Diyisha pamue ne bakuabu mu kasumbu didi difila disanka

¹ Pavua Yezu mutume bayidi bende 70 bua kuyisha, wakabalongesha tshia kuamba, kubatumaye babidi babidi ne kubaludikaye kabidi teritwre anyi miaba misunguluke ivuabu ne bua kuyisha. Ngenzelu eu wakabapesha disanka. (Luka 10:1-17) Bia muomumue lelu’eu kabidi, diyisha ne bakuabu mu tusumbu didi diambuluisha bua kuikala bakumbane, badiakaje ne didi dipesha bantu ba Nzambi bukole bua kuenza mudimu wa buambi.

² Bakulu badi bafila tshilejilu: Bakulu badi ne mudimu munene wa kuambuluisha bamanyishi bonso bua kuikalabu benza mudimu wa buambi pa tshibidilu. Mutangidi wa mudimu udi ne bua kulongolola bisangilu bia mudimu wa buambi munkatshi mua lumingu. Mutangidi yonso wa kasumbu ka dilonga dia mukanda udi ne bujitu bua kulongolola mudimu wa buambi bua bena mu kasumbu kende, nangananga ku ndekelu kua lumingu. Bikondo bidi tshisumbu tshijima tshidisangisha bua tshisangilu tshia mudimu wa buambi bu etshi tshitu tshienzeka kunyima kua Dilonga dia Tshibumba tshia Nsentedi, mutangidi yonso wa kasumbu ka dilonga dia mukanda udi ne bua kutangila malu a bena mu kasumbu kende bua mudimu wa buambi.

³ Malu onso enzeke “bilengele ne alondangane biakane”: Muanetu udibu basungule bua kulombola tshisangilu tshia mudimu wa buambi udi ne bua kutshituadija pa dîba ne kutshienza mu minite 10 anyi 15. Udi ne bua kuabanya bantu mu tusumbu ne kubapesha teritware wa kuyishila, (pa kumusha anu bikala batangidi ba tusumbu tua dilonga dia mukanda badiangatshile bujitu ebu amu mushindu udibu babileje kuulu eku) pashishe udi ne bua kujikija ne disambila. Ngenzelu eu udi wambuluisha bua bamanyishi kabayi kukunguila mu teritware bantu babamona, bualu bidi mua kunyanga lumu lua mudimu wetu. Kuenza nunku kudi kabidi kumvuangana ne mubelu wa Paulo eu: ‘Malu onso enjibue bilengele ne alondangane biakane.’ (1 Kol. 14:40) Bamanyishi bonso badi babuela mu bisangilu bia mudimu wa buambi badi ne bua kuenza muabu muonso bua bionso biende bimpe mu bulongame pa kufika pa dîba, kukuatshishangana ne muanetu udi ulombola tshisangilu, ne kuya diakamue mu teritware padibu bajikija kuabanya bantu.

⁴ Tudisangishayi ne bakuetu mu buobumue: Diyisha mu tusumbu didibu balongolole didi ditupetesha mushindu muimpe wa kumanyangana ne bana betu bakuabu ba mu tshisumbu tshietu. Nansha mudibi kabiyi bibi bua kudianjila kumvuangana ne muanetu kampanda bua kupatuka nende mu buambi, mbitambe buimpe bua tuetu kubuela mu tshisangilu tshia mudimu wa buambi katuyi badianjile kusungula muanetu wa kupatuka nende. Badi mua kutuambila bua kupatuka ne muanetu kampanda utudi katuyi bibidilangane nende, nanku au bidi mua kutuambuluisha bua ‘kudiundishibua’ mu dinanga.​—2 Kol. 6:11-13.

⁵ Diyisha mu tusumbu didi ditukankamija ne ditusemeja pabuipi bualu tuetu bonso tudi ‘benzejanganyi ba mudimu mu bualu bua bushuwa.’ (3 Yone 8) Tudifilayi muetu muonso mu mudimu eu.