Masanka adi lumu luimpe lupetesha

“[Yehowa] mmundabe manyi, mmuntume bua meme kumanyisha [bena bupuekele] mukenji mulenga, bua meme kukankamika badi ne dibungama mu muoyo, . . . bua kusamba bonso badi [mu madilu].”​—YESHAYA 61:1, 2, MMM.

1, 2. (a) Yezu wakadimanyisha ne: uvua nganyi, ne mmushindu kayi? (b) Lumu luimpe luakamanyisha Yezu luakapetesha bantu masanka kayi?

DIMUE dituku dia Nsabatu patshivua Yezu utuadijilaku mudimu wende, wakabuela mu nsunagoga mu Nazaleta. Bible udi ulonda ne: ‘Bakamupesha mukanda wa muprofete Yeshaya. Yeye wakavungulula mukanda, wakamona muaba wakafundabu ne: Nyuma wa Nzambi udi pambidi panyi, bualu bua yeye wakungela manyi pa mutu ne: Ambila bantu lumu luimpe.’ Yezu wakatungunuka ne dibala mêyi aa a tshiprofete. Pashishe wakasomba ne kuambaye ne: ‘Lelu bualu ebu buakafundabu buakujalama mu matshi enu.’​—Luka 4:16-21.

² Mushindu’eu ke wakadileja Yezu bu mumanyishi wa evanjeliyo anyi muambi wa lumu luimpe ne mutuadi wa busambi ukavuabu bamanyishe dilua diende. (Matayo 4:23) Malu akamba Yezu avua lumu luimpe tshia bushuwa! Wakambila bantu ne: “Ndi butoke bua bena panu. Udi undonda, kakuenda mu midima, kadi neapete butoke bua muoyo.” (Yone 8:12, MMM) Wakamba kabidi ne: “Binualamata ku dilongesha dianyi, nenuikale balongi banyi bulelela; nenumanye bulelela ne bulelela nebunupe budikadidi.” (Yone 8:31, 32, MML) Bushuwa, Yezu uvua ne ‘mêyi a muoyo wa tshiendelele.’ (Yone 6:68, 69) Butoke, muoyo ne budikadidi mmasanka atudi ne bua kuanyisha bikole!

3. Ndumu luimpe kayi luakayisha bayidi ba Yezu?

³ Kunyima kua Pentekoste wa mu 33 B.B., bayidi bakatungunuka ne mudimu wa Yezu wa dimanyisha evanjeliyo. Bakayisha bena Isalele ne bantu ba bisamba bia bende ‘lumu luimpe lua bukalenge.’ (Matayo 24:14; Bienzedi 15:7; Lomo 1:16) Bantu bakaluitaba bakafika ku dimanya Yehowa Nzambi. Bakapikudibua ku bupika bua bitendelelu ne kubuelabu mu tshisamba tshipiatshipia tshia mu nyuma tshia ‘Isalele wa Nzambi,’ tshidi ne bantu bikale ne ditekemena dia kukokesha kashidi mu diulu ne Mfumuabu Yezu Kristo. (Galatia 5:1; 6:16; Efeso 3:5-7; Kolosai 1:4, 5; Buakabuluibua 22:5) Aa avua masanka a mushinga mukole be!

