Lama

Tulombolayi malonga a Bible mimpe

Tshisakidila etshi tshidi ne malu manene a mu biena-bualu bia tulombolayi malonga a Bible mimpe bivua bipatuke mu Mudimu wetu wa Bukalenge. Tudi tulomba bantu bonso bua balame tshisakidila etshi bua kuikala kutapamu dîsu padibu balombola malonga a Bible. Badi mua kuenza kabidi mudimu ne malu adimu bua kulombola bisangilu bia mudimu wa buambi, ne batangidi ba mudimu nebenze natshi mudimu padibu bakumbula tusumbu tua dilonga dia mukanda.

Tshitupa tshia 1: Dilonga dia Bible ntshinyi?

Wewe uyukila ne muntu pa Bible mu minite mikese misangu ne misangu, anyi ku diambuluisha dia umue wa ku mikanda itutu tulongesha nayi bantu Bible, udi ulombola dilonga dia Bible. Udi mua kufunda dilonga edi mu luapolo lua mudimu anu padidi dienzeka misangu ibidi ne kabidi anu padidi dimueneka ne: neditungunuke.​—km 7/04 dib. 1.

Mikanda ya kulonga nayi Bible

▪ Ntshinyi tshidi Nzambi utulomba?

▪ Dimanya didi difikisha ku muoyo wa kashidi

▪ Tutendelelayi Nzambi umuepele mulelela

▪ Udi mua kulua mulunda wa Nzambi! bua bantu badi kabayi balonge tulasa tua bungi anyi badi ne lutatu lua kubala.

Tshitupa 2: Tudilongolole bua kulombola dilonga dia Bible

Tudi ne bua kulenga mutshima wa mulongi patudi tulongesha. Ebi bidi bilomba kudilongolola bimpe bikale bamanye majinga a mulongi.​—km 8/04 dib. 1.

Mushindu wa kudilongolola

▪ Konkonona bimpe mutu wa bualu, tubiena-bualu tukese ne bimfuanyi.

▪ Keba mandamuna a nkonko mifunda, wele tulongo anu pa miaku ne biambilu bidi ne malu manene.

▪ Sungula mvese inudi mua kubala. Funda amue malu a mu mvese eyi kumpenga kua dibeji.

▪ Longolola diambulula dikese dia malu manene.

Longesha muntu bilondeshile majinga ende

▪ Sambila bua mulongi ne majinga ende.

▪ Ikala mudianjile kumanya malu ikala mulongi ne lutatu lua kumvua anyi kuitaba.

▪ Diebeja ne: ‘Ntshinyi tshidiye ne bua kumvua anyi kulengeja bua kukolaye mu nyuma? Mmunyi mundi mua kulenga mutshima wende?’

▪ Pikalabi ne mushinga, longolola tshilejilu, diumvuija anyi nkonko idi mua kuambuluisha mulongi bua kumvua bualu anyi mvese kampanda bimpe.

Tshitupa 3: Enza mudimu bimpe ne Bible

Tshipatshila tshietu patudi tulonga Bible ne bantu ntshia ‘kubavuija bayidi’: kubambuluisha bua kumvua ne kuitaba malongesha a mu Bible ne kuatumikila mu nsombelu wabu. (Mat. 28:19, 20; 1 Tes. 2:13) Ke bua tshinyi dilonga edi didi ne bua kuimanyina anu pa Bible.​—km 11/04 dib. 4.

Yisha ne Bible

▪ Leja mulongi mushindu wa kupeta mvese mu Bible wende.

▪ Balayi mvese idi ileja nshindamenu wa malongesha a mu Bible ne uyumvuije.

▪ Ela nkonko. Pamutu pa wewe kumvuija mulongi mvese, umulombe bua yeye akumvuijayi.

▪ Dilonga dikale dipepele. Ki mbimpe kukeba bua kumvuija mvese mu kanungu ne kanungu to. Akuila anu pa malu adi ne mushinga bilondeshile binudi nulonga.

▪ Leja mushindu muimpe wa kutumikila mvese. Ambuluisha mulongi bua umvue mudi malu adi mvese yamba amutangila.

