Bala Dîyi dia Nzambi ne disanka
‘MUNTU udi ne disanka diende mu mikenji ya Yehowa’ ng’wa diakalenga. Muntu wa nunku udi ubala Dîyi dia Nzambi “munya ne butuku.” (Mus. 1:1, 2) Utu pebe umvua disanka edi anyi? Mmunyi muudi mua kuvudija disanka didi Dîyi dia Nzambi difila?
Teleja tshidi Yehowa wamba!
Kubadi anu miaku patupu to. Fuanyikija malu audi ubala au mu lungenyi. Fuanyikija mudi mêyi a bantu badibu batele. Tshilejilu, paudi utuadija ne mukanda wa Genese, teleja mudi Yehowa nkayende umvuija mushindu udiye ulongoluela muntu buloba ku kakese ku kakese bua kuluaye kusombelapu. Muteleje padiye wambila Muanende (Muena mudimu wa dilambu) bua ne: dîba dikadi dikumbane bua kufuka bantu ba kumpala. Fuanyikija mu lungenyi mushindu udi Adama ne Eva batombokela Nzambi, mudi Nzambi ubalumbuluisha ne ubipata mu Mparadizu. (Gen., nshap. 1-3) Paudi ubala muakafuma dîyi mu diulu diamba ne: Yezu Kristo m’Muana munanga wa Nzambi uvuaye mutume bua kufuila bantu, keba mua kumvua buôwa budi muntu mua kumvua. (Mat. 3:16, 17) Fuanyikija muvua Yone mumvue pakamba Yehowa ne: ‘Mona, ndi mvuija bintu bionso bipia-bipia.’ (Buak. 21:5) Kubala Dîyi dia Nzambi mushindu eu kudi kutupetesha disanka bulelela!
Wewe mutungunuke ne kubala Bible, neumone Yehowa bu muntu wa butumbi buvule ne wa kutshina. Neukebe bua kushemeja nende bulunda bualu mmukunange. Kabidi udi ukumvuila luse, ukuambuluisha paudi umusadila ne budipuekeshi, ne ukuleja mushindu wa wewe kuenze malu onso bimpe.—Yosh. 1:8; Mus. 8:1; Yesh. 41:10.
Wewe muikale ubala Bible bikole, neumanye malu mavule adi Nzambi musue, ne neudiumvue bimpe menemene. Kadi ki nkujike to. Bikale dibala diebe dia Bible dikupeteshe meji audi ukeba bua kumona mua kupita ne malu ebe bimpe, newambe bu muakamba mufundi wa Misambu ne: “Biudi muambe mbia dikema, ke padi muoyo wanyi ubilama.” (Mus. 119:129, MMM) Neusanke kabidi pawajingulula amue mêyi a mu Bible adi akuambuluisha bua wikale wela meji ne ujinga malu adi Nzambi musue.—Yesh. 55:8, 9.
Bible udi ne mikenji idi ituepula ku malu mabi ne ituleja njila muakane. Patudi tubala Bible, tudi tumona mudi Yehowa muikale Tatu udi mumanye tshiatufikila bituenza malu adi mubidi wetu musue, ne ki mmusue tukenge bua dipanga kulonda mikenji yende to. Udi wenza bionso bidi bikengela kuenza bua bualu buetu, ne mmusue bua tuikale bimpe. Patudi tubala Dîyi dia Yehowa, tudi tumvua bimpe menemene se: kuikala ne muntu bu Yehowa bu Nzambi wetu ne Tatu wetu, ndiakalenga dinene be!
Ikala ubala Bible dituku ku dituku
Mufundi wa Misambu wakamba ne: ‘Malu onso adi [muntu utu ubala Dîyi dia Nzambi dituku dionso] wenza adi atuta diakalengele.’ (Mus. 1:3) Tuetu tubala Bible dituku dionso ne tutumikila malu atudi tubalamu, malanda etu ne Nzambi neikale mimpe nansha mutudi bapange bupuangane, mutudi mu ndongoluelu mubi wa Satana ne nansha mudi Diabolo wamba kutudia ne muoyo.
Bu mudi malu mabi a panu apa atutatshisha, kubala Mukanda wa Nzambi nansha bua minite mikese dituku dionso nekutuambuluishe bikole. Bamue bana betu bavuabu bele mu maloko bua ditabuja diabu bavua bangula anu mvese mikese tshianana mu bimue bikandakanda. Bavua bayikosa mu bikandakanda abi, bayikuata ku muoyo ne belelanganapu meji. Yehowa wakababenesha bualu bavua benza muabu muonso bua kulonga Dîyi diende. (Mat. 5:3) Pabi ba bungi ba kutudi badi ne Bible mujima. Katuedi meji ne: kubala tshianana mvese umue lubilu lubilu dituku dionso, nekupatule bipeta bia nsongo nansha. Kadi bua tuetu kupeta bipeta bimpe, tudi ne bua kuenza muetu muonso bua kubala ndambu wa malu mu Bible dituku dionso, kuelanganapu meji ne kutumikila malu atudi tubala aa.
Kadi nansha tuetu benze bishi, tshitudi mua kumanya ntshia se: dimue dituku malu adi mua kutupita mutu. Biobi bikuenzekele nanku, uteke malu a mushinga menemene kumpala kua makuabu onso. Tshilejilu, katutu mua kupitshisha dituku dimue anyi abidi ku bukole katuyi banue mâyi to. Nunku, nansha tuetu bapete malu kayi dituku kampanda, tuangatayiku ndambu wa dîba bua kunua mâyi a bulelela.—Bien. 17:11.
