Nkonko ya babadi

Mmunyi mutu Bantemu ba Yehowa bangata masungulangana?

Kudi mêyi-maludiki maleja patoke mu Bible adi ambuluisha basadidi ba Nzambi bua kuikala ne mmuenenu muimpe pa muanda eu. Kadi bidi bimueneka ne: kakuena mukandu bua tshilele tshine tshia masungulangana. Tshilejilu, kakuena bualu bubi padi kasumbu ka balombodi ne bua kuenza disungula bua kuangata mapangadika adi atangila kumpanyi wabu. Bisumbu bia Bantemu ba Yehowa bitu misangu mivule biangata mapangadika bua mêba a bisangilu ne mushindu wa kutula mfranga ya tshisumbu pa kusungula mu diela bianza muulu.

Kadi netuambe tshinyi bua masungulangana a bena tshididi? Bushuwa, mu amue matunga a mbulamatadi wa mungalata anyi demokrasi, bantu batue ku 50 pa lukama kabatu baya bua kuelelangana tukanda dituku dia masungulangana nansha. Bantemu ba Yehowa kabatu bapangisha bantu bakuabu bukenji budibu nabu bua kuelelangana tukanda; peshi kabatu babasaka bua kubenga masungulangana a bena tshididi to. Badi banemeka ne bambuluishangana ne bakokeshi badi bantu basungule mu mushindu muakanyine. (Lomo 13:1-7) Bua bidi bitangila dielela muntu kampanda kakanda mu masungulangana, Ntemu yonso wa Yehowa udi ne bua kuangata dipangadika dishindamene pa kuondo kende ka muoyo kalongesha kudi Bible ne pa mushindu udiye mumvue bujitu budiye nabu kumpala kua Nzambi ne kua Mbulamatadi. (Matayo 22:21; 1 Petelo 3:16) Mu diangata dipangadika edi dia pa nkaya, Bantemu batu bakonkonona ndambu wa malu.

Bua kumpala: Yezu Kristo wakamba bua balongi bende ne: “Kabena ba panu, bu mundi meme tshiyi wa panu.” (Yone 17:14, MMM) Bantemu ba Yehowa batu bangata dîyi edi ne mushinga wa bungi. Bu mudibu ‘kabayi ba panu,’ kabatu badibueja mu malu a tshididi a bena panu nansha.​—Yone 18:36.

Buibidi: mupostolo Paulo wakadibikila bu ‘mulopo’ muleji-mpala wa Kristo kumpala kua bantu ba mu tshikondo tshiende. (Efeso 6:20; 2 Kolinto 5:20) Bantemu ba Yehowa badi bitaba ne: Kristo Yezu mmujadika mpindieu bu Mukalenge wa Bukalenge bua Nzambi mu diulu, eku buobu bikale milopo, bua kumanyisha matunga bualu ebu. (Matayo 24:14; Buakabuluibua 11:15) Milopo idi ne bua kulama ndubidilu ne kubenga kudibueja mu malu a mu matunga mudibu bayitume. Bu mudibu baleji-mpala ba Bukalenge bua Nzambi bua mu diulu, Bantemu ba Yehowa badi badiumvua benzejibue bia muomumue bua kubenga kudibueja mu malu a tshididi a mu matunga mudibu.

Bualu buisatu bua kuangata ne mushinga mbua se: bantu badi belela muntu tukanda bua kumuteka pa mudimu kampanda badi mua kuambula bujitu bua malu adiye wenza. (Tangila 1 Timote 5:22.) Bena Kristo badi ne bua kukonkonona bualu ebu ne ntema bikalabu basue kuambula bujitu ebu.

Bualu buinayi: Bantemu ba Yehowa badi bangata buobumue buabu bua bena Kristo ne mushinga wa bungi. (Kolosai 3:14) Padi bitendelelu bibuela mu malu a tshididi, misangu mivule bena kuitabuja batu bapandulukangana. Bu mudibu bidikija Yezu Kristo, Bantemu ba Yehowa kabatu babuela mu malu a tshididi nansha, badi balama buobumue buabu bua bena Kristo.​—Matayo 12:25; Yone 6:15; 18:36, 37.

Bualu buitanu ne bua ndekelu mbuobu’ebu: dibenga kubuela mu malu a tshididi didi dipesha Bantemu ba Yehowa budikadidi bua kuakula ne bena tshididi bonso bua kubaleja mukenji wa Bukalenge udi ne mushinga wa bungi.​—Ebelu 10:35.

