Diambulula malu bua kuashindika

BUA kulongesha bimpe, bidi bikengela kuamba kuambulula malu. Bantu badi mua kuvuluka bualu kampanda bua mushinga wewe mubuambe misangu mipite pa umue. Badi mua kubumvua bimpe menemene wewe mubuambulule njila ne njila mu mêyi makuabu.

Padi bantu kabayi bavuluka biudi wamba, kabakulekela malu atubu bitaba to, bikadilu biabu kabiakushintuluka nansha. Kadi nebatungunuke bumue ne kuela meji pa malu auvua mushindike bikole.

Bua pa bidi bitangila diambulula, Mulongeshi wetu Munene Yehowa udi ufila tshilejilu tshilenga. Wakapesha bena Isalele Mêyi Dikumi. Ku butuangaji bua muanjelu mutuadi wa dîyi, [Yehowa] wakenza ne: bantu bonso bumvue mêyi au ku Mukuna wa Sinai. Panyima, wakaafunda, kuapeshaye Mose. (Ekes. 20:1-17; 31:18; Dut. 5:22) Yehowa wakambila Mose bua kuambuluila bena Isalele mêyi aa kumpala kua kubuelabu mu Buloba Bulaya; nyuma wa Nzambi kulua kuambuluisha kabidi Mose bua kuafunda bu mutudi tuasangana mu Dutelonome 5:6-21. Munkatshi mua mêyi au, kuvua divua diamba bua kunanga ne kukuatshila Yehowa mudimu ne mutshima wonso, ne anyima yonso, ne bukole bua muoyo buonso. Wakambulula dîyi edi njila ne njila. (Dut. 6:5; 10:12; 11:13; 30:6) Bua tshinyi? Bualu anu muakalua Yezu kuamba, diodi ‘ke dîyi dipite bunene ne dia kumpala kabidi.’ (Mat. 22:34-38) Ku butuangaji bua muprofete Yelemiya, Yehowa wakavuluija bena Yuda njila mipite pa 20 mijima bua kumona mushinga wa kutumikila malu onso avuaye mubambile. (Yel. 7:23; 11:4; 12:17; 19:15) Ne ku butuangaji bua Yehezekele, Nzambi wakamba misangu mipite pa 60 ne: bisamba ‘bivua ne bua kumanya ne: Meme ndi Yehowa.’​—Yeh. 6:10; 38:23.

Tudi tumona kabidi ngambuluilu wa malu muimpe mu malu a Yezu adibu bafunde. Tshilejilu, kudi Evanjeliyo inayi: Evanjeliyo yonso udi wamba malu a mushinga adi mu Evanjeliyo umue anyi mu Evanjeliyo mikuabu kadi mu mmuenenu mishilangane kakese. Pavua Yezu ulongesha, uvua upinganuna pa amue malu a mushinga njila ne njila mu mishindu mishilangane. (Mâko 9:34-37; 10:35-45; Yone 13:2-17) Ku Mukuna wa Olive kumpala kua lufu luende, Yezu wakambulula mubelu munene umue umue eu bua kuushindika: ‘Dimukayi, bualu bua kanuena bamanye dituku dialua Mukalenge wenu.’​—Mat. 24:42; 25:13.

Mu mudimu wetu wa budimi. Pautu uyisha utu ukeba ne: bantu bavuluke biudi ubambila. Diambulula malu dimpe ke didi mua kukuambuluisha bua kukumbaja kipatshila kebe aka.

Misangu mivule, diambulula dienza panutshidi nuyikila, didi dienza ne: bantu bakuate malu anudi nuyikila au. Nanku panyima pa dibala mvese, udi mua kumushindika pa kushindamena pa tshitupa tshiende tshidi ne mushinga ne kuebeja muntu ne: “Udi mumvue bimpe miaku idi mu mvese eu anyi?”