Bala Bible mujima
Ukadiku mujikije Bible mujima anyi? Bamue batu bumvua bibatonda bua kubala Bible, kutuadijila ku Genese too ne ku Buakabuluibua. Ke bualu kayi bantu bavule bavua basue kubala Bible bakatuadija ne Mifundu ya tshiena-Greke ya Buena-Kristo. Bua tshinyi? Bualu bavua imue misangu mua kumona kakuyi lutatu mushindu udibu mua kutumikila malu adi mu mikanda eyi bua kumona mua kulonda dikasa dia Yezu. Anyi bualu Mifundu ya tshiena-Greke ya Buena-Kristo mmikese (idi yenza tshia binayi tshimue tshianana tshia Bible). Kadi kunyima kua bamane kujikija mikanda 27 eyi, bakatuadija kubala mikanda 39 ya Mifundu ya tshiena-Ebelu. Pakajikijabu kubala Mifundu ya tshiena-Ebelu, bakapingana kabidi ku ya tshiena-Greke e kutungunuka ne kubala Bible mujima nunku too ne adi aloka aa. Ikala pebe ne tshibidilu tshia kubala Dîyi dia Nzambi ku dituku ku dituku.
Mu tshisumbu tshienu peshi mu dîku dienu mudi muntu udi kayi mumanye kubala anyi? Bua tshinganyi kubenga kumulomba bua kumubadila pende Bible dituku dionso? Neumone muakuambuluishabi, ne muamuambuluishabi pende, nangananga pikalaye welangana meji pa malu audi umubadila ne uatumikila.—Buak. 1:3.
Panyima, udi mua kudifundila bua kuenza makuabu malu a pa buawu mu dibala diebe dia Bible. Amue adi mua kukuambuluisha bua kumvua bilenga diumvuangana didi pankatshi pa bitupa bishilashilangane bia Bible. Pikala Bible webe muikale ne mvese ku luseke, mu kalongo munkatshi mua dibeji anyi kuinshi, peshi ne mumvuija kuinshi kua mabeji, neumanye kudi imue miaku mifumine ne mikuabu mvese idi yakula malu adi mafuanangane. Tshilejilu, udi mua kumanya tshivua tshifikishe bantu ku difunda imue Misambu, ne tshivua tshifikishe bayidi ba Yezu ku difundilangana mikanda. Mukanda wa Étude perspicace des Écritures udi wakula bua malu a bantu ba bungi, udi wakula bua miaba ne ngikadilu idibu batele mu Bible. Mudi tablo idi ileja mushindu udi milayi ya mu Bible mikumbane. Badi balejamu bakalenge ne baprofete bavua ne muoyo mu tshikondo tshimue. Badi kabidi bafilamu bikondo bivua malu mavule adi mu Bible mua kuikala menzeke.
Wewe welangana meji pa biudi ubala, neumvue bua tshinyi malu kampanda akenzeka munkatshi mua bantu ba Nzambi; bua tshinyi Yehowa wakenza malu mushindu kansanga ne bantu bende. Neumvue bimpe mudi Yehowa umona malu adibu benza kudi mbulamatadi, kudi bantu, ne adi muntu yonso wenza. Neumvue bimpe menemene meji ende.
Nebikusankishe bikole bu wewe mua kutangila tuarte tudimu bua kumanya miaba ivua malu adi malonda mu Bible menzekele! Tuarte etu tudi tuleja miaba ne bule bua ntanta udi pankatshi pa muaba umue ne mukuabu. Tshilejilu, mmuaba kayi uvua bena Isalele basabukile Mbuu Mukunze? Udi mumanye bunene bua Buloba Bulaya anyi? Pavua Yezu wenza mudimu wende, uvua muende mutantshi bule kayi? Mbintu kayi bivua Paulo mua kuikala mumone mu ngendu yende yonso ya bu-misionere? Tuarte tudi tukuleja malu akusankisha bua kubala Bible. Kadi neupete tuarte etu penyi? Tumue tudi mu Bible wa Les Saintes Écritures—Traduction du monde nouveau. Mukanda wa kumpala wa Étude perspicace udi ne tshikebelu anyi indekse udi uleja miaba iudi mua kupeta tuarte tutue ku 70 tudi mu mukanda wa kumpala ne muibidi. Index des publications de la Société Watch Tower udi mua kukuleja muaba udi tukuabu tuarte. Biwikala kuyi ne mikanda yonso itudi batele eyi, utangile tuarte tudi tupatuka mu Tshibumba tshia Nsentedi bua tukuambuluishe mu dibala diebe dia Bible.
Mukalenge Davidi wakasamuna Yehowa (mu Mifundu ya tshiena-Ebelu) wamba ne: ‘Nzambi, mona mudi meji ebe mikale a mushinga mukole kundi! Mona mudi bungi buawu bupite bungi!’ (Mus. 139:17) Mupostolo Paulo wakatumbisha Yehowa (mu Mifundu ya tshiena-Greke ya Buena-Kristo) bualu Uvua ‘mukenke mu mitshima yetu bua kutupa dikenka dia lungenyi lua butumbi bua Nzambi pa mpala pa Yezu Kristo.’ (2 Kol. 4:6) Nansha muvua Paulo ne muoyo bidimu nkama mivule kunyima kua Davidi, bubidi buabu bavua banyisha Dîyi dia Nzambi. Wewe pebe neupete disanka dia muomumue biwakeba dîba dia kubala malu onso adi Yehowa ukuambila mu Dîyi diende diakafundishaye ne diambuluisha dia nyuma wende.