Disulakaja dia tshiena-bualu

BANGAMBA-MALU bapiluke batu bamanye mushinga wa kuikala ne tshiena-bualu. Padibu balongolola muyuki, tshiena-bualu tshidi tshiabambuluisha bua kutuma lungenyi anu ku tshitupa kampanda tshia malu ne kuela meji bikole pa tshitupa atshi. Nanku pamutu pa kuakula malu a bungi pamutu pamutu, badi bakula pa malu makese adi ambuluisha bateleji. Padi malu manene onso umvuangana ne tshiena-bualu ne atshisulakaja, bantu nebaavuluke ne nebumvue mushinga wau.

Nansha mutubu bamba ne: tshiena-bualu ke mutu wa bualu uudi nawu, kadi neumone se: newenze miyuki yebe bilenga paudi wangata tshiena-bualu bu disangu kampanda diudi wangata bua kusulakajila mutu webe wa bualu. Mitu ya malu idi mua kuikala: Bukalenge, Bible, ne dibishibua ku lufu. Kudi mua kupatukila biena-bualu bivule. Mona bimue bilejilu: “Bukalenge mmbulamatadi mulelela,” “Bukalenge bua Nzambi nebuvuije buloba mparadizu,” “Bible mmukanda mufundisha ku nyuma wa Nzambi,” “Bible ke mukanda udi mua kutulombola biakane mu matuku etu aa,” “Dibishibua ku lufu didi dipesha badi mu tshinyongopelu ditekemena,” ne “Ditekemena dia dibishibua ku lufu didi dituambuluisha bua kushala ne lulamatu padibu batukengesha.” Badi basulakaja biena-bualu bionso ebi mu mishindu mishilangane.

Tshiena-bualu tshia pa buatshi tshivua Yezu uyisha natshi tshia ne: ‘Bukalenge bua mu diulu budi pepi’ tshivua tshiumvuangana ne tshia mu Bible mujima. (Mat. 4:17) Wakatshisulakaja munyi? Badi bakula bua Bukalenge abu misangu mipite pa 110 mu Evanjeliyo inayi. Kadi Yezu kavua anu wenda wambulula patupu muaku “bukalenge” to. Ku bivuaye ulongesha ne ku dienza diende dia bishima, Yezu wakaleja patoke ne: yeye uvua Muana wa Nzambi, Masiya, eu uvua Yehowa ne bua kulua kupesha Bukalenge abu. Wakaleja kabidi ne: ku butuangaji buende, kuvua njila uvua munzuluila bantu bakuabu bua kukokeshabu nende mu Bukalenge. Wakaleja ngikadilu ivuabu ne bua kuikala nayi kudi bavua ne bua kukokesha nende. Ku malongesha ne bishima bivuaye wenza, wakaleja patoke tshialua Bukalenge bua Nzambi kuenzela bantu. Wakaleja ne: dipata ba-demon ku diambuluisha dia nyuma wa Nzambi divua dijadika muvua ‘bukalenge bua Nzambi bumane kulua’ kudi bavua bamuteleja. (Luka 11:20) Yezu wakambila bayidi bende bua kuyisha Bukalenge ebu.​—Mat. 10:7; 24:14.

Dikeba tshiena-bualu tshiakanyine. Kabena bakulomba bua kuakula pa tshiena-bualu anu bu mudi Bible wakula to, kadi nansha nanku kuikala ne tshiena-bualu tshiakanyine kudi ne mushinga wa bungi.

Pikalabu bakulombe bua wewe kudikebela tshiena-bualu nkayebe, bangabanga anji kutangila tshiudi wipatshila mu muyuki webe. Mpindieu paudi usungula malu manene ikala ne bua kuenza muyuki webe, wikale mujadike se: adi umvuangana menemene ne tshiena-bualu tshiebe atshi.

Padibu bakupesha tshiena-bualu, ukonkonone bimpe bua kumanya disangu didi malu ebe audi ne bua kusulakaja ne tshia kuangata. Bidi bilomba diditatshisha kampanda bua kumona bimpe mushinga ne malu adi mu tshiena-bualu. Padibu bakulomba bua kudikebela malu a kusulakaja nawu tshiena-bualu, uasungule ne lubatshi bua kupatula tshiena-bualu patoke. Kadi pikalabu badianjile kukupesha malu a kuamba, uakonkonone bua kumona mua kuenza nawu mudimu mu diumvuangana ne tshiena-bualu. Ukebe kumanya bua tshinyi bateleji badi nawu dijinga, ne umanye tshiudi wipatshila mu muyuki webe. Ke biakuambuluisha bua kumanya malu a kushindika mu muyuki.

Mushindu wa kushindika tshiena-bualu. Bua kushindika tshiena-bualu biakane, bidi bikengela kuasa tshishimikidi tshikondo tshiudi usungula ne ulongolola malu audi ukeba bua kuenza nawu mudimu. Wewe wenza mudimu anu ne malu adi akuatshisha tshiena-bualu tshiebe ne ulonda mibelu idi itangila dienza plan wa muyuki, neushindike diakamue tshiena-bualu.

Diambulula didi dishindika kabidi tshiena-bualu, ditshipatula patoke. Tuangate tshilejilu tshia musambu wa dinanga. Mu musambu mujima, muimbi udi utela tshiena-bualu, mbuena kuamba ne: dinanga didiye nadi bua bantu kampanda. Udi mua kuambulula tshiena-bualu etshi mu mishindu ya bungi. Udi mua kukudimuna muaku “dinanga” mu mishindu yawu mivule. Udi kabidi mene mua kuenza mudimu ne miaku idi ne diumvuija difuanangane ne dinanga, kuenza mudimu ne ngakuilu wa mipinganyi, ngakuilu wa ba-kangimba, anyi ngakuilu mikuabu. Kadi musambu udi amu unyungulukila pa tshiena-bualu tshimuepele. Ke mudibi kabidi ne bua kuikala ne bua tshiena-bualu tshia muyuki. Anu bu mudi lungenyi lua dinanga luikale mu musambu wonso, udi mua kuambulula miaku minene ya mu tshiena-bualu mu bule bua muyuki webe. Udi kabidi mua kukeba miaku idi mifuanangane ne miaku minene ku diumvuija anyi mene kuambulula tshiena-bualu mu mishindu mikuabu.

Mibelu eyi idi itangila kabidi bisangilu ne mudimu wetu wa budimi. Muntu udi mua kuvuluka muyuki udi muipi ndambu pikala tshiena-bualu tshiumvuika bimpe kakuyi lutatu. Muntu udi mua kuvuluka malu anudi nulonga nende biwikale mushindike tshiena-bualu tshidimuenekela patoke. Diditatshisha bua kusungula ne kusulakaja biena-bualu bilenga nedikuambuluishe bikole bua kulua muyishi ne mulongeshi wa Dîyi dia Nzambi wa dilambu.