Nshapita Muibidi
Tumbisha Yehowa, Nzambi umuepele mulelela
1. Nzambi umuepele mulelela nnganyi?
BIBLE udi wamba ne: nansha mudiku bintu bia bungi bidibu bangata bu nzambi, “ku mesu kuetu Nzambi umue udiku, Tatu mene.” (1 Kolinto 8:5, 6) “Nzambi umue” eu n’Yehowa, Mufuki wa bintu bionso. (Dutelonome 6:4; Buakabuluibua 4:11) Yezu wakamubikila ne: “Nzambi wanyi ne Nzambi wenu.” (Yone 20:17) Yezu uvua ne meji a muomumue ne a Mose wakamba kale ne: “Yehowa udi Nzambi; kakuena Nzambi mukuabo.” (Dutelonome 4:35) Yehowa udi ku mutu kua tshintu tshionso tshidibu batendelela bu mudi mpingu, bantu anyi muluishi wende Satana Diabolo, “nzambi wa tshikondo etshi.” (2 Kolinto 4:3, 4) Anu muakamba Yezu, Yehowa mmushilangane ne bionso ebi bualu yeye udi ‘Nzambi umuepele mulelela.’—Yone 17:3.
2. Patudi tumanya malu a Nzambi, ntshinyi tshitudi ne bua kuenza?
2 Nzambi udi ukoka bantu bena dianyisha badi bafika ku dimanya ngikadilu yende milenga ne malu adiye mutuenzele ne ikalaye ne bua kutuenzela. Padi dinanga diabu dia Yehowa divula, bidi bibasaka bua kumutumbisha. Mmushindu kayi? Tshia kumpala, badi bambila bantu malu ende. Lomo 10:10 udi wamba ne: ‘bantu badi bajukula ne mukana bua kupeta lupandu.’ Tshibidi, badi bidikija mêyi ne bienzedi biende. Tudi tubala mu Efeso 5:1 ne: ‘Nuidikije kuenza mudi Nzambi wenza, bu bana bende bananga.’ Bua tuetu kuidikija Yehowa bimpe menemene, tudi ne bua kumanya tshidiye bulelela.
3. Tela ngikadilu minene ya Nzambi.
3 Mu Bible mudi biambilu bia bungi bidi bileja ngikadilu ya pa buayi ya Nzambi. Ngikadilu yende minene inayi nyoyi eyi: meji, buakane, bukole, ne dinanga. “Kudi Nzambi kudi meji.” (Yobo 12:13) ‘Mudimu wende wonso udi muakane.’ (Dutelonome 32:4) ‘Udi ne bukole bupite.’ (Yeshaya 40:26, MMM) ‘Nzambi udi dinanga.’ (1 Yone 4:8) Kadi, ku ngikadilu minene inayi ya Nzambi eyi, ngikadilu kayi udi utamba kuleja tshidi Nzambi menemene?
“Nzambi udi dinanga”
4. Nngikadilu kayi munene wa Nzambi wakamusaka bua kufuka diulu ne buloba ne bintu bionso bidi ne muoyo?
4 Elabi meji bua tshiakasaka Yehowa bua kufuka diulu ne buloba, kufuka banjelu ne bantu. Tshivua meji ende peshi bukole buende anyi? Tòo, bualu ngikadilu eyi ki ngivua misake Nzambi bua kufuka to. Nansha buakane buende mene kabuvua bumulomba bua kuabanyangana muoyo ne bantu bakuabu nansha. Kadi, dinanga dinene dia Nzambi ke diakamusaka yeye muntu wa lungenyi bua kuabanyangana masanka ende ne bakuabu. Dinanga diakamusaka bua kulongolola malu bua bantu bena butumike bapete muoyo wa tshiendelele mu Mparadizu. (Genese 1:28; 2:15) Dinanga diakamusaka bua kulongolola malu ne kumona mua kufuta tshibawu tshia mpekatu wa Adama tshivua tshikuate bantu.
5. Bilondeshile Bible, Yehowa udi ne ngikadilu kayi, ne mbua tshinyi?
5 Nunku, ku ngikadilu yonso ya Nzambi, dinanga ke ngikadilu wende munene. Nzambi mene ke dinanga. Nansha mudi meji, buakane ne bukole bikale ngikadilu ya mushinga, Bible kêna wamba ne: Yehowa udi meji, buakane peshi bukole to. Kadi udi wamba ne: Nzambi udi dinanga. Eyowa, Yehowa ke dinanga mene. Edi ndinanga didi dilonda mikenji, ki ndia mu lupitapita patupu to. Dinanga dia Nzambi edi badi badilombola kudi mikenji ya bulelela ne ya buakane. Ndinanga dia mushindu wa pa buawu, anu mudi Yehowa nkayende mudileje. Dinanga dia nunku kadiena dikeba disanka diadi nkayadi nansha kakese ne didi misangu yonso dimuenekela ku bienzedi bia muntu.
