Konkonona Dîyi dia Yehowa dituku dionso

¹ Dituku dionso didi ne adi malu mapiamapia adi ateta ditabuja diebe. Pamu’apa muntu uudi mumanyangane nende kadi kayi mukaji anyi mulume nebe ne udi kayi muena Kristo udi anu ukusesela bua nuya kanyunguluka nende. Mulongeshi webe mmusue bua ujikije tulasa ne wenze mudimu udi mua kukupetesha bintu bia bungi, peshi mfumuebe wa mudimu mmusue bua usakidile mêba makuabu pa atubu bakufundile. Mubidi webe udi mua kuikala kauyi muimpe. Nansha mudi ntatu eyi mua kukufikila dîba kayi dionso, kuena nkayebe to. Yehowa udiku bua kukupesha meji adi akengedibua bua wamona mua kuyitantamena. Kukonkonona mvese wa mu Bible ne mumvuija ende mu broshire wa Tukonkononayi Mifundu ng’umue mushindu udi mua kukuambuluisha bua kupeta Dîyi dia Yehowa pa tshibidilu. Utu wenza mudimu bimpe ne kakanda kalenga aka anyi?

² Udi mua kupeta diambuluisha: Yeshaya 30:20 udi ubikila Yehowa ne: ‘Muyishi Munene’ udi bantu ba Nzambi mua kutekemena bua abambuluishe. Udi ukupesha tshiudi natshi dijinga menemene bua kutantamena ntatu. Mmunyi? Mvese udi ulonda udi umvuija ne: ‘Matshi ebe neumvue dîyi difume kunyima kuebe, diamba ne: Njila [nyeye eu], endelamu.’ Lelu’eu, Yehowa udi utuma ‘dîyi’ diende ku diambuluisha dia Mifundu ne mikanda ya “mupika wa lulamatu.” (Mat. 24:45, NW) Anu mu biena-bualu bia kale bia Tshibumba tshia Nsentedi nkayabi, mudi malu a bungi a meji adi atangila pa kuamba, bitupa bionso bia nsombelu wa muena Kristo. Dibalulula bimue biena-bualu bidi bitela mu Tukonkononayi Mifundu didi dikuambuluisha bua kuibaka muaba wa kulamina dimanya didi ne mushinga wa bungi bua wewe kutantamena ntatu ya mishindu yonso.​—Yesh. 48:17.

³ Dilongoluela dîba: Nansha muvuaye ne bia bungi bia kuenza matuku onso mu dinda, mamu kampanda uvua ubala ne uyikila pa mvese ne mumvuija ende pamue ne muanende wa balume dîba divuabu banua tshiayi mu dinda. Mêyi aa pamue ne disambila ke malu a ndekelu avua muana eu umvua dinda dionso kumpala kua kuya mu kalasa. Avua amupa bukole bua kubenga kuenda tshiendenda nansha muvuabu bamusaka, amuambuluisha bua kuepuka dinanga dinekesha dia ditunga diabu ne amupesha dikima bua kumona mua kuyisha balongi ne balongeshi kabidi. Nansha muvuaye tshikondo kampanda anu Ntemu umuepele mu tshilongelu atshi, kavua udiumvua nkayende nansha.

⁴ Keba buludiki ne bulombodi kudi Yehowa ne mu Dîyi diende. Wewe muenze nanku, neikale muntu mulelela kuudi, muenze bu mulunda wa kueyemena. Nyemena kudiye dituku dionso! Enza bua ‘mêsu ebe ikale amona Muyishi webe Munene,’ amu bu miliyo ya bakuabu badi pa buloba bujima batu bikale babala Dîyi dia Nzambi dituku dionso.