayi miadi, nuenu bonso banu ba maluvu a mvinyo, bualu bua mvinyo mipiamipia yakumushibua mukana muenu.’ (Yoele 1:5) Eyowa, bakambila bakuatshiki ba maluvu ba mu nyuma ba mu Yuda bua ‘kutabala,’ bua kulekela dikuatshika dia maluvu. Kadi kuedi meji ne: muanda eu mmuyuki wa kale patupu. Kubangila ku mpindieu, kumpala kua dituku dinene dia Yehowa, mu ngakuilu wa tshimfuanyi bamfumu ba Bukua-buena-nkristo mbûle tente ne maluvu a mvinyo mu mushindu wa se: ki mbamanye dîyi-dituma edi dia kudi Mutambe Bunene. Nebabazuke bushuwa palua dituku dinene dia Yehowa didi dikuatshisha buôwa kubatabuluja ku ndengama yabu ya bukuatshiki bua mu nyuma!
8, 9. (a) Mmunyi mudi Yoele umvuija mikumbi ne tshipeta tshia tshipupu tshiayi? (b) Lelu’eu, mikumbi eyi idi tshimfuanyi tshia banganyi?
8 Tangila tshiluilu tshinene tshia mikumbi tshiatshia! ‘Tshisamba tshia bantu tshiakalua kubunda ba mu buloba buanyi, tshidi tshikole ne katshiyi mua kubadibua. Mênu atshi adi mênu a nyama wa ntambue, mênu atshi a tshinyanganyanga adi menu a mukaj’a nyama wa ntambue. Tshiakanyanga mionji yanyi ya tumuma tua mvinyo, tshiakavuija mitshi yanyi ya mfigi bu mitshi miûme; tshiakubula bipusu ne tshiakabimansha; matamba au akalua matoke too. Asayi muadi bu mukaji utshidi kamama muluate bilamba bikayabala udidila mulume udi mumubangile mu bunsongakaji buende.’—Yoele 1:6-8.
9 Eu udi patupu mulayi udi utangila “tshisamba” tshia mikumbi, mikumbi mivulavulayi idi itangalaka mu Yuda anyi? Tòo, mulayi eu udi ne diumvuija ditambe bunene. Mu Yoele 1:6 ne mu Buakabuluibua 9:7, bantu ba Nzambi mbaleja bu mikumbi. Tshiluilu tshia mikumbi tshia mu matuku etu aa tshidi anu masalayi a mikumbi miela manyi ya Yehowa, milamata mpindieu kudi “mikoko mikuabo” ya Yezu mitue ku 5 600 000. (Yone 10:16) Kuena ne disanka bua kuikala munkatshi mua musumba munene eu wa batendeledi ba Yehowa anyi?
10. Tshipupu tshia mikumbi tshivua ne tshipeta kayi pa Yuda?
10 Mu Yoele 1:9-12, tudi tubala bua bipeta bia tshipupu tshia mikumbi. Tshisumbu tshimue pashishe tshikuabu bidi bikebesha dibutuka dinene dia buloba. Bu mudibu kabayi ne ntete, mvinyo ne mafuta, bakuidi bapange lulamatu kabena mua kutungunuka ne midimu yabu. Nansha buloba budi budila, bualu mikumbi yakabutula ntete yabu, ne mitshi ya bimuma ivua mishiya kayiyi ne bimuma. Ne mionji ya tumuma tua mvinyo minyanga, kakuena kabidi mvinyo bua balondi aba ba Baala ba-kanuayi bavua kabidi bakuatshiki ba maluvu ba mu nyuma.
“Dikumayi pa biadi, nuenu bakuidi”
11, 12. (a) Mbanganyi badi badiamba mudibu bakuidi ba Nzambi lelu’eu? (b) Mmunyi mudi tshipeta tshia tshipupu tshia mikumbi ya matuku etu aa tshikale ne buenzeji kudi bamfumu ba bitendelelu ba Bukua-buena-nkristo?