Tshitupa 4: Kulongesha balongi bua kudilongolola

Mulongi udi ubala tshiena-bualu kumpala kua dîba, wela tulongo ku mandamuna ne wela meji pa mushindu udiye mua kuandamuna mu ende mêyi neakole mu nyuma ne lukasa. Ke bua tshinyi paudi umona ne: dilonga dia Bible ndishindame ne neditungunuke, longolola dilonga dimue pamue ne mulongi bua kumuleja mudiye mua kudilongolola. Bua balongi bavule, bitu bimpe kulongolola nabu nshapita mujima.​—km 12/04 dib. 1.

Kuela tulongo ne kufunda amue malu

▪ Umvuije mushindu wa kupeta diandamuna dia lukonko ludi lufunda mu mukanda.

▪ Leja mulongi webe mukanda bua amone muudi muele tulongo ku miaku idi ne mushinga.

▪ Ambuluisha mulongi bua amone mudi mvese yonso udi kayi ne mêyi ende mafunde mu tshikoso ushindika lungenyi kampanda ludibu batele mu tshikoso amu, pashishe umuleje mushindu wa kufunda amue malu makese mu miaba idi mishale ku nseke mu mukanda wende.

Kutapa dîsu dia lukasa ne kuambulula

▪ Leja mulongi mushindu wa kukonkonona mutu wa bualu, tumitu tua bualu, ne bimfuanyi kumpala kua kubalaye tshikoso ku tshikoso.

▪ Ambila mulongi bua atete kuvuluka ngenyi minene padiye ujikija kudilongolola.

Tshitupa 5: Ikala mujadike bungi bua malu anuikala mua kulonga

Bungi bua malu a kulonga budi bulonda tshidi mulongeshi ne mulongi mua kukokesha ne bilondeshile kabidi nsombelu yabu bonso.​—km 1/05 dib. 1.

Kolesha ditabuja diende

▪ Mbimpe kuambuluisha mulongi bua kumvuaye bimpe Dîyi dia Nzambi pa mutu pa kukeba bua kumulongesha bintu bia bungi lubilu lubilu.

▪ Pitshisha dîba dikumbane ne mulongi bua kumuambuluisha bua kumvuaye bimpe malu adiye ulonga ne kuitaba.

▪ Utambe kuimanyina pa mvese idi ne malu a nshindamenu.

Tungunuja dilonga kumpala

▪ Padi mulongi utamba kuakula bua malu a tshianana, umulombe bua nuenu kuyukila malu aa panyima pa dilonga.

▪ Kuakudi bia bungi panudi nulonga. Udi mua kulonda bualu kampanda bua mushinga anyi kulonda bualu budi buenzeke, kadi ki nkulonda malu bungi tshianana adi mua kupangisha mulongi mua kumvua bimpe malongesha a nshidamenu a mu Bible to.

Tshitupa 6: Tshia kuenza padi mulongi wela lukonko

Pakadi dilonga dimane kubotakana, mbimpe kulonga malongesha a mu Bible mu mushindu udiwu malondangane pamutu pa kuenda kutumpika kutua eku ne kuaka. Kuenza nunku kudi kuambuluisha mulongi bua kuikala ne tshishimikidi tshia dimanya dilelela ne kukola mu nyuma.​—km 2/05 dib. 6.

Ikala ne busunguluji

▪ Padi nkonko ijuka pa tshiena-bualu tshinudi nulonga, mbimpe kuyandamuna diakamue.

▪ Kadi bikala lukonko lutangila malu makuabu anyi lulomba kuenza makebulula, mbimpe kuluandamuna ku ndekelu kua dilonga anyi dituku dikuabu. Mbimpe kufunda nkonko ya mushindu eu.

▪ Pikala mulongi kayi witaba dilongesha kampanda, mbimpe kukonkonona nende mikanda mikuabu idi yumvuija bualu abu mu bule ne mu butshiama.

▪ Kadi pikala mulongi kayi anu umvua bualu abu bimpe, teka bualu abu ku luseke bua kulua kubuyukila dikuabu dituku, tungunukayi ne dilonga.

Ikala ne budipuekeshi

▪ Wewe kuyi mumanye diandamuna dia lukonko kampanda, kufidi diandamuna dia mu mutu to.

