Dinanukila didi ditupetesha difutu
1 “Nenudiangatshile mioyo yenu bualu bua dinanukila dienu.” (Luka 21:19) Mêyi aa adi mu mulayi wa Yezu udi wakula bua ‘nshikidilu wa tshikondo etshi,’ adi aleja patoke ne: patudi tushala ne lulamatu, mbimpe tuikale badilongolole bamanye ne: netupete ntatu ya bungi. Kadi ku diambuluisha dia bukole bua Yehowa, yonso wa kutudi udi mua ‘kunanukila too ne ku nshikidilu’ ne kabidi ‘kusungidibua.’—Mat. 24:3, 13; Filip. 4:13.
2 Dikengeshibua, masama, dipangila makuta ne tunyinganyinga bidi mua kuvuija dituku dionso edi bualu bukole menemene. Kadi, katupu muoyo bua ne: Satana udi ukeba ne wenza muende muonso bua katushadi balamate Yehowa to. Dituku dionso ditudi tushala ne lulamatu kudi Tatu wetu ndituku dimue ditudi bambuluishe bua kuandamuna Mupendianganyi udi welesha lulamatu luetu mpata. Bidi bitukolesha ku muoyo patudi tumanya ne: Yehowa kêna upua muoyo ‘binsonji’ bietu bitudi tupuekesha patudi mu ntatu. Bidi ne mushinga wa bungi ku mêsu kua Yehowa, ne lulamatu luetu ludi lusankisha mutshima wende!—Mus. 56:8; Nsu. 27:11.
3 Ntatu idi itulengeja: Dikenga didi mua kuleja mutudi ne ditabuja ditekete anyi tshilema tshikuabu bu mudi lutambishi anyi dipanga lutulu. Pamutu pa kukeba bua kuepuka anyi kujikija ntatu mu mishindu idi Bible kayi wanyisha, tudi ne bua kulonda mubelu wa mu Dîyi dia Nzambi udi wamba bua kulekela ‘ditantamana dikale ne mudimu wadi muimpe tshishiki.’ Bua tshinyi? Bualu kutantamena ntatu ne lulamatu luonso kudi kutuambuluisha bua kuikala “bakane tshishiki, bakumbane mu malu onso.” (Yak. 1:2-4) Dinanukila didi mua kutuambuluisha bua kupeta ngikadilu ya mushinga mukole bu mudi diumvuilangana, diditeka pa muaba wa bakuabu ne luse.—Lomo 12:15.
4 Ditabuja didibu batete: Patudi tutantamena ntatu, tudi tupeta ditabuja dimana kuteta didi ne mushinga wa bungi ku mêsu kua Nzambi. (1 Pet. 1:6, 7) Ditabuja dia nunku didi ditulongolola bua kushala bashindame mu mateta makuabu atshilualua. Nzambi udi kabidi utuanyisha, ne dianyisha diende edi didi dikolesha ditekemena dietu, dilua bualu bulelela ku mêsu kuetu.—Lomo 5:3-5.
5 Disanka anyi difutu ditambe buimpe dia dinanukila ndileja mu Yakobo 1:12, udi wamba ne: ‘Muntu udi utantamana mu mateyi udi ne disanka; bualu bua pakamanabu kumujadika, neangate tshifulu tshia butumbi tshia muoyo.’ Nunku, tushalayi anu balamate Yehowa katuyi tutenkakana, bashindike ne: neafute “badi bamunanga” bintu bia bungi.