Tshitupa 2: Tulombolayi malonga a Bible mimpe
Tudilongolole bua kulombola dilonga dia Bible
1 Kulombola dilonga dia Bible bimpe kudi kulomba malu makuabu a bungi pa kumusha kuela nkonko idi mu mukanda ne kubala mvese idibu bafile. Tudi ne bua kulongesha mu mushindu wa kulenga mutshima wa mulongi. Bua kufika ku dilongesha bimpe nunku, tudi ne bua kudilongolola bilenga bikale tuvuluka mulongi mu lungenyi.—Nsu. 15:28.
2 Mushindu wa kudilongolola: Anji sambila Yehowa bua muntu unudi nulonga nende ne bua majinga ende. Lomba Yehowa akuambuluishe bua malu awalongesha alenge mutshima wa mulongi. (Kolos. 1:9, 10) Bua kumvua tshiena-bualu bilenga, konkonona bimpe mutu wa bualu wa nshapita anyi wa dilonga, tubiena-bualu tukese ne bimfuanyi. Udiebeje ne: ‘Dilongesha edi didi ne kipatshila kayi?’ Ebi nebikuambuluishe bua kushindamena pa malu manene paudi ulonga ne muntu.
3 Konkonona dilongesha tshikoso ku tshikoso. Keba mandamuna a nkonko idi mifunda, wela tushonyi anu pa miaku ne biambilu bidi ne malu manene. Konkonona mudi mvese idibu bafile yumvuangana ne bualu bunene budi mu tshikoso, ne sungula inudi mua kubala mu dilonga. Bidi mua kukuambuluisha wewe mufunde amue malu bua mvese eyi kumpenga kua dibeji. Mulongi udi ne bua kumona bimpe ne: malu adiye ulonga adi afumina mu Dîyi dia Nzambi.—1 Tes. 2:13.
4 Longesha muntu bilondeshile majinga ende: Pashishe, wikale ne mulongi mu lungenyi paudi ulongolola dilonga adi. Teta kuela meji ku nkonko idiye mua kuela ne malu adi mua kumukolela bua kumvua anyi kuitaba. Udiebeje ne: ‘Ntshinyi tshidiye ne bua kumvua anyi kulengeja bua kudiundaye mu nyuma? Mmunyi mundi mua kulenga mutshima wende?’ Umulongeshe mpindieu bilondeshile majinga adiye nawu. Misangu mikuabu, udi mua kulongolola tshilejilu kampanda, diumvuija anyi nkonko idi mua kuambuluisha mulongi bua kumvuaye bualu peshi mvese kampanda. (Neh. 8:8) Kadi lekela kubueja ngenyi mikuabu idi kayiyi ne mushinga wa bungi mu dilongesha. Diambulula dikese ku ndekelu kua dilonga nedimuambuluishe bua kukuata malu manene.
5 Tutu ne disanka dia bungi padi bapiabapia bapeta mamuma a buakane bua kutumbisha Yehowa. (Filip. 1:11) Bua kubambuluisha bua kutumbishabu Yehowa, udilongolole bimpe misangu yonso iudi ulombola dilonga dia Bible.