6. Bua tshinyi tudi mua kuidikija Nzambi nansha mudiye ku mutu kuetu mutupite kule ne kule?
6 Ngikadilu wa mpatshi eu ke udi utuambuluisha bua kuidikija Nzambi. Bu mutudi bapuekele kudiye, bapange bupuangane ne bantu bena bilema, tudi mua kumona ne: katuena mua kufika ku didikija Nzambi to. Kadi tangila tshilejilu tshikuabu tshia dinanga dinene dia Yehowa: Mmumanye mateketa etu ne kêna utulomba bua tuikale bapuangane to. Udi mumanye bimpe ne: mpindieu tukadi bashiye bupuangane kule kua menemene. (Musambu 51:5) Ke bualu kayi Musambu 130:3, 4 udi wamba ne: ‘Yehowa, bu wewe mubale dipambuka dia bantu, muntu kayi wakadi mua kuimana, Mukalenge? Kadi dibuikidila dia mibi didi kûdi, bua wewe unemekibue.’ Bushuwa, Yehowa udi “Nzambi wa luse ne dinanga, kena ukuata tshiji lubilu, udi mûle tente ne luse lujalame.” (Ekesode 34:6) Bible udi wamba kabidi ne: ‘Wewe, Mukalenge, udi muimpe, ne mutshima webe udi musue kubuikidila bantu mibi yabu.’ (Musambu 86:5) Bulelela, mêyi aa adi atukolesha ku muoyo! Bidi bia disanka dia bungi bua kuenzela Nzambi mulenga eu mudimu ne kumona mudiye uleja dinanga diende ne luse!
7. Mmunyi mudi bintu bidi Yehowa mufuke bituleja dinanga diende?
7 Dinanga dia Yehowa tudi kabidi mua kudimuena mu bintu bidiye mufuke. Elabi meji bua bungi bua bintu bidi Yehowa muenze bua kutusankisha, bu mudi mikuna mile, mêtu, majiba a mâyi ne mbuu minene. Mmutupeshe biakudia bia mishindu ne mishindu bia muenya ne bidi bitupesha bukole bua mubidi. Yehowa mmufuke kabidi bilongo bilenga bungi tshianana ne nyama idi isankisha. Wakafuka bintu bivua ne bua kupesha bantu disanka, nansha muvuaye kayi ne bua kufuka bintu anu bua nanku. Lelu katuena mua kumona bulenga buonso bua bintu bidiye mufuke ebi to, bualu tudi panu padi bubi ne tuetu tudi bantu bapange bupuangane. (Lomo 8:22) Kadi anji fuanyikijabi malu ikala Nzambi mua kutuenzela mu Mparadizu! Mufundi wa Misambu udi utujadikila ne: “Udi ubulula tshianza tshiebe, tshintu tshionso tshidi ne muoyo udi utshiukutshisha ne diakalengele.”—Musambu 145:16.
8. Mmushindu kayi mutambe bunene udi Yehowa mutuleje dinanga?
8 Mmushindu kayi munene udi Nzambi muleje bantu dinanga? Bible udi uleja ne: ‘Bualu bua Nzambi wakatamba kusua ba pa buloba, yeye wakabapa Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele.’ (Yone 3:16) Yehowa wakenza nunku bualu bantu badi bena malu mimpe anyi? Lomo 5:8 udi wandamuna ne: ‘Nzambi wakatamba kuleja luse luende kutudi mu muanda eu ne: patutshivua bantu babi, Kristo wakatufuila.’ Bushuwa, Nzambi wakatuma Muanende mupuangane pa buloba bua kufila muoyo wende bu mulambu bua kutufutshila tshibawu tshia mpekatu ne kutupikula ku lufu. (Matayo 20:28) Lufu lua Yezu elu luakapesha bantu badi banange Nzambi mushindu wa kupeta muoyo wa tshiendelele. Tudi ne dianyisha dia bungi bualu Nzambi udi unanga eu yonso udi musue kuenza disua diende anu bu mudi Bible utuambila ne: ‘Nzambi kêna ne kansungansunga, kadi yeye udi witabuja wa mu tshisamba tshionso udi umutshina, udi wenza malu makane.’—Bienzedi 10:34, 35.
