Kuatshila Nzambi mudimu ku budisuile

MUPOSTOLO Paulo wakafunda ne: “Meme nemfile bindi nabio ne muoyo mujima, kabidi nendifile meme mujima bua mioyo yenu.” (2 Kolinto 12:15, MMM) Ntshinyi tshidi mêyi aa akuleja bua lungenyi ne ngikadilu bidi basadidi ba Yehowa ne bua kuikala nabi? Mukonkononyi wa Bible mukuabu wakaleja ne: pavua Paulo mufundile bena Kristo ba mu Kolinto mêyi aa, uvua wamba ne: “Ndi muitabe bua kufila bukole buanyi, dîba ne muoyo wanyi ne bionso bindi nabi bua bualu buenu, anu mutu tatu wenzela bana bende ne disanka dionso.” Paulo uvua mudilongolole bua ‘kudifila yeye mujima’ anyi bua “kupungila,” bikalabi bivua mua kumulomba bua kuenza nanku bua kukumbajaye mudimu wende wa bena Kristo.

Paulo wakenza kabidi bionso ebi “ne muoyo mujima.” Mukanda wa Nzambi udi wamba ne: uvua musue kuenza nanku “ne disanka dia bungi.” Kadi wewe? Udiku ne disanka dia kufila dîba diebe, bukole buebe, bipedi biebe ne mpetu yebe bua kuenzela Yehowa mudimu ne kuambuluisha bakuabu, nansha biobi bitulomba bua “kupungila” anyi? Udiku mua kuenza malu aa “ne muoyo mujima” anyi?

Badi babenga ne muoyo mujima bua kuenzela Nzambi mudimu

Bantu ba bungi kabatu anu belakana bua kuenzela Nzambi mudimu to, kadi batu babenga mene ne muoyo mujima. Mbapange dianyisha, mbasue budikadidi bua kuenza anu bidibu basue ne lungenyi luabu mene ndua buntomboji. Satana wakalobesha Adama ne Eva ne lungenyi lua mushindu’eu. Wakabashima ne: bavua ne bua ‘kuikala bu Nzambi, bamanya malu mimpe ne malu mabi,’ mmumue ne: bavua balua ne bukole bua kudiangatshila mapangadika bua tshimpe ne tshibi. (Genese 3:1-5) Bantu badi ne lungenyi lua muomumue lelu badi bela meji ne: badi ne bua kuikala ne budikadidi mu malu onso bua kuenzabu anu tshidi muoyo wabu ujinga, Nzambi kayi ubenzeja bualu nansha bumue anyi kayi welamu dîyi to. (Musambu 81:11, 12) Mbasue kuangata bionso bidibu nabi bua kukeba nabi masanka abu nkayabu.​—Nsumuinu 18:1.

Pamu’apa kuena ne meji mabi a buena aa to. Imue misangu utu wanyisha bikole dipa dia muoyo uudi nawu mpindieu ne ditekemena dilenga dia kuikala ne muoyo wa kashidi mu mparadizu pa buloba. (Musambu 37:10, 11; Buakabuluibua 21:1-4) Bumue udi mua kuikala wanyisha bikole Yehowa bua malu mimpe adiye mukuenzele. Kadi tuetu bonso tudimukilayi njiwu eyi ya se: Satana udi mua kunyanga lungenyi luetu bifuane kufikisha Nzambi ku dibenga mudimu utudi tumuenzela. (2 Kolinto 11:3) Mmunyi mudibi mua kuenzeka nanku?

Tudi ne bua kuenza mudimu ku budisuile

Yehowa mmusue bua bantu bamuenzele mudimu ku budisuile, ne muoyo wabu mujima. Katu utuenzeja ku bukole bua kuenza disua diende nansha. Satana ke utu wenza muende muonso bua kusaka anyi kulobesha bantu bua benze disua diende. Bible udi wakula bua malu adi muntu ne bua kuenza, udi uleja mikenji ne malu a kukumbaja ne bikuabu bidi bitangila mushindu wa kuenzela Nzambi mudimu. (Muambi 12:13; Luka 1:6) Kadi, tshintu tshia kumpala tshidi tshitusaka bua kusadila Nzambi ndinanga ditudi bamunange.​—Ekesode 35:21; Dutelonome 11:1.