11 Teleja mukenji wa Nzambi bua bakuidi abu batomboke: ‘Luatayi bilulu bikayabale, [“ne dikumayi pa biadi,” NW], nuenu bakuidi, asayi muadi, nuenu bakuatshi ba mudimu wa tshioshelu.’ (Yoele 1:13) Mu dikumbana dia kumpala dia mulayi wa Yoele, bakuidi bena Lewi bavua basadila ku tshioshelu. Kadi netuambe tshinyi bua mu dikumbana dia ndekelu? Lelu’eu, bamfumu ba Bukua-buena-nkristo mbadiangatshile bukokeshi bua kuenza mudimu ku tshioshelu tshia Nzambi, badiamba mudibu ba-ministre bende, “bakuidi” bende. Kadi, ntshinyi tshidi tshienzeka mpindieu udi mikumbi ya Nzambi ya matuku etu aa mikale mu luendu?
12 Padi “bakuidi” ba Bukua-buena-nkristo bamona bantu ba Yehowa mu dienza mudimu ne bumvua didimuija diabu dia dilumbuluisha dia Nzambi, badi babanga kupampakana. Badi badikuma pa biadi bua dilubakana ne bumvua tshiji bua tshipeta tshibutudi tshia mukenji wa Bukalenge. Ne badi basa muadi bualu mikoko yabu idi ibongoloka. Ne mpata yabu idi yenda ishala mitupu, balekelayi batshishe butuku bavuale bilamba bikayabale, badila bua dijimija diabu dia lupetu. Mu katupa kîpi emu, nebajimije kabidi midimu yabu! Bushuwa, Nzambi udi ubambila bua kudila butuku bujima bualu nshikidilu wabu udi pabuipi.
13. Bukua-buena-nkristo mu ka-bujima nebuteleje didimuija dia Yehowa anyi?
13 Bilondeshile Yoele 1:14, ditekemena diabu dimuepele ndisuikila ku dinyingalala ne ‘didila kudi Yehowa.’ Tudi mua kutekemena bua kasumbu kajima ka bamfumu ba Bukua-buena-nkristo kutangilaku kudi Yehowa anyi? Nansha kakese! Bantu ba munkatshi muabu—muntu pa nkayende—badi mua kuteleja didimuija dia Yehowa. Kadi nsombelu wa nzala mikole ya mu nyuma wa bamfumu ba bitendelelu aba ne bena mu parwase babu bu kasumbu neatungunuke. Muprofete Amosa wakadianjila kuamba ne: ‘Mukalenge Yehowa udi wamba ne: Monayi, mu matuku alualua, nentume tshiyole mu buloba, tshidi katshiyi bu tshiyole tshia biakudia, ne nyota idi kayiyi bu nyota ya mâyi, kadi ntshiyole tshia kumvua mêyi a Yehowa.’ (Amosa 8:11) Ku lunga luseke, ndianyisha kayipu ditudi nadi bua difesto dinene dia mu nyuma didi Nzambi ufila ne dinanga dionso ku butuangaji bua “mupika wa lulamatu ne wa budimu”!—Matayo 24:45-47, NW.
14. Tshipupu tshia mikumbi ntshimanyinu tshia tshinyi?
14 Tshipupu tshia mikumbi tshivua ne tshidi tshimanyinu tshia bualu kampanda. Tshia bualu kayi? Yoele udi utuambila patoke ne: ‘Aka! Bua dituku adi! Bua dituku dia Yehowa didi pabuipi, ne didi dilua bu kubutuka kufume kudi Nzambi Wa-Bukole-Buonso.’ (Yoele 1:15) Ditangalaka dia tshintuluntulu dia tshiluilu tshia mikumbi tshia Nzambi pa buloba bujima lelu’eu didi dileja patoke ne: dituku dinene dia Yehowa didi dikuatshisha buôwa didi pabuipi. Bushuwa, bantu bonso ba mitshima milulame badi bajinga bikole dituku adi dia pa buadi dia difila milubu padi dilumbuluisha dia Nzambi dikumbana pa bantu babi ne Yehowa utshimuna bu Mfumu Mukulu pa bionso.