Udi mua kukuata mudimu kabidi ne mêyi a ndekelu a muyuki. Tshilejilu, udi mua kuamba ne: “Bualu bunene bundi nkeba ne: ukuate mu muyuki wetu mbuobu ebu: . . . ” Ubuambulule tshianana. Tshilejilu, budi mua kuikala ebu bua ne: “Nzambi mmulongolole bua kuvuija buloba mparadizu. Muanda eu neukumbane anu kukumbana.” Anyi ebu: “Bible udi uleja patoke ne: tudi mu matuku a ku nshikidilu wa ndongoluelu wa malu eu. Bua tuetu kupanduka ku nshikidilu eu, tudi ne bua kulonga bua kumanya tshidi Nzambi utulomba.” Peshi budi mua kuikala ne: “Anu bu mutudi bamone, Bible udi ufila mibelu miakane pa mushindu wa kupita ne ntatu ya mu dîku.” Imue misangu, udi anu mua kutelulula mêyi a mu Bible tshianana. Kadi bua kuenza nenku bimpe, bidi bikengela kudilongolola.

Patudi tupinganyina bantu ne tulonga nabu Bible, tudi mua kuela nkonko bua kuambulula malu atudi bambe anyi balonge.

Padibi bikolele muntu bua kumvua anyi kutumikila mubelu kampanda wa mu Bible, mbimpe kuyikila nende pa bualu ebu misangu mivule. Uditatshishe bua kubuakula mu mishindu mishilangane. Kanuikadi nuyikila mitantshi mile to, kadi ikala umukankamija bua kuela meji pa bualu abu. Udi muvuluke ne: ke tshivua Yezu muenze mene, wakambulula malu mushindu eu bua kuambuluisha bayidi bende bavua bakeba kuikala anu pa muaba wa kumpala.​—Mat. 18:1-6; 20:20-28; Luka 22:24-27.

Paudi wenza muyuki. Paudi ku tshiakuidi, kipatshila kebe kakena anu ka kuamba malu anu bualu bidi bikengela kuamba to, kadi nka ne: bantu bumvue, bavuluke, ne batumikile biudi ubambila. Bua kukumbaja kipatshila aka, wambulule malu bilenga.

Kadi paudi wambulula malu manene bia bungi bia bungi menemene, bantu kabakukulonda kabidi bimpe to. Nanku usungule bimpe bimpe malu adi akengela kushindika. Nansha mutuwu malu manene a muyuki, adi mua kuikala kabidi imue ngenyi ya mushinga mukole bua badi bakuteleja.

Bua kuambulula bimpe, udi mua kuanji kutela malu manene mu mbuelelu. Udi mua kuamba biambilu bikese bidi bifila lungenyi lua biwalua kuamba mu muyuki wonso, kuela nkonko, anyi kufila bilejilu bîpi bidi bijula bilumbu biwalua kuleja mua kubijikija. Udi mua kuamba bungi bua malu manene ne kuatela malondangane bumue ku bumue, utuadija ne bua kumpala, buibidi, amu nanku. Mpindieu akula pa bualu buonso munkatshi mua muyuki. Udi mua kushindika kabidi malu munkatshi mua muyuki, pa kuambulula bualu bunene buonso kumpala kua kupita ku budi bubulonda. Anyi udi mua kufila tshilejilu tshidi tshileja mua kutumikila bualu bunene. Udi mua kushindika kabidi malu manene mu nkomenu pa kuambulula, pa kufila dishilangana, pa kuandamuna nkonko yuvua mujule, anyi pa kuleja mua kujikija bilumbu biuvua mujule.

Pa kumbusha mishindu itudi baleje eyi, ngamba-malu mupiluke udi utangila ne lubatshi bantu badi bamuteleja. Padi bamue kabayi bumvua bumue bualu bilenga, udi umona. Pikalabu bualu bunene, udi ubuambulula. Kadi imue misangu, kuambulula miaku imue imue kakutu kukumbane to. Kudi tshikuabu tshidiye mua kuenza bua kulongesha bimpe. Udi mua kusakidila amue malu diakamue nansha kaayi muvuaye mulongolole. Bua kuikala mulongeshi mulenga, mbimpe wewe kumanya mua kukumbaja majinga a bantu badi bakuteleja.