Tumanyishayi dîna dia Yehowa miaba yonso pa buloba

¹ Yezu ukavua mumane kushiila bayidi bende tshilejilu tshivuabu ne bua kulonda pakabapeshaye mudimu wa kuikalabu bantemu ‘too ne ku mfudilu kua buloba.’ (Bien. 1:8) Dîba dionso ne muaba wonso uvuaye upeta bantu, uvua ubambila malu avua Nzambi mulongoluele bukua-bantu. Kasumbu ka mupika wa lulamatu kadi kenza mudimu mu mishindu kabukabu bua dîna dia Yehowa ‘dimanyibue mu miaba yonso ya pa buloba,’ anu bu muakenza Yezu.​—Yesh. 12:4, 5.

² Tshivuabu benza kale: Mu bidimu bia kale, bavua bapatula miyuki mu bikandakanda; bakapatula “Foto-Drama wa Bufuki” ne kumuleja bantu miliyo mivule; bavua benda ne mashinyi avua ne bikolokolo; ne bakenza mudimu bikole ne bisanji bia fono, ne mu tshikondo kampanda, bakenza mudimu ne tudiomba​—bionso ebi anu bua kuyisha lumu luimpe. Kadi pa tshibidilu, bavua bipatshila anu bua kuyikila mpala ne mpala ne bantu, bua kumona mua kudiundisha dijinga divua bantu baleja. Nunku, mudimu wa ku nzubu ne ku nzubu wakalua kumueneka mushindu mutambe buimpe wa kumanyisha dîna dia Yehowa miaba yonso.​—Bien. 5:42.

³ Tshidibu benza matuku etu aa: Bu mudi bikondo bienda bishintuluka, bantu badi benza malu anu lukasalukasa ne mu miaba ya bungi, mbikole bua kupeta bantu kumbelu. Bakese mbadi bapeta dîba dia kubala ne kuelangana meji pa malu a mu nyuma. Ke bua tshinyi tudi ne bua kuakaja mudimu wetu bilondeshile nsombelu eu. Pa kumbusha buambi bua ku nzubu ne ku nzubu mu teritware wetu mujima, bavua batukankamije bua kuya miaba yonso idi bantu ne kabidi bua kuikala ‘badilongolole misangu yonso’ bua kuambila bantu ditekemena ditudi nadi. (1 Pet. 3:15) Muanda eu udi utulomba bua kuenza madikolela bua kumona mua kuyisha bena mudimu netu, balongi netu, bapitshi ba njila anyi aba badi bimane muaba udi mashinyi atudila, ku makazen peshi muaba kayi wonso mukuabu utudi mua kupeta bantu. Bu mudi Yehowa muikale utukuatshisha, mudimu wetu mukole utudi tuenza udi upatula bipeta bimpe bitambe. Udiku udifila bua kupeta bantu miaba yonso idibu anyi?

⁴ Muntu ne muntu, katushiyi muaba nansha umue ne tumanyishayi dîna dia Yehowa mu teritware wetu mujima. Eku batangile kudi Yehowa bua akoke bantu badi ne mitshima miakane, netupete disanka dia bungi bu tuetu mua kuenza mudimu wetu bimpe menemene.​—Yone 6:44.

Tuikalayi ne meji mu dienza mudimu ne mikanda yetu

¹ Dienza mudimu ne mikanda pa tshibidilu ndituadije katshia babanya bibejibeji 6 000 bia Tshibumba tshia Nsentedi tshia dia 1 Kashipu 1879 mu Anglais. Kubangila mu tshikondo atshi too ne lelu, mbapatule mikanda bungi tshianana idibu babanye bikole.

ANU MAPA KE ADI AKUATSHISHA MUDIMU EU

² Kukadi mbingu mikese, bavua batuambile ne: bamanyishi ne bantu bonso batu banyisha bibejibeji ne mikanda yetu nebikale babipeta pa tshibidilu kakuyi dibalomba makuta bungi kampanda to. Kadi, patudi tufila mikanda eyi mu buambi, tudi mua kuitaba mapa a ku budisuile adi bantu mua kufila bua kukuatshisha mudimu wa pa buloba bujima wa diyisha lumu luimpe. Tudi bajadike se: Yehowa neabeneshe ngenzelu eu mupiamupia.​—Tangila Matayo 6:33.