15. Pa kutangila nsombelu wa dibungama wa buloba, ntshinyi tshidi aba badi bateya ntema ku madimuija a Nzambi benza?
15 Anu bu mudi Yoele 1:16-20 uleja, bakumbusha biakudia mu Yuda wa kale. Nenku kakuvua disanka. Mayeba avua mashiya munda mutupu ne bavua ne bua kupula nzubu minene ya dilamina biakudia. Bipangile mpata wa bisonsa bualu mikumbi ivua mishiye buloba kabuyi mashinde, bimuna biakatambakana mu dilubakana ne bisumbu bia mikoko biakafua. Ntshipupu kayipu! Mu nsombelu eyi, ntshinyi tshiakenzekela Yoele? Bilondeshile mvese wa 19, wakamba ne: “Yehowa, ndi ndila kûdi.” Lelu’eu kabidi, bantu bavule badi bateya ntema ku madimuija a Nzambi ne bela mbila kudi Yehowa Nzambi mu ditabuja.
“Dituku dia Yehowa didi diamba kulua”
16. Bua tshinyi “bena buloba” bavua ne bua kuzakala?
16 Teleja dîyi-dituma edi dia kudi Nzambi: ‘Elayi mpungi mu Siona, elayi mbila mu mukuna wanyi wa tshijila! Bena buloba ebu bonso bazakale.’ (Yoele 2:1) Bua tshinyi kuenza mushindu’eu? Mulayi eu udi wandamuna ne: ‘Bualu bua dituku dia Yehowa didi diamba kulua, didi pabuipi! Ndituku dia mîdima ne dia mufitu, ndituku dia matutu ne dia mîdima mikole. Bu mudi kabundubundu ka lunkelu katshila pa mutu pa mikuna.’ (Yoele 2:1, 2) Lungenyi lua mitalu ya bushuwa ndulamakaja ku dituku dinene dia Yehowa.
17. Mmunyi muvua tshipeta tshia tshipupu tshia mikumbi tshikale ne buenzeji kudi buloba ne bantu ba mu Yuda?
17 Ela meji bua buenzeji bua tshikena-kumona tshia muprofete padi mikumbi eyi kayiyi kutekesha miandamune bu tshipela tshia patupu budimi bufuane bua Edene. Teleja diumvuija dia tshiluilu etshi tshia mikumbi: ‘Tshifuanyikiji tshiayi tshidi bu tshifuanyikiji tshia tubalu; ne bu mudi tubalu tua mvita tuenda lukasa, mbu mudiyi yenda. Bu mudi tshiona tshia makalu a mvita pa mikuna mbu mudiyi itupika; bu kutudika kua kapia kadi kalamba ne kadi kosha bisonsa; bu bantu bakole baluate bivualu bia mvita ne badi bela mualu wa mvita. Bantu badi bazakala kumpala kuayi ne buôwa bukole, mpala ya bantu bonso idi itokoloka.’ (Yoele 2:4-6) Mu tshikondo tshia tshipupu tshia mikumbi mu matuku a Yoele, kanyinganyinga ka batendeledi ba Baala kakavula, ne divula dia disumpakana divua mua kumuenekela pa mpala yabu.
18, 19. Mmunyi mudi mudimu wa bantu ba Nzambi lelu’eu muikale bu tshipupu tshia mikumbi?
18 Tshintu nansha tshimue katshiakimanyika mikumbi eyi ya bulongame ne ivua kayiyi ipungila. Yakanyema “bu balume ba bukole” ne yakabanda mene ku bimanu. ‘Pavua imue ya kudiyi imata mu bia-mvita bikupa, mikuabu kayivua ikosa luendu luayi.’ (Yoele 2:7, 8, NW) Ntshifuanyikijilu kayipu tshikole tshia mulayi wa tshiluilu tshia Nzambi tshia matuku etu aa tshia mikumbi ya mu tshimfuanyi! Lelu’eu kabidi, tshiluilu tshia mikumbi tshia Yehowa ntshitungunuke ne kuya anu kumpala. Kakuena “tshimanu” nansha tshimue tshia buluishi tshidi tshiyitekesha. Kayena inyanga muoyo-mutoke wayi kudi Nzambi, kadi mmidiakaje bua kuakama lufu, anu bu muakenza binunu bia Bantemu ‘bakamata mu bia-mvita bikupa’ bua dibenga kuamba mêyi a disekelela nawu Hitler mu tshikondo tshia bukokeshi bua Allemagne wa bena Nazi.
