‘Ambila bantu dîyi ne dinanukila’
1 Wewe mupete tshintu bafundepu ne: “TSHIA LUKASA,” utu utshimona munyi? Miaku “tshia lukasa” idi yumvuija ne: “tshia kuenza diakamue kakuyi dijingakana to.” Mupostolo Paulo uvua muele meji bimpe pakambilaye Bena Kristo bua ‘kuambila bantu dîyi ne dinanukila.’ (2 Tim. 4:2, Muanda Mulenga Lelu) Utuku uleja muudi munange mudimu eu pa kuwenza kakuyi dijingakana anyi?
2 Pamu’apa bavua mua kuikala bambile Paulo ne: bamue ba ku bana babu bakavua batuadije kuikala ne “lulengu” mu dienza mudimu wabu wa bena Kristo. (Lomo 12:11, Mukenji Mulenga) Ke bua tshinyi mudimu wabu kawakapatula bipeta bia nsongo ne kabidi bakapangila disanka divuabu mua kupeta bu buobu bambuluishe bakuabu.
3 Mushindu uvua Yezu wangata mudimu eu: Yezu wakasanka bikole bua mushindu uvuaye ukumbaja mudimu wende! Wakamba ne: “Tshianyi tshiakudia nkuenza mudibo basue kudi Udi muntume, ne kukumbaja mudimu wende bimpe.” Tshilejilu tshia Yezu etshi tshiakasaka bayidi bende bua kudifila mu mudimu, pakabakankamijaye ne: ‘madimi mmatoke ne bia kunowa.’ (Yone 4:34, 35, Mukanda wa Mvidi Mukulu) Dibenga kuikala ne lulèngù mu mudimu divuaye nadi diakamueneka pakambilaye bayidi bende ne: ‘nulombe Mukalenge wa bintu bia kunowa, atume biende bena mudimu mu kunowa kuende.’ (Mat. 9:38) Yezu uvua munange bikole mudimu wende wa kuyisha, ne uvua mupangadije bua kalekedi tshintu nansha tshimue tshimupangisha bua kuwenza.
4 Kadi tuetu? Lelu’eu bidi bikengela kuenza mudimu wa diyisha lukasa kupita muvuabi kale. Mu miaba mivule pa buloba, bia pa madimi bikadi bifike pa dîba dia kubinowa. Nansha mu matunga muvua mumueneka ne: mbamuyishe bikole, bantu binunu bivule badi batambulamu tshidimu tshionso. Bu mudi nshikidilu wa ndongoluelu wa malu eu wenda usemena lukasalukasa, kudi “bivule bia kuenza mu mudimu wa Mukalenge.” (1 Kol. 15:58, NW) Nanku tudifilayi bikole mu diyisha bakuabu mukenji wa Bukalenge, kupita mutuvua tuenza kumpala.
5 Katupungidi bua kutuadila bantu lumu luimpe, ku nzubu ne ku nzubu ne miaba mikuabu yonso itudi mua kubapeta mu teritware wetu. Patudi tutamba kudifila mu mudimu wa diyisha, tudi tuleja patoke ne: Bukalenge budi pa muaba wa kumpala mu matuku etu onso a muoyo. (Mat. 6:33) Tuetu tuyisha ne lulamatu katuyi tujingakana, netupete disanka dia bungi.