Enza mudimu bimpe ne dîba diebe
1 Dijinga dietu dia kusankisha Yehowa didi ditusaka bua kuakaja nsombelu wetu bua ikale muimanyine pa malu a mu nyuma. Dîyi diende didi ditulomba bua ‘kukeba diambedi bukalenge buende’ ne ‘kumanya mua kujadika malu adi makane.’ (Mat. 6:33; Filip. 1:10) Mmunyi mutudi mua kupeta dîba bua malu a Bukalenge bua Nzambi ne kuteka malu adi ne mushinga mukese pa muaba muibidi?—Ef. 5:15-17.
2 Teka malu a Bukalenge pa muaba wa kumpala: Longolola programe webe bua kubenga kupitshisha dîba ku malu a patupu. Ku ntuadijilu kua ngondo yonso, bamue batu bafunda matuku adibu ne bua kupatuka mu buambi. Pashishe badi benza muabu muonso bua malu makuabu kaalu kubapangisha bua kuyisha matuku au to. Ke tshitubu benza kabidi bua kubuela mu bisangilu, kudilongela ne kuya mu mpuilu. Ba bungi mbenza programe wabu bua kuikala kutuadija anyi kujikija dituku ne dibala dia Bible. Enza programe mujalame wa malu onso a mushinga ne kulekedi malu makuabu alua kuatshiamakana kumpala to.—Muam. 3:1; 1 Kol. 14:40.
3 Ikala ne nkatshinkatshi: Mu amue matunga mudi malu bu mudi manaya, dijikija lutetuku pamue ne bintu bikuabu bitule bipuwe. Bantu ba bungi badi bapitshisha dîba dia bungi ku TV anyi ku ordinatere. Pabi, kutamba kudifila ku malu adi kaayi ne mushinga ne bintu bipiabipia bidi bipatuka nekutuele mâyi ku makasa. (1 Yone 2:15-17) Ke bua tshinyi Bible udi utubela bua kubenga kudina ne kasuki mu malu a pa buloba. (1 Kol. 7:31) Wewe mutumikile mubelu eu, neuleje Yehowa ne: udi muteke ntendelelu wende pa muaba wa kumpala.—Mat. 6:19-21.
4 Matuku adi mashadile ndongoluelu wa malu eu mmabadika ku minu. Bantu badi bateka malu a Bukalenge pa muaba wa kumpala nebikale ne disanka ne Nzambi neabanange. (Nsu. 8:32-35; Yak. 1:25) Nanku, tuenzayi mudimu bimpe ne dîba ditudi nadi.