▪ Ku kakese ku kakese, leja mulongi mudiye mua kudienzela makebulula.

Tshitupa tshia 7: Tusambile patudi tulonga Bible ne bantu

Bua mulongi kudiunda bimpe mu nyuma, bidi bikengela Yehowa amuambuluishe. Nunku, mbimpe kutuadija ne kujikija dilonga dikadi dishindame ne disambila.​—km 3/05 dib. 6.

Dîba ditudi mua kusambila

▪ Bua bantu badi banange malu a Nzambi bikole, tudi mua kusambila nabu nansha mu dilonga dia kumpala.

▪ Bua bakuabu, bidi bikengela busunguluji bua malu kumpala kua kutuadija kusambila nabu.

▪ Tudi mua kuangata Musambu wa 25:4, 5 ne 1 Yone 5:14 bua kuleja mulongi bua tshinyi tudi tusambila.

▪ Tubale Yone 15:16 bua kuleja ne: tudi ne bua kusambila Yehowa mu dîna dia Yezu.

Tshia kuamba mu disambila

▪ Mbimpe kutumbisha Yehowa bualu malu anudi nulonga adi afumina kudiye.

▪ Tuleje mutudi tuditatshisha ne muoyo mujima bua diakalenga dia mulongi.

▪ Tuleje dianyisha bua bulongolodi budi Yehowa wenza nabu mudimu.

▪ Tulombe Yehowa bua ambuluishe mulongi mu bionso bidiye wenza bua kutumikila malu adiye ulonga.

Tshitupa tshia 8: Tulombole balongi ba Bible ku bulongolodi bua Nzambi

Tshipatshila tshietu patudi tulonga Bible ne bantu ntshia kubalongesha malongesha a nshindamenu ne kubambuluisha kabidi bua balue bena mu tshisumbu tshia bena Kristo. Ikala wangata minite mikese lumingu luonso panudi nulonga bua kuakula nabu bua malu adi atangila bulongolodi bua Yehowa.​—km 4/05 dib. 8.

Bisangilu bia tshisumbu

▪ Umvuija mulongi mushindu utu tshisangilu tshionso tshienzeka. Anu musangu wa kumpala unudi nutuadija kulonga au, umubikile bua abuele mu bisangilu.

▪ Umuambile malu manene avuabu bakule mu bisangilu.

▪ Enza bua apete dijinga dia kubuela mu Tshivulukilu, mu mpuilu ne mu lumingu lua pa bualu.

▪ Muleje foto idi mu mikanda yetu bua kumonaye mutu malu enzeka.

▪ Muambile bua kubala broshire wa Bantemu ba Yehowa​—Mbanganyi? Mmalu kayi adibu balongesha?

Enza mudimu ne bande ya Video bua kuvudija dianyisha diabu

▪ Jusqu’aux extrémités de la terre

▪ Les Témoins de Jéhovah: un nom, une organisation

▪ Unis grâce à l’enseignement divin

▪ Toute la communauté de nos frères

Tshitupa tshia 9: Longesha balongi ba Bible mua kuyisha dîba dionso didi mpunga umueneka

Padi balongi ba Bible batuadija kuleja ditabuja diabu mu bidibu balonga, badi bumvua disanka bua kubiambila bakuabu.​—km 5/05 dib. 1.

Bakankamija bua kuyisha

▪ Badi ne balunda anyi bena mu dîku diabu badibu mua kubikila bua balue kulonga pabu Bible anyi?

▪ Kudiku bena mudimu nabu, balongi nabu anyi bamanyangana nabu kampanda badi ne dijinga dia kumanya malu a bungi anyi?

Balongesha mua kuyisha

▪ Patudi tufika imue miaba tudi mua kuebeja mulongi ne: “Mmunyi muudi mua kuenza mudimu ne Bible bua kumvuija bena mu dîku dienu dilongesha edi?”

▪ Muambuluisha bua ikale ne busunguluji ne kanemu ne bukalanga padiye uyukila ne bakuabu pa malu a Nzambi.

▪ Mulongi udi mua kuangata broshire wa Bantemu ba Yehowa​—Mbanganyi? Mmalu kayi adibu balongesha? bua kuambuluisha balunda anyi bena mu dîku diabu bua kumvua malongesha etu a mu Bible ne midimu yetu.

