Tuikalayi ne meji mu dienza mudimu ne mikanda yetu
1 Dienza mudimu ne mikanda pa tshibidilu ndituadije katshia babanya bibejibeji 6 000 bia Tshibumba tshia Nsentedi tshia dia 1 Kashipu 1879 mu Anglais. Kubangila mu tshikondo atshi too ne lelu, mbapatule mikanda bungi tshianana idibu babanye bikole.
ANU MAPA KE ADI AKUATSHISHA MUDIMU EU
2 Kukadi mbingu mikese, bavua batuambile ne: bamanyishi ne bantu bonso batu banyisha bibejibeji ne mikanda yetu nebikale babipeta pa tshibidilu kakuyi dibalomba makuta bungi kampanda to. Kadi, patudi tufila mikanda eyi mu buambi, tudi mua kuitaba mapa a ku budisuile adi bantu mua kufila bua kukuatshisha mudimu wa pa buloba bujima wa diyisha lumu luimpe. Tudi bajadike se: Yehowa neabeneshe ngenzelu eu mupiamupia.—Tangila Matayo 6:33.
TSHITUDI MUA KUENZA MU BUAMBI
3 Tuenze mudimu ne mbuelelu idi miakanyine bua kujula bantu dijinga dia kumanya bivule. Bikala muntu kayi witaba bulelela, kabiena bikengela kumupesha mukanda to. Katuena basue bua kunyanga mikanda yetu pa kuyipesha bantu badi kabayi nayi dijinga to. Kadi padi muntu wanyisha bulelela ne witaba bua kubala mukanda, tudi mua kumupeshawu. Nenku tuabanyayi mikanda yetu ne meji.
4 Wewe mumane kuleja muntu unudi nuyikila nende mukanda, udi mua kuamba ne: “Biwasua kubala mukanda eu, ndi mua kukushilawu.” Yeye mukonke ne: “Udi mushinga kayi?” udi mua kuandamuna ne: “Mudimu wetu ki ng’wa dienda mushinga to. Nenku katuena tupanyisha mukanda eu to. Badisuile ke badi benza mudimu eu mu matunga mapite pa 230, bua kuambuluisha bantu bua bamone mua kupeta muoyo wa kashidi. Wewe musue kufila dipa bua kukuatshisha mudimu eu, nenganyishe bua kudiangata.”
5 Paudi ufila bibejibeji, udi mua kujula nkonko pa tshiena-bualu kampanda ne pashishe kuamba ne: “Ndi njinga bua udimanyine malu makuabu a bungi adi andamuna lukonko elu adi mu tshiena-bualu etshi. Wewe musue kubala bibejibeji bibidi ebi, nensanke bua kukushiilabi.” Muntu yeye muitabe, udi mua kusakidila ne: “Ndi ngela meji se: tshiena-bualu etshi netshikusankishe menemene. Ne ndi mene njinga bua kupingana lumingu ludi lulonda bua tuetu kuyikila pa malu awikala mubalemu. Pa buloba bujima badi bapatula bibejibeji bia Tshibumba tshia Nsentedi bipite pa 22 000 000 mu miakulu 132. Mudimu eu udi wenzeka anu ku diambuluisha dia mapa a ku budisuile adi bantu bafila. Wewe musue kufila dipa dikese bua kukuatshisha mudimu eu wa dilongesha bantu Bible, mbualu buimpe.”
6 Kuelakanyi bua kuakula bua mapa adi akuatshisha mudimu wetu to. Tshilejilu, muntu udi witaba bulelela udi mua kukonka ne: “Udi umpesha mukanda eu anyi?” Udi mua kuandamuna ne: “Wewe musue kuubala, ndi mua kukupeshawu. Kadi ndi musue kuanji kukumanyisha malu adi atangila mudimu eu utudi tuenza pa buloba bujima ne kukuleja kudi makuta adi awukuatshisha afumina.” Tudi mua kumvuija ne: kabatu bafuta Bantemu ba Yehowa badi benza mudimu eu pa buloba bujima to. Kunyima, tudi mua kubadisha muntu eu tshiambilu tshidi mu dibeji 2 dia Tshibumba tshia Nsentedi tshidi tshileja ne: dipatula dia tshibejibeji etshi “ng’umue wa ku midimu idi yenzeka pa buloba bujima ne mapa a ku budisuile bua kulongesha bantu Bible.” Pashishe tudi mua kumuambila ne: yeye musue kufila dipa nansha dikese bua Bantemu ba Yehowa kutungunukabu ne kuenza mudimu eu mu ditunga dietu, netudianyishe bikole.