TSHITUDI MUA KUENZA MU BUAMBI

³ Tuenze mudimu ne mbuelelu idi miakanyine bua kujula bantu dijinga dia kumanya bivule. Bikala muntu kayi witaba bulelela, kabiena bikengela kumupesha mukanda to. Katuena basue bua kunyanga mikanda yetu pa kuyipesha bantu badi kabayi nayi dijinga to. Kadi padi muntu wanyisha bulelela ne witaba bua kubala mukanda, tudi mua kumupeshawu. Nenku tuabanyayi mikanda yetu ne meji.

⁴ Wewe mumane kuleja muntu unudi nuyikila nende mukanda, udi mua kuamba ne: “Biwasua kubala mukanda eu, ndi mua kukushilawu.” Yeye mukonke ne: “Udi mushinga kayi?” udi mua kuandamuna ne: “Mudimu wetu ki ng’wa dienda mushinga to. Nenku katuena tupanyisha mukanda eu to. Badisuile ke badi benza mudimu eu mu matunga mapite pa 230, bua kuambuluisha bantu bua bamone mua kupeta muoyo wa kashidi. Wewe musue kufila dipa bua kukuatshisha mudimu eu, nenganyishe bua kudiangata.”

⁵ Paudi ufila bibejibeji, udi mua kujula nkonko pa tshiena-bualu kampanda ne pashishe kuamba ne: “Ndi njinga bua udimanyine malu makuabu a bungi adi andamuna lukonko elu adi mu tshiena-bualu etshi. Wewe musue kubala bibejibeji bibidi ebi, nensanke bua kukushiilabi.” Muntu yeye muitabe, udi mua kusakidila ne: “Ndi ngela meji se: tshiena-bualu etshi netshikusankishe menemene. Ne ndi mene njinga bua kupingana lumingu ludi lulonda bua tuetu kuyikila pa malu awikala mubalemu. Pa buloba bujima badi bapatula bibejibeji bia Tshibumba tshia Nsentedi bipite pa 22 000 000 mu miakulu 132. Mudimu eu udi wenzeka anu ku diambuluisha dia mapa a ku budisuile adi bantu bafila. Wewe musue kufila dipa dikese bua kukuatshisha mudimu eu wa dilongesha bantu Bible, mbualu buimpe.”

⁶ Kuelakanyi bua kuakula bua mapa adi akuatshisha mudimu wetu to. Tshilejilu, muntu udi witaba bulelela udi mua kukonka ne: “Udi umpesha mukanda eu anyi?” Udi mua kuandamuna ne: “Wewe musue kuubala, ndi mua kukupeshawu. Kadi ndi musue kuanji kukumanyisha malu adi atangila mudimu eu utudi tuenza pa buloba bujima ne kukuleja kudi makuta adi awukuatshisha afumina.” Tudi mua kumvuija ne: kabatu bafuta Bantemu ba Yehowa badi benza mudimu eu pa buloba bujima to. Kunyima, tudi mua kubadisha muntu eu tshiambilu tshidi mu dibeji 2 dia Tshibumba tshia Nsentedi tshidi tshileja ne: dipatula dia tshibejibeji etshi “ng’umue wa ku midimu idi yenzeka pa buloba bujima ne mapa a ku budisuile bua kulongesha bantu Bible.” Pashishe tudi mua kumuambila ne: yeye musue kufila dipa nansha dikese bua Bantemu ba Yehowa kutungunukabu ne kuenza mudimu eu mu ditunga dietu, netudianyishe bikole.

⁷ Imue misangu muntu udi mua kuangata mukanda diakamue ne kukuela patupu tuasakidila. Biobi nanku, udi mua kuamba ne: “Ndi mujadike ne: neuubale. Bantu ba bungi batu badiebeja kutu mfranga idi ikuatshisha mudimu wetu ifumina, bualu tudi tuwenza pa buloba bujima. Bavule ba ku bantu badi bangata mikanda yetu badi baleja dianyisha diabu bua malu adi mikanda eyi ibalongesha pa kufila dipa dikese bua tuetu kumona mua kuabanya mikuabu. Padi bantu bakuabu basua