Ditabuja diakamusaka ku dienza

PAVUA Yehowa mupe Mozese bukenji bua kupatula tshisamba tshia bena Izalele mu bupika ku Ejipitu, Mozese wakanji kusengelela Yehowa bua kumulekelaye, wamba ne: “Yehowa, meme tshiena mua kuakula bimpe, nansha diambedi, nansha katshia wabanga kuakula ne muntu webe; bualu bua meme ndi muena tshikukumina.” (Ekesode 4:10) Eyowa, Mozese kavua mudiumvue mukumbanyine bua kuenza mudimu eu wa bujitu nansha.

Bia muomumue lelu’eu, bavule ba ku basadidi ba Yehowa badi badiumvua kabayi bakanyine bua kukumbaja bujitu budibu bapeshibue. Tshilejilu, mutangidi muena nkristo kampanda muena dîna dia Theodore udi ulonda ne: “Ku malu onso adi Yehowa undomba bua kuenza, mudimu wa buambi ke udi munkolele. Pamvua nsonga, mvua amu nsemena pabuipi ne tshiibi, ndingidija kudidisha ngonga wa ku tshiibi ne ngumbuka mu bupole, pa kuela meji ne: kakuena muntu wanteleja peshi wammona nansha. Bu mumvua nkola, ngakalekela kuenza nanku, kadi lungenyi lua kuya ku tshiibi ne ku tshiibi luvua lunsamisha mubidi. Nansha too ne ku lelu, ntu nsama kumpala kua kupatuka mu buambi, kadi, mu mishindu kayi yonso ntu amu nya.”

Kadi ntshinyi tshivua tshiambuluishe Mozese ne Bantemu ba lelu’eu bu mudi Theodore bua kutshimuna ditshina dia mushindu’eu? Bible udi wandamuna se: “Bua ditabuja, [Mozese] wakumbuka ku Ejipitu, . . . bualu uvua utungunuka ne kutantamana bu uvua umona Eu ukena-umueka.”​—Ebelu 11:27, NW.

Bushuwa, pa kuenza midimu ya ditabuja mu Yehowa, Mozese uvua mua kutshimuna diumvua diende dia se: kavua muakanyine ne uvua mua kukumbaja bujitu bumuambika bu mulumbuluishi, muprofete, mulombodi wa tshisamba, mutuangaji wa tshiovo tshia Mikenji, mutumi wa mêyi, mufundi wa malu a kale ne mufundi wa Bible.

Mu mushindu wa muomumue, patudi ne ditabuja bu Mozese, netuende anu bu ‘badi bamona Eu ukena-umueka.’ Ditabuja dia mushindu’eu didi difila bukitu, dituambuluisha bua kuambula majitu etu a Buena-nkristo​—nansha patudi tudiumvua katuyi bakanyine.