7 Imue misangu muntu udi mua kuangata mukanda diakamue ne kukuela patupu tuasakidila. Biobi nanku, udi mua kuamba ne: “Ndi mujadike ne: neuubale. Bantu ba bungi batu badiebeja kutu mfranga idi ikuatshisha mudimu wetu ifumina, bualu tudi tuwenza pa buloba bujima. Bavule ba ku bantu badi bangata mikanda yetu badi baleja dianyisha diabu bua malu adi mikanda eyi ibalongesha pa kufila dipa dikese bua tuetu kumona mua kuabanya mikuabu. Padi bantu bakuabu basua kufila pabu mapa, tudi tuangata ne disanka.”
MMUNYI MUUDI MUA KUJINGULULA DIJINGA DILELELA DIA KUMANYA BIVULE?
8 Bushuwa, tshipatshila tshietu ki ntshia kufila mikanda yetu tshifilafila nansha. Tudi basue bua ikumbaje tshipatshila tshiayi—tshia kuambuluisha bantu bena muoyo muimpe bua bamanye malu malenga a bungi adi Yehowa mulongolole. Kufila mikanda kudi bantu badi kabayi banyisha malu a mu nyuma nkuyinyanga. (Eb. 12:16) Difila dia mikanda yetu nedipatule bipeta bimpe anu bituikala bakumbane bua kujingulula dijinga dilelela dia kumanya bivule. Tudi mua kumanyina dijinga edi ku tshinyi? Padi muntu witaba bua kuyikila netu, atshi ntshimanyinu tshimpe. Padiye uteya ntema ku biudi umuambila, wandamuna ku nkonko ne uleja mmuenenu wende, bidi bileja ne: mmusue bua nuyikile. Muntu yeye wakula nebe ne kanemu, ne dîyi dia bulunda, bidi bimueneka ne: mmudiakaje bimpe bua kuyikila nebe. Padiye ukulonda dîba diudi ubala mvese mu Bible, mmumue ne: udi unemeka Dîyi dia Nzambi. Misangu mivule udi ne bua kuebeja muntu bua kujadika bikalaye mua kubala mikanda iudi umupesha. Udi kabidi mua kumuambila ne: udi ujinga bua kumupinganyina bua nuenu kutungunuka ne diyuki. Yeye muitabe, etshi ntshimanyinu tshikuabu tshidi tshileja se: tshiena-bualu atshi ntshimulengelele. Wewe mumone bimanyinu ebi bia mudi muntu witaba bulelela ne muoyo mujima, udi mua kutekemena ne: neabale mikanda yonso iwamupesha.
9 Ngenzelu wetu mupiamupia eu wa mudimu udi uleja kabidi ne: ‘katuena tuenda mushinga ne dîyi dia [Nzambi] to.’ (2 Kol. 2:17, Muanda Mulenga Lelu) Udi uleja kabidi ne: tudi batapuluke ne bena panu.—Yone 17:14.
10 Bu mudi kabutu ka Babulona Munene kikale pabuipi, nsombelu udi wenda ukola amu kukola bua bena malu a nzambi bonso. Tudi tutamba kuditatshisha bua mudimu eu wa mushinga mukole wa dimanyisha Bukalenge pa buloba bujima utungunuke ne kuya kumpala kakuyi tshidi tshiujikila njila ne kabidi bua ufikishe bantu ba bungi ku lupandu.—Mat. 24:14; Lomo 10:13, 14.