Tuenze mudimu ne trakte bua kutuadija kuyikila

¹ Katuenaku bajadike ne: buambi butu bupatula bipeta bimpe nangananga patutu tudianjila kuyikila ne bantu anyi? Lutatu ludiku ndua kuamba bualu kampanda budi mua kulengelela muntu ne kumufikisha ku diakula. Kadi mmunyi mudibi mua kuenzeka bimpe?

² Bamanyishi ba bungi mbamone se: padibu babanga kuakula ne mêyi makese masungula bimpe, difila umue wa ku trakte yetu idi yumvuija Bible didi mua kuambuluisha bua kutuadija kuyukila ne bantu. Mitu ya bualu ya trakte itu milenga, ne kudi kabidi bimfuanyi bia mekalamekala bidi bimpe kumona. Trakte katu utonda muntu, umupesha lungenyi lua se: kudi malu a bungi adiye ne bua kubala nansha. Tshidibi ntshia se: malu makese adi mu trakte adi ajula dijinga dia kumanya bivule ne tudi mua kuenza nawu mudimu bua kutuadija kulonga Bible ne bantu.

³ Ke muakamona Ntemu mukuabu wakamba ne: “Mu tshikondo etshi tshidi bantu benza malu anu lukasalukasa, pa tshibidilu kabatu basua kupitshisha dîba dia bungi mu dibala to, kadi trakte idi ne malu makese ne makumbane bua kumanyisha mukenji wa mushinga, ne nunku kêna mua kutshinyisha muntu to. Mvua mbala trakte ya bungi ne ndekelu ngakafika ku dimanya bulelela.” Katupepeji bukole bua Dîyi dia Nzambi mushindu udibu badiumvuija mu trakte eyi mifunda mu mêyi makese.​—Eb. 4:12.

⁴ Malu mapepele anayi: Ba bungi mbapatule bipeta bimpe pa kuenza malu mu mushindu mupepele. (1) Leja muntu imue trakte ne mukonke trakte udi umusankisha. (2) Padi muntu usungula trakte umue, umuele lukonko lulongolola bimpe ludi luleja bualu bunene kampanda budi mu trakte. (3) Bua kuandamuna lukonko alu, bala tshikoso tshiakanyine anyi mvese mu trakte. (4) Yeye muitabe biudi mumubadile, utungunuke ne dikonkonona nende malu adi mu trakte anyi utele dilongesha kampanda didi mu broshire wa Utulomba anyi nshapita kansanga mu mukanda wa Dimanya bua kusakidila mamanyisha makuabu. Ngenzelu eu udi mua kukukuatshisha bua kutuadija diakamue dilonga dia Bible ne muntu. Ngenyi idi ilonda eyi neyikuambuluishe bua kulongolola tshiudi mua kuamba pa bidi bitangila trakte inayi eyi.

⁵ Trakte udi ne mutu wa bualu wa ne: “Nnganyi udi bushuwa mukokeshi wa bulongolodi ebu?” ndukonko ludi luelesha meji:

▪ Bikala muntu unudi nuyikila nende muandamune ne: “n’Nzambi” peshi ne: “Tshiena mumanye to,” bala biambilu bibidi bia ntuadijilu mu dibeji 2 ne tshikoso tshia kumpala mu dibeji 3. Shindamena pa 1 Yone 5:19 ne Buakabuluibua 12:9. Nansha muntu witaba anyi kayi witaba ne: Satana Diabolo utuku, anyi witaba mudiye ne buenzeji kudi bantu, udi mua kutungunuka ne lungenyi ludi muinshi mua ka-tshiena-bualu aka: “Nsombelu ya mu bulongolodi ebu bua kusulula nshinga.” Muntu yeye muitabe bulelela, mbimpe umulombe bua wewe kumumvuija kuvua Diabolo mufumine, nanku ubale malu adi mu dibeji 3 ne 4 mu trakte.

⁶ Malu adi mu trakte wa: “Nditekemena kayi ditudi nadi bua bananga betu bakadi bafue?” adi mua kulengelela muntu diakamue. Udi mua kuasa diyuki pa kuela lukonko elu:

▪ “Utuku wela meji ne: tuadiakumonaku kabidi bananga betu bakadi bafue anyi?” Padi muntu ujikija kuandamuna, umuleje tshikoso tshibidi mu dibeji 4 ne ubale Yone 5:28, 29. Pashishe umvuije ne: mbimpe kumvua tshidi ka-tshiena-bualu ka kumpala ka trakte kamba. Umulombe bua nuyikidilepu nende.

⁷ Trakte wa: “Nsombelu wa disanka mu dîku” utu usankisha mêku miaba yonso. Bua kuenza nende mudimu, udi mua kuamba ne:

▪ “Pamu’apa udi mumanye mudi mêku mikale mu ntatu lelu’eu. Buebe wewe ntshinyi tshitudi mua kuenza bua kukolesha malanda a mu dîku?” Padi muntu ujikija kuandamuna, umuleje malu adi mu tshikoso tshia kumpala mu dibeji 6. Angata mvese umue ku idi mitela mu dibeji 4 ne 5 ne umumvuije. Pashishe wambe ne: udi musue bua nulonge nende Bible kayi ufuta mfranga.

⁸ Bua kuenza mudimu ne trakte wa: “Bua tshinyi kuanyisha Bible,” udi mua kutuadija nunku:

▪ “Bantu ba bungi bakadi bumvue muyuki wa Kayine ne Abele, udi mu mukanda wa kumpala wa mu Bible. Muyuki eu udi mu Genese udi wakula kabidi bua mukaji wa Kayine. Ukadiku mudiebeje kuvua mukaji eu mufumine anyi?” Bua kuandamuna, bala tshikoso tshia ndekelu mu dibeji 2. Umvuija ne: trakte eu udi kabidi ukonkonona malu a mushinga a mu Bible adi atangila matuku etu atshilualua. Paudi utuadija ne tshikoso tshisatu mu dibeji 5, mbimpe wenze mudimu ne mvese idi ishindika malu adimu.

⁹ Diabanya trakte idi yumvuija Bible nngenzelu mulenga wa katshia kuonso eku udibu benze nende mudimu bua kumanyisha lumu luimpe. Bu mudiyi ya bunene bukese ne mipepele bua kuya nayi muaba wonso uudi uya, udi mua kupatula nayi bipeta bimpe mu mudimu webe wa ku nzubu ne ku nzubu ne mu buambi bua mu mpukapuka. Trakte idi ne mushinga wa bungi mu dikumbaja dia mudimu wetu. Kupu muoyo bua kuangata trakte mishilashilangane ne kuenza nayi mudimu bimpe bua kutuadija mayuki ne bantu.​—Kolos. 4:17.