Nansha muvua Paulo mudifile bikole mu mudimu wa Nzambi, uvua mumanye bimpe ne: ‘pavuaye kayi ne dinanga’ mudimu eu uvua ulua wa patupu. (1 Kolinto 13:1-3, MMM) Padi bafundi ba Bible babikila bena Kristo ne: bapika ba Nzambi, kabena bakula bua bupika bua dienzejangana malu ku bukole to. (Lomo 12:11; Kolosai 3:24) Kadi badi basua kumvuija ne: badi bakokela Nzambi ku budisuile bualu mbamunange yeye ne Muanende Yezu Kristo bikole.​—Matayo 22:37; 2 Kolinto 5:14; 1 Yone 4:10, 11.

Mudimu utudi tuenzela Nzambi udi kabidi ne bua kuleja ne: tudi banange bantu netu bikole. Mupostolo Paulo wakafundila tshisumbu tshia mu Tesalonike ne: ‘Tuakadivuija bantu bapuekele patuakadi kuenu aku, bapuekele bu mamu udi ulama bana bende.’ (1 Tesalonike 2:7, MML) Lelu mu matunga a bungi, mikenji ya mbulamatadi idi yenzeja bamamu bua kulama bana babu. Kadi tudi mua kuamba ne: bamamu ba bungi batu balama bana babu anu bua kutumikila mêyi ne mikandu eyi anyi? Tòo. Batu balama bana babu bualu mbabanange. Bulelela, mamu muledi utu wamba kufua bua bana bende! Bu muvua Paulo pende ‘mutambe kusua’ bavuaye wenzela mudimu, uvua “ne disanka dimpe” (‘musue,’ Mukanda wa Mvidi Mukulu; ‘mudilongolole,’ Muanda Mulenga Lelu) bua kudifila ne muoyo wende bua kubambuluisha. (1 Tesalonike 2:8) Dinanga ke didi ditusaka bua kulonda tshilejilu tshia Paulo.​—Matayo 22:39.

Netuambe tshinyi bua mudimu wa ku tshimfula-muoyo?

Bushuwa, katuena ne bua kulekela dinanga ditudi badinange dipita ditudi banange Nzambi ne bantu netu to. Tshianana, kudi njiwu ya tuetu kuenzela Nzambi mudimu katuyi ne disanka anyi ku tshimfula-muoyo. Tudi mene mua kubanga kunyingalala anyi kubungama bua mutudi katuyi mua kuenza anu malu adi muoyo wetu ujinga. Ke tshiakenzekela bamue bena Isalele bakavua kabatshiyi banange Nzambi, kadi batungunuke ne kumukuatshila mudimu bualu bavua badimona bu bavua benzejibue ku bukole. Ntshinyi tshiakenzeka? Kuenzela Nzambi mudimu ‘kuakabatonda.’​—Malaki 1:13.

Milambu yonso ivuabu balambula Nzambi ivua ne bua kuikala ‘kayiyi ne kalema,’ ya ‘mimpe’ menemene. (Lewitiki 22:17-20; Ekesode 23:19, MMM) Pamutu pa kupesha Yehowa nyama ya mimpe, bantu ba mu matuku a Malaki bakatuadija kulambula nyama ivuabu buobu bine kabayi basue to. Yehowa wakenza tshinyi? Wakambila bakuidi ne: ‘Panuafila nyama idi ne bufofo, ki mbualu bubi anyi? Panuafila mikuabu idi milema ne idi misame, ki mbualu bubi anyi? Binuayifila kudi gouverneur wenu, yeye neikale nenu disanka anyi? Nuakulua ne nyama inuakunyenga ku bukole, milema ne misame; nudi nulua nabi bu milambu! Ndi mua kubitabuja ku bianza bienu anyi?’​—Malaki 1:8, 13.