19 Tshiluilu tshia mikumbi tshia Nzambi tshia matuku etu aa ntshifile bumanyishi bujima mu “musoko” wa Bukua-buena-nkristo. (Yoele 2:9) Mmienze nanku pa buloba bujima. Idi itungunuka ne kutshimuna bipumbishi bionso, ibuela mu miliyo mivule ya nzubu, iya kudi bantu mu misesu, yakula nabu ku nshinga, ipetangana nabu mu mushindu kayi mukuabu wonso udi mua kuikalaku padiyi imanyisha mukenji wa Yehowa. Bushuwa, mmiabanye miliyare ya mikanda miumvuiji ya Bible ne neyabanye mivule, mivule mitambe mu mudimu wayi udi kauyi wimana—patoke ne ku nzubu ne ku nzubu.—Bienzedi 20:20, 21.
20. Nnganyi udi utua mikumbi ya matuku etu aa nyama ku mikolo, ne kudi bipeta kayi?
20 Yoele 2:10 udi uleja ne: tshisumbu tshinene menemene tshia mikumbi tshidi bu divuba didi mua kubuitshidija dîba, ngondo ne mitoto. (Fuanyikija ne Yeshaya 60:8.) Kudiku mpata bua muntu udi mu nyima mua masalayi aa anyi? Ku mutu kua mukungulu wa bîshi ebi, tudi tumvua mêyi aa a Yoele 2:11: ‘Yehowa udi wela dîyi dikole kumpala kua masalayi ende; bualu bua tshisumbu tshiende tshia masalayi tshidi tshinene; bualu bua muenji wa dîyi diende udi ne bukole. Bualu bua dituku dia Yehowa didi dinene, didi dikuatshisha bantu buôwa bukole; nnganyi washindama kumpala kuadi?’ Ee, Yehowa Nzambi udi utuma masalayi ende a mikumbi mpindieu—kumpala kua dituku diende dinene.
“Yehowa kêna ujanguluka”
21. Ntshinyi tshienzeka padi ‘dituku dia Yehowa dilua bu muivi’?
21 Anu bu Yoele, mupostolo Petelo wakakula bua dituku dinene dia Yehowa. Wakafunda ne: “Dituku dia Yehowa nedilue bu muivi, ndiodi diajimina diulu ne diyoyo dikole, kadi bintu bidi ne kapia kakole menemene nebienguluke, ne buloba ne midimu idimu nebisokolodibue.” (2 Petelo 3:10, NW) Ku buenzeji bua Satana Diabolo, “diulu” dibi dia mbulamatadi didi dikokesha “buloba,” mmumue ne: bukua-bantu budi kule ne Nzambi. (Efeso 6:12; 1 Yone 5:19) Diulu edi dia mu tshimfuanyi ne buloba kabiakupanduka ku luya lua tshiji tshia Nzambi mu dituku dinene dia Yehowa. Kadi, nebabipingane kudi ‘diulu dipiadipia ne buloba bupiabupia bitudi batekemene bu mudi mulayi wende, muikala buakane.’—2 Petelo 3:13.
22, 23. (a) Ntshinyi tshitudi ne bua kuenza bua mudi Yehowa uleja lutulu lua luse? (b) Ntshinyi tshitudi ne bua kuenza bua dikala pabuipi dia dituku dia Yehowa?