Dimanyisha evanjeliyo lelu

4. Mmushindu kayi udibu bakumbaja mudimu wa kuyisha lumu luimpe lelu?

⁴ Lelu, bena Kristo bela manyi (bakuatshisha kudi “musumba munene” wa “mikoko mikuabo” idi yenda ivula), badi batungunuka ne kukumbaja mudimu uvuabu bamanyishe wakapeshabu Yezu ku ntuadijilu. (Buakabuluibua 7:9, MMM; Yone 10:16) Ke bualu kayi badi bayisha lumu luimpe miaba ya bungi kupita kumpala. Mu matunga ne teritware 235, Bantemu ba Yehowa mbaye “bua kumanyisha [bena bupuekele] mukenji mulenga, bua kukankamika badi ne dibungama mu muoyo, bua kumanyisha badi ku bupika dibapikula diabo, ne bua kumanyisha bena lukanu dibakopola mu lukanu. . . . Bua kumanyisha bantu tshidimu tshia luse lua [Yehowa], ne dituku didi [Nzambi wetu] usombola bua kusamba bonso badi [mu madilu].” (Yeshaya 61:1, 2, MMM) Nunku, mudimu wa bena Kristo wa dimanyisha evanjeliyo udi utungunuka ne kupetesha bantu ba bungi masanka ne udi upesha “badi mu makenga a mishindu yonso” busambi bulelela.​—2 Kolinto 1:3, 4, MML.

5. Mmunyi mudi Bantemu ba Yehowa bashilangane ne ekeleziya ya Bukua-buena-Kristo pa bidi bitangila diyisha lumu luimpe?

⁵ Ntshia bushuwa bua se: ekeleziya ya Bukua-buena-Kristo idi ne mishindu kabukabu idiyi ilongesha malu a Buena-Kristo. Ya bungi idi ituma ba-misionere mu matunga makuabu bua kuitabijija bantu malu ayi. Tshilejilu, tshimue tshikandakanda tshia bena Ortodokse (The Orthodox Christian Mission Center Magazine) tshidi tshiakula bua mudimu wa ba-misionere bena Ortodokse mu ditunga dia Madagascar, ku Sud kua Afrike, mu ditunga dia Tanzanie ne mu dia Zimbabwe. Kadi mu Ekeleziya wa bena Ortodokse ne mu ekeleziya mikuabu ya Bukua-buena-Kristo, bantu ba bungi badimu kabatu benza mudimu eu to. Kadi Bantemu ba Yehowa bonso badi badilambule kudi Nzambi batu benza muabu muonso bua kumanyisha bantu evanjeliyo. Mbajingulule ne: padibu bamanyisha lumu luimpe bidi bileja se: ditabuja diabu ndilelela. Paulo wakamba ne: ‘Bantu badi bitabuja ne mutshima bua kupeta buakane, badi bajukula ne mukana bua kupeta lupandu.’ Ditabuja didi kadiyi disaka muntu ku dienza bualu ndifue menemene.​—Lomo 10:10; Yakobo 2:17.

Lumu luimpe ludi lupetesha masanka a kashidi

6. Ndumu luimpe kayi ludibu benda bayisha lelu?

⁶ Bantemu ba Yehowa badi bayisha lumu ludi lutambe yonso ku buimpe. Badi babulula Bible yabu ne baleja bantu badi babateleja ne: Yezu wakalambula muoyo wende bua kupetesha bantu mushindu wa kusemena pabuipi ne Nzambi, mushindu wa Nzambi kubabuikidila mpekatu yabu, ne wa kupeta ditekemena dia muoyo wa tshiendelele. (Yone 3:16; 2 Kolinto 5:18, 19) Badi bamanyisha ne: Nzambi ukadi mujadike Bukalenge buende mu diulu bulombola kudi Yezu Kristo Mukalenge udiye muele manyi, ne mu katupa kîpi emu Bukalenge ebu nebumushe malu mabi pa buloba ne nebulombole mudimu wa diasulula Mparadizu. (Buakabuluibua 11:15; 21:3, 4) Badi bakumbaja mêyi a mulayi wa Yeshaya padibu bamanyisha bantu nabu ne: mpindieu ke “tshidimu tshia luse lua [Yehowa],” dîba didi bantu mua kutungunuka ne kuteleja lumu luimpe. Badi badimuija kabidi bantu ne: mu katupa kîpi emu “dituku didi [Nzambi] wetu usombola” nedilue pabutula Yehowa bantu babi badi kabayi badilengeja.​—Musambu 37:9-11.