Mmunyi mudi bualu ebu mua kutuenzekela? Milambu yetu idi mua ‘kututonda’ tuetu katuyi ne muoyo anyi lungenyi lua budisuile. (Ekesode 35:5, 21, 22; Lewitiki 1:3; Musambu 54:6; Ebelu 13:15, 16) Tshilejilu, tutu tupesha Yehowa anu tusunsukila tua mêba atudi nawu anyi?

Buebe wewe udi umona munyi, pavua mulela kampanda wa meji mimpe anyi muena Lewi wa tshisumi wenzeja muena Isalele bua kuangata nyama wende wa muimpe bua amulambule pavua muoyo wende kauyi musue kumulambula, Nzambi uvua mua kuitaba mulambu au anyi? (Yeshaya 29:13; Matayo 15:7, 8) Yehowa wakabenga milambu ya mushindu’au ne ndekelu wa bionso wakabenga ne bantu bine bavua bayifila.​—Hoshea 4:6; Matayo 21:43.

Tuikale ne disanka bua kuenza disua dia Nzambi

Bua kuenzela Nzambi mudimu udiye wanyisha, tudi ne bua kulonda tshilejilu tshia Yezu Kristo. Wakamba ne: “Tshiena nkeba kuenza bu mundi musue, ndi nkeba kuenza bu mudi wakuntuma musue.” (Yone 5:30) Yezu wakapeta disanka dia bungi mu mudimu uvuaye wenzela Nzambi ku budisuile. Yezu wakakumbaja mêyi a tshiprofete akamba Davidi aa: “Ndi ne disanka bua kuenza disua diebe, Nzambi wanyi.”​—Musambu 40:8.

Nansha muvua Yezu ne disanka bua kuenza disua dia Yehowa, misangu yonso kabivua bitekete to. Tangila tshiakenzeka kumpala kua buobu kumukuata, kumulumbuluisha ne kumushipa. Pavuaye mu budimi bua Getesemane, uvua “muule tente ne dibungama” ne “kanyinganyinga kakole.” Dipampakana diende divua dikole menemene, ke bualu kayi pavuaye usambila, “luanga luende luakandamuka bu mamata a mashi amata mu buloba.”​—Matayo 26:38; Luka 22:44, MML.

Bua tshinyi Yezu uvua ne kanyinganyinga ka nanku? Bushuwa, kabivua bualu uvua ukeba disanka diende nkayende anyi bualu uvua welakana bua kuenza disua dia Nzambi to. Uvua muitabe bua kufua, ke pavuaye mene mubenge ne muoyo umue mêyi a Petelo a se: “[Nzambi] akulame Mfumu, abio kabiena mua kukuenzekela to.” (Matayo 16:21-23, MMM) Tshivua tshitonde Yezu tshivua mushindu uvua lufu luende bu muena tshibawu wa tshianana mua kupendesha Yehowa ne dîna Diende dinsantu. Yezu uvua mumanye bimpe ne: Tatuende uvua ne bua kumvua bibi menemene pavuaye umona bakengesha Muanende munanga ne tshikisu nunku.

Yezu uvua kabidi mumanye bimpe ne: uvua wenda usemena pabuipi ne tshikondo tshia mushinga mukole tshia kukumbaja malu avua Yehowa mulongolole. Pavuaye ulonda mikenji ya Nzambi ne lulamatu, uvua uleja patoke ne: Adama uvua mua kuikala muenze pende bia muomumue. Lulamatu lua Yezu luvua mua kujadika ne: mêyi avua Satana muambe a ne: bantu buobu mu mateta kabena mua kusadila Nzambi ku budisuile ne lulamatu, avua a dishima. Ku ndekelu, Yezu ke uvua Yehowa ne bua kutuma bua kuzaza Satana ne kumbusha malu mabi onso adi buntomboji buende bukebeshe.​—Genese 3:15.

