Tuambuluishayi bakuabu bua bikale ‘batumikila mu mitshima’
1. Ntshinyi tshidi Yehowa ulomba batendeledi bende?
1 Bua Yehowa kuitabaye dimutendelela dietu, bidi bikengela tuikala tumutumikila. (Dut. 12:28; 1 Pet. 1:14-16) Mu katupa kîpi emu, dilumbuluisha dia Nzambi nedilue kudi bantu ‘badi kabayi bamanye Nzambi ne badi kabayi batumikila lumu luimpe.’ (2 Tes. 1:8) Mmunyi mutudi mua kuambuluisha bakuabu bua ‘kutumikila mu mitshima’ diyisha dia Dîyi dia Nzambi?—Lomo 6:17.
2. Bua tshinyi mbimpe kuambuluisha bakuabu bua bapete ditabuja dikole?
2 Bambuluishe bua kukolesha ditabuja ne dinanga diabu: Mu Bible, ditumikila mmuanabu ne ditabuja. Mupostolo Paulo wakakula bua ‘mukenji wa Nzambi wa tshiendelele wakamanyishibua bua ditumikila mu ditabuja.’ (Lomo 16:26) Ebelu nshapita wa 11 udi utela bilejilu bia bungi bia ditabuja bia bantu bavua benza malu mu diumvuangana ne disua dia Yehowa. (Eb. 11:7, 8, 17) Ku lukuabu luseke, dibenga kutumikila didi dienda pamue ne dipangila dia ditabuja. (Yone 3:36; Eb. 3:18, 19) Tudi ne bua kudienzeja bua kuikala bapiluke mu dienza mudimu ne Dîyi dia Nzambi bua kumona mua kuambuluisha bakuabu bua bapete ditabuja diabasaka ku ditumikila.—2 Tim. 2:15; Yak. 2:14, 17.
3. (a) Mmunyi mudi ditumikila dienda pamue ne dinanga? (b) Mmushindu kayi utudi mua kufikisha balongi ba Bible ku dinanga Yehowa?
3 Ditumikila ditu kabidi dienda pamue ne dinanga dia Nzambi. (Dut. 5:10; 11:1, 22; 30:16) Yone wa kumpala 5:3 udi wamba ne: ‘Edi ndinanga dia Nzambi, bua tuetu tutumikile mikenji yende; ne mikenji yende kayena itunemena bujitu.’ Mmunyi muudi mua kuambuluisha balongi ba Bible bua bafike ku dinanga Yehowa? Paudi ulonga Bible ne muntu, keba mishindu ya kumufikisha ku dikala ne dianyisha bua ngikadilu ya Yehowa. Leja wewe muine muudi ne dianyisha kudi Nzambi. Ambuluisha mulongi bua ikale ukeba mushindu wa kudiaye malanda mimpe ne Yehowa. Kadi dinanga dia Yehowa ke didi nangananga mua kuambuluisha bantu bua kumutumikila ne muoyo wabu mujima ne ke didi ditusaka petu bua kumutumikila.—Mat. 22:37.
4. (a) Bua tshinyi tshilejilu tshietu tshidi ne mushinga? (b) Ntshinyi tshitudi ne bua kuenza bua kupeta “mutshima wa lungenyi”?
4 Tshilejilu tshietu: Mushindu mutambe buimpe wa kuambuluisha bakuabu bua kutumikila lumu luimpe ntshilejilu tshietu. Nunku, bidi bikengela tuetu kuenza muetu muonso bua kupeta “mutshima wa lungenyi” anyi udi utumikila Nzambi. (1 Bak. 3:9; Nsu. 4:23) Ebi bidi bilomba tshinyi? Bidi bikengela kudisha muoyo wetu ne biakudia bia mu nyuma, bu mudi kuikala ne tshibidilu tshia kulonga Bible ne kubuela mu bisangilu. (Mus. 1:1, 2; Eb. 10:24, 25) Diaku bulunda ne bantu badi batendelela Nzambi ne muoyo wabu mujima. (Nsu. 13:20) Ikala ne tshibidilu tshia kuyisha ne dijinga dikole dia kuambuluisha bantu badi mu teritware wenu. Lomba Yehowa bua abeneshe bionso biudi wenza bua kupeta mutshima muimpe. (Mus. 86:11) Lekela malu adi mua kunyanga mutshima webe, bu mudi dijikija lutetuku ne malu adi akusaka bua kuenda masandi ne kuikala ne tshikisu. Enza malu adi mua kukufikisha ku didia bulunda bukole ne Nzambi ne kukolesha malanda enu nende.—Yak. 4:7, 8.
5. Mmunyi mudi bantu badi batumikila Nzambi bapeta masanka?
5 Yehowa wakambila batendeledi bende ba kale ne: neababeneshe pikalabu batumikila dîyi diende. (Dut. 28:1, 2) Bia muomumue lelu’eu, Yehowa udi ubenesha bikole bantu badi ‘batumikila mêyi ende.’ (Bien. 5:32) Tuambuluishayi bakuabu bua kutumikila Nzambi ne muoyo wabu mujima ku ndongeshilu wetu ne ku tshilejilu tshietu.