9. Muanda wa se: Yehowa mmufile Muanende bua kutupikula udi ne bua kutusaka ku dienza tshinyi?
9 Muanda eu wa se: Yehowa mmufile Muanende bua kutupikula ne kutupesha muoyo wa tshiendelele, udi ne bua kutusaka ku dienza tshinyi mpindieu? Udi ne bua kukolesha dinanga ditudi banange Yehowa, Nzambi mulelela. Kabidi udi ne bua kutusaka bua kuteleja Yezu, muena-mpala wa Nzambi. ‘[Yezu] wakafuila bonso bua badi ne muoyo kabikadi nawu bua bualu buabu nkayabu, kadi bikale nawu kudi yeye wakafua bua bualu buabu.’ (2 Kolinto 5:15) Bulelela, bidi bia disanka bua kulonda Yezu mu makasa ende, bualu yeye ke tshilejilu tshitudi ne bua kulonda bua kuidikija dinanga dia Yehowa ne luse luende. Ke tshidi mêyi akambila Yezu bena budipuekeshi aa aleja: ‘Luayi kundi, bonso badi ne mudimu mukole, badi ne bujitu bunene, meme nennupe dikisha. Angatayi mutshi wanyi wa tshikokedi pa nshingu yenu, nuyile malu kundi; bualu bua meme ndi ne kalolo ne kanemu mu mutshima wanyi; nunku nenusangane dikisha mu mitshima yenu. Bualu bua mutshi wanyi wa tshikokedi udi muakane ne bujitu buanyi budi bupepele.’—Matayo11:28-30.
Tunangayi bantu netu
10. Nngimue mishindu kayi itudi mua kuleja ne: tudi banange bena Kristo netu?
10 Mmunyi mutudi mua kuleja ne: tudi banange bena Kristo netu mushindu udi Yehowa ne Yezu batunange? Tangila mishindu kabukabu itudi mua kuleja dinanga: “Dinanga didi ne lutulu; dinanga didi dienzela bakuabo bimpe; kadiena ne lubabu, kadiena diditambisha, kadiena didisua; kadiena dipanga bukalanga, kadiena dikeba diakalenga diadio, kadiena difika munda, kadiena divuluka bubi, kadiena disanka bua malu mabi, didi disanka bua malu malelela. Dinanga didi dilekelangana bionso, ditaba bionso, ditekemena bionso, diumvua bionso ne lutulu. Dinanga kadiena difua.”—1 Kolinto 13:4-8, MMM; 1 Yone 3:14-18; 4:7-12.
11. Mbanganyi bakuabu batudi ne bua kunanga, ne mmushindu kayi?
11 Nganyi mukuabu utudi ne bua kunanga, ne mmushindu kayi? Yezu wakamba ne: ‘Yayi bienu, nuvuije ba bisamba bionso bayidi, nubabatize mu dîna dia Tatu ne mu dia Muana ne mu dia nyuma muimpe; nubayishe mua kuenza malu onso angakanuambila.’ (Matayo 28:19, 20) Mêyi aa adi umvuija kuambila bantu badi kabayi bena Kristo netu lumu luimpe lua mparadizu wa Nzambi udi ne bua kuenzeka mu bukua-panu bupiabupia. Yezu wakaleja patoke ne: katuena ne bua kunanga anu bena Kristo netu to, bualu wakamba ne: “Panuikala nunanga anu badi banunange, ndifutu kayi dinuapeta? Nansha balambuishi ba bitadi kabatu benza pabo nanku anyi? Panuikala nuelangana muoyo amu ne bana benu, ngenzelu wenu mmupite wa bantu bakuabo ku tshinyi? Nansha bena bisamba bikuabo kabatu benza nanku awu anyi?”—Matayo 5:46, 47; 24:14, MMM; Galatia 6:10.
‘Enda mu dîna dia Yehowa’
12. Bua tshinyi dîna dia Nzambi didi dimuakanyine amu yeye nkayende?
12 Mushindu mukuabu utudi mua kutumbisha Nzambi mulelela nkumanya dîna diende dia nsungasunga dia Yehowa, kuditela ne kudimanyisha bantu. Mufundi wa Misambu wakaleja ne: ‘Mbua bamanye biabu ne: wewe nkayebe, ngudi muidike dîna dia Yehowa, udi Mutambe bunene wa pa mutu pa buloba bujima.’ (Musambu 83:18) Dîna dia Yehowa didi diumvuija ne: “Udi uvuija.” Udi Mulongolodi Munene wa malu, udi misangu yonso ukumbaja malu adiye ulongolola. Anu Nzambi mulelela eu ke udi mukumbanyine dîna edi, bualu bantu kabena mua kukumbaja malu onso adibu bapangadija nansha. (Yakobo 4:13, 14) Yehowa nkayende ke udi mua kuamba ne: dîyi diende ‘nedikumbaje’ tshidiye uditumina. (Yeshaya 55:11, MMM) Bantu ba bungi batu bakema patubu bamona dîna dia Nzambi mu Bible yabu musangu wa kumpala ne patubu bamanya tshididi diumvuija. (Ekesode 6:3) Kadi dimanya edi didi mua kubambuluisha anu buobu ‘bende mu dîna dia Yehowa tshiendelele.’—Mika 4:5.
