Tuikalayi ne dianyisha bua luse lua Nzambi
1 Kumpala kua Mupostolo Paulo kuluaye muena Kristo, wakaluisha Buena-Kristo bikole bua kabuyi kumpala nansha. Kadi, bu muvuaye wenza bionso abi mu dipanga, Yehowa wakamufuila luse. Wakamuleja bulenga budi kabuyi butuakanyine, e kupeshaye Paulo mudimu wa kuyisha uvuaye munanga ne wangata ne mushinga muvule. (Bien. 26:9-18; 1 Tim. 1:12-14) Dianyisha divua nadi Paulo bua luse lua Yehowa diakamusaka bua kudifila muende muonso mu mudimu wende.—2 Kol. 12:15.
2 Bua luse lua Nzambi, mbatupeshe petu mudimu wa kuenza. (2 Kol. 4:1) Anu bu Paulo, tudi mua kuleja dianyisha dietu bua luse ludibu batufuile pa kudifila ne muoyo mujima bua kuambuluisha bakuabu bua bakole pabu mu nyuma. Umue mushindu utudi mua kuenza bualu ebu nkutuadija ne kutungunuka ne kulombola malonga a Bible ne bantu.
3 Tutuadijayi malonga a Bible: Tudi mua kupeta mushindu wa kutuadija malonga a Bible ne bantu tuetu bikale ne tshibidilu tshia kubatuadila bibejibeji bietu dîba dionso didibi bipatuka. Patudi tufika ku diya kubatangila njila ne njila bua kubatuadila bibejibeji, tudi tulua kuibidilangana nabu ne kabidi tufika ku dimanya malu abu. Imue misangu, tshiena-bualu kampanda tshia mu bibejibeji bietu tshidi mua kutuambuluisha bua kutuadija dilonga dia Bible ne muntu mu broshire wa Utulomba. Misangu yonso yalonda patudi tuya kutangila muntu bua kumutuadila bibejibeji bietu, tudi mua kupeta mushindu wa kutungunuka ne diyukidilangana nende mu broshire wa Utulomba.
4 Disambila ne didienzeja bidi ne mushinga: Disambila ne didienzeja ne tshisumi nebilengeje mudimu wetu wa buambi. Muanetu mukuabu mpanda-njila uvua ulombola dilonga dia Bible dimue wakasambila Yehowa bua amuambuluishe apete bantu bakuabu ba kulonga nabu. Wakenza malu mu diumvuangana ne disambila diende adi. Pakakonkononaye bimpe mudimu wende, wakamona ne: kavua ulomba bantu bua kulonga nabu Bible pavuaye ubapinganyina to. Ke kutuadijaye kuenza nanku, kupetaye bantu babidi bakuabu ba kulonga nabu.
5 Ndiakalenga kayipu ditudi nadi dia kuikala petu mu mudimu eu wa kumanyisha bantu “lumu luimpe lua [bulenga bua Nzambi budi kabuyi butuakanyine]”! (Bien. 20:24) Dianyisha ditudi nadi bua luse lua Nzambi ditusake bua kuikala ne tshisumi tshia kuambuluisha bakuabu bua bamone bulenga bua Yehowa budi kabuyi butuakanyine.