Bansonga wetu, asayi tshishimikidi tshimpe bua matuku enu atshilualua
1. Bua tshinyi bansonga bena Kristo badi ne bua kuikala ne ditabuja dikole?
1 Ntshinyi tshidi ne mushinga wa bungi mu mutu muebe? Udi wela meji a tshinyi? Udi utamba kuditatshisha bua malu a mpindieu anyi a matuku atshilualua adi Nzambi mulaye? (Mat. 6:24, 31-33; Luka 8:14) Bidi bikengela ditabuja dikole bua kutekemena malu adi Nzambi mulaye anu mutudi mua kubimona mu tshilejilu tshia Abalahama ne Mose. (Eb. 11:8-10, 24-26) Mmunyi muudi mua kupeta ditabuja dia nunku ne kuasa ‘tshishimikidi tshimpe bua matuku atshilualua’?—1 Tim. 6:19.
2. Tshilejilu tshia Mukalenge Yoshiya tshidi tshitulongesha tshinyi?
2 Keba Yehowa: Tudi tunuela kalumbandi binuikala ne ndongamu muimpe wa malu a mu nyuma mu dîku dienu. Kadi kanuedi meji ne: ndongamu wa nunku neanupeteshe diakamue ditabuja dikole to. Bua kupeta “dimanya dia Nzambi,” wewe nkayebe udi ne bua kukeba Yehowa. (Nsu. 2:3-5; 1 Kul. 28:9) Ke tshiakenza Mukalenge nsonga Yoshiya. Nansha muvuaye mukolele muaba uvua kauyi mua kumuambuluisha bua kudiunda mu nyuma, ‘wakabanga kukeba Yehowa, Nzambi wa Davidi, nkambua wende’ pavuaye ne bidimu 15.—2 Kul. 34:3.
3. Mmunyi mudi nsonga muena Kristo lelu mua kukeba Yehowa?
3 Mmunyi muudi mua kukeba Yehowa? Mpa kukonkonona bimpe bimpe malu audi witabuja ne ‘kujingulula nkayebe’ ne: mmalelela menemene. (Lomo 12:2) Tshilejilu, udi mua kumvuija tshidi Bible wamba pa bidi bitangila mashi ne kufila bijadiki bidi bileja ne: Bukalenge bua Nzambi bukadi butuadije kukokesha mu diulu katshia mu 1914 anyi? Kupeta “dimanya dia malu malelela” mbualu bua mushinga mu muanda wa diasa tshishimikidi tshilenga bua matuku atshilualua.—1 Tim. 2:3, 4.
4. Mmunyi mudi bamanyishi badi kabayi banji kutambula mua kuleja dikola diabu dia mu nyuma patoke?
4 Dikeba dia Nzambi dia Yoshiya diakapatula bipeta bimpe. Kumpala kua kukumbajaye bidimu 20, wakenza malu ne dikima dionso bua kumbusha ntendelelu wa dishima mu ditunga. (2 Kul. 34:3-7) Bia muomumue, dikola diebe dia mu nyuma nedimuenekele ku malu audi wenza. (1 Tim. 4:15) Biwikala mumanyishi udi kayi muanji kutambula, enza muebe muonso bua kulengeja mudimu webe wa buambi. Kushadidi anu ku difila mikanda tshianana to. Difundila tshipatshila tshia kuenza mudimu ne Bible, kuelangana meji ne bantu, ne kutabalela bantu baudi upeta mu buambi. (Lomo 12:7) Kuenza nunku nekukuambuluishe bua kudiunda mu nyuma.
5. Mmishindu kayi ya kualabaja mudimu idiku bua bena Kristo bakadi batambule?
5 Pesha Yehowa tshintu tshitambe buimpe tshiudi natshi: Paudi utambula bua kuleja ne: udi mudilambule kudi Yehowa, udi ulua muena mudimu udi Nzambi muteke. (2 Kol. 3:5, 6) Batismo udi ukunzuluila njila bua kuenzela Yehowa mudimu wa ku dîba ne ku dîba. Munkatshi mua midimu eyi mudi wa bumpanda-njila, disadila ku Betele, bu-misionere ne basadidi badi benzela mudimu wabu wa dibaka mu matunga a ku ba bende. Mikuabu mishindu idi mua kukuambuluisha bua kualabaja mudimu webe wa bena Kristo mpa kulonga muakulu mukuabu anyi kumuangala bua kuya kuenzela mudimu muaba udibu dijinga bikole ne bamanyishi ba lumu luimpe.
6. Mmunyi mudi yonso wa kutudi mua kuasa tshishimikidi tshimpe bua matuku atshilualua?
6 Bushuwa, bantu bonso kabakupeta mushindu wa kuenza midimu yonso eyi to, kadi muntu yonso udi mua kupesha Yehowa tshiende tshitambe buimpe tshidiye natshi. (Mat. 22:37) Nansha nsombelu webe muikale wa mushindu kayi, dienzela Yehowa mudimu dikale tshintu tshia kumpala mu nsombelu webe. (Mus. 16:5) Paudi wenza nunku, newase tshishimikidi tshimpe bua matuku atshilualua.