13. Kumanya Yehowa ne kuenda mu dîna diende kudi kumvuija tshinyi?
13 Musambu 9:10 udi wamba bua dîna dia Nzambi ne: ‘Badi bamanye dîna diebe nebakueyeme.’ Kumanya kudibu bambe muaba eu ki nkua dîna dia Yehowa patupu nansha, bualu kakuena kumvuija kumueyemena diakamue to. Kumanya dîna dia Nzambi kudi kumvuija kuikala ne dianyisha bua mushindu udi Yehowa muikale Nzambi muimpe, kunemeka bumfumu buende, kutumikila mikenji yende ne kumueyemena mu malu onso. (Nsumuinu 3:5, 6) Bia muomumue, kuenda mu dîna dia Yehowa kudi kumvuija kudilambula kudiye ne kuikala mutendeledi wende udi uleja mpala wende ku bantu, ne kuikala ne nsombelu udi umvuangana ne disua dia Nzambi. (Luka 10:27) Ke tshiutu wenza anyi?
14. Bituikala basue kusadila Yehowa tshiendelele, ntshinyi tshitudi ne bua kuenza kabiyi bimueneka bu badi batuenzeja ku bukole?
14 Bituikala basue kuenzela Yehowa mudimu tshiendelele, katuena ne bua kudiumvua bu badi batuenzejawu ku bukole nansha. Mupostolo Paulo wakabela Timote (ukavua musadile Yehowa kukavua bidimu bia bungi) ne: “Udifile mu kulamata kua [Nzambi].” (1 Timote 4:7, Muanda Mulenga Lelu [MML]) Dilamata didi dilua padi muntu muikale ne dianyisha bua muntu udiye mulamate. “Kulamata kua Nzambi” kudi kuleja kunemeka Yehowa kumunekelamu. Kudi kumuenekela ku mushindu utudi bamunange ne kabidi ku bungi bua mushinga utudi tumuangata yeye ne njila yende. Kudi kutusaka bua tuikale tuangata dîna diende ne mushinga wa bungi menemene. Tudi ne bua kulamata Nzambi mu nsombelu wetu bituikala basue kuenda tshiendelele mu dîna dia Yehowa, Nzambi umuepele mulelela.—Musambu 37:4; 2 Petelo 3:11.
15. Mmunyi mutudi mua kushala balamate amu Nzambi nkayende?
15 Bua tuetu kusadila Nzambi mushindu udiye musue, tudi ne bua kumutendelela amu yeye, bualu udi “Nzambi wa mukau.” (Ekesode 20:5) Katuena mua kunanga Nzambi eku banange kabidi bukua-panu budi Satana muikale nzambi wabu nansha. (Yakobo 4:4; 1 Yone 2:15-17) Yehowa mmumanye bimpe tshidi muntu ne muntu yonso wa kutudi ujinga bua kuikala. (Yelemiya 17:10) Bituikala banange buakane ne muoyo mujima, udi umona ne: Nzambi neatuambuluishe bua kutantamena ntatu ya ku dituku dionso itudi mua kupeta. Neatuambuluishe ne nyuma wende muimpe bua kutshimuna malu mabi adi matape bu meshi mu bantu lelu. (2 Kolinto 4:7) Neatuambuluishe kabidi bua kushala balame ditekemena dietu dia muoyo wa tshiendelele mu buloba bukudimuna mparadizu. Ditekemena edi si ndilenga, ki mmuomu anyi? Tuikalayi ne dianyisha dikole bua ditekemena edi, ne kabidi tusadilayi Yehowa, Nzambi umuepele mulelela wadikumbaja.
16. Ntshinyi tshiudi ne bua kuenza pamue ne miliyo ne miliyo ya bantu bakuabu?
16 Bantu bavule pa buloba bujima badi bitaba ne disanka ku muoyo mêyi a mufundi wa Misambu a ne: ‘Tumbishayi nanyi Yehowa, tunemeke bietu dîna diende diatshimue!’ (Musambu 34:3) Yehowa udi ukulomba bua kuikala munkatshi mua bantu ba matunga onso badi bamutumbisha mushindu eu.
Diambulula
• Yehowa mmuntu wa mushindu kayi?
Dimanya ngikadilu yende menemene didi dituambuluisha ku tshinyi?
• Mmunyi mutudi mua kuambuluisha bantu bakuabu bua kufikabu pabu ku dimanya bulelela bua Nzambi?
• Kumanya Yehowa ne kuenda mu dîna diende kudi kumvuija tshinyi?
[Bimfuanyi mu dibeji 14]
Bua dinanga dia Yehowa, ‘neabulule tshianza tshiende, tshintu tshionso tshidi ne muoyo neatshiukutshishe ne diakalengele’