Enza malu mimpe ne ambuluishe bakuabu
1 Dôka ‘uvua wenza malu mimpe ne wambuluisha bapele.’ (Bien. 9:36, 39, Muanda Mulenga lelu) Bua lungenyi luende lua kupeshangana bintu bakamunanga kudi bantu ne kudi Yehowa Nzambi. Ebelu 13:16 udi wamba ne: ‘Kadi kanupu muoyo bua kuenzelangana bimpe ne bua kukuatshishangana, bua Nzambi udi usanka ne milambu ya nunku.’ Mmunyi mutudi mua kuenza malu mimpe ne kuambuluisha bakuabu lelu eu?
2 Umue mushindu utudi mua kuenza bua kuambuluisha bakuabu nkufila ‘biuma’ bietu. (Nsu. 3:9) Mapa atudi tufila bua mudimu wa pa buloba bujima adi ambuluisha bua kuibakabu Nzubu ya Bukalenge, Nzubu ya mpuilu ne ya Betele. Mapa etu atudi tufila mmambuluishe miliyo ne miliyo ya bana betu bua kulongabu malu a Nzambi ne mmakoleshe buena muntu buetu.
3 Kufila kudi kusamba: Patu bipupu bienzeka, bantu ba Yehowa batu badilongolola bua ‘kuenzela [bena Kristo nabu] bimpe’ ne bafika too ne ku dienzela bantu ba tshianana bimpe. (Gal. 6:10) Tshilejilu, mu ditunga dia France pakakuata tshiapu kampanda tshia bintu bia lulengu kapia, tatu mukuabu ne mukajende bavua basombele pabuipi ne tshiapu etshi bakamba ne: “Diakamue bana betu bena Kristo bakalua bua kutuambuluisha, e kusukulabu bimpe bitambe nzubu wetu ne ya bena mutumba. Bena mutumba betu bakakema bikole bua kumona bantu bungi nunku balue bua kutuambuluisha.” Muanetu mukuabu wa bakaji wakamba pende ne: “Bakulu bakalua bua kutuambuluisha. Bakalua bua kutukankamija. Bulelela, edi ke diambuluisha dituvua nadi dijinga kupita dituambuluisha ne bintu bia ku mubidi.”
4 Nansha mudiku mishindu ya bungi itudi mua kuenzela bena mutumba netu malu mimpe, mushindu mutambe buimpe utudi mua kubambuluisha nau nkuenza bua bapete dimanya dimpe dia bulelela pamue ne “ditekemena dia muoyo wa tshiendelele” udi Yehowa mulaye. (Tito 1:1, 2) Mukenji wa mu Bible udi ukankamija anu mudibi bikengela bantu badi banyingalala bua malu adibu bamona pa buloba ne bua ngikadilu wabu wa benji ba malu mabi. (Mat. 5:4) Tuenzayi malu mimpe ne tuambuluishayi bakuabu patudi ne mushindu wa kuenza nanku.—Nsu. 3:27.