Bilondeshile mêyi-maludiki a mu Mifundu matela kuulu eku, mu matunga a bungi, Bantemu ba Yehowa badi badiangatshila, muntu pa nkayende, dipangadika dia kubenga kuelelangana tukanda mu masungulangana a bena tshididi, ne budikadidi budibu nabu bua kuangata dipangadika edi mbutua nyama ku mikolo kudi mikenji ya mu ditunga didibu. Kadi netuambe tshinyi bikala mikenji ya ditunga ilomba bua muena-muabu yonso kuelelanganaye kakanda? Mu nsombelu wa mushindu’eu, Ntemu yonso udi ne bujitu bua kuangata dipangadika diumvuangane ne kuondo kende ka muoyo ne dishindamene pa Bible bua kumanya tshidiye ne bua kuenza. Biapangadija muntu bua kuya muaba udibu belelangana tukanda, adi ndipangadika didi dimutangila. Tshienzaye muaba au ntshimutangile anu yeye ne Mufuki wende.

Nimero wa Tshibumba tshia Nsentedi wa dia 1 Lumungulu 1951, dibeji dia 136 ne dia 137 (Mfual.), wakamba ne: “Mu ditunga mudi Kaisa wenzeja bantu ku bukole bua kuelelangana tukanda . . . [Bantemu] badi mua kuya muaba udibu benzela masungulangana ne kubuela mu biro. Muaba eu ke udibu ne bua kuleja ku luseke kudibu pa kakanda ka masungulangana. Beledianganyi ba tukanda badi benza tshidibu basue ne tukanda tuabu tua masungulangana. Nenku kumpala kua Nzambi, muaba eu ke udi bantemu bende ne bua kuenza malu adi umvuangana ne mikenji yende ne ditabuja diabu. Ki ntshilumbu tshietu bua kubalongesha tshidibu ne bua kuenza ne kakanda ka masungulangana nansha.”

Kadi bikala muanetu wa bakaji muena Kristo muikale ne mulume kayi muena kuitabuja, ne bayende eu udi umuambila bua aye kuelelangana kakanda? Bushuwa, udi ne bua kukokela bayende anu mutu bena Kristo bakokela bakokeshi badi ku mutu. (Efeso 5:22; 1 Petelo 2:13-17) Biatumikilaye bayende ne biayaye muaba udibu belelangana tukanda, adi ndipangadika diende nkayende. Muntu nansha umue kêna ne bua kukeba bua kumupisha to.​—Tangila Lomo 14:4.

Bidi munyi bua mu ditunga mudi kamuyi mukenji udi wenzeja bantu bua kuelelangana tukanda, kadi muikale bantu badi bakuatshila aba badi kabayi baya kuela tukanda tshiji​—pamu’apa bibateka mu njiwu? Peshi, tshia kuenza ntshinyi pikalabu bakosela bantu badi kabayi baya muaba udibu belelangana tukanda tshibawu tshinene mu mushindu kampanda, nansha mudi mikenji ya ditunga kayiyi ibenzeja bua kuyaku? Mu nsombelu eyi ne mu mikuabu ya muomumue, muena Kristo udi ne bua kuangata dipangadika diende nkayende. ‘Muntu ne muntu neadiambuile bujitu buende.’​—Galatia 6:5.

Kudi mua kuikala bantu badi balenduka padibu bamona ne: mu tshikondo tshia masungulangana mu ditunga diabu, bamue Bantemu ba Yehowa badi baya ku biro bia dielelangana tukanda eku bakuabu kabayi bayaku. Badi mua kuamba ne: ‘Bantemu ba Yehowa kabatu benza malu mushindu umue to.’ Kadi bantu badi ne bua kumanya se: mu malu adi atangila kuondo ka muoyo ka muntu bu mudi ebu, muena Kristo yonso udi ne bua kudiangatshila dipangadika kumpala kua Yehowa Nzambi.​—Lomo 14:12.

Nansha Bantemu ba Yehowa buobu bangate mapangadika a mushindu kayi muntu pa nkayende mu nsombelu mishilangane, badi badienzeja bua kulama ndubidilu wabu wa bena Kristo ne budikadidi buabu bua diakula. Mu malu onso badi banyemena kudi Yehowa Nzambi bua abakoleshe, abapeshe meji ne abambuluishe bua kabafiki ku dinyanga ditabuja diabu to. Nenku badi bitaba mêyi a mufundi wa misambu aa: ‘Bualu bua wewe udi dibue dianyi ne ngumbu yanyi ya mvita; nunku, bualu bua dîna diebe wikale mulombodi wanyi, undombole mu njila.’​—Musambu 31:3.