22 Ne bitanaji bionso bidiku lelu’eu ne mateta a ditabuja, tudi mua kupanga kumona mudi bikondo bietu ebi bikale bilomba mitalu. Kadi bu mudi mikumbi ya mu tshimfuanyi itungunuka mitangile anu kumpala, bantu ba bungi badi bitaba mukenji wa Bukalenge. Nansha mudi Nzambi mufile tshikondo bua muanda eu, katuena ne bua kubuejakaja lutulu luende ne dijanguluka. “Yehowa kêna ujanguluka bua bidi bitangila dilaya diende, bu mudi bamue bamona bu dijanguluka, kadi udi nenu lutulu bualu kêna ujinga bua muntu nansha umue abutuke kadi udi ujinga ne: bonso bafike ku dinyingalala.”—2 Petelo 3:9, NW.
23 Mu dindila dituku dinene dia Yehowa, tuvulukayi mêyi a Petelo mafunda mu 2 Petelo 3:11, 12 (NW) ne: “Bu mudi bintu ebi bionso ne bua kuenguluka nenku, mbantu ba mushindu kayi banudi ne bua kuikala mu bienzedi binsantu bia nsombelu ne malu a bulamate kudi Nzambi, bindile ne balame bikole mu lungenyi dikalaku dia dituku dia Yehowa, muikala diulu dikuate kapia ne bua kuenguluka ne bintu bipie bikole menemene ne bua kuenguluka!” Bienzedi ebi ne malu aa bidi bushuwa biumvuija ne: tudi tuenda pamue ne tshiluilu tshia mikumbi tshia Yehowa pa kudifila ne tshisumi ne muoyo mujima mu diyisha lumu luimpe lua Bukalenge kumpala kua nshikidilu kuluaye.—Mâko 13:10.
24, 25. (a) Mmunyi muudi umvua bua diakalenga dia kuenza mudimu mu tshiluilu tshia mikumbi tshia Yehowa? (b) Ndukonko kayi lua mushinga ludi Yoele ujula?
24 Tshiluilu tshia mikumbi tshia Nzambi katshiakuimanyika mudimu watshi too ne pabudika dituku dinene dia Yehowa didi dikuatshisha buôwa. Dikalaku dia masalayi aa a mikumbi kaayi kuimanyika ntshijadiki tshia pa buatshi tshia se: dituku dia Yehowa didi pabuipi. Kuena ne disanka bua kuenza mudimu munkatshi mua mikumbi miela manyi ya Nzambi ne balunda bayi mu mvita ya ndekelu kumpala kua dituku dinene dia Yehowa didi dikuatshisha buôwa anyi?
25 Mbunene kayipu buikala dituku dia Yehowa! Kabiena bikemesha mudi lukonko lujuka ne: ‘Nnganyi washindama kumpala kuadi?’ (Yoele 2:11) Netukonkonone lukonko elu ne mikuabu ya bungi mu biena-bualu bibidi bidi bilonda.
Udi mua kumvuija anyi?
◻ Bua tshinyi Yehowa wakadimuija bua tshipupu tshia bîshi mu Yuda?
◻ Mu dikumbana dia mulayi wa Yoele dia matuku etu aa, mbanganyi badi mikumbi ya Yehowa?
◻ Mmunyi mudi bamfumu ba Bukua-buena-nkristo bumvua bua tshipupu tshia mikumbi, ne mmunyi mudi bamue ba kudibu mua kuepuka bipeta biatshi?
◻ Tshipupu tshia mikumbi tshidi ne bualabale kayi mu siekele eu wa 20, ne netshitungunuke too ne dîba kayi?
[Tshimfuanyi mu dibeji 9]
Tshipupu tshia bîshi tshivua tshimanyinu tshia tshintu kampanda tshitambe bubi
[Mêyi a dianyisha]
Mutshi mupopola: FAO photo/G. Singh
[Tshimfuanyi mu dibeji 10]
Yehowa Nzambi udi mu nyima mua tshipupu tshia mpasu ya matuku etu aa
[Mêyi a dianyisha bua tshimfuanyi mu dibeji 8]
Mikumbi: FAO photo/G. Tortoli; tshisumbu tshia mikumbi: FAO photo/Desert Locust Survey