Tudiluatshishayi ne budipuekeshi
1 Mulami kampanda wa mikoko utshidi nsonga udi weyemena Yehowa ne ufika ku ditshimuna tshilobo mukuabu wa kanyemi baluishi. (1 Sam. 17:45-47) Muntu muena bubanji kansanga udi utantamena makenga ne lutulu luonso. (Yobo 1:20-22; 2:9, 10) Muana wa Nzambi udi wamba ne: malongesha ende onso mmafume kudi Tatuende. (Yone 7:15-18; 8:28) Budipuekeshi ke tshintu tshinene tshiakambuluisha muntu yonso wa ku batudi batele aba. Bia muomumue lelu’eu, budipuekeshi budi ne mushinga wa bungi bua kumona mua kupita ne nsombelu kabukabu itudi tupeta.—Kolos. 3:12.
2 Patudi tuyisha: Bu mutudi tuenza mudimu wa bena Kristo, tudi tumanyisha ne budipuekeshi buonso lumu luimpe kudi bantu ba mishindu yonso, katuyi ne kansungasunga bua dikoba diabu, bibidilu biabu anyi bua kudibu bafumina nansha. (1 Kol. 9:22, 23) Padi muntu utuamba mêyi makole anyi ne lutambishi ubenga mukenji wa Bukalenge, katuakumuandamuna petu mushindu au to, kadi ne lutulu luonso netuye kukeba bantu ba muoyo mulenga. (Mat. 10:11, 14) Pamutu pa kubanga kuditambisha ne kujinga bua kuleja bakuabu ne: tuetu ke badi ne dimanya anyi balonge mukanda wa bungi, tudi tutuma ntema yabu ku Dîyi dia Nzambi, bamanye ne: didi ne bukole bua kutuisha bantu kupita mêyi kayi onso atudi mua kuamba. (1 Kol. 2:1-5; Eb. 4:12) Butumbi buonso tudi tubupesha Yehowa anu bu muakenza Yezu.—Mâko 10:17, 18.
3 Mu tshisumbu: Bena Kristo badi kabidi ne bua ‘kudiluatshisha buonso buabu ne budipuekeshi.’ (1 Pet. 5:5) Tuetu tuangata bakuabu bu badi ku mutu kuetu, netukebe mua kubenzela mudimu pamutu pa kuindila bua buobu kutukuatshilawu. (Yone 13:12-17; Filip. 2:3, 4) Katuakuikala tuela meji ne: tudi bantu banene badi kabayi bakumbanyine midimu bu mudi wa disukula Nzubu wa Bukalenge nansha.
4 Budipuekeshi budi butuambuluisha bua ‘kuikalangana ne luse’ ne bakuabu; ke bualu kayi budi bufikisha buobumue ne ditalala mu tshisumbu. (Ef. 4:1-3) Budi butuambuluisha bua kukokela bana betu badibu bateke bua kulombola mu tshisumbu. (Eb. 13:17) Budi butuambuluisha bua kuitaba mubelu anyi dinyoka kayi dionso didibu mua kutupesha. (Mus. 141:5) Anu buobu budipuekeshi ebu budi butusaka bua kueyemena Yehowa patudi tuenza mudimu onso udibu batupesha mu tshisumbu. (1 Pet. 4:11) Anu bu Davidi, tudi bamanye ne: bipeta bitudi tupeta katuena tubipeta ku makanda etu to, kadi tudi tubipeta ku diambuluisha dia Nzambi.—1 Sam. 17:37.
5 Kumpala kua Nzambi wetu: Tudi nangananga ne bua ‘kudipuekesha kuinshi kua tshianza [tshia bukole] tshia Nzambi.’ (1 Pet. 5:6) Bituikale tutantamena ntatu, bumue tudi mua kushala bindile ne mioyo kuulu kuulu disulakana dialua Bukalenge bua Nzambi kututuadila. Kadi ne budipuekeshi buonso tudi tushala ne lutulu, bindile Yehowa bua kukumbajaye malu ende adiye mulaye mu tshikondo tshidiye mujadike. (Yak. 5:7-11) Anu bu muvua Yobo mulami mulelela wa muoyo-mutoke muenze, tudi ne bua kutamba kuditatshisha bua ne: ‘Dîna dia Yehowa ditumbishibue.’—Yobo 1:21.
6 Muprofete Danyele ‘wakadipuekesha kumpala kua Nzambi,’ Yehowa e kumuanyisha ne kumupesha midimu mikuabu ya bungi mimpe. (Dan. 10:11, 12) Tuetu petu anu bu yeye, tudivuadikayi ne budipuekeshi bamanye ne: ‘Difutu dia kudipuekesha ne dia ditshina dia Yehowa didi bubanji, butumbi ne muoyo.’—Nsu. 22:4.