Mukanda wa kudi Kasumbu Kaludiki

BU MUTUKADI pa kubuela mu bulongolodi bupiabupia, bidi bikengela kuenza lukasa bua kushala bindile Yehowa. (Sef. 3:8) Muprofete Danyele wakamba ne: ‘Nzambi udi usokolola malu masokoka, ne yeye wakumanyisha malu akadi pa kulua mu matuku atshidi ku mpala.’ (Dan. 2:28) Ndiakalengapu kayi nunku dia kuikala ne muoyo ku ndekelu kua tshikondo tshivuabu badianjile kumanyisha atshi ne dia kumvua malu masokoka a Yehowa Nzambi adiye wenda usokolola!

Ku butuangaji bua “mupika wa lulamatu ne wa budimu,” ku kakese ku kakese Yehowa mmusokolole disua diende dia kusangisha “musumba munene” wa bantu ba buloba bujima badi bamutendelela mu ‘matuku a ku nshikidilu’ aa makole. (Mat. 24:45, NW; Buak. 7:9; 2 Tim. 3:1) Yeshaya 2:2, 3 udi umvuija mudi mudimu wa buloba bujima eu wenzeka ‘mu tshitupa tshia ndekelu tshia matuku.’ (NW) Ku tshidimu tshionso, mudimu wa disangisha eu udi utungunuka ne kuenzeka mu bimvundu ne tshikisu bidi biuwule tente pa buloba.

Mu tshidimu tshia 2004, bavua batulombe bua kutumikila mêyi a Yezu a ne: “Nuikale batabale . . . Nuikale badilongolole.” (Mat. 24:42, 44, MMM) Bulelela, malu adi enzeka pa buloba adi ne diumvuija dinene kudi bena Kristo badi bajingulula “bimanyinu bia bikondo” ne benza malu bilondeshile mudi bikondo. (Mat. 16:1-3) Bua Yehowa kukumbaja Dîyi diende, neatungunuke ne kuambuluisha bantu bende badiye mulongolole bua kumuenzela mudimu nansha padibu babaluisha.

Nansha mudi bamue bantu bakeba bua kupumbisha anyi kuimanyika mudimu wa dimanyisha dia Bukalenge, tshidibi bana betu badi batungunuka ne kulongesha bulelela ne kudisangisha. (Bien. 5:19, 20; Eb. 10:24, 25) Mu ngondo muisambombo wa 2004 mu ditunga dia Russie, kabadi kakulu ka mu tshimenga tshia Moscou kakitaba dipangadika dia kabadi kakese dia kukandika midimu ya Bantemu ba Yehowa ne kubumbusha ku mikanda ya mbulamatadi mu tshimenga atshi. Kadi, bana betu ki mbapingane tshianyima to; bualu mbamanye tshidi Nzambi ubalomba, ne badi bamutumikila bu Mukalenge kumpala kua bantu. (Bien. 5:29) Tudi batekemene ne: Yehowa nealombole basadidi bende nansha padi mbulamatadi ukosa bilumbu biabu bibi.

Bidimu bishale ebi, bavua banyenge bana betu ba mu ditunga dia Géorgie bintu biabu, babakengeshe ne tshikisu tshikole kudi bisumbu bia bantu, ne badimuene muvua bantu babôshila mikanda yabu. Kadi kakuvua tshia mvita nansha tshimue tshivuabu babatudile tshivua tshibenzele bualu. (Yesh. 54:17) Mu tshidimu tshia mudimu tshia 2004, bavua belulule kabidi Bantemu ba Yehowa ku mikanda ya mbulamatadi mu Géorgie. Bavua benze mpungilu yabu kakuyi muntu mubenze mukodi, kabidi mikanda yetu idi ilokamu mpindieu bu mvula kakuyi lutatu. Bungi bua bamanyishi ne bua bantu bavua babuele mu Tshivulukilu buvua bupite bua kumpala.

Mu ditunga dia Arménie, dia Érythrée, mu République de Corée, mu Rwanda, ne mu Turkménistan, mbele bana betu mu buloko bua ditabuja diabu. Nansha mudibu babakengesha, mbamanye tshidi Bible wamba bua makenga abu, ne kumanya bualu ebu nkubambuluishe bikole bua kushala ne lulamatu bindile bua Yehowa abasungile.​—1 Pet. 1:6; 2 Pet. 2:9.

Paudi ubala Luapolo lua buloba bujima lua tshidimu tshia mudimu tshia 2004 mu Tshibumba tshia Nsentedi tshia dia 1 Luishi 2005, neusanke bikole bua kumona bulenga bua Yehowa. (Mus. 31:19; 65:11) Tudi batekemene se: luapolo lua mudimu elu nelukupeshe bukole bua kutungunuka ne kuenda mu njila udi usankisha Nzambi.​—1 Tes. 4:1.

Kudi bia bungi bitshidibu benda balongolola bua kulongesha bantu ba mishindu yonso bulelela. Tshilejilu, bande ya video, matadi a DVD ne bintu bikuabu bia muakulu wa tumama ne mikanda mikuabu kabidi mu maleta a bampofo mbilongolola bua kulongesha tumama ne bampofo malu a Nzambi. Bamanyishi ba bungi ba Bukalenge mbalonge miakulu ya bantu benyi badi balue kusombela mu teritware wa tshisumbu tshiabu.

Mbenze kabidi tusumbu tukese nkama ne nkama mu miaba idi mikole bua kufikamu. Biro bietu bikuabu bidi bitangila teritware udi ne tusumbu tukese tua palepale tupite pa 300 tuikale ne bamanyishi bapite pa 7 000. Ebi bidi bileja mudi bisumbu bipiabipia mua kulua kuledibua. Kabidi, pa bantu 16 760 607 bavua babuele mu Tshivulukilu tshidimu etshi, bantu bapite pa miliyo 10 kabavua Bantemu to. Ebu mbualu bunene budi butujadikila mudiku mudimu wa dinowa wa tuetu kuenza.

Tudi tuela Yehowa tuasakidila bua mabenesha ende mavule ne bua mudiye uditatshisha ne dinanga bua bualu buetu ku dituku ne ku dituku. (Nsu. 10:22; Mal. 3:10; 1 Pet. 5:7) Bu mutudi mu buobumue tuya batangile kumpala mu “matuku a ku nshikidilu” aa, tudi batekemene ne beyemene anu Yehowa. Nansha tuetu bapete ntatu ya mushindu kayi, tushale anu bavuluke mêyi a mvese wetu wa tshidimu tshia 2005 a ne: “Dikuatshisha dianyi didi difuma kudi Yehowa.” (Mus. 121:2) Anyishayi bana betu mioyo yetu ya dinanga ne tudi tusambila bua bualu buenu.

Bana benu,

Kasumbu Kaludiki ka Bantemu ba Yehowa