Epuka dikeba dia “bintu bidi kabiyi ne mushinga”
1 Difundilangana mikanda ku Internet (E-mail) mmushindu udi mutangalake bikole lelu wa difidila ne dipetela ngumu. Nansha mudi dimanyishilangana malu avua muntu mumone ne ngenyi ne bena mu dîku ne balunda bende ku Internet dikale diakanyine, kadi ‘mmalu [kayi] a patupu’ adi mua kubuelakana mu tshibidilu etshi padi muntu kayi udielela mikalu mu dienza diende dia mudimu ne njila eu wa dipetela ne dimanyishilangana malu ta Internet (E-mail)?—Nsu. 12:11.
2 Malu adibu batudimuija bua bidi bitangila E-Mail: Bantu ba bungi badi bamba mudibu badiumvua pabuipi ne bulongolodi bua Yehowa padibu bapetela ku Internet ta E-mail tshidibu bamone bu ngumu mipiamipia. Ngumu eyi idi mua kuikala malu mamona a mu nsombelu, malu adi enzeka ku Betele, ngumu ya bipupu anyi dikengeshangana ne malu adi kaayi akengela kuambila bantu bakuabu avuabu bamanyishe mu Kalasa ka Mudimu wa Bukalenge. Bakuabu batu bazuka bikole bua kumanyishangana malu a nunku, bakeba bua kuikala misangu yonso ba kumpala badi bamanyisha balunda babu malu.
3 Misangu mikuabu, batu bakonyangaja anyi banekesha ngumu ne malu mamona. Peshi mu didienzeja bua kutamba kulengeja malu adiye umanyisha bakuabu, bidi bimufikisha too ne ku dipesha bantu mmuenenu mubi. Aba batu bazukila bua kuamba malu bu nunku kabatu nansha pa tshibidilu bamanye malu onso mu katoba mu katoba nansha. (Nsu. 29:20) Imue misangu, nansha padiku kakuyi mushindu wa kuitaba bualu kampanda bulonda, buobu badi anu babupitshishila bakuabu bualu budi bukoka ntema yabu. Malu adi kaayi malelela anyi adi apambuishangana a nunku adi mua kubadibua bu “nsumuinu ya patupu,” idi kayiyi ikankamija bantu ku dikala ne lulamatu lulelela kudi Nzambi. —1 Tim. 4:6, 7.
4 Biwikala mutumine muntu dimanyisha didi kadiyi dilelela, udi wambula ndambu wa bujitu bua kanyinganyinga anyi dibuejakaja dia malu didibi mua kukeba. Pavua Davidi mupete mukenji munekesha wa ne: bavua bashipe bana bende bonso ba balume, ‘wakapanda bilamba biende’ bua kanyinganyinga. Pabi, anu muana umuepele patupu ke uvua mufue. Lumu elu luvua lua dibungama, kadi dinekesha edi diakavudijila Davidi kanyinganyinga. (2 Sam. 13:30-33, Mukanda wa Mvidi Mukulu [Katolike, MMM]) Bushuwa katuena basue kuenza tshintu kayi tshionso tshidi mua kupambuisha anyi kutekesha muanetu nansha umue mu maboko to.
5 Njila musungula kudi Nzambi: Umanye ne: Tatu wetu wa mu diulu udi ne njila udiye musungule wa kumanyishila malu: “mupika wa lulamatu ne wa budimu.” “Mupika” au udi ne bujitu bua kusungula bualu budi bukumbanyine budi bukengela kumanyisha dîku dia bena kuitabuja kabidi ne ‘dîba diakane’ dia kubumanyisha. Biakudia ebi bia mu nyuma badi babifidila anu mu bulongolodi bua Nzambi. Misangu yonso tudi ne bua kutekemena bua kumanyina malu a kueyemena anu mu njila eu udi Nzambi musungule, kadi ki nku Internet to.—Mat. 24:45, NW.
6 Programe ya ku Internet (anyi site Web): Tudi ne wetu site Web udi mumanyike bimpe: www.watchtower.org. Programe anyi site eu ke muaba udi muakanyine bua kumanyishila bantu bonso tshianana malu. Kabiena ne mushinga bua muntu nansha umue, kasumbu anyi tshisumbu kampanda bikanguishe watshi muaba mu programe wa Web ku Internet bua kuikala kumanyishilamu malu adi atangila Bantemu ba Yehowa to. Bamue mbatentule ne mbatumine banga bantu malu adi mu mikanda yetu ne mvese yonso idimu ne mikanda mikuabu yonso idibu batelemu; batuminangana too ne malu a mu mpungilu baalombela mene ne mfranga. Ditentula ne diabanya mikanda ya Bantemu ba Yehowa ku Internet (nansha kuikale anyi kakuyi dilomba dia mfranga) nkushipa kua mikenji idi itangila bukenji budi nabu anu benji ba mikanda eyi nkayabu. Nansha mudi bakuabu mua kumona bualu ebu bu diambuluisha dîku dia bana betu, kabuena buanyishibue ne bituadijile anu ku mpindieu budi ne tshia bua kujika.
7 Kuikala ne busunguluji ne meji mimpe patudi tuenza mudimu ne Internet bua kupeta anyi kumanyisha bakuabu malu nekutuambuluishe bua kuikala ne meji mûle tente ne “bintu bionso bia mushinga mukole bilengele ne bisankishi.”—Nsu. 24:4.