7. Mbualu kayi budi buleja buobumue bua Bantemu ba Yehowa, ne bua tshinyi badi ne buobumue ebu?

⁷ Elu ke lumu luimpe lumuepele ludi lupetesha masanka a kashidi lelu udi buloba bunyukula kudi bipupu ne makenga. Bantu badi baluitaba badi babuela mu dîku dia bana betu bena Kristo badi mu buobumue pa buloba bujima, badi kabayi balekela dishilangana dia matunga, dia bisa anyi dia mpetu dibapandulula to. ‘Mbaluate dinanga didi tshisuikidi [tshipuangane tshia buobumue].’ (Kolosai 3:14; Yone 15:12) Ke tshiakamueneka tshidimu tshishale mu dimue ditunga dia mu Afrike. Dimue dituku mu dinda, bantu bakabika ne mitoyi ya bingoma bivuabu batuta. Basalayi bavua bakeba kutonkola bukalenge buvua mu nkuasa. Pakakudimuka bimvundu ebi kuluabi dikokangana pankatshi pa bisa, bantu bakangata dîku kampanda dia Bantemu bibi bualu divua dilame Bantemu nabu ba tshisa tshikuabu. Bena mu dîku edi bakambila bantu abu ne: “Tudi anu ne Bantemu ba Yehowa badi basombele kuetu eku.” Buabu buobu, dishilangana dia bisa kadivua ne mushinga to, kadi tshivua ne mushinga ndinanga dia bena Kristo: kusamba bakengi. Mulela mukuabu wa mu dîku adi uvua kayi Ntemu wakamba ne: “Bena mu bitendelelu bionso bakatungila bena kuitabuja babu tshitungu, pa kumbusha anu Bantemu ba Yehowa.” Malu a bungi a muomumue adi menzeke mu matunga makosolola kudi mvita adi aleja ne: Bantemu ba Yehowa ‘mbanange bana babu ba mu Kristo’ bikole.​—1 Petelo 2:17.

Lumu luimpe ludi lushintulula bantu

8, 9. (a) Mmalu kayi adi bantu badi bitaba lumu luimpe bashintulula mu nsombelu wabu? (b) Mmalu kayi adi aleja bukole bua lumu luimpe?

⁸ Lumu luimpe ludi lutangila tshiakabikila Paulo ne: ‘muoyo wa mpindieu ne ukadi pa kulua.’ (1 Timote 4:8) Kaluena anu lufila patupu ditekemena dilenga ne dishindame bua matuku atshilualua to, kadi ludi kabidi lulengeja ‘muoyo wa mpindieu.’ Ntemu wa Yehowa yonso udi ulonda tshidi Bible wamba bua kumonaye mua kuikala ne nsombelu udi umvuangana ne disua dia Nzambi. (Musambu 119:101) Bumuntu buende budi bulua bupiabupia padiye upeta ngikadilu bu mudi buakane ne lulamatu.​—Efeso 4:24.

⁹ Angata tshilejilu tshia Franco. Uvua muena bumfika-munda. Dîba dionso divua malu kaayi enda bimpe, uvua ufika munda bikole ne unyangakaja bintu. Mukajende wakalonga Bible ne Bantemu ba Yehowa, ne tshilejilu tshiabu tshia bena Kristo tshiakambuluisha Franco ku kakese ku kakese too ne pakamonaye ne: bivua bikengele yeye kushintuluka. Wakalonga nabu Bible ne ndekelu wa bionso wakapeta mushindu wa kuleja mamuma a nyuma muimpe bu mudi ditalala ne didikanda. (Galatia 5:22, 23) Uvua umue wa ku bantu 492 bakatambula mu ditunga dia Belgique mu tshidimu tshia mudimu tshia 2001. Angata kabidi tshilejilu tshia Alejandro. Nsongalume au wakabanga kunua diamba bikole, kufikaye too ne ku diangulula bintu bimansha ku diyala, wangula tshionso tshivuaye upeta, utshisumbisha bua kumona mua kusumba diamba. Pakakumbaja Alejandro bidimu 22, Bantemu ba Yehowa bakamulomba bua kulonga nende Bible, yeye e kuitaba. Wakabanga kubala Bible dituku dionso ne kubuela mu bisangilu bia tshisumbu. Wakadilengeja ne lukasa luonso, ne ngondo kayiyi mianji kukumbana nansha isambombo, yeye kubanga kuenza mudimu wa dimanyisha evanjeliyo; uvua umue wa ku bantu 10 115 bavua benze mudimu eu tshidimu tshishale mu ditunga dia Panama.