Tshitupa tshia 10: Tulongeshe balongi ba Bible mua kuyisha ku nzubu ne ku nzubu

Padi bakulu bamona ne: mulongi kampanda wa Bible mmukumbaje malu malomba bua kuikala mumanyishi udi kayi muanji kutambula, mulongi eu udi mua kutuadija kupatuka mu buambi ne bena mu tshisumbu.​—km 6/05 dib. 1.

Udilongolole pamue ne mulongi

▪ Leja mulongi muaba udiye mua kupetela mishindu ya kutuadija kuyukila ne bantu.

▪ Muambuluishe bua kusungula mushindu udi umueneka mupepele ne muakanyine muaba unudi basombele.

▪ Mukankamije bua kuenza mudimu ne Bible wende mu buambi.

▪ Dibidijayi nende. Muleje mua kuandamuna ne bukalanga nkonko itu ijuka mu teritware wenu.

Yisha pamue ne mulongi

▪ Lekela mulongi amone muudi uyukila ne bantu bilondeshile malu anuvua balongolole nende.

▪ Ambuluisha mulongi eu bilondeshile bumuntu buende ne dimanya didiye nadi. Imue misangu bidi mua kuikala bimpe bua kulomba mulongi eu bua ambe anu malu makese a mu binuvua balongolole nende.

▪ Ambuluisha mumanyishi mupiamupia eu bua ikale ne programe wa kupatuka mu buambi pa tshibidilu.

Tshitupa tshia 11: Tuambuluishayi balongi bua kuenza makumbula mapiamapia

Tudi tutuadija kulongolola dikumbula dipiadipia dîba ditudi tuyukila ne muntu musangu wa kumpala. Ambila mulongi bua atabalele bantu badiye uyukila nabu. Umulongeshe ku kakese ku kakese bua abasake ku dileja ngenyi yabu, ateleje tshidibu bamba ne afunde malu adi abasunsuma ku muoyo.​—km 7/05 dib. 1.

Kudilongolola bua kupinganyina muntu

▪ Nukonkonone binuvua bayukile musangu wa kumpala ne muntu, pashishe uleje mulongi mushindu wa kusungula bualu budi mua kusankisha muntu au.

▪ Nulongolole pamue dinaya dîpi, nubale mvese umue ne tshikoso tshimue tshia mu mukanda kampanda.

▪ Nulongolole lukonko lunudi mua kujula ku ndekelu kua diyukidilangana dienu ne muntu au.

Pinganyina bantu diakamue

▪ Kankamija mulongi bua kuikalaye upinganyina diakamue bantu badi bamuteleja.

▪ Ambuluisha mulongi bua kusuminyina bua kupeta bantu batu kabayi batamba kupeteka kumbelu.

▪ Longesha mulongi mushindu wa kuangata tshipungidi ne muntu, ne mushinga wa kumupinganyina bu muvuaye mulaye.

Tshitupa tshia 12: Tulongeshayi balongi mua kutuadija ne kulombola malonga a Bible

Kufila tshilejilu tshimpe anu bu Yezu kudi ne mushinga. Padi mulongi umona muudi udifila mu buambi, udi ujingulula ne: tshitudi tuenzela makumbula mapiamapia mbua kutuadija malonga a Bible.​—km 8/05 dib. 1.

Kulomba muntu bua kulonga nende Bible

▪ Umvuija mulongi ne: kabiena ne mushinga bua kuleja muntu mu katoba ne mu katoba mutu dilonga dienzeka to.

▪ Pa tshibidilu, bitu bimpe kuangata tshikoso tshimue anyi bibidi mu mukanda ututu tulonga nawu ne bantu bua kumuleja mutubi bienzeka.

▪ Nukonkonone lumue lua ku ngenyi ya mushindu wa kutuadija malonga a Bible ne nuluambulule.​—km 8/05 dib. 8; km 1/02 dib. 6.

Tulongeshayi balongi bua balue balongeshi

▪ Kankamija balongi bua kudifundisha mu Kalasa ka Mudimu wa Nzambi.

▪ Longolola bua bamanyishi bapiabapia baya kukufila mu buambi paudi ulombola malonga makuabu a Bible.