Bulelela, Yezu uvua ne bujitu bunene pa makaya ende! Dîna dia Tatuende, ditalala dia buloba bujima ne lupandu lua bantu bivua bisuikila bionso ku lulamatu lua Yezu. Bu muvuaye mumanye bualu ebu, wakasambila ne: “Tatu wanyi, bu biobio mua kuenzeka, dikopo edi diyile kule! Kadi kabienzeki mundi musue meme, bienzeke amu muudi musue wewe.” (Matayo 26:39, MMM) Nansha pavua Yezu mu kanyinganyinga kakole, kavuaku muanji kuelakana bua kuenza disua dia Tatuende ku budisuile nansha.

‘Muoyo mmusue kuenza, kadi mubidi mmutekete’

Bu muvua Yezu mupete kanyinganyinga ka bungi bualu uvua usadila Yehowa, tudi mua kutekemena petu ne: Satana neatukengeshe bualu tudi tukuatshila Nzambi mudimu. (Yone 15:20; 1 Petelo 5:8) Kabidi, katuena bapuangane to. Nenku nansha tuetu tuenzela Nzambi mudimu ku budisuile, kabiakuikala bitekete to. Yezu wakamona muvua bapostolo bende bapatata bua kuenza bionso bivuaye mubalombe bua kuenza. Ke bualu kayi wakamba ne: ‘Muoyo mmusue kuenza, kadi mubidi mmutekete.’ (Matayo 26:41, MMM) Bu muvua Yezu muntu mupuangane, kavua muledibue ne butekete nansha bumue mu mubidi wende to. Kadi uvua anu muvuluke butekete bua mubidi wa bayidi bende, mmumue ne: dipanga bupuangane divuabu bapiane kudi Adama. Yezu uvua mumanye bimpe ne: bua dipanga bupuangane divua balongi bende bapiane ne malu adidi dipangisha bantu bua kuenza, bavua ne bua kuluangana bua kuenza bionso bivuabu bajinga kuenza mu mudimu wa Yehowa.

Nanku, tudi mua kumvua bu muakumvua mupostolo Paulo, uvua ubungama bikole pavua dipanga bupuangane dimupangisha bua kusadila Nzambi muende muonso. Wakafunda ne: “Bualu bua disua dia kuenza bimpe didi kundi, kadi bukole bua mua kuenza n’abu bimpe kabuenaku” to. (Lomo 7:18) Tuetu petu tudi tumona ne: katuena mua kuenza malu onso atudi basue kuenza bimpe menemene nansha. (Lomo 7:19) Ki mbua se: tudi ne dielakana to. Kadi bualu butekete bua mubidi budi butupangisha bua kuenza too ne malu etu a mimpe atudi basue kuenza.

Katuteketshi mu mikolo to. Bituikala ne mutshima mulongolola bua kuenza malu onso atudi mua kukokesha, Nzambi neitabe mudimu wetu. (2 Kolinto 8:12) Tuenzayi ‘muetu muonso’ bua kuidikija lungenyi lua Kristo lua kuenza disua dia Nzambi ne muoyo mujima. (2 Timote 2:15, NW; Filipoi 2:5-7; 1 Petelo 4:1, 2) Yehowa neatubeneshe ne neatukuatshishe bituikala ne lungenyi lua kuenza malu ku budisuile elu. Neatupeshe ‘bukole bupite’ bua kutuyishabu butekete butudi nabu. (2 Kolinto 4:7-10, MMM) Ne diambuluisha dia kudi Nzambi, ‘netufile bitudi nabi ne muoyo mujima, kabidi netudifile tuetu bajima’ mu mudimu Wende wa mushinga mukole, anu bu muakenza pende Paulo.

[Tshimfuanyi mu dibeji 21]

Paulo wakenzela Nzambi mudimu ku budisuile ne makanda ende onso

[Tshimfuanyi mu dibeji 23]

Nansha pavua Yezu mu kanyinganyinga kakole, wakenza anu disua dia Tatuende