Lumu luimpe ludi lupetesha bena bupuekele masanka

10. Mbanganyi badi bitaba lumu luimpe, ne mmunyi mudi ngikadilu wabu ushintuluka?

¹⁰ Yeshaya wakamanyisha ne: bavua ne bua kuyisha bena bupuekele lumu luimpe. Bena bupuekele aba mbanganyi? Mbantu badibu bamba mu Bienzedi ne: badi “badiakaje bua muoyo wa kashidi.” (Bienzedi 13:48, NW) Mbena budipuekeshi badi munkatshi mua bantu ba milongo yonso badi bunzulula mitshima yabu bua kuteleja mukenji wa bulelela. Bantu aba badi bajingulula ne: kuenza disua dia Nzambi kudi kupetesha masanka mapite kule ne kule tshionso tshidi bena panu mua kubapesha. (1 Yone 2:15-17) Kadi mmunyi mudi Bantemu ba Yehowa bafika ku dilenga mitshima ya bantu mu mudimu wabu wa dimanyisha evanjeliyo?

11. Bilondeshile Paulo, mmunyi mudi lumu luimpe ne bua kuyishibua?

¹¹ Angata tshilejilu tshia mupostolo Paulo, wakafundila bena Kolinto ne: “Pamvua mulue kuenu aku, tshiena mulue bua kunumanyisha bualu busokome bua [Nzambi] ne miaku ya budiambi nansha ne dimanya ditue. Tshivua musue kumanya bunga bualu munkatshi muenu, anu Yezu Kristo; eyowa anu Yezu Kristo mupopela pa mutshi wa tshibawu.” (1 Kolinto 2:1, 2, MMM) Paulo kavua ukeba kukemesha bantu ne dimanya diende to. Kakalongesha manga malu anu avua afuma kudi Nzambi, ne malu aa mmafunda lelu mu Bible. Tangila kabidi dikankamija divua Paulo mupeshe Timote mumanyishi nende wa evanjeliyo: ‘Ambila bantu dîyi dia Nzambi mene; nanukila kubambila.’ (2 Timote 4:2) Timote uvua ne bua kuyisha ‘dîyi’ anyi mukenji wa Nzambi. Paulo wakafundila kabidi Timote ne: ‘Unanukile bua kudifila mujalame, bu muena mudimu udi kayi ne bua kufua bundu, uludikile bantu njila mululame mu dîyi dia Nzambi dia bushuwa.’​—2 Timote 2:15.

12. Mmunyi mudi Bantemu ba Yehowa balonda mêyi a Paulo ne tshilejilu tshiende lelu?

¹² Bantemu ba Yehowa badi balonda tshilejilu tshia Paulo ne mêyi avuaye muambile Timote. Badi bitaba ne: Dîyi dia Nzambi didi ne bukole, ne badi babadilamu bantu nabu mêyi makane a ditekemena ne a busambi. (Musambu 119:52; 2 Timote 3:16, 17; Ebelu 4:12) Bulelela, badi balongesha bimpe ne mikanda ya kulonda nayi Bible bua bantu badi basankidila bulelela bapete dimanya dia mu Bible bu mudibu basue. Kadi misangu yonso batu baleja bantu mêyi a mu Mukanda wa Nzambi. Mbamanye ne: Dîyi didi Nzambi mufundishe ku nyuma wende nedisonsole mitshima ya bena budipuekeshi. Ne kulongesha nadi bantu mushindu’eu kudi kukolesha ditabuja diabu buobu bine badi balongesha.

