Tukumbajayi mutshipu wetu wa didilambula
1 Ni udi mutambule matuku abidi abidi aa anyi kukadi bidimu bia bungi, bumue udi pamuapa muvuluke bualu bua mushinga mukole ebu bua mu matuku ebe a muoyo. Batismo wetu ki ndekelu wa kipatshila ketu to, kadi udi anu mbangilu wa mudimu utudi badilambuile kudi Nzambi udi mua kunenga kashidi ne tshiendelele. (1 Yone 2:17) Mmalu kayi adi atangila dikumbaja dia mutshipu wetu wa didilambula dietu kudi Nzambi a kukumbaja?
2 Tulondayi tshilejilu tshia Kristo: Diakamue pakatambulaye, Yezu ‘wakabanga kuyisha bantu,’ wamba ‘lumu luimpe lua Bukalenge bua Nzambi.’ (Luka 3:23; 4:43) Bia muomumue, patudi tutambula bua kuleja ne: tudi badilambule kudi Yehowa, tudi tulua ba-ministre ba lumu luimpe. Nansha mudibi mua kutulomba dîba dia bungi ne mudimu mukole bua kupeta bia kudikuatshisha nabi, mudimu wetu munene mmudimu wa bena Kristo. (Mat. 6:33) Pamutu pa kuluangana bua kupeta bubanji ne lumu, bantu badi badilambule kudi Nzambi buobu badi bakeba bua ‘kutumbisha mudimu wabu,’ anu bu muakenza mupostolo Paulo. (Lomo 11:13) Udiku munange mudimu webe wa pa buawu eu wa disadila Yehowa ne wenza muebe muonso bua kuutumbisha anyi?
3 Anu bu muakenza Yezu, tudi ne bua ‘kukandamena Diabolo.’ (Yak. 4:7) Satana wakateta Yezu panyima pa batismo wende, bia muomumue kabidi lelu’eu Satana mmuase basadidi badi baditshipe kudi Yehowa mutu. (Luka 4:1-13) Bu mudi bulongolodi bua Satana butunyunguluke eku ne eku, mbimpe tumanye mua kudikanda, kuepuka bualu buonso budi mua kunyanga lungenyi ne mutshima wetu. (Nsu. 4:23; Mat. 5:29, 30) Badi babela bena Kristo bua se: ‘kabadisangi ku mêsa a [Yehowa] ne ku mêsa a bademon popamue.’ (1 Kol. 10:21) Bua nanku tudi ne bua kuepuka dijikija lutetuku dionso didi kadiyi diakane, kuepuka malunda mabi ne kudikuba ku njiwu ya ku Internet. Bidi bikengela kabidi tuepuke bintu ne malu onso a batontolodi. Patudi tujingulula malu aa ne ngenzelu mikuabu mibi ya Satana, nebituambuluishe bua kukumbaja mutshipu wetu wa didilambula.
4 Tuenzayi mudimu ne bidi Nzambi mulongolole: Bua kutuambuluisha tumone mua kukumbaja mutshipu wa mulambu wetu utuvua benze, Yehowa udi utuambuluisha ne Dîyi diende, kabidi ne tshisumbu tshiende tshia bena Kristo. Tuenzayi bua dibala dia Bible ne disambila Yehowa bikale tshibidilu mu nsombelu wetu. (Yosh. 1:8; 1 Tes. 5:17) Tuikalayi tusankidila bisangilu bia tshisumbu. (Mus. 122:1) Tudiayi bulunda ne bantu badi batshina Yehowa ne banemeka mikenji yende.—Mus. 119:63.
5 Ne dikuatshisha dia Yehowa, tudi mua kukumbaja mutshipu wetu wa didilambula dietu dituvua badilambule kudi Yehowa ne kumukuatshila mudimu ne disanka kashidi ne tshiendelele.—Mus. 22:26, 27; Filip. 4:13.