“Kusamba bonso badi mu madilu”

13. Mu tshidimu tshia 2001, mmianda kayi yakajula dijinga dikole dia kusamba bantu bavua mu madilu?

¹³ Tshidimu tshia 2001 tshivua ne biatshi bipupu, ke bualu kayi bantu ba bungi bavua dijinga ne busambi. Mu ngondo wa tshitema muvua muenzeke malu a katshia ne katshia mu États-Unis, pavua bena tshikisu babumbule nzubu ibidi ya bisasa bile (World Trade Center) mu New York ne biro binene bia basalayi (Pentagone) mu Washington. Malu aa akabungamija bantu bikole mu ditunga dijima! Patuku malu a mushindu’eu, Bantemu ba Yehowa batu badienzeja bua kukumbaja mudimu wabu wa “kusamba bonso badi mu madilu.” Malu mamona makese adi alonda aa adi aleja mushindu udibu bakumbaja mudimu eu.

14, 15. Leja muvua Bantemu ba Yehowa basambe bimpe bantu bavua mu madilu ne Bible misangu ibidi mijima.

¹⁴ Ntemu mukuabu udi wenza mudimu wa dimanyisha evanjeliyo ku dîba ne ku dîba wakayikila ne muntu mukaji mukuabu kumpenga kua njila, kumuebejaye tshivuaye wela meji bua malu a tshikisu avua afuma ku dienzeka au. Muntu mukaji au wakabanga kudila muadi. Wakamba ne: uvua mumvue luse ne uvua ujinga bua kupetaku mushindu wa kuambuluisha bantu. Ntemu eu wakamuambila ne: Nzambi mmusue bua tuetu bonso tuikale ne disanka, ne muntu mukaji eu wakabala Yeshaya 61:1, 2. Mêyi aa mafundisha ku nyuma wa Nzambi akasankisha mukaji eu, kuambaye ne: bantu bonso bavua mu madilu. Wakitaba trakte wakamupesha Ntemu au ne kumuambilaye bua kuyaye kumutangila kuende.

¹⁵ Bantemu babidi bavua benza mudimu wa dimanyisha evanjeliyo bakasangana muntu mulume mukuabu wenza mudimu mu nzubu wende wa dilamina bintu. Bakamuambila ne: bavua basue kumuleja mêyi a busambi a mu Mukanda wa Nzambi pa kumona makenga avua menzeke matuku mashale aa ku nzubu ya bisasa bile eyi ivuabu babumbule. Pakitabaye, bakamubadila 2 Kolinto 1:3-7 (MML), udi ne mêyi a se: “busambi [budi] buvulangana [mu Kristo].” Muntu eu wakanyisha bikole bua muvua bena mutumba nende aba Bantemu bikale basamba bantu bakuabu ne pashishe kubambilaye ne: “Nzambi abeneshe mudimu mulenga unudi nuenza.”

16, 17. Mmalu kayi abidi adi aleja bukole bua Bible bua kuambuluisha bantu badi babungamija kudi makenga?

¹⁶ Ntemu mukuabu uvua uya kutangila bantu bavuaye muyukile nabu, yeye kusambakena ne muana wa balume wa munga muntu mukaji uvua musankidile bulelela, yeye kumumvuija ne: uvua musue kumanya muvua bena mutumba nende balale kunyima kua muanda wa dibungama uvua muenzeke au. Muntu eu wakakema bua muvua Ntemu eu mupete dîba dia kukumbula bantu ne kumanya muvuabu babike. Wakamba ne: uvua wenza mudimu pabuipi ne nzubu ibidi ayi ya bisasa bile pakenzeka njiwu, ne wakamona malu onso muakenzekawu. Pakebejaye tshidi Nzambi mulekele makenga, Ntemu au wakamubadila mvese ya mu Bible, pamue ne Musambu 37:39, udi wamba ne: ‘Lupandu lua bantu bakane ludi lufuma kudi Yehowa; yeye udi tshinyemenu tshiabu palua tshikondo tshia dikenga.’ Muntu eu wakakonka Ntemu eu muvuaye mubike pende ne dîku diende, pashishe kumuambilaye bua alue kumutangila kabidi, ne kumuelaye tuasakidila bua muvuaye mulue kumumona.

¹⁷ Mukuabu wa munkatshi mua bantu binunu ne binunu bavua mu madilu wakasambabu kudi Bantemu ba Yehowa panyima pa makenga au mmuntu mukaji uvua Bantemu bapete pavuabu benda bayisha bena mutumba nabu. Malu avua menzeke avua mamubungamije bikole menemene, ne wakateleja pakamubadilabu Musambu 72:12-14 ne: ‘Neapandishe mukengedi wa bintu padilaye kudiye, neapandishe muntu mupele udi kayi ne mukuatshishi. Neafuile udi mutekete ne udi ukengela dikuatshisha luse, neasungile mioyo ya bakengedi. Neapikule mioyo yabu ku tshinyangu ne malu makole, ne mashi abu neikale tshintu tshia mushinga mukole ku mêsu kuende.’ Mêyi aa avua ne mushinga wa bungi be! Muntu mukaji au wakalomba Bantemu bua kubalabu kabidi mvese eyi, ne kubabuejaye mu nzubu muende bua kutungunukabu ne muyuki. Ku ndekelu kua muyuki buobu e kutuadija dilonga dia Bible.

18. Mmunyi muvua Ntemu mukuabu muambuluishe bantu nende pakamulombabu bua kusambila?

¹⁸ Ntemu mukuabu udi wenza mudimu mu nzubu wa tshidilu mu tshitupa tshitu bena mfranga, bavua kumpala kabayi basue kuteleja lumu luimpe lua Bukalenge. Kadi kunyima kua malu a tshikisu au, bantu aba bakalubakana bikole. Mu Ditanu ku dilolo kunyima kua bipupu ebi bimane kuenzeka, mutangidi wa nzubu wa tshidilu eu wakambila bantu bonso bua bapatuke pambelu ne bikale bakuate buji ku bianza, bashale bapuwe katantshi bua kuvuluka bantu bavua bapete njiwu. Bua kunemeka dipangadika diabu, Ntemu eu wakapatuka pambelu ne kushalaye muimane mupuwe ku luseke lua njila. Mutangidi wa nzubu wa tshidilu uvua mumanye bimpe ne: uvua Ntemu wa Yehowa, nenku kunyima kua minite ya divuluka bavua bapete njiwu, wakambila Ntemu eu bua kusambidila bonso bavua muaba au. Ntemu eu wakitaba. Mu disambila diende, wakakula bua madilu avua miaba yonso, kadi wakamba ne: aba badi mu madilu kabena ne bua kunyingalala patupu kabayi ne ditekemena to. Wakatela tshikondo tshikala malu a buôwa a nunku kaayi mua kuenzeka kabidi, ne kuambaye ne: bantu bonso bavua mua kusemena pabuipi ne Nzambi wa busambi buobu bapete dimanya dijalame dia mu Bible. Pakambaye ne “Amen,” mutangidi wa nzubu wa tshidilu au pamue ne bantu bapite pa 60 bavua pambelu bakalua kudi Ntemu eu bua kumuela tuasakidila ne kumuela kalumbandi, mutangidi wa nzubu wa tshidilu kuambaye ne: katshia kavua muanji kuteleja disambila dilenga dia mushindu’au to.

Lumu luimpe ludi lupetesha bantu masanka

19. Mbualu kayi budi buleja ne: bamue batu bamanye mikenji milenga itu Bantemu ba Yehowa batumikila?

¹⁹ Nangananga mu matuku aa, bantu ba miaba idi Bantemu ba Yehowa benzela mudimu badi bapeta masanka anu mudi ba bungi bafike ku dimona. Mmunyi mudi bantu badi bakankamija bakuabu bua kusomba mu ditalala, bua kuikala kuamba malu malelela ne bua kuikala ne bikadilu bilenga kabayi mua kubasaka ku dienza malu mimpe? Mu dimue ditunga dia mu Asia wa pankatshi, Bantemu bakayikila ne muena mbulamatadi mukuabu (ukadi muangate pansio) uvua mpulushi wa mbulamatadi. Wakamba ne: umue musangu bavua bamupeshe mudimu wa kukonkonona malu a bitendelelu kabukabu. Pakakonkononaye malu a Bantemu ba Yehowa, wakakema bua mudibu bamba malu malelela ne mudibu ne bikadilu bimpe. Wakanyisha bua mudibu ne ditabuja dikole ne bua mudi malongesha abu mangatshila mu Mukanda wa Nzambi. Muntu eu wakitaba bua kulonga Bible.

20. (a) Ntshinyi tshidi luapolo lua mudimu udi Bantemu ba Yehowa benze tshidimu tshishale luleja? (b) Ntshinyi tshidi tshileja ne: kutshidi mudimu wa bungi wa kuenza, ne mmunyi mutudi tuangata mudimu wetu wa dimanyisha evanjeliyo?

²⁰ Ku diambuluisha dia malu makese atudi balonde mu tshiena-bualu etshi (mangata munkatshi mua binunu bia malu atudi mua kulonda), tudi tumona bimpe ne: Bantemu ba Yehowa bavua badifile bikole mu mudimu wa Nzambi mu tshidimu tshia 2001.a Bavua bayikile ne bantu miliyo mivule, bavua basambe bavule bavua mu madilu, ne mudimu wabu wa dimanyisha evanjeliyo wakapatula bipeta bimpe. Bantu 263 431 bakatambula bua kuleja didilambula diabu kudi Nzambi. Pa buloba bujima, bungi bua bamanyishi ba evanjeliyo mbuvule ne bantu 1,7 pa lukama. Dibuela dia bantu 15 374 986 mu Tshivulukilu tshia lufu lua Yezu tshitu tshienzeka tshidimu tshionso didi dileja ne: kutshidi mudimu wa bungi wa kuenza. (1 Kolinto 11:23-26) Tutungunukayi ne kukeba bena bupuekele badi bitaba lumu luimpe. Ne bu mudi tshidimu tshia luse lua Yehowa tshikale anu tshitungunuka, tutungunukayi petu ne kusamba “badi ne dibungama mu muoyo.” Eu mmudimu muimpe utudi tuenza. Bushuwa, tuetu bonso tudi tuambulula mêyi a Yeshaya a se: ‘Nentambe kusanka mu Yehowa, mutshima wanyi neutambe kusanka mu Nzambi wanyi.’ (Yeshaya 61:10) Nzambi atungunuke ne kuenza netu mudimu bua kukumbajaye mêyi a tshiprofete a se: ‘Mukalenge Yehowa neameneshe buakane ne butumbi kumpala kua bisamba bionso bia bantu.’​—Yeshaya 61:11.

[Mêyi adi kuinshi]

Udi muvuluke anyi?

• Mmunyi muvua lumu luimpe luakayisha Yezu lupeteshe bena bupuekele masanka?

• Mmasanka kayi akapeta bantu bakateleja evanjeliyo wakamanyisha bayidi ba Yezu ba mu bidimu lukama bia kumpala?

• Mmunyi mudi lumu luimpe lupeteshe bantu badi baluteleje masanka lelu?

• Mmunyi mutudi tuangata mudimu wetu mulenga wa dimanyisha evanjeliyo?

[Tablo mu mabeji 19-22]

LUAPOLO LUA BULOBA BUJIMA LUA BANTEMU BA YEHOWA BUA TSHIDIMU TSHIA MUDIMU 2001

(Bua kumona malu bimpe, tangila mu mukanda)

[Bimfuanyi mu dibeji 15]

Bantemu ba Yehowa batu anu bavuluke bujitu buabu bua kumanyisha bantu evanjeliyo

[Bimfuanyi mu dibeji 17]

Bantu badi bitaba lumu luimpe badi babuela mu dîku dia bana betu badi mu